Chapter 15

[English text for this chapter is available]

|| brahmovāca |
ityuktā vibhunā tena niścayaṃ paramaṃ gatāḥ |
sannaddhāstu tadā tatra jagmuśca śivamandiram || 1 ||
[Analyze grammar]

gaṇeśo'pi tathā dṛṣṭvā hyāyātāngaṇasattamān |
yuddhā''ṭopaṃ vidhāyaiva sthitāṃścaivābravīdidam || 2 ||
[Analyze grammar]

gaṇeśa uvāca |
āyāṃtu gaṇapāssarve śivājñāpa ripālakāḥ |
ahamekaśca bālaśca śivājñāparipālakaḥ || 3 ||
[Analyze grammar]

tathāpi paśyatāṃ devī pārvatī sūnujaṃ balam |
śivaśca svagaṇānāṃ tu balaṃ paśyatu vai punaḥ || 4 ||
[Analyze grammar]

balavadbālayuddhaṃ ca bhavānīśiva pakṣayoḥ |
bhavadbhiśca kṛtaṃ yuddhaṃ pūrvaṃ yuddhaviśāradaiḥ || 5 ||
[Analyze grammar]

mayā pūrvaṃ kṛtaṃ naiva bālosmi kriyate'dhunā |
tathāpi bhavatāṃ lajjā girijāśivayoriha || 6 ||
[Analyze grammar]

mamaivaṃ tu bhavennaiva vaiparītyaṃ bhaviṣyati |
mamaiva bhavatāṃ lajjā girijāśivayoriha || 7 ||
[Analyze grammar]

evaṃ jñātvā ca karttavyaḥ samaraśca gaṇeśvarāḥ |
bhavadbhissvāminaṃ dṛṣṭvā mayā ca mātaraṃ tadā || 8 ||
[Analyze grammar]

kriyate kīdṛśaṃ yuddhaṃ bhavitavyaṃ bhavatviti |
tasya vai vāraṇe ko'pi na samarthastrilokake || 9 ||
[Analyze grammar]

brahmovāca |
ityevaṃ bhartsitāste tu daṃḍabhūṣitabāhavaḥ |
vividhānyāyudhānyevaṃ dhṛtvā te ca samāyayuḥ || 10 ||
[Analyze grammar]

gharṣayantastathā daṃtān huṃkṛtya ca punaḥpunaḥ |
paśya paśya bruvaṃtaśca gaṇāste samupāgatāḥ || 11 ||
[Analyze grammar]

naṃdī prathamamāgatya dhṛtvā pādaṃ vyakarṣayat |
dhāvanbhṛṃgī dvitīyaṃ ca pādaṃ dhṛtvā gaṇasya ca || 12 ||
[Analyze grammar]

yāvatpāde vikarṣantau tāvaddhastena vai gaṇaḥ |
āhatya hastayostābhyāmutkṣiptau pādakau svayam || 13 ||
[Analyze grammar]

atha devīsuto vīrassagṛhya parighaṃ bṛhat |
dvārasthito gaṇapatiḥ sarvānāpothayattadā || 14 ||
[Analyze grammar]

keṣāṃcitpāṇayo bhinnāḥ keṣāṃcitpṛṣṭha kāni ca |
keṣāṃcicca śirāṃsyeva keṣāṃcinmastakāni ca || 15 ||
[Analyze grammar]

keṣāṃcijānunī tatra keṣāṃcitskaṃdhakāstathā |
sammukhe cāgatā ye vai te sarve hṛdaye hatāḥ || 16 ||
[Analyze grammar]

kecicca patitābhūmau kecicca vidiśo gatāḥ |
keṣāṃciccaraṇau chinnau keciccharvāntikaṃ gatāḥ || 17 ||
[Analyze grammar]

teṣāṃ madhye tu kaścidvai saṃgrāme sammukho na hi |
siṃhaṃ dṛṣṭvā yathā yāṃti mṛgāścaiva diśo daśa || 18 ||
[Analyze grammar]

tathā te ca gaṇāssarve gatāścaiva sahasraśaḥ |
parāvṛtya tathā sopi sudvāri samupasthitaḥ || 19 ||
[Analyze grammar]

kalpāṃtakaraṇe kālo dṛśyate ca bhayaṃkaraḥ |
yathā tathaiva dṛṣṭassa sarveṣāṃ pralayaṃkaraḥ || 20 ||
[Analyze grammar]

etasminsamaye caiva sarameśasureśvarāḥ |
preritā nāradeneha devāssarve samāgaman || 21 ||
[Analyze grammar]

samabruvaṃstadā sarve śiva sya hitakāmyayā |
puraḥsthitvā śivaṃ natvā hyājñāṃ dehi prabho iti || 22 ||
[Analyze grammar]

tvaṃ parabrahma sarveśassarve ca tava sevakāḥ |
sṛṣṭeḥ kartā sadā bhartā saṃhartā parameśvaraḥ || 23 ||
[Analyze grammar]

rajassattvatamorūpo līlayā nirguṇaḥ svataḥ |
kā līlā racitā cādya tāmidānīṃ vada prabho || 24 ||
[Analyze grammar]

|| brahmovāca |
ityākarṇya vacasteṣāṃ muniśreṣṭha maheśvaraḥ |
gaṇān bhinnāṃstadā dṛṣṭvā tebhyassarvaṃ nyavedayat || 25 ||
[Analyze grammar]

atha sarveśvarastatra śaṃkaro munisattama |
vihasya girijānātho brahmāṇaṃ māmuvāca ha || 26 ||
[Analyze grammar]

śiva uvāca |
 brahmañchṛṇu mama dvāri bāla ekassamāsthitaḥ |
mahābalo yaṣṭipāṇirgehāveśanivārakaḥ || 27 ||
[Analyze grammar]

mahāprahārakartā'sau matpārṣadavighātakaḥ |
parājayaḥ kṛtastena madgaṇānāṃ balādiha || 28 ||
[Analyze grammar]

brahman tvayaiva gaṃtavyaṃ prasādyo'yaṃ mahābalaḥ |
yathā brahmannayaḥ syādvai tathā kāryaṃ tvayā vidhe || 29 ||
[Analyze grammar]

|| brahmovāca |
ityākarṇya prabhorvākyamajñātvā'jñānamohitaḥ |
tadīyanikaṭaṃ tāta sarvairṛṣivarairayām || 30 ||
[Analyze grammar]

samāyāntaṃ ca māṃ dṛṣṭvā sa gaṇeśo mahābalī |
krodhaṃ kṛtvā samabhyetya mama śmaśrūṇyavākirat || 31 ||
[Analyze grammar]

kṣamyatāṃ kṣamyatāṃ deva na yuddhārthaṃ samāgataḥ |
brāhmaṇohamanugrāhyaḥ śāṃtikartānupadravaḥ || 32 ||
[Analyze grammar]

ityevaṃ bruvati brahmaṃstāvatparighamādade |
sa gaṇeśo mahāvīro bālo'bālaparākramaḥ || 33 ||
[Analyze grammar]

gṛhītaparighaṃ dṛṣṭvā taṃ gaṇeśaṃ mahābalam |
palāyanaparo yātastvahaṃ drutataraṃ tadā || 34 ||
[Analyze grammar]

yāta yāta bruvaṃtaste parighena hatāstadā |
svayaṃ ca patitāḥ kecitkecittena nipātitāḥ || 35 ||
[Analyze grammar]

kecicca śivasāmīpyaṃ gatvā tatkṣaṇamātrataḥ |
śivaṃ vijñāpayāṃcakrustadvṛttāṃ tamaśeṣataḥ || 36 ||
[Analyze grammar]

tathāvidhāṃśca tān dṛṣṭvā tadvṛttāṃtaṃ niśamya saḥ |
apāramādadhe kopaṃ haro līlāviśāradaḥ || 37 ||
[Analyze grammar]

iṃdrādikāndevagaṇān ṣaṇmukhapravarān gaṇān |
bhūtapretapiśācāṃśca sarvānādeśayattadā || 38 ||
[Analyze grammar]

te sarve ca yathāyogyaṃ gatāste sarvato diśam |
taṃ gaṇaṃ haṃtukāmā hi śivājñātā udāyudhāḥ || 39 ||
[Analyze grammar]

yasya yasyāyudhaṃ yacca tattatsarvaṃ viśeṣataḥ |
tadgaṇeśopari balātsamāgatya vimocitam || 40 ||
[Analyze grammar]

hāhākāro mahānāsīttrailokye sacarācare |
trilokasthā janāssarve saṃśayaṃ paramaṃ gatāḥ || 41 ||
[Analyze grammar]

na yātaṃ brahmaṇo'pyāyurbrahmāṃḍa kṣayameti hi |
akāle ca tathā nūnaṃ śivecchāvaśataḥ svayam || 42 ||
[Analyze grammar]

te sarve cāgatāstatra ṣaṇmukhādyāśca ye punaḥ |
devā vyarthāyudhā jātā āścaryaṃ paramaṃ gatāḥ || 43 ||
[Analyze grammar]

etasminnantare devī jagadambā vibodhanā |
jñātvā taccaritaṃ sarvamapāraṃ krodhamādadhe || 44 ||
[Analyze grammar]

śaktidvayaṃ tadā tatra tayā devyā munīśvara |
nirmitaṃ svagaṇasyaiva sarvasāhāyyahetave || 45 ||
[Analyze grammar]

ekā pracaṃḍarūpaṃ ca dhṛtvātiṣṭhanmahāmune |
śyāmaparvatasaṃkāṃśaṃ vistīrya mukhagahvaram || 46 ||
[Analyze grammar]

ekā vidyutsvarūpā ca bahuhastasamanvitā |
bhayaṃkarā mahādevī duṣṭadaṃḍavidhāyinī || 47 ||
[Analyze grammar]

āyudhāni ca sarvāṇi mocitāni surairgaṇaiḥ |
gṛhītvā svamukhe tāni tābhyāṃ śīghraṃ ca cikṣipe || 48 ||
[Analyze grammar]

devāyudhaṃ na dṛśyeta parighaḥ paritaḥ punaḥ |
evaṃ tābhyāṃ kṛtaṃ tatra caritaṃ paramādbhutam || 49 ||
[Analyze grammar]

eko bālo'khilaṃ sainyaṃ loḍayāmāsa dustaram |
yathā girivareṇaiva loḍitassāgaraḥ purā || 50 ||
[Analyze grammar]

ekena nihatāssarve śakrādyā nirjarāstathā |
śaṃkarasya gaṇāścaiva vyākulāḥ abhavaṃstadā || 51 ||
[Analyze grammar]

atha sarve militvā te niśśvasya ca muhurmuhuḥ |
parasparaṃ samūcuste tatprahārasamākulāḥ || 52 ||
[Analyze grammar]

devagaṇā ūcuḥ |
kiṃ kartavyaṃ kva gaṃtavyaṃ na jñāyaṃte diśo daśa |
parighaṃ bhrāmayatyeṣa savyāpasavyameva ca || 53 ||
[Analyze grammar]

brahmovāca |
etatkāle'psaraśreṣṭhāḥ puṣpacandanapāṇayaḥ |
ṛṣayaśca tvadādyā hi ye'tiyuddhetilālasāḥ || 54 ||
[Analyze grammar]

te sarve ca samājagmuryuddhasaṃdarśanāya vai |
pūrito vyoma sanmārgastaistadā munisattama || 55 ||
[Analyze grammar]

tāste dṛṣṭvā raṇaṃ taṃ vai mahāvismayamāgatāḥ |
īdṛśaṃ paramaṃ yuddhaṃ na dṛṣṭaṃ caikadāpi hi || 56 ||
[Analyze grammar]

pṛthivī kaṃpitā tatra samudrasahitā tadā |
parvatāḥ patitāścaiva cakruḥ saṃgrāmasaṃbhavam || 57 ||
[Analyze grammar]

dyaurgraharkṣagaṇairghūrṇṇā sarve vyākulatāṃ gatāḥ |
devāḥ palāyitāssarve gaṇāśca sakalāstadā || 58 ||
[Analyze grammar]

kevalaṃ ṣaṇmukhastatra nāpalāyata vikramī |
mahāvīrastadā sarvānāvārya purataḥ sthitaḥ || 59 ||
[Analyze grammar]

śaktidvayena tadyuddhe sarve ca niṣphalīkṛtāḥ |
sarvāstrāṇi nikṛttāni saṃkṣiptānyamarairgaṇaiḥ || 60 ||
[Analyze grammar]

ye'va sthitāśca te sarve śivasyāṃtikamāgatāḥ |
devāḥ palāyitāssarve gaṇāśca sakalāstadā || 61 ||
[Analyze grammar]

te sarve militāścaiva muhurnatvā śivaṃ tadā |
abruvanvacanaṃ kṣipraṃ ko'yaṃ gaṇavaraḥ prabho || 62 ||
[Analyze grammar]

purā caiva śrutaṃ yuddhamidānīṃ bahudhā punaḥ |
dṛśyate na śrutaṃ dṛṣṭamīdṛśaṃ tu kadācana || 63 ||
[Analyze grammar]

kiṃcidvicāryatāṃ deva tvanyathā na jayo bhavet |
tvameva rakṣakassvāminbrahmāṃḍasya na saṃśayaḥ || 64 ||
[Analyze grammar]

brahmovāca |
ityevaṃ tadvacaḥ śrutvā rudraḥ paramakopanaḥ |
kopaṃ kṛtvā ca tatraiva jagāma svagaṇaissaha || 65 ||
[Analyze grammar]

devasainyaṃ ca tatsarvaṃ viṣṇunā cakriṇā saha |
samutsavaṃ mahatkṛtvā śivasyānujagāma ha || 66 ||
[Analyze grammar]

etasminnaṃtare bhaktyā namaskṛtya maheśvaram |
abravīnnārada tvaṃ vai devadevaṃ kṛtāṃjaliḥ || 67 ||
[Analyze grammar]

nārada uvāca |
devadeva mahādeva śṛṇu madvacanaṃ vibho |
tvameva sarvagassvāmī nānālīlāviśāradaḥ || 68 ||
[Analyze grammar]

tvayā kṛtvā mahālīlāṃ gaṇagarvo'pahāritaḥ |
asmai dattvā balaṃ bhūri devagarvaśca śaṃkara || 69 ||
[Analyze grammar]

darśitaṃ bhuvane nātha svameva balamadbhutam |
svataṃtreṇa tvayā śaṃbho sarvagarvaprahāriṇā || 70 ||
[Analyze grammar]

idānīṃ na kuruṣveśa tāṃ līlāṃ bhaktavatsalaḥ |
svagaṇānamarāṃścāpi susanmānyābhivarddhaya || 71 ||
[Analyze grammar]

na khelayedānīṃ jahi brahmapadaprada |
ityuktvā nārada tvaṃ vai hyaṃtarddhānaṃ gatastadā || 72 ||
[Analyze grammar]

iti śrīśivamahāpurāṇe dvi0 rudrasaṃhitāyāṃ ca kumārakhaṇḍe gaṇeśayuddhavarṇanaṃ nāma pañcadaśo'dhyāyaḥ || 15 ||
[Analyze grammar]