Chapter 30

[English text for this chapter is available]

sūta uvāca |
kadācitsevakastasya rākṣasasya durātmanaḥ |
tadagre suṃdaraṃ rūpaṃ śaṃkarasya dadarśa ha || 1 ||
[Analyze grammar]

tasmai niveditaṃ rājñe rākṣasānāṃ yathārthakam |
sarvaṃ taccaritaṃ tena sakautukamathādbhutam || 2 ||
[Analyze grammar]

rājāpi tatra cāgatya rākṣasānāṃ sa dārukaḥ |
vihvalassabalaśśīghraṃ paryapṛcchacca taṃ śivam || 3 ||
[Analyze grammar]

dāruka uvāca |
kiṃ dhyāyasi hi vaiśya tvaṃ satyaṃ vada mamāgrataḥ |
evaṃ sati na mṛtyuste mama vākyaṃ ca nānyathā || 4 ||
[Analyze grammar]

sūta uvāca |
tenoktaṃ ca na jānāmi tacchrutvā kupitasya vai |
rākṣasānprerayāmāsa hanyatāṃ rākṣasā ayam || 5 ||
[Analyze grammar]

taduktāste tadā haṃtuṃ nānāyudhadharā gatāḥ |
drutaṃ taṃ vaiśyaśārdūlaṃ śaṃkarāsaktacetasam || 6 ||
[Analyze grammar]

tānāgatāṃstadā dṛṣṭvā bhayavitrastalocanaḥ |
śivaṃ sasmāra suprītyā tannāmāni jagau muhuḥ || 7 ||
[Analyze grammar]

vaiśyapatiruvāca |
pāhi śaṃkara deveśa pāhi śaṃbho śiveti ca |
duṣṭādasmāttrilokeśa khalahanbhaktavatsala || 8 ||
[Analyze grammar]

sarvasvaṃ ca bhavānadya mama deva tvameva hi |
tvadadhīnastvadīyo'haṃ tvatprāṇassarvadā prabho || 9 ||
[Analyze grammar]

sūta uvāca |
iti saṃprārthitaśśaṃbhurvivarānnirgatastadā |
bhavanenottamenātha caturdvārayutena ca || 10 ||
[Analyze grammar]

madhyajyotissvarūpaṃ ca śivarūpaṃ tadadbhutam |
parivārasamāyuktaṃ dṛṣṭvā cāpūjayatsa vai || 11 ||
[Analyze grammar]

pūjitaśca tadā śaṃbhuḥ prasanno hyabhavatsvayam |
astraṃ pāśupataṃ nāma dattvā rākṣasapuṃgavān || 12 ||
[Analyze grammar]

jaghāna sopakaraṇāṃstānsarvānsagaṇāndrutam |
arakṣacca svabhaktaṃ vai duṣṭahā sa hi śaṃkaraḥ || 13 ||
[Analyze grammar]

sarvāṃstāṃśca tadā hatvā varaṃ prādādvanasya ca |
atyadbhutakaraśśaṃbhussvalīlāttasuvigrahaḥ || 14 ||
[Analyze grammar]

asminvane sadā varṇadharmā vai saṃbhavaṃtu ca |
brāhmaṇakṣatriyaviśāṃ śūdrāṇāṃ hi tathaiva ca || 15 ||
[Analyze grammar]

bhavatvatra muniśreṣṭhāstāmasā na kadācana |
śivadharmapravaktāraśśivadharmapravartakāḥ || 16 ||
[Analyze grammar]

sūta uvāca |
etasminsamaye sā vai rākṣasī dārukāhvayā |
devyāḥ stutiṃ cakārāsau pārvatyā dīnamānasā || 17 ||
[Analyze grammar]

prasannā ca tadā devī kiṃ karomītyuvāca hi |
sāpyuvāca punastatra vaṃśo me rakṣyatāṃ tvayā || 18 ||
[Analyze grammar]

rakṣayiṣyāmi te vaṃśaṃ satyaṃ ca kathyate mayā |
ityuktvā ca śivenaiva vigrahaṃ sā cakāra ha || 19 ||
[Analyze grammar]

śivopi kupitāṃ devīṃ dṛṣṭvā varavaśaḥ prabhuḥ |
pratyuvāceti suprītyā yathecchasi tathā kuru || 20 ||
[Analyze grammar]

sūt uvāca |
iti śrutvā vacastasya svapateśśaṃkarasya vai |
suprasannā vihasyāśu pārvatī vākyamabravīt || 21 ||
[Analyze grammar]

pārvatyuvāca |
bhavadīyaṃ vacastathyaṃ yugāṃte saṃbhaviṣyati |
tāvacca tāmasī sṛṣṭirbhavatviti mataṃ mama || 22 ||
[Analyze grammar]

anyathā pralayassyādvai satyaṃ me vyāhṛtaṃ śiva |
pramāṇīkriyatāṃ nātha tvadīyāsmi tvadāśrayā || 23 ||
[Analyze grammar]

iyaṃ ca dārukā devī rākṣasī śaktikā mama |
baliṣṭhā rākṣasīnāṃ ca rakṣorājyaṃ praśāstu ca || 24 ||
[Analyze grammar]

imā rākṣasapatnyastu prasaviṣyaṃti putrakān |
te sarve militāścaiva vane vāsāya me matāḥ || 25 ||
[Analyze grammar]

sūta uvāca |
ityevaṃ vacanaṃ śrutvā pārvatyāssvastriyāḥ prabhuḥ |
prasannamānaso bhūtvā śaṃkaro vākyamabravīt || 26 ||
[Analyze grammar]

śaṅkara uvāca |
iti bravīṣi tvaṃ vai cecchṛṇu madvacanaṃ priye |
sthāsyāmyasminvane prītyā bhaktānāṃ pālanāya ca || 27 ||
[Analyze grammar]

atra me varṇadharmastho darśanaṃ prītisaṃyutam |
kariṣyati ca yo vai sa cakravartī bhaviṣyati || 28 ||
[Analyze grammar]

anyathā kaliparyāye satyasyādau nṛpeśvara |
mahāsenasuto yo vai vīraseneti viśrutaḥ || 29 ||
[Analyze grammar]

sa me bhaktyātivikrāṃto darśanaṃ me kariṣyati |
darśanaṃ me sa kṛtvaiva cakravartī bhaviṣyati || 30 ||
[Analyze grammar]

sūta uvāca |
ityevaṃ daṃpatī tau ca kṛtvā hāsyaṃ parasparam |
sthitau tatra svayaṃ sākṣānmahattvakārakau dvijāḥ || 31 ||
[Analyze grammar]

jyotirliṃgasvarūpo hi nāmnā nāgeśvaraśśivaḥ |
nāgeśvarī śivā devī babhūva ca satāṃ priyau || 352 ||
[Analyze grammar]

ṛṣaya ūcuḥ |
vīrasenaḥ kathaṃ tatra yāsyate dārukāvane |
kathamarciṣyati śivaṃ tvaṃ tadvada mahāmate || 33 ||
[Analyze grammar]

sūta uvāca |
niṣadhe suṃdare deśe kṣatriyāṇāṃ kule ca saḥ |
mahāsenasuto vīrasenaścaiva śivapriyaḥ || 34 ||
[Analyze grammar]

pārthiveśārcanaṃ kṛtvā tapaḥ paramaduṣkaram |
cakāra vīraseno vai varṣāṇāṃ dvādaśāvadhiḥ || 35 ||
[Analyze grammar]

tataḥ prasanno deveśaḥ pratyakṣaṃ prāha śaṃkaraḥ |
kāṣṭhasya matsyikāṃ kṛtvā trapudhātu vilepanām || 36 ||
[Analyze grammar]

vidhāya yogamāyāṃ ca dāsyāmi vīrasenaka |
tāṃ gṛhītvā praviśyaitaṃ nṛbhissaha vrajādhunā || 37 ||
[Analyze grammar]

tatastvaṃ tatra gatvā ca vivare ca kṛte mayā |
praviśya ca tadā pūjāṃ kṛtvā nāgeśvarasya ca || 38 ||
[Analyze grammar]

tataḥ pāśupataṃ prāpya hatvā ca rākṣasīmukhān |
mayi dṛṣṭe tadā kiṃcinnyūnaṃ te na bhaviṣyati || 39 ||
[Analyze grammar]

pārvatyāśca balaṃ caiva saṃpūrṇaṃ vai bhaviṣyati |
anye ca mleccharūpā ye bhaviṣyaṃti vane śubhāḥ || 40 ||
[Analyze grammar]

sūta uvāca |
ityuktvā śaṃkarastatra vīrasenaṃ hi duḥkhaha |
kṛtvā kṛpāṃ ca mahatīṃ tatraivāṃtarddadhe prabhuḥ || 41 ||
[Analyze grammar]

iti dattavarasso'pi śivena paramātmanā |
śaktassa vai tadā kartuṃ saṃbabhūva na saṃśayaḥ || 42 ||
[Analyze grammar]

evaṃ nāgeśvaro deva utpanno jyotiṣāṃ patiḥ |
liṃgarūpastrilokasya sarvakāmapradassadā || 43 ||
[Analyze grammar]

etadyaśśṛṇuyānnityaṃ nāgeśodbhavamādarāt |
sarvānkāmāniyāddhīmānmahāpātakanāśanān || 44 ||
[Analyze grammar]

iti śrīśivamahāpurāṇe caturthyāṃ koṭirudrasaṃhitāyāṃ nāgeśvarajyotirliṃgodbhavamāhātmyavarṇanaṃ nāma triṃśo'dhyāyaḥ || 30 ||
[Analyze grammar]