Chapter 16

[English text for this chapter is available]

|| sanatkumāra uvāca |
punardaityaṃ samāyāṃtaṃ dṛṣṭvā devāssavāsavāḥ |
bhayātprakaṃpitāssarve sahaivādudruvurdrutam || 1 ||
[Analyze grammar]

vaikuṃṭhaṃ prayayussarve puraskṛtya prajāpatim |
tuṣṭuvuste surā natvā saprajāpatayo'khilāḥ || 2 ||
[Analyze grammar]

devā ūcuḥ |
hṛṣīkeśa mahābāho bhagavan madhusūdana |
namaste devadeveśa sarvadaityavināśaka || 3 ||
[Analyze grammar]

matsyarūpāya te viṣṇo vedānnītavate namaḥ |
satyavratena sadrājñā pralayābdhivihāriṇe || 4 ||
[Analyze grammar]

kurvāṇānāṃ surāṇāṃ ca mathanāyodyamaṃ bhṛśam |
bibhrate maṃdaragiriṃ kūrmarūpāya te namaḥ || 5 ||
[Analyze grammar]

namaste bhagavannātha kratave sūkarātmane |
vasuṃdharāṃ janādhārāṃ mūddhato bibhrate namaḥ || 6 ||
[Analyze grammar]

vāmanāya namastubhyamupendrākhyāya viṣṇave |
viprarūpeṇa daityendraṃ baliṃ chalayate vibho || 7 ||
[Analyze grammar]

namaḥ paraśurāmāya kṣatraniḥkṣatrakāriṇe |
māturhitakṛte tubhyaṃ kupitāyāsatāṃ druhe || 8 ||
[Analyze grammar]

rāmāya lokarāmāya maryādāpuruṣāya te |
rāvaṇāṃtakarāyāśu sītāyāḥ pataye namaḥ || 9 ||
[Analyze grammar]

namaste jñānagūḍhāya kṛṣṇāya paramātmana |
rādhāvihāraśīlāya nānālīlākarāya ca || 10 ||
[Analyze grammar]

namaste gūḍhadehāya vedaniṃdākarāya ca |
yogācāryāya jaināya vauddharūpāya māpate || 11 ||
[Analyze grammar]

namaste kalkirūpāya mlecchānāmaṃtakāriṇe |
anantaśaktirūpāya saddharmasthāpanāya ca || 12 ||
[Analyze grammar]

namaste kapilarūpāya devahūtyai mahātmane |
vadate sāṃkhyayogaṃ ca sāṃkhyācāryāya vai prabho || 13 ||
[Analyze grammar]

namaḥ paramahaṃsāya jñānaṃ saṃvadate param |
vidhātre jñānarūpāya yenātmā saṃprasīdati || 14 ||
[Analyze grammar]

vedavyāsāya vedānāṃ vibhāgaṃ kurvate namaḥ |
hitāya sarvalokānāṃ purāṇaracanāya ca || 15 ||
[Analyze grammar]

evaṃ matsyāditanubhirbhaktakāryodyatāya te |
sargasthitidhvaṃsakartre namaste brahmaṇe prabho || 16 ||
[Analyze grammar]

ārtihaṃtre svadāsānāṃ sukhadāya śubhāya ca |
pītāmbarāya haraye tārkṣyayānāya te namaḥ |
sarvakriyāyaikakartre śaraṇyāya namonamaḥ || 17 ||
[Analyze grammar]

daityasaṃtāpitāmartya duḥkhādidhvaṃsavajraka |
śeṣatalpaśayāyārkacandranetrāya te namaḥ || 18 ||
[Analyze grammar]

kṛpāsindho ramānātha pāhi naśśaraṇāgatān |
jalaṃdhareṇa devāśca svargātsarve nirākṛtāḥ || 19 ||
[Analyze grammar]

sūryo nissāritaḥ sthānāccandro vahnistathaiva ca |
pātālānnāgarājaśca dharmarājo nirākṛtaḥ || 20 ||
[Analyze grammar]

vicaraṃti yathā martyāśśobhaṃte naiva te surāḥ |
śaraṇaṃ te vayaṃ prāptā vadhastasya viciṃtyatām || 21 ||
[Analyze grammar]

|| sanatkumāra uvāca |
iti dīnavacaśśrutvā devānāṃ madhusūdanaḥ |
jagāda karuṇāsindhurme ghanirhrādayā girā || 22 ||
[Analyze grammar]

|| viṣṇuruvāca |
bhayaṃ tyajata he devā gamiṣyāmyahamāhavam |
jalaṃdhareṇa daityena kariṣyāmi parākramam || 23 ||
[Analyze grammar]

ityuktvā sahasotthāya daityāriḥ khinnamānasaḥ |
ārohadgaruḍaṃ vegātkṛpayā bhaktavatsalaḥ || 24 ||
[Analyze grammar]

gacchantaṃ vallabhaṃ dṛṣṭvā devaissārddhaṃ samudrajā |
sāṃjalirbāṣpanayanā lakṣmīrvacanamabravīt || 25 ||
[Analyze grammar]

lakṣmyuvāca |
ahaṃ te vallabhā nātha bhaktā yadi ca sarvadā |
tatkathaṃ te mama bhrātā yuddhe vadhyaḥ kṛpānidhe || 26 ||
[Analyze grammar]

viṣṇuruvāca |
jalaṃdhareṇa daityena kariṣyāmi parākramam |
taissaṃstuto gamiṣyāmi yuddhāya tvaritānvitaḥ || 27 ||
[Analyze grammar]

rudrāṃśasaṃbhavatvācca brahmaṇo vacanādapi |
prītyā ca tava naivāyaṃ mama vadhyo jalaṃdharaḥ || 28 ||
[Analyze grammar]

sanatkumāra uvāca |
ityuktvā garuḍārūḍhaśśaṃkhacakragadāsibhṛt |
viṣṇurvegādyayau yoddhuṃ devaiśśakrādibhissaha || 29 ||
[Analyze grammar]

drutaṃ sa prāpa tatraiva yatra daityo jalaṃdharaḥ |
kurvan siṃharavaṃ devairjvaladbhirviṣṇutejasā || 30 ||
[Analyze grammar]

athāruṇānujajavapakṣavātaprapīḍitāḥ |
vātyāvivartitā daityā babhramuḥ khe yathā ghanāḥ || 31 ||
[Analyze grammar]

tato jalaṃdharo dṛṣṭvā daityān vātyāprapīḍitān |
uddhṛtya vacanaṃ krodhāddrutaṃ viṣṇuṃ samabhyagāt || 32 ||
[Analyze grammar]

etasminnaṃtare devāścakruryuddhaṃ praharṣitāḥ |
tejasā ca hareḥ puṣṭā mahābalasamanvitāḥ || 33 ||
[Analyze grammar]

yuddhodyataṃ samālokya devasainyamupasthitam |
daityānājñāpayāmāsa samare cātidurmadān || 34 ||
[Analyze grammar]

jalaṃdhara uvāca |
bhobho daityavarā yūyaṃ yuddhaṃ kuruta dustaram |
śakrādyairamarairadya prabalaiḥ kātaraissadā || 35 ||
[Analyze grammar]

mauryāstu lakṣasaṃkhyātā dhaumrā hi śatasaṃkhyakāḥ |
asurāḥ koṭisaṃkhyātāḥ kālakeyāstathaiva ca || 36 ||
[Analyze grammar]

kālakānāṃ daurhṛdānāṃ kaṃkānāṃ lakṣasaṃkhyayā |
anye'pi svabalairyuktā viniryāṃtu mamājñayā || 37 ||
[Analyze grammar]

sarve sajjā viniryāta bahusenābhisaṃyutāḥ |
nānāśastrāstrasaṃyuktā nirbhayāḥ gatasaṃśayāḥ || 38 ||
[Analyze grammar]

bhobho śuṃbhaniśuṃbhau ca devānsamarakātarān |
kṣaṇena sumahāvīryau tucchānnāśayataṃ yuvām || 39 ||
[Analyze grammar]

sanatkumāra uvāca |
daityā jalaṃdharājñaptā itthaṃ yuddhaviśāradāḥ |
yuyudhuste surāssarve caturaṃgabalānvitāḥ || 40 ||
[Analyze grammar]

gadābhistīkṣṇabāṇaiśca śūlapaṭṭiśatomaraiḥ |
kecitparaśuśūlaiśca nijaghnuste parasparam || 41 ||
[Analyze grammar]

nānāyudhaiśca paraistatra nijaghnuste balānvitā |
devāstathā mahāvīrā hṛṣīkeśabalānvitāḥ |
yuyudhustīkṣṇabāṇāśca kṣipaṃtassiṃhavadravāḥ || 42 ||
[Analyze grammar]

kecidbāṇaistu tīkṣṇaiśca kecinmusalatomaraiḥ |
kecitparaśuśūlaiśca nijaghnuste parasparam || 43 ||
[Analyze grammar]

itthaṃ surāṇāṃ daityānāṃ saṃgrāmassamabhūnmahān |
atyulbaṇo munīnāṃ hi siddhānāṃ bhaya kārakaḥ || 44 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe devayuddhavarṇanaṃ nāma ṣoḍaśo'dhyāyaḥ || 16 ||
[Analyze grammar]