Chapter 18

[English text for this chapter is available]

nārada uvāca |
jīvite girijāputre devyā dṛṣṭe prajeśvara |
tataḥ kimabhavattatra kṛpayā tadvadādhunā || 1 ||
[Analyze grammar]

brahmovāca |
jīvite girijāputre devyā dṛṣṭe munīśvara |
yajjātaṃ tacchṛṇuṣvādya vacmi te mahadutsavam || 2 ||
[Analyze grammar]

jīvitassa śivāputro nirvyagro vikṛto mune |
abhiṣiktastadā devairgaṇādhyakṣairgajānanaḥ || 3 ||
[Analyze grammar]

dṛṣṭvā svatanayaṃ devī śivā harṣasamanvitā |
gṛhītvā bālakaṃ dorbhyāṃ pramudā pariṣasvaje || 4 ||
[Analyze grammar]

vastrāṇi vividhānīha nānālaṃkaraṇāni ca |
dadau prītyā gaṇeśāya svaputrāya mudāṃbikā || 5 ||
[Analyze grammar]

pūjayitvā tayā devyā siddhibhiścāpyanekaśaḥ |
kareṇa sparśitassotha sarvaduḥkhahareṇa vai || 6 ||
[Analyze grammar]

pūjayitvā sutaṃ devī mukhamācumbya śāṃkarī |
varāndadau tadā prītyā jātastvaṃ duḥkhito'dhunā || 7 ||
[Analyze grammar]

dhanyosi kṛtakṛtyosi pūrvapūjyo bhavādhunā |
sarveṣāmamarāṇāṃ vai sarvadā duḥkhavarjitaḥ || 8 ||
[Analyze grammar]

ānane tava sindūraṃ dṛśyate sāṃprataṃ yadi |
tasmāttvaṃ pūjanīyosi sindūreṇa sadā naraiḥ || 9 ||
[Analyze grammar]

puṣpairvā candanairvāpi gandhenaiva śubhena ca |
naivedye suramyeṇa nīrājena vidhānataḥ || 10 ||
[Analyze grammar]

tāṃmbūlairatha dānaiśca tathā prakramaṇairapi |
namaskāravidhānena pūjāṃ yaste vidhāsyati || 11 ||
[Analyze grammar]

tasya vai sakalā siddhirbhaviṣyati na saṃśayaḥ |
vighnānyanekarūpāṇi kṣayaṃ yāsyaṃtyasaṃśayam || 12 ||
[Analyze grammar]

brahmovāca |
ityuktvā ca tadā devī svaputraṃ taṃ maheśvaro |
nānāvastubhirutkṛṣṭaṃ punarapyarcayattathā || 13 ||
[Analyze grammar]

tatassvāsthyaṃ ca devānāṃ gaṇānāṃ ca viśeṣataḥ |
girijākṛpayā vipra jātaṃ tatkṣaṇamātrataḥ || 14 ||
[Analyze grammar]

etasmiṃśca kṣaṇe devā vāsavādyāḥ śivaṃ mudā |
stutvā prasādya taṃ devaṃ bhaktā ninyuḥ śivāṃtikam || 15 ||
[Analyze grammar]

saṃsādya giriśaṃ paścādutsaṃge sannyaveśayan |
bālakaṃ taṃ maheśānyāstrijagatsukhahetave || 16 ||
[Analyze grammar]

śivopi tasya śirasi dattvā svakarapaṃkajam |
uvāca vacanaṃ devān putro'yamiti me'paraḥ || 17 ||
[Analyze grammar]

gaṇeśopi tadotthāya namaskṛtya śivāya vai |
pārvatyai ca namaskṛtya mahyaṃ vai viṣṇave tathā || 18 ||
[Analyze grammar]

nārādādyānṛṣīnsarvānsatvāsthāya puro'bravīt |
kṣaṃtavyaścāparādho me mānaścaivedṛśo nṛṇām || 19 ||
[Analyze grammar]

ahaṃ ca śaṃkaraścaiva viṣṇuścaite trayassurāḥ |
pratyūcuryugapatprītyā dadato varamuttamam || 20 ||
[Analyze grammar]

trayo vayaṃ suravarā yathāpūjyā jagattraye |
tathāyaṃ gaṇanāthaśca sakalaiḥ pratipūjyatām || 21 ||
[Analyze grammar]

vayaṃ ca prākṛtāścāyaṃ prākṛtaḥ pūjya eva ca |
gaṇeśo vighnahartā hi sarvakāmaphalapradaḥ || 22 ||
[Analyze grammar]

etatpūjāṃ purā kṛtvā paścātpūjyā vayaṃ naraiḥ |
vayaṃ ca pūjitāssarve nāyaṃ cāpūjito yadā || 23 ||
[Analyze grammar]

asminnapūjite devāḥ parapūjākṛtā yadi |
tadā tatphalahāniḥ syānnātra kāryā vicāraṇā || 24 ||
[Analyze grammar]

brahmovāca |
ityuktvā sa gaṇeśāno nānāvastubhirādarāt |
śivena pūjitaḥ pūrvaṃ viṣṇunānu prapūjitaḥ || 25 ||
[Analyze grammar]

brahmaṇā ca mayā tatra pārvatyā ca prapūjitaḥ |
sarvairdevairgaṇaiścaiva pūjitaḥ parayā mudā || 26 ||
[Analyze grammar]

savairmilitvā tatraiva brahmaviṣṇuharādibhiḥ |
sagaṇeśaśśivātuṣṭyai sarvādhyakṣo niveditaḥ || 27 ||
[Analyze grammar]

punaścaiva śivenāsmai suprasannena cetasā |
sarvadā sukhadā loke varā dattā hyanekaśaḥ || 28 ||
[Analyze grammar]

śiva uvāca |
he girīndrasutāputra saṃtuṣṭohaṃ na saṃśayaḥ |
mayi tuṣṭe jagattuṣṭaṃ viruddhaḥ kopi no bhavet || 29 ||
[Analyze grammar]

bālarūpopi yasmāttvaṃ mahāvikramakārakaḥ |
śaktiputrassutejasvī tasmādbhava sadā sukhī || 30 ||
[Analyze grammar]

tvannāma vighnahaṃtṛtve śreṣṭhaṃ caiva bhavatviti |
mama sarvagaṇādhyakṣaḥ saṃpūjyastvaṃ bhavādhunā || 31 ||
[Analyze grammar]

evamuktvā śaṃkareṇa pūjāvidhiranekaśaḥ |
āśiṣaścāpyanekā hi kṛtāstasmiṃstu tatkṣaṇāt || 32 ||
[Analyze grammar]

tato devagaṇāścaiva gīta vādyaṃ ca nṛtyakam |
mudā te kārayāmāsustathaivapsarasāṃ gaṇāḥ || 33 ||
[Analyze grammar]

punaścaiva varo dattassuprasannena śaṃbhunā |
tasmai ca gaṇanāthāya śivenaiva mahātmanā || 34 ||
[Analyze grammar]

caturthyāṃ tvaṃ samutpanno bhādre māsi gaṇeśvara |
asite ca tathā pakṣe caṃdrasyodayane śubhe || 35 ||
[Analyze grammar]

prathame ca tathā yāme girijāyāssucetasaḥ |
āvirbabhūva te rūpaṃ yasmātte vratamuttamam || 36 ||
[Analyze grammar]

tasmāttaddinamārabhya tasyāmeva tithau mudā |
vrataṃ kāryaṃ viśeṣeṇa sarvasiddhyai suśobhanam || 37 ||
[Analyze grammar]

yāvatpunassamāyāti varṣānte ca caturthikā |
tāvadvrataṃ ca kartavyaṃ tava caiva mamājñayā || 38 ||
[Analyze grammar]

saṃsāre sukhamicchanti ye'tulaṃ cāpyanekaśaḥ |
tvāṃ pūjayantu te bhaktyā caturthyāṃ vidhipūrvakam || 39 ||
[Analyze grammar]

mārgaśīrṣe tathā māse ramā yā vai caturthikā |
prātaḥsnānaṃ tadā kṛtvā vrataṃ viprānnivedayeta || 40 ||
[Analyze grammar]

dūrvābhiḥ pūjanaṃ kāryamupavāsastathāvidhaḥ |
rātreśca prahare jāte snātvā saṃpūjayennaraḥ || 41 ||
[Analyze grammar]

mūrtiṃ dhātumayīṃ kṛtvā pravālasaṃbhavāṃ tathā |
śvetārkasaṃbhavāṃ cāpi mārddikāṃ nirmitāṃ tathā || 42 ||
[Analyze grammar]

pratiṣṭhāpya tadā tatra pūjayetprayataḥ pumān |
gaṃdhairnānāvidhairdivyaiścandanaiḥ puṣpakairiha || 43 ||
[Analyze grammar]

vitastimātrā dūrvā ca vyaṃgā vai mūlavarjitā |
īdṛśānāṃ tadbalānāṃ śatenaikottareṇa ha || 44 ||
[Analyze grammar]

ekaviṃśatikenaiva pūjayetpratimāṃ sthitām |
dhūpairdīpaiśca naivedyairvividhairgaṇanāyakam || 45 ||
[Analyze grammar]

tāmbūlādyarghasaddravyaiḥ praṇipatya stavaistathā |
tvāṃ tatra pūjayitvetthaṃ bālacaṃdraṃ ca pūjayet || 46 ||
[Analyze grammar]

paścādviprāṃśca saṃpūjya bhojayenmadhurairmudā |
svayaṃ caiva tato bhuṃjyānmadhuraṃ lavaṇaṃ vinā || 47 ||
[Analyze grammar]

visarjayettataḥ paścānniyamaṃ sarvamātmanaḥ |
gaṇeśasmaraṇaṃ kuryyātsaṃpūrṇaṃ syādvrataṃ śubham || 48 ||
[Analyze grammar]

evaṃ vratena saṃpūrṇe varṣe jāte narastadā |
udyāpanavidhiṃ kuryādvratasampūrttihetave || 49 ||
[Analyze grammar]

dvādaśa brāhmaṇāstatra bhojanīyā madājñayā |
kuṃbhamekaṃ ca saṃsthāpya pūjyā mūrtistvadīyikā || 50 ||
[Analyze grammar]

sthaṇḍileṣṭapalaṃ kṛtvā tadā vedavidhānataḥ |
homaścaivātra kartavyo vittaśāṭhyavivarjitaiḥ || 51 ||
[Analyze grammar]

strīdvayaṃ ca tathā cātra baṭukadvayamādarāt |
bhojayetpūjayitvā vai mūrtyagre vidhipūrvakam || 52 ||
[Analyze grammar]

niśi jāgaraṇaṃ kāryaṃ punaḥ prātaḥ prapūjayet |
visarjanaṃ tataścaiva punarāgamanāya ca || 53 ||
[Analyze grammar]

bālakāccāśiṣo grāhyāssvastivācanameva ca |
puṣpāṃjaliṃ pradadyācca vratasaṃpūrṇa hetave || 54 ||
[Analyze grammar]

namaskārāṃstataḥ kṛtvā nānākāryaṃ prakalpayet |
evaṃ vrataṃ kṛtaṃ yena tasyepsitaphalaṃ bhavet || 55 ||
[Analyze grammar]

yo nityaṃ śraddhayā sārddhaṃ pūjāṃ caiva sva śaktitaḥ |
kuryyāttava gaṇeśāna sarvakāmaphalāptaye || 56 ||
[Analyze grammar]

sindūraiścandanaiścaiva taṃḍulaiḥ ketakaistathā |
upacārairanekaiśca pūjayettvāṃ gaṇe śvaram || 57 ||
[Analyze grammar]

evaṃ tvāṃ pūjayeyurye bhaktyā nānopacārataḥ |
teṣāṃ siddhirbhavennityaṃ vighnanāśo bhavediha || 58 ||
[Analyze grammar]

sarvairvarṇaiḥ prakarttavyā strībhiścaiva viśeṣataḥ |
udayābhimukhaiścaiva rājabhiśca viśeṣataḥ || 59 ||
[Analyze grammar]

yaṃ yaṃ kāmayate yo vai taṃtamāpnoti niścitam |
ataḥ kāmayamānena tena sevyassadā bhavān || 60 ||
[Analyze grammar]

|| brahmovāca |
śivenaiva tadā proktaṃ gaṇeśāya mahātmane |
tadānīṃ daivataiścaiva sarvaiśca ṛṣisattamaiḥ || 61 ||
[Analyze grammar]

tathetyuktvā tu taissarvairgaṇaiśśaṃbhupriyairmune |
pūjito hi gaṇādhīśo vidhinā parameṇa saḥ || 62 ||
[Analyze grammar]

tataścaiva gaṇāssarve praṇemuste gaṇeśvaram |
samānarcurviśeṣeṇa nānāvastubhirādarāt || 63 ||
[Analyze grammar]

girijāyāssamutpanno yaśca harṣo munīśvara |
caturbhirvadanairvai tamavarṇyaṃ ca kathaṃ bruve || 64 ||
[Analyze grammar]

devaduṃdubhayo nedurnanṛtuścāpsarogaṇāḥ |
jagurgaṃdharvamukhyāśca puṣpavarṣaṃ papāta ha || 65 ||
[Analyze grammar]

jagatsvāsthyaṃ tadā prāpa gaṇādhīśe pratiṣṭhite |
mahotsavo mahānāsītsarvaṃ duḥkhaṃ kṣayaṃ gaṇam || 66 ||
[Analyze grammar]

śivāśivau ca modetāṃ viśeṣeṇāti nārada |
āsītsumaṃgalaṃ bhūri sarvatra sukhadāyakam || 67 ||
[Analyze grammar]

tato devagaṇāḥ sarve ṛṣīṇāṃ ca gaṇāstathā |
samāgatāśca ye tatra jagmuste tu śivājñayā || 68 ||
[Analyze grammar]

praśaṃsaṃtaśśivā tatra gaṇeśaṃ ca punaḥ punaḥ |
śivaṃ caiva tathā stutvā kīdṛśaṃ yuddhameva ca || 69 ||
[Analyze grammar]

yadā sā girijā devī kopahīnā babhūva ha |
śivo'pi girijāṃ tatra pūrvavatsaṃprapadya tām || 70 ||
[Analyze grammar]

cakāra vividhaṃ saukhyaṃ lokānāṃ hitakāmyayā |
svātmārāmo'pi paramo bhaktakāryodyataḥ sadā || 71 ||
[Analyze grammar]

viṣṇuśca śivamāpṛcchya brahmāhaṃ taṃ tathaiva hi |
āgacchāva svadhāmaṃ ca śivau saṃsevya bhaktitaḥ || 72 ||
[Analyze grammar]

nārada tvaṃ ca bhagavansaṃgīya śivayoryaśaḥ |
āgamo bhavanaṃ svaṃ ca śivau pṛṣṭvā munīśvara || 73 ||
[Analyze grammar]

etatte sarvamākhyātaṃ mayā vai śivayoryaśaḥ |
bhavatpṛṣṭena vighneśa yaśassaṃmiśramādarāt || 74 ||
[Analyze grammar]

idaṃ sumaṃgalākhyānaṃ yaḥ śṛṇoti susaṃyataḥ |
sarvamaṃgala saṃyuktassa bhavenmaṃgalālayaḥ || 75 ||
[Analyze grammar]

aputro labhate putraṃ nirdhano labhate dhanam |
bhāyārthī labhate bhāryāṃ prajārthī labhate prajām || 76 ||
[Analyze grammar]

ārogyaṃ labhate rogī saubhāgyaṃ durbhago labhet |
naṣṭaputraṃ naṣṭadhanaṃ proṣitā ca patiṃ labhet || 77 ||
[Analyze grammar]

śokāviṣṭaśśokahīnassa bhavennātra saṃśayaḥ |
idaṃ gāṇeśamākhyānaṃ yasya gehe ca tiṣṭhati || 78 ||
[Analyze grammar]

sadā maṃgalasaṃyuktassa bhavennātra saṃśayaḥ |
yātrākāle ca puṇyāhe yaśśṛṇoti samāhitaḥ |
sarvābhīṣṭaṃ sa labhate śrīgaṇeśaprasādataḥ || 79 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṃḍe gaṇeśagaṇādhipapadavīvarṇanaṃ nāmāṣṭādaśo'dhyāyaḥ || 18 ||
[Analyze grammar]