Chapter 20

[English text for this chapter is available]

||brahmovāca |
etasminnaṃtare tatra viśvarūpaḥ prajāpatiḥ |
tadudyogaṃ saṃvicārya sukhamāpa prasannadhīḥ || 1 ||
[Analyze grammar]

viśvarūpaprajeśasya divyarūpe sute ubhe |
siddhibuddhiriti khyāte śubhe sarvāṃgaśobhane || 2 ||
[Analyze grammar]

tābhyāṃ caiva gaṇeśasya girijā śaṃkaraḥ prabhū |
mahotsavaṃ vivāhaṃ ca kārayāmāsaturmudā || 3 ||
[Analyze grammar]

saṃtuṣṭā devatāssarvāstadvivāhe samāgaman |
yathā caiva śivasyaiva girijāyā manorathaḥ || 4 ||
[Analyze grammar]

tathā ca viśvakarmā'sau vivāhaṃ kṛtavāṃstathā |
tathā ca ṛṣayo devā lebhire paramāṃ mudam || 5 ||
[Analyze grammar]

gaṇeśopi tadā tābhyāṃ sukhaṃ caivāpticiṃtakam |
prāptavāṃśca mune tattu varṇituṃ naiva śakyate || 6 ||
[Analyze grammar]

kiyatā caiva kālena gaṇeśasya mahātmanaḥ |
dvayoḥ patnyośca dvau divyau tasya putrau babhūvatuḥ || 7 ||
[Analyze grammar]

siddhergaṇeśapatnyāstu kṣemanāmā suto'bhavat |
buddherlābhābhidhaḥ putro hyāsītparabhaśobhanaḥ || 8 ||
[Analyze grammar]

evaṃ sukhamaciṃtyaṃ va bhuṃjāne hi gaṇeśvare |
ājagāma dvitīyaśca krāṃtvā pṛthvīṃ sutastadā || 9 ||
[Analyze grammar]

tāvaśca nāradenaiva prāpto gehe mahātmanā |
yathārthaṃ vacmi no'satyaṃ na chalena na matsarāt || 10 ||
[Analyze grammar]

pitṛbhyāṃ tu kṛtaṃ yacca śivayā śaṃkareṇa te |
tanna kuryyātparo loke satyaṃ satyaṃ bravīmyaham || 11 ||
[Analyze grammar]

niṣkāsya tvāṃ kukramaṇaṃ miṣamutpādya yatnataḥ |
gaṇeśasya varokāri vivāhaḥ paraśobhanaḥ || 12 ||
[Analyze grammar]

gaṇeśasya kṛtodvāho labdhavāṃsstrīdvayaṃ mudā |
viśvarūpaprajeśasya kanyāratnaṃ mahottamam || 13 ||
[Analyze grammar]

putradvayaṃ lalābhāsau dvayoḥ patnyośśubhāṃgayoḥ |
siddhe kṣemaṃ tathā buddherlābhaṃ sarvaṃ sukhapradam || 14 ||
[Analyze grammar]

patnyordvayorgaṇeśo'sau labdhvā putradvayaṃ śubham |
mātāpitrormatenaiva sukhaṃ bhuṃkte niraṃtaram || 15 ||
[Analyze grammar]

bhavatā pṛthivī krāṃtā sasamudrā sakānanā |
tacchalājñāvaśāttāta tasya jātaṃ phalaṃ tvidam || 16 ||
[Analyze grammar]

pitṛbhyāṃ kriyatāsmaivacchalaṃ tāta vicāryatām |
svasvāmibhyāṃ viśeṣeṇa hyanyaḥ kinna karoti vai || 17 ||
[Analyze grammar]

asamyakca kṛtaṃ tābhyāṃ tvatpitṛbhyāṃ hi karma ha |
vicāryatāṃ tvayā'pīha maccitte na śubhaṃ matam || 18 ||
[Analyze grammar]

dadyādyadi garaṃ mātā vikrīṇīyātpitā yadi |
rājā harati sarvasvaṃ kasmai kiṃ ca bravītu vai || 19 ||
[Analyze grammar]

yenaivedaṃ kṛtaṃ syādvai karmānarthakaraṃ param |
śāṃtikāmassudhīstāta tanmukhaṃ na vilokayet || 20 ||
[Analyze grammar]

iti nītiḥ śrutau proktā smṛtau śāstreṣu sarvataḥ |
niveditā ca sā te'dya yathecchasi tathā kuru || 21 ||
[Analyze grammar]

brahmovāca |
ityuktvā nārada tvaṃ tu maheśvaramanogatiḥ |
tasmai tathā kumārāya vākyaṃ maunamupāgataḥ || 22 ||
[Analyze grammar]

skando'pi pitaraṃ natvā kopāgnijvalitastadā |
jagāma parvataṃ krauṃcaṃ pitṛbhyāṃ vārito'pi san || 23 ||
[Analyze grammar]

vāraṇe ca kṛte tvadya gamyate ca kathaṃ tvayā |
ityevaṃ ca niṣiddhopi procya neti jagāma saḥ || 24 ||
[Analyze grammar]

na sthātavyaṃ mayā tātau kṣaṇamapyatra kiṃcana |
yadyevaṃ kapaṭaṃ prītimapahāya kṛtaṃ mayi || 25 ||
[Analyze grammar]

evamuktvā gatastatra mune so'dyāpi vartate |
darśanenaiva sarveṣāṃ lokānāṃ pāpahārakaḥ || 26 ||
[Analyze grammar]

taddinaṃ hi samārabhya kārtikeyasya tasya vai |
śivaputrasya devarṣe kumāratvaṃ pratiṣṭhitam || 27 ||
[Analyze grammar]

tannāma śubhadaṃ loke prasiddhaṃ bhuvanatraye |
sarvapāpaharaṃ puṇyaṃ brahmacaryapradaṃ param || 28 ||
[Analyze grammar]

kārtikyāṃ ca sadā devā ṛṣayaśca satīrthakāḥ |
darśanārthaṃ kumārasya gacchaṃti ca munīśvarāḥ || 29 ||
[Analyze grammar]

kārtikyāṃ kṛttikāsaṃge kuryādyaḥ svāmidarśanam |
tasya pāpaṃ dahetsarvaṃ cittepsita phalaṃ labhet || 30 ||
[Analyze grammar]

umāpi duḥkhamāpannā skandasya virahe sati |
uvāca svāminaṃ dīnā tatra gaccha mayā prabho || 31 ||
[Analyze grammar]

tatsukhārthaṃ svayaṃ śaṃbhurgatassvāṃśena parvate |
mallikārjunanāmāsījjyotirliṅgaṃ sukhāvaham || 32 ||
[Analyze grammar]

adyāpi dṛśyate tatra śivayā sahitaśśivaḥ |
sarveṣāṃ nijabhaktānāṃ kāmapūrassatāṃ gatiḥ || 33 ||
[Analyze grammar]

tamāgataṃ sa vijñāya kumārassaśivaṃ śivam |
sa virajya tato'nyatra gaṃtumāsītsamutsukaḥ || 34 ||
[Analyze grammar]

devaiśca munibhiścaiva prārthitassopi dūrataḥ |
yojanatrayamutsṛjya sthitaḥ sthāne ca kārtikaḥ || 35 ||
[Analyze grammar]

putrasnehāturau tau vai śivau parvaṇi parvaṇi |
darśanārthaṃ kumārasya tasya nārada gacchataḥ || 36 ||
[Analyze grammar]

amāvāsyādine śaṃbhuḥ svayaṃ gacchati tatra ha |
pūrṇamāsī dine tatra pārvatī gacchati dhruvam || 37 ||
[Analyze grammar]

yadyattasya ca vṛttāṃtaṃ bhavatpṛṣṭaṃ munīśvara |
kārtikasya gaṇeśasya paramaṃ kathitaṃ mayā || 38 ||
[Analyze grammar]

etacchrutvā naro dhīmān sarvapāpaiḥ pramucyate |
śobhanāṃ labhate kāmānīpsitānsakalānsadā || 39 ||
[Analyze grammar]

yaḥ paṭhetpāṭhayedvāpi śṛṇuyācchrāvayettathā |
sarvānkāmānavāpnoti nātra kāryā vicāraṇā || 40 ||
[Analyze grammar]

brāhmaṇo brahmavarcasvī kṣatriyo vijayī bhavet |
vaiśyo dhana samṛddhassyācchūdrassatsamatāmiyāt || 41 ||
[Analyze grammar]

rogī rogātpramucyeta bhayānmucyeta bhītiyuk |
bhūtapretādibādhābhyaḥ pīḍito na bhavennaraḥ || 42 ||
[Analyze grammar]

etadākhyānamanaghaṃ yaśasyaṃ sukhavarddhanam |
āyuṣyaṃ svargyamatulaṃ putrapautrādikārakam || 43 ||
[Analyze grammar]

apavargapradaṃ cāpi śivajñānapradaṃ param |
śivāśivaprītikaraṃ śivabhaktivivarddhanam || 44 ||
[Analyze grammar]

śravaṇīyaṃ sadā bhaktairniḥkāmaiśca mumukṣubhiḥ |
śivādvaitapradaṃ caitatsadāśivamayaṃ śivam || 45 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe gaṇeśavivāhavarṇanaṃ nāma viṃśo'dhyāyaḥ || 20 ||
[Analyze grammar]

samāptoyaṃ rudrasaṃhitāntargataḥ kumārakhaṇḍaścaturthaḥ || 4 ||
[Analyze grammar]