Chapter 19

[English text for this chapter is available]

nārada uvāca |
gaṇeśasya śrutā tāta samyagjaniranuttamā |
caritramapi divyaṃ vai suparākramabhūṣitam || 1 ||
[Analyze grammar]

tataḥ kimabhavattāta tattvaṃ vada sureśvaraḥ |
śivāśivayaśassphītaṃ mahānandapradāyakam || 2 ||
[Analyze grammar]

brahmovāca || sādhu pṛṣṭaṃ muniśreṣṭha bhavatā karuṇātmanā |
śrūyatāṃ dattakarṇaṃ hi vakṣye'haṃ ṛṣisattama || 3 ||
[Analyze grammar]

śivā śivaśca viprendra dvayośca sutayoḥ param |
darśaṃdarśaṃ ca tallīlāṃ mahatprema samāvahat || 4 ||
[Analyze grammar]

pitrorlālayatostatra sukhaṃ cāti vyavarddhata |
sadā prītyā mudā cātikhelanaṃ cakratussutau || 5 ||
[Analyze grammar]

tāveva tanayau tatra mātā pitrormunīśvara |
mahābhaktyā yadā yuktau paricaryāṃ pracakratuḥ || 6 ||
[Analyze grammar]

ṣaṇmukhe ca gaṇeśe ca pitrostadadhikaṃ sadā |
sneho vyavarddhata mahāñcchuklapakṣe yathā śaśī || 7 ||
[Analyze grammar]

kadācittau sthitau tatra rahasi premasaṃyutau |
śivā śivaśca devarṣe suvicāraparāyaṇau || 8 ||
[Analyze grammar]

śivā śivāvūcatuḥ |
vivāhayogyau saṃjātau sutāviti ca tāvubhau |
vivāhaśca kathaṃ kāryaḥ putrayorubhayoḥ śubham || 9 ||
[Analyze grammar]

ṣaṇmukhaśca priyatamo gaṇeśaśca tathaiva ca |
iti ciṃtāsamudvignau līlānandau babhūvatuḥ || 10 ||
[Analyze grammar]

svapitrormatamājñāya tau sutāvapi saṃspṛhau |
tadicchayā vivāhārthaṃ babhūvaturatho mune || 11 ||
[Analyze grammar]

ahaṃ ca pariṇeṣyāmi hyahaṃ caiva punaḥ punaḥ |
parasparaṃ ca nityaṃ vai vivāde tatparāvubhau || 12 ||
[Analyze grammar]

śrutvā tadvacanaṃ tau ca daṃpatī jagatāṃ prabhū |
laukikācāramāśritya vismayaṃ paramaṃ gatau || 13 ||
[Analyze grammar]

kiṃ kartavyaṃ kathaṃ kāryo vivāhavidhiretayoḥ |
iti niścitya tābhyāṃ vai yuktiśca racitādbhutā || 14 ||
[Analyze grammar]

kadācitsamaye sthitvā samāhūya svaputrakau |
kathayāmāsatustatra putrayoḥ pitarau tadā || 15 ||
[Analyze grammar]

śivāśivāvūcatuḥ |
asmākaṃ niyamaḥ pūrvaṃ kṛtaśca sukhado hi vām |
śrūyatāṃ susutau prītyā kathayāvo yathārthakam || 16 ||
[Analyze grammar]

samau dvāvapi satputrau viśeṣo nātra labhyate |
tasmātpaṇaḥ kṛtaśśaṃdaḥ putrayorubhayorapi || 17 ||
[Analyze grammar]

yaścaiva pṛthivīṃ sarvāṃ krāṃtvā pūrvamupāvrajet |
tasyaiva prathamaṃ kāryo vivāhaśśubhalakṣaṇaḥ || 18 ||
[Analyze grammar]

brahmovāca |
tayorevaṃ vacaḥ śrutvā śarajanmā mahābalaḥ |
jagāma mandirāttūrṇaṃ pṛthivīkramaṇāya vai || 19 ||
[Analyze grammar]

gaṇanāthaśca tatraiva saṃsthito buddhisattamaḥ |
subuddhyā saṃvicāraryeti citta eva punaḥ punaḥ || 20 ||
[Analyze grammar]

kiṃ kartavyaṃ kva gaṃtavyaṃ laṃghituṃ naiva śakyate |
krośamātraṃ gataḥ syādvai gamyate na mayā punaḥ || 21 ||
[Analyze grammar]

kiṃ punaḥ pṛvivīmetāṃ krāṃtvā copārjitaṃ sukham |
vicāryeti gaṇeśastu yaccakāra śṛṇuṣva tat || 22 ||
[Analyze grammar]

snānaṃ kṛtvā yathānyāyaṃ samāgatya svayaṃ gṛham |
uvāca pitaraṃ tatra mātaraṃ punareva saḥ || 23 ||
[Analyze grammar]

gaṇeśa uvāca |
āsane sthāpite hyatra pūjārthaṃ bhavatoriha |
bhavaṃtau saṃsthitau tātau pūryyatāṃ me manorathaḥ || 24 ||
[Analyze grammar]

brahmovāca |
iti śrutvā vacastasya pārvatīparameśvarau |
asthātāmāsane tatra tatpūjāgrahaṇāya vai || 25 ||
[Analyze grammar]

tenātha pūjitau tau ca prakrāntau ca punaḥ punaḥ |
evaṃ ca kṛtavān sapta praṇāmāstu tathaiva saḥ || 26 ||
[Analyze grammar]

baddhāṃjalirathovāca gaṇeśo buddhisāgaraḥ |
stutvā bahu tithastāta pitarau premavihvalau || 27 ||
[Analyze grammar]

gaṇeśa uvāca |
bho mātarbho pitastvaṃ ca śṛṇu me paramaṃ vacaḥ |
śīghraṃ caivātra kartavyo vivāhaśśobhano mama || 28 ||
[Analyze grammar]

brahmovāca |
ityevaṃ vacanaṃ śrutvā gaṇeśasya mahātmanaḥ |
mahābuddhinidhiṃ taṃ tau pitarāvūcatustadā || 29 ||
[Analyze grammar]

śivā śivāvūcatuḥ |
prakrāmeta bhavānsamyakpṛthivīṃ ca sakānanām |
kumāro gatavāṃstatra tvaṃ gaccha pura āvraja || 30 ||
[Analyze grammar]

brahmovāca |
ityevaṃ vacanaṃ śrutvā pitrorgaṇapati drutam |
uvāca niyatastatra vacanaṃ krodhasaṃyutaḥ || 31 ||
[Analyze grammar]

gaṇeśa uvāca |
bho mātarbho pitardharmarūpau prājñau yuvāṃ matau |
dharmataḥ śrūyatāṃ samyak vacanaṃ mama sattamau || 32 ||
[Analyze grammar]

mayā tu pṛthivī krāṃtā saptavāraṃ punaḥ punaḥ |
evaṃ kathaṃ bruvāte vai punaśca pitarāviha || 33 ||
[Analyze grammar]

brahmovāca |
tadvacastu tadā śrutvā laukikīṃ gatimāśritau |
mahālīlākarau tatra pitarāvūcatuśca tam || 34 ||
[Analyze grammar]

pitarāvūcatuḥ |
kadā krāṃtā tvayā putra pṛthivī sumahattarā |
saptadvīpā samudrāṃtā mahadbhirgahanaiyutā || 35 ||
[Analyze grammar]

brahmovāca |
tayorevaṃ vacaḥ śrutvā śivāśaṃkarayormune |
mahābuddhinidhiḥ putro gaṇeśo vākyamabravīt || 36 ||
[Analyze grammar]

gaṇeśa uvāca |
bhavatoḥ pūjanaṃ kṛtvā śivāśaṃkarayoraham |
svabuddhyā hi samudrāntapṛdhvīkṛtaparikramaḥ || 37 ||
[Analyze grammar]

ityevaṃ vacanaṃ deve śāstre vā dharmasañcaye |
varttate kiṃ ca tattathyaṃ nahi kiṃ tathyameva vā || 38 ||
[Analyze grammar]

pitrośca pūjanaṃ kṛtvā prakrāṃtiṃ ca karoti yaḥ |
tasya vai pṛthivījanyaphalaṃ bhavati niścitam || 39 ||
[Analyze grammar]

apahāya gṛhe yo vai pitarau tīrthamāvrajet |
tasya pāpaṃ tathā proktaṃ hanane ca tayoryathā || 40 ||
[Analyze grammar]

putrasya ca mahattīrthaṃ pitroścaraṇapaṃkajam |
anyatīrthaṃ tu dūre vai gatvā samprāpyate punaḥ || 41 ||
[Analyze grammar]

idaṃ saṃnihitaṃ tīrthaṃ sulabhaṃ dharmasādhanam |
putrasya ca striyāścaiva tīrthaṃ gehe suśobhanam || 42 ||
[Analyze grammar]

iti śāstrāṇi vedāśca bhāṣante yanniraṃtaram |
bhavadbhyāṃ tatprakarttavyamasatyaṃ punareva ca || 43 ||
[Analyze grammar]

bhavadīyaṃ tvidaṃ rūpamasatyaṃ ca bhavediha |
tadā vedopyasatyo vai bhavediti na saṃśayaḥ || 44 ||
[Analyze grammar]

śīghraṃ ca bhavitavyo me vivāhaḥ kriyatāṃ śubhaḥ |
atha vā vedaśāstrañca nyalīkaṃ kathyatāmiti || 45 ||
[Analyze grammar]

dvayoḥ śreṣṭhatamaṃ madhye yatsyātsamyagvicārya tat |
kartavyaṃ ca prayatnena pitarau dharmarūpiṇau || 46 ||
[Analyze grammar]

|| brahmovāca |
ityuktvā pārvatīputrassa gaṇeśaḥ prakṛṣṭadhīḥ |
virarāma mahājñānī tadā buddhimatāṃ varaḥ || 47 ||
[Analyze grammar]

tau daṃpatī ca viśveśau pārvatīśaṃkarau tadā |
iti śrutvā vacastasya vismayaṃ paramaṃ gatā || 48 ||
[Analyze grammar]

tataḥ śivā śivaścaiva putraṃ buddhivicakṣaṇam |
supraśasyocatuḥ prītyā tau yathārthaprabhāṣiṇam || 49 ||
[Analyze grammar]

śivāśivāvūcatuḥ |
putra te vimalā buddhissamutpannā mahātmanaḥ |
tvayoktaṃ yadvacaścaiva tataścaiva ca nānyathā || 50 ||
[Analyze grammar]

samutpanne ca duḥkhe ca yasya buddhirviśiṣyate |
tasya dukhaṃ vinaśyeta sūrye dṛṣṭe yathā tamaḥ || 51 ||
[Analyze grammar]

buddhiryasya balaṃ tasya nirbuddhestu kuto balam |
kūpe siṃho madonmattaśśaśakena nipātitaḥ || 52 ||
[Analyze grammar]

vedaśāstrapurāṇeṣu bālakasya yathoditam |
tvayā kṛtaṃ tu tatsarvaṃ dharmasya paripālanam || 53 ||
[Analyze grammar]

samyakkṛtaṃ tvayā yacca tatkenāpi bhavediha |
āvābhyāṃ mānitaṃ tacca nānyathā kriyate'dhunā || 54 ||
[Analyze grammar]

brahmovāca |
ityuktvā tau samāśvāsya gaṇeśaṃ buddhisāgaram |
vivāhakaraṇe cāsya matiṃ cakraturuttamām || 55 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe gaṇeśavivāhopakramonāmaikonaviṃśodhyāyaḥ || 19 ||
[Analyze grammar]