Chapter 29

[English text for this chapter is available]

sūta uvāca |
athātaḥ saṃpravakṣyāmi nāgeśākhyaṃ parātmanaḥ |
jyotīrūpaṃ yathā jātaṃ paramaṃ liṃgamuttamam || 1 ||
[Analyze grammar]

dārukā rākṣasī kācitpārvatī varadarpitā |
dārukaśca patistasyā babhūva balavattaraḥ || 2 ||
[Analyze grammar]

bahubhī rākṣasaistatra cakāra kadanaṃ satām |
yajñadhvaṃsaṃ ca lokānāṃ dharmadhvaṃsaṃ tadākarot || 3 ||
[Analyze grammar]

paścime sāgare tasya vanaṃ sarvasamṛddhimat |
yojanānāṃ ṣoḍaśabhirvistṛtaṃ sarvato diśam || 4 ||
[Analyze grammar]

dārukā svavilāsārthaṃ yatra gacchati tadvanam |
bhūmyā ca tarubhistatra sarvopakaraṇairyutam || 5 ||
[Analyze grammar]

dārukāyai dadau devī tadvanasyāvalokanam |
prayāti tadvanaṃ sā hi patyā saha yadṛcchayā || 6 ||
[Analyze grammar]

tatra sthitvā tadā sopi sarveṣāṃ ca bhayaṃ dadau |
dāruko rākṣasaḥ patnyā tayā dārukayā saha || 7 ||
[Analyze grammar]

te sarve pīḍitā lokā aurvasya śaraṇaṃ yayuḥ |
natvā prītyā viśeṣeṇa tamūcurnatamastakāḥ || 8 ||
[Analyze grammar]

lokā ūcuḥ |
maharṣe śaraṇaṃ dehi no cedduṣṭaiśca māritāḥ |
sarvaṃ kartuṃ samarthosi tejasā dīptimānasi || 9 ||
[Analyze grammar]

pṛthvyāṃ na vartate kaścittvāṃ vinā śaraṇaṃ ca naḥ |
yāmo yasya samīpe tu sthitvā sukhamavāpnumaḥ || 10 ||
[Analyze grammar]

tvāṃ dṛṣṭvā rāśrasāssarve palā yaṃte vidūrataḥ |
tvayi śaivaṃ sadā tejo vibhāti jvalano yathā || 11 ||
[Analyze grammar]

sūta uvāca |
ityevaṃ prārthito lokairaurvo hi munisattamaḥ |
śocamānaḥ śaraṇyaśca rakṣāyai hi vaco'bravīt || 12 ||
[Analyze grammar]

aurva uvāca |
pṛthivyāṃ yadi rakṣāṃsi hiṃsyurvai prāṇinastadā |
svayaṃ prāṇairviyujyeyū rākṣasā balavattarāḥ || 13 ||
[Analyze grammar]

yadā yajñā na hanyeraṃstadā prāṇairviyojitāḥ |
bhavaṃtu rākṣasāssarve satyametanmayocyate || 14 ||
[Analyze grammar]

sūta uvāca |
ityuktvā vacanaṃ tebhyassamāśvāsya prajāḥ punaḥ |
tapaścakāra vividhamaurvo lokasukhāvahaḥ || 15 ||
[Analyze grammar]

devāstadā te vijñāya śāpasya kāraṇaṃ hi tat |
yuddhāya ca samudyogaṃ cakrurdevāribhissaha || 16 ||
[Analyze grammar]

sarvaiścaiva prayatnaiśca nānāyudhadharāssurāḥ |
sarve śakrādayastatra yuddhārthaṃ samupāgatāḥ || 17 ||
[Analyze grammar]

tāndṛṣṭvā rākṣasāstatra vicāre tatparāḥ punaḥ |
babhūvuste'khilā duṣṭā mitho ye yatra saṃsthitāḥ || 18 ||
[Analyze grammar]

rākṣasā ūcuḥ |
kiṃ kartavyaṃ kva gaṃtavyaṃ saṃkaṭaṃ samupāgatāḥ |
yuddhyate mriyate caiva yuddhyate na vihanyate || 19 ||
[Analyze grammar]

tathaiva sthīyate cedvai bhakṣyate kiṃ parasparam |
duḥkhaṃ hi sarvathā jātaṃ ka enaṃ vinivārayet || 20 ||
[Analyze grammar]

sūta uvāca |
vicāryeti ca te tatra dārukādyāśca rākṣasāḥ |
upāyaṃ na vijānanto duḥkhaṃ prāptāssadā hi vai || 21 ||
[Analyze grammar]

dārukā rākṣasī cāpi jñātvā duḥkhaṃ samāgatam |
bhavānyāśca varaṃ tañca kathayāmāsa sā tadā || 22 ||
[Analyze grammar]

dārukovāca |
mayā hyārādhitā pūrvaṃ bhavapatnī varaṃ dadau |
vanaṃ gaccha nijaiḥ sārdhaṃ yatra gaṃtuṃ tvamicchasi || 23 ||
[Analyze grammar]

tadvaraśca mayā prāptaḥ kathaṃ duḥkhaṃ viṣahyate |
jalaṃ vanaṃ ca nītvā vai sukhaṃ stheyaṃ tu rākṣasaiḥ || 24 ||
[Analyze grammar]

bhūta uvāca |
tasyāstadvacanaṃ śrutvā rākṣasyā harṣamāgatāḥ |
ucussarve mithaste hi rākṣasā nirbhayāstadā || 25 ||
[Analyze grammar]

dhanyeyaṃ kṛtakṛtyeyaṃ rājñyā vai jīvitāssvayam |
natvā tasyai ca tatsarvaṃ kathayāmāsurādarāt || 26 ||
[Analyze grammar]

yadi gaṃtuṃ bhavecchaktirgamyatāṃ kiṃ vicāryate |
tatra gatvā jale devi sukhaṃ sthāsyāma nityaśaḥ || 27 ||
[Analyze grammar]

etasminnaṃtare lokā devaissārddhaṃ samāgatāḥ |
yuddhāya vividhairduḥkhaiḥ pīḍitā rākṣasaiḥ purā || 28 ||
[Analyze grammar]

pīḍitāśca tadā tasyā bhavānyā balamāśritāḥ |
samagraṃ nagaraṃ nītvā jalasthalasamanvitam || 29 ||
[Analyze grammar]

jayajayeti devyāstu stutimuccārya rākṣasī |
tata uḍḍīyanaṃ kṛtvā sapakṣo girirāḍyathā || 30 ||
[Analyze grammar]

samudrasya ca madhye sā saṃsthitā nirbhayā tadā |
sakalaiḥ parivāraiśca mumudeti śivānugā || 31 ||
[Analyze grammar]

tatra siṃdhau ca te sthitvā nagare ca vilāsinaḥ |
rākṣasāśca sukhaṃ prāpu्rnirbhayāśca vijahrire || 32 ||
[Analyze grammar]

rākṣasāśca pṛthivyāṃ vai nājagmuśca kadācana |
muneśśāpabhayādeva babhramuste cale tadā || 33 ||
[Analyze grammar]

nauṣu sthitāñjanānnītvā nagare tatra tāṃstadā |
cikṣipurbandhanāgāre kāṃścijjaghnustadā hi te || 34 ||
[Analyze grammar]

yathāyathā punaḥ pīḍāṃ cakruste rākṣasāstadā |
tatrasthitā bhavānyāśca varadānācca nirbhayāḥ || 35 ||
[Analyze grammar]

yathāpūrvaṃ sthale loke bhayaṃ cāsīnnirantaram |
tathā bhayaṃ jale teṣāmāsīnnityaṃ munīśvarāḥ || 36 ||
[Analyze grammar]

kadācidrākṣasī sā ca nissṛtā nagarājjale |
ruddhvā mārgaṃ sthitā lokapīḍārthaṃ dharaṇau ca hi || 37 ||
[Analyze grammar]

etasminnaṃtare tatra nāvo bahutarāḥ śubhāḥ |
āgatā bahudhā tatra sarvato lokasaṃvṛtāḥ || 38 ||
[Analyze grammar]

tā nāvaśca tadā dṛṣṭvā harṣaṃ saṃprāpya rākṣasāḥ |
drutaṃ gatvā hi tatrasthānvegātsaṃdadhrire khalāḥ || 39 ||
[Analyze grammar]

ājagmurnagaraṃ te ca tānādāya mahābalāḥ |
cikṣipurbandhanāgāre baddhvā hi nigaḍairdṛḍhaiḥ || 40 ||
[Analyze grammar]

baddhāste nigaḍairlokā saṃsthitā baṃdhanālaye |
atīva duḥkhamājagmurbhartsitāste muhurmuhuḥ || 41 ||
[Analyze grammar]

teṣāṃ madhye ca yo'dhīśassa vaiśyassupriyābhidhaḥ |
śivapriyaśśubhācāraśśaivaścāsītsadātanaḥ || 42 ||
[Analyze grammar]

vinā ca śivapūjāṃ vai na tiṣṭhati kadācana |
sarvathā śivadharmā hi bhasmarudrākṣabhūṣaṇaḥ || 43 ||
[Analyze grammar]

yadi pūjā na jātā cenna bhunakti tadā tu saḥ |
atastatrāpi vaiśyo'sau cakāra śivapūjanam || 44 ||
[Analyze grammar]

kārāgṛhagatassopi bahūṃścāśikṣayattadā |
śivamaṃtraṃ ca pūjāṃ ca pārthivīmṛṣisattamāḥ || 45 ||
[Analyze grammar]

te sarve ca tadā tatra śivapūjāṃ svakāmadām |
cakrire vidhivattatra yathādṛṣṭaṃ yathāśrutam || 46 ||
[Analyze grammar]

kecittatra sthitā dhyāne baddhvāsanamanuttamam |
mānasīṃ śivapūjāṃ ca keciccakrurmudānvitāḥ || 47 ||
[Analyze grammar]

tadadhīśena tatraiva pratyakṣaṃ śivapūjanam |
kṛtaṃ ca pārthivasyaiva vidhānena munīśvarāḥ || 48 ||
[Analyze grammar]

anye ca ye na jānanti vidhānaṃ smaraṇaṃ param |
namaśśivāya maṃtreṇa dhyāyaṃtaśśaṃkaraṃ sthitāḥ || 49 ||
[Analyze grammar]

supriyo nāma yaścāsīdvaiśyavaryaśśivapriyaḥ |
dhyāyaṃśca manasā tatra cakāra śivapūjanam || 50 ||
[Analyze grammar]

yathoktarūpī śaṃbhuśca pratyakṣaṃ sarvamādade |
sopi svayaṃ na jānāti gṛhyate na śivena vai || 51 ||
[Analyze grammar]

evaṃ ca kriyamāṇasya vaiśyasya śivapūjanam |
vyatīyustatra ṣaṇmāsā nirvighnena munīśvarāḥ || 52 ||
[Analyze grammar]

ataḥ paraṃ ca yajjātaṃ caritaṃ śaśimaulinaḥ |
tacchṛṇudhvamṛṣiśreṣṭhāḥ sāvadhānena cetasā || 53 ||
[Analyze grammar]

iti śrīśivamahāpurāṇe caturthyāṃ koṭirudra saṃhitāyāṃ nāgeśvarajyotirliṃgamāhātmye dārukāvanarākṣasopadravavarṇanaṃnāmaikonatriṃśo'dhyāyaḥ || 29 ||
[Analyze grammar]