Chapter 22

[English text for this chapter is available]

vyāsa uvāca |
vidhiṃ tāta vadedānīṃ jīva janmavidhānataḥ |
garbhe sthitiṃ ca tasyāpi vairāgyārthaṃ munīśvara || 1 ||
[Analyze grammar]

sanatkumāra uvāca |
śṛṇu vyāsa samāsena śāstrasāramaśeṣataḥ |
vadiṣyāmi suvairāgyaṃ mumukṣorbhavabaṃdhakṛt || 2 ||
[Analyze grammar]

pākapātrasya madhye tu pṛthagannaṃ pṛthagjalam |
agnerūrdhvaṃ jalaṃ sthāpyaṃ tadannaṃ ca jalopari || 3 ||
[Analyze grammar]

jalasyādhassa cāgnirhi sthito'gniṃ dhamate śanaiḥ |
vāyunādhamyamāno'gniratyuṣṇaṃ kurute jalam || 4 ||
[Analyze grammar]

tadannamuṣṇatoyena samantātpacyate punaḥ |
dvidhā bhavati tatpakvaṃ pṛthakkiṭṭaṃ pṛthagrasaḥ || 5 ||
[Analyze grammar]

malairdvādaśabhiḥ kiṭṭaṃ bhinnaṃ dehādbahirbhavet |
rasastu dehe sarati sa puṣṭastena jāyate || 6 ||
[Analyze grammar]

karṇākṣināsikā jihvā dantāḥ śiśno gudaṃ nakhāḥ |
malāśrayaḥ kaphaḥ svedo viṇmūtraṃ dvādaśa smṛtāḥ || 7 ||
[Analyze grammar]

hṛtpadme pratibaddhāśca sarvanāḍyassamaṃtataḥ |
jñeyā rasapravāhinyastatprakāraṃ bruve mune || 8 ||
[Analyze grammar]

tāsāṃ mukheṣu taṃ sūkṣmaṃ prāṇassthāpayet rasam |
rasena tena nāḍīstāḥ prāṇaṃ pūrayate punaḥ || 9 ||
[Analyze grammar]

punaḥ prayāṃti saṃpūrṇāstāśca dehaṃ samaṃtataḥ |
tatassa nāḍīmadhyasthaśśarīreṇātmanā rasaḥ || 10 ||
[Analyze grammar]

pacyate pacyamānācca bhavetpākadvayaṃ punaḥ |
tvak tayā veṣṭyate pūrvaṃ rudhiraṃ ca prajāyate || 11 ||
[Analyze grammar]

raktāllomāni māṃsaṃ ca keśāḥ snāyuśca māṃsataḥ |
snāyutaśca tathāsthīni nakhā majjāsthisaṃbhavāḥ || 12 ||
[Analyze grammar]

majjākāraṇavaikalyaṃ śukraṃ hi prasavātmakam |
iti dvādaśadhānnasya pariṇāmaḥ prakīrtitāḥ || 13 ||
[Analyze grammar]

śukro'nnājjāyate śukrāddivyadehasya saṃbhavaḥ |
ṛtukāle yadā śukraṃ nirdoṣaṃ yonisaṃsthitam || 14 ||
[Analyze grammar]

tadvā tadvāyusaṃspṛṣṭaṃ strīraktenaikatāṃ vrajet |
visargakāle śukrasya jīvaḥ kāraṇasaṃyutaḥ || 15 ||
[Analyze grammar]

saṃvṛtaḥ praviśedyoniṃ karmabhissvairniyojitaḥ |
tacchukraraktamekasthamekāhātkalilaṃ bhavet || 31 ||
[Analyze grammar]

paṃcarātreṇa kalilaṃ budbudākāratāṃ vrajet |
budbudassaptarātreṇa māṃsapeśī bhavetpunaḥ || 17 ||
[Analyze grammar]

grīvā śiraśca skaṃdhau ca pṛṣṭhavaṃśastathodaram |
pāṇipādantathā pārśve kaṭirgātraṃ tathaiva ca || 18 ||
[Analyze grammar]

dvimāsābhyantareṇaiva kramaśassaṃbhavediha |
tribhirmāsaiḥ prajāyaṃte sarve hyaṃkurasaṃdhayaḥ || 19 ||
[Analyze grammar]

māsaiścaturbhiraṃgulyaḥ prajāyaṃte yathākramam |
mukhaṃ nāsā ca karṇau māsaiḥ paṃcabhireva ca || 20 ||
[Analyze grammar]

dantapaṃktistathā guhyaṃ jāyaṃte ca nakhāḥ punaḥ |
karṇayostu bhavecchidraṃ ṣaṇmāsābhyaṃtareṇa tu || 21 ||
[Analyze grammar]

pāyurmehamupasthaṃ ca nābhiścābhyupajāyate |
saṃdhayo ye ca gātreṣu māsairjāyaṃti saptabhiḥ || 22 ||
[Analyze grammar]

aṃgapratyaṃgasaṃpūrṇaḥ paripakvassa tiṣṭhati |
udare māturācchanno jarāyau muni sattama || 23 ||
[Analyze grammar]

māturāhāracauryyeṇa ṣaḍvidhena rasena tu |
nābhinālanibaddhena varddhate sa dinedine || 24 ||
[Analyze grammar]

tatasmṛtiṃ labhejjīvassaṃpūrṇe'smiñśarīrake |
sukhaṃ duḥkhaṃ vijānāti nidrāsvapnaṃ purākṛtam || 25 ||
[Analyze grammar]

mṛtaścāhaṃ punarjāto jātaścāhaṃ punarmṛtaḥ |
nānāyonisahasrāṇi mayā dṛṣṭāni jāyatā || 26 ||
[Analyze grammar]

adhunā jātamātro'haṃ prāptasaṃskāra eva ca |
śreyo'munā kariṣyāmi yena garbhe na saṃbhavaḥ || 27 ||
[Analyze grammar]

garbhasthaściṃtayatyevamahaṃ garbhādvinissṛtaḥ |
anveṣyāmi śivajñānaṃ saṃsāravinivartakam || 28 ||
[Analyze grammar]

evaṃ sa garbhaduḥkhena mahatā paripīḍitaḥ |
jīvaḥ karmavaśādāste mokṣopāyaṃ viciṃtayan || 29 ||
[Analyze grammar]

yathā girivarākrāṃtaḥ kaścidduḥkhena tiṣṭhati |
tathā jarāyuṇā dehī duḥkhaṃ tiṣṭhati veṣṭitaḥ || 30 ||
[Analyze grammar]

patitassāgare yadvadduḥkhamāste samākulaḥ |
garbhodakena siktāṃgassarvadākulitastadā || 31 ||
[Analyze grammar]

lohakuṃbhe yathā nyastaḥ pacyate kaścidagninā |
garbhakuṃbhe tathā kṣiptaḥ pacyate jaṭharāgninā || 32 ||
[Analyze grammar]

sūcībhiragnivarṇābhinirbhinnasya niraṃtaram |
yadduḥkhaṃ jāyate tasya tatra saṃsthasya cādhikam || 33 ||
[Analyze grammar]

garbhāvāsātparaṃ duḥkhaṃ kaṣṭaṃ naivāsti kutracit |
dehināṃ duḥkhabahulaṃ sughoramatisaṃkaṭam || 34 ||
[Analyze grammar]

ityetatsumahadduḥkhaṃ pāpināṃ parikīrtitam |
kevalaṃ dharmabudīnāṃ saptamāsairbhavassadā || 35 ||
[Analyze grammar]

garbhātsudurlabhaṃ duḥkhaṃ yoniyaṃtranipīḍanāt |
bhavetpāpātmanāṃ vyāsa na hi dharmayutātmanām || 36 ||
[Analyze grammar]

ikṣuvatpīḍyamānasya yaṃtreṇaiva samaṃtataḥ |
śirasā tāḍyamānasya pāpa mudgarakeṇa ca || 37 ||
[Analyze grammar]

yaṃtreṇa pīḍitā yadvannissārā ssyustilāḥ kṣaṇāt |
tathā śarīraṃ nissāraṃ yoniyaṃtranipīḍanāt || 38 ||
[Analyze grammar]

asthipādatulāstaṃbhaṃ snāyubandhena yaṃtritam |
raktamāṃsamṛdāliptaṃ viṇmūtradravyabhājanam || 39 ||
[Analyze grammar]

keśaromanakhacchannaṃ rogāyatanamāturam |
vadanaikamahādvāraṃ gavākṣāṣṭakabhūṣitam || 40 ||
[Analyze grammar]

oṣṭhadvayakapāṭaṃ ca tathā jihvārgalānvitam |
bhogatṛṣṇāturaṃ mūḍhaṃ rāgadveṣavaśānugam || 41 ||
[Analyze grammar]

saṃvartitāṃgapratyaṃgaṃ jarāyupariveṣṭitam |
saṃkaṭenāviviktena yonimārgeṇa nirgatam || 42 ||
[Analyze grammar]

viṇmūtraraktasiktāṃgaṃ vikośikasamudbhavam |
asthipañjaravikhyātamasmiñjñeyaṃ kalevaram || 43 ||
[Analyze grammar]

śatatrayaṃ ṣaṣṭyadhikaṃ paṃcapeśīśatāni ca |
sārddhābhistisṛbhiśchannaṃ samaṃtādromakoṭibhiḥ || 44 ||
[Analyze grammar]

śarīraṃ sthūlasūkṣmābhirdṛśyā'dṛśyā hi tāssmṛtāḥ |
etāvatībhirnāḍībhiḥ koṭibhistatsamaṃtataḥ || 45 ||
[Analyze grammar]

asvedamadhubhiryābhiraṃtasthaḥ sravate bahiḥ |
dvātriṃśaddaśanāḥ proktā viṃśatiśca nakhāḥ smṛtāḥ || 46 ||
[Analyze grammar]

pittasya kuḍavaṃ jñeyaṃ kaphasyāthāḍhakaṃ smṛtam |
vasāyāśca palaṃ viṃśattadardhaṃ kapilasya ca || 47 ||
[Analyze grammar]

paṃcārddhaṃ tu tulā jñeyā palāni daśa medasaḥ |
palatrayaṃ mahāraktaṃ majjāyāśca caturguṇam || 48 ||
[Analyze grammar]

śukrorddhaṃ kuḍavaṃ jñeyaṃ tadbījaṃ dehināṃ balam |
māṃsasya caikapiṃḍena palasāhasramucyate || 49 ||
[Analyze grammar]

raktaṃ palaśataṃ jñeyaṃ viṇmūtraṃ yatpramāṇata |
aṃjalayaśca catvāraścatvāro munisattama || 50 ||
[Analyze grammar]

iti dehagṛhaṃ hyetannityasyānityamātmanaḥ |
aviśuddhaṃ viśuddhasya karmabaṃdhādvinirmitam || 51 ||
[Analyze grammar]

iti śrīśivamahāpurāṇe pañcamyāmumāsaṃhitāyāṃ dehotpattivarṇanaṃ nāma dvāviṃśo'dhyāyaḥ || 22 ||
[Analyze grammar]