Chapter 1

[English text for this chapter is available]

yo dhatte nijamāyayaiva bhuvanākāraṃ vikārojjhito |
yasyāhuḥ karuṇākaṭākṣavibhavau svargāpavarggābhidhau |
pratyagbodhasukhādvayaṃ hṛdi sadā paśyanti yaṃ yoginastasmai |
śailasutāñjitārddhavapuṣe śaśvannamastejase || 1 ||
[Analyze grammar]

kṛpālalitavīkṣaṇaṃ smitamanojñavaktrāmbujaṃ śaśāṃkakalayojjvalaṃ śamitaghoratāpatrayam |
karotu kimapi sphuratparamasaukhyasaccidvapurdharādharasutābhujodvalayitaṃ maho maṃgalam || 2 ||
[Analyze grammar]

ṛṣaya ūcuḥ |
samyaguktaṃ tvayā sūta lokānāṃ hitakāmyayā |
śivāvatāramāhātmyaṃ nānākhyānasamanvitam || 3 ||
[Analyze grammar]

punaśca kathyatāṃ tāta śivamāhātmyamuttamam |
liṃgasambandhi suprītyā dhanyastvaṃ śaivasattamaḥ || 4 ||
[Analyze grammar]

śṛṇvantastvanmukhāmbhojānna tṛptāssmo vayaṃ prabho |
śaivaṃ yaśo'mṛtaṃ ramyaṃ tadeva punarucyatām || 5 ||
[Analyze grammar]

pṛthivyāṃ yāni yāni liṃgāni tīrthetīrthe śubhāni hi |
anyatra vā sthale yāni prasiddhāni sthitāni vai || 6 ||
[Analyze grammar]

tāni tāni ca divyāni liṃgāni parameśituḥ |
vyāsaśiṣya samācakṣva lokānāṃ hitakāmyayā || 7 ||
[Analyze grammar]

sūta uvāca |
sādhupṛṣṭamṛṣiśreṣṭha lokānāṃ hitakāmyayā |
kathayāmi bhavatsnehāttāni saṃkṣepato dvijāḥ || 8 ||
[Analyze grammar]

sarveṣāṃ śivaliṃgānāṃ mune saṃkhyā na vidyate |
sarvaṃ liṃgamayī bhūmiḥ sarvaliṃgamayaṃ jagat || 9 ||
[Analyze grammar]

liṃgamayāni tīrthāni sarvaṃ liṃge pratiṣṭhitam |
saṃkhyā na vidyate teṣāṃ tāni kiṃcidbravīmyaham || 10 ||
[Analyze grammar]

yatkiṃciddṛśyate dṛśyaṃ varṇyate smaryate ca yat |
tatsarvaṃ śivarūpaṃ hi nānyadastīti kiṃcana || 11 ||
[Analyze grammar]

tathāpi śrūyatāmprītyā kathayāmi yathāśrutam |
liṃgāni ca ṛṣiśreṣṭhāḥ pṛthivyāṃ yāni tāni ha || 12 ||
[Analyze grammar]

pātāle cāpi vartante svarge cāpi tathā bhuvi |
sarvatra pūjyate śambhuḥ sadevāsuramānuṣaiḥ || 13 ||
[Analyze grammar]

trijagacchambhunā vyāptaṃ sadevāsuramānuṣam |
anugrahāya lokānāṃ liṃgarūpeṇa sattamāḥ || 14 ||
[Analyze grammar]

anugrahāya lokānāṃ liṃgāni ca maheśvaraḥ |
dadhāti vividhānyatra tīrthe cānyasthale tathā || 15 ||
[Analyze grammar]

yatrayatra yadā śaṃbhurbhaktyā bhaktaiśca saṃsmṛtaḥ |
tatratatrāvatīryātha kāryaṃ kṛtvā sthitastadā || 16 ||
[Analyze grammar]

lokānāmupakārārthaṃ svaliṃgaṃ cāpyakalpayat |
talliṃgaṃ pūjayitvā tu siddhiṃ samadhigacchati || 17 ||
[Analyze grammar]

pṛthibyāṃ yāni liṃgāni teṣāṃ saṃkhyā na vidyate |
tathāpi ca pradhānāni kathyate ca mayā dvijāḥ || 18 ||
[Analyze grammar]

pradhāneṣu ca yānīha mukhyāni pravadāmyaham |
yacchrutvā sarvapāpebhyo mucyate mānavaḥ kṣaṇāt || 19 ||
[Analyze grammar]

jyotirliṃgāni yānīha mukhyamukhyāni sattama |
tānyahaṃ kathayāmyadya śrutvā pāpaṃ vyapohati || 20 ||
[Analyze grammar]

saurāṣṭre somanāthaṃ ca śrīśaile mallikārjunam |
ujjayinyāṃ mahākālamoṃkāre parameśvaram || 21 ||
[Analyze grammar]

kedāraṃ himavatpṛṣṭhe ḍākinyāṃ bhīmaśaṃkaram |
vārāṇasyāṃ ca viśveśaṃ tryambakaṃ gautamītaṭe || 22 ||
[Analyze grammar]

vaidyanāthaṃ citābhūmau nāgeśaṃ dārukāvane |
setubaṃdhe ca rāmeśaṃ ghuśmeśaṃ ca śivālaye || 23 ||
[Analyze grammar]

dvādaśaitāni nāmāni prātarutthāya yaḥ paṭhet |
sarvapāpavinirmuktaḥ sarvasiddhiphalaṃ labhet || 24 ||
[Analyze grammar]

yaṃ yaṃ kāmamapekṣyaiva paṭhiṣyanti narottamāḥ |
prāpsyaṃti kāmaṃ taṃ taṃ hi paratreva munīśvarāḥ || 25 ||
[Analyze grammar]

ye niṣkāmatayā tāni paṭhiṣyanti śubhāśayāḥ |
teṣāṃ ca jananīgarbhe vāso naiva bhaviṣyati || 26 ||
[Analyze grammar]

eteṣāṃ pūjanenaiva varṇānāṃ duḥkhanā śanam |
iha loke paratrāpi muktirbhavati niścitam || 27 ||
[Analyze grammar]

grāhyameṣāṃ ca naivedyaṃ bhojanīyaṃ prayatnataḥ |
tatkartuḥ sarvvapāpāni bhasmasād yānti vai kṣaṇāt || 28 ||
[Analyze grammar]

jyotiṣāṃ caiva liṃgānāṃ bahmādibhiralaṃ dvijāḥ |
viśeṣataḥ phalaṃ vaktuṃ śakyate na paraistathā || 29 ||
[Analyze grammar]

ekaṃ ca pūjitaṃ yena ṣaṇmāsaṃ tannirantaram |
tasya duḥkhaṃ na jāyeta mātṛkukṣisamudbhavam || 30 ||
[Analyze grammar]

hīnayonau yadā jāto jyotirliṃgaṃ ca paśyati |
tasya janma bhavettatra vimale satkule punaḥ || 31 ||
[Analyze grammar]

satkule janma saṃprāpya dhanāḍhyo vedapāragaḥ |
śubhakarma tadā kṛtvā muktiṃ yātyanapāyinīm || 32 ||
[Analyze grammar]

mleccho vāpyantyajo vāpi ṣaṇḍho vāpi munīśvarāḥ |
dvijo bhūtvā bhavenmuktastasmāttaddarśanaṃ caret || 33 ||
[Analyze grammar]

jyotiṣāṃ caiva liṃgānāṃ kiṃcitproktaṃ phalaṃ mayā ||
[Analyze grammar]

jyotiṣāṃ copaliṃgāni śrūyantāmṛṣisattamāḥ || 34 ||
[Analyze grammar]

someśvarasya yalliṃgamantakeśamudāhṛtam |
mahyāssāgarasaṃyoge talliṃgamupaliṅgakam || 35 ||
[Analyze grammar]

mallikārjunasaṃbhūtamupaliṃgamudāhṛtam |
rudreśvaramiti khyātaṃ bhṛgukakṣe sukhāvaham || 36 ||
[Analyze grammar]

mahākālabhavaṃ liṃgaṃ dugdheśamiti viśrutam |
narmadāyāṃ prasiddhaṃ tatsarvapāpaharaṃ smṛtam || 37 ||
[Analyze grammar]

oṃkārajaṃ ca yalliṃgaṃ kardameśamiti śrutam |
prasiddhaṃ bindusarasi sarvakāmaphalapradam || 38 ||
[Analyze grammar]

kedāreśvarasaṃjātaṃ bhūteśaṃ yamunā taṭe |
mahāpāpaharaṃ proktaṃ paśyatāmarcatāntathā || 39 ||
[Analyze grammar]

bhīmaśaṃkarasaṃbhūtaṃ bhīmeśvaramiti smṛtam |
sahyācale prasiddhaṃ tanmahābalavivarddhanam || 40 ||
[Analyze grammar]

nāgeśvarasamudbhūtaṃ bhūteśvaramudāhṛtam |
mallikāsarasvatītīre darśanātpāpahārakam || 41 ||
[Analyze grammar]

rāmeśvarācca yajjātaṃ gupteśvaramiti smṛtam |
ghuśmeśāccaiva yajjātaṃ vyāghreśvaramiti smṛtam || 42 ||
[Analyze grammar]

jyotirliṃgopaliṃgāni proktānīha mayā dvijāḥ |
darśanātpāpahārīṇi sarvakāmapradāni ca || 43 ||
[Analyze grammar]

etāni supradhānāni mukhyatāṃ hi gatāni ca |
anyāni cāpi mukhyāni śrūyatāmṛṣisattamā || 44 ||
[Analyze grammar]

iti śrīśivamahāpurāṇe caturthyāṃ koṭirudrasaṃhitāyāṃ jyotirligatadupaliṃga māhātmyavarṇanaṃ nāma prathamo'dhyāyaḥ || 1 ||
[Analyze grammar]