Chapter 35

[English text for this chapter is available]

dakṣa uvāca |
devadeva hare viṣṇo dīnabaṃdho kṛpānidhe |
mama rakṣā vidhātavyā bhavatā sādhvarasya ca || 1 ||
[Analyze grammar]

rakṣakastvaṃ makhasyaiva makhakarmā makhātmakaḥ |
kṛpā vidheyā yajñasya bhaṃgo bhavatu na prabho || 2 ||
[Analyze grammar]

|| brahmovāca |
itthaṃ bahuvidhāṃ dakṣaḥ kṛtvā vijñaptimādarāt |
papāta pādayostasya bhayavyākulamānasaḥ || 3 ||
[Analyze grammar]

utthāpya taṃ tato viṣṇurdakṣaṃ viklinnamānasam |
śrutvā ca tasya tadvākyaṃ kumaterasmaracchivam || 4 ||
[Analyze grammar]

smṛtvā śivaṃ maheśānaṃ svaprabhuṃ parameśvaram |
avadacchivatattvajño dakṣaṃ sabodhayanhariḥ || 5 ||
[Analyze grammar]

hariruvāca |
śṛṇu dakṣa pravakṣyāmi tattvataḥ śṛṇu me vacaḥ |
sarvathā te hitakaraṃ mahāmaṃtrasukhapradam || 6 ||
[Analyze grammar]

avajñā hi kṛtā dakṣa tvayā tattvamajānatā |
sakalādhīśvarasyaiva śaṃkarasya parātmanaḥ || 7 ||
[Analyze grammar]

īśvarāvajñayā sarvaṃ kāryaṃ bhavati sarvathā |
viphalaṃ kevalaṃ naiva vipattiśca padepade || 8 ||
[Analyze grammar]

apūjyā yatra pūjyaṃte pūjanīyo na pūjyate |
trīṇi tatra bhaviṣyaṃti dāridryaṃ maraṇaṃ bhayam || 9 ||
[Analyze grammar]

tasmātsarvaprayatnena mānanīyo vṛṣadhvajaḥ |
amānitānmaheśācca mahadbhayamupasthitam || 10 ||
[Analyze grammar]

adyāpi na vayaṃ sarve prabhavaḥ prabhavāmahe |
bhavato durnayenaiva mayā satyamudīryyate || 11 ||
[Analyze grammar]

brahmovāca |
viṣṇostadvacanaṃ śrutvā dakṣaściṃtāparo'bhavat |
vivarṇavadano bhūtvā tūṣṇīmāsīdbhuvi sthitaḥ || 12 ||
[Analyze grammar]

etasminnaṃtare vīrabhadraḥ sainyasamanvitaḥ |
agacchadadhvaraṃ rudraprerito gaṇanāyakaḥ || 13 ||
[Analyze grammar]

pṛṣṭhe kecitsamāyātā gagane kecidāgatāḥ |
diśaśca vidiśaḥ sarve samāvṛtya tathāpare || 14 ||
[Analyze grammar]

śarvājñayā gaṇāḥ śūrā nirbhayā rudravikramāḥ |
asaṃkhyāḥ siṃhanādānvai kurvaṃto vīrasattamāḥ || 15 ||
[Analyze grammar]

tena nādena mahatā nāditaṃ bhuvanatrayam |
rajasā cāvṛtaṃ vyoma tamasā cāvṛtā diśaḥ || 16 ||
[Analyze grammar]

saptadvīpānvitā pṛthvī cacālāti bhayākulā |
saśailakānanā tatra cukṣubhussakalābdhayaḥ || 17 ||
[Analyze grammar]

evaṃbhūtaṃ ca tatsainyaṃ lokakṣayakaraṃ mahat |
dṛṣṭvā ca vismitāssarve babhūvuramarādayaḥ || 18 ||
[Analyze grammar]

sainyodyogamathālokya dakṣaścāsṛṅmukhākulaḥ |
daṃḍavatpatito viṣṇuṃ sakalatro'bhyabhāṣata || 19 ||
[Analyze grammar]

|| dakṣa uvāca |
bhavadbalenaiva mayā yajñaḥ prāraṃbhito mahān |
satkarmasiddhaye viṣṇo pramāṇaṃ tvaṃ mahāprabho || 20 ||
[Analyze grammar]

viṣṇo tvaṃ karmaṇāṃ sākṣī yajñānāṃ pratipālakaḥ |
dharmasya vedagarbhasya brahmaṇastvaṃ mahāprabho || 21 ||
[Analyze grammar]

tasmādrakṣā vidhātavyā yajñasyāsya mama prabho |
tvadanyaḥ yassamarthosti yatastvaṃ sakalaprabhuḥ || 22 ||
[Analyze grammar]

|| brahmovāca |
dakṣasya vacanaṃ śrutvā viṣṇurdīnataraṃ tadā |
avocadbodhayaṃstaṃ vai śivatattvaparāṅmukham || 23 ||
[Analyze grammar]

viṣṇuruvāca |
mayā rakṣā vidhātavyā tava yajñasya dakṣa vai |
khyāto mama paṇaḥ satyo dharmasya paripālanam || 24 ||
[Analyze grammar]

tatsatyaṃ tu tvayoktaṃ hi kiṃ tattasya vyatikramaḥ |
śṛṇu tvaṃ vacmyahaṃ dakṣa krūrabuddhiṃ tyajā'dhunā || 25 ||
[Analyze grammar]

naimiṣe nimiṣakṣetre yajjātaṃ vṛttamadbhutam |
tatkiṃ na smaryate dakṣa vismṛtaṃ kiṃ kubuddhinā || 26 ||
[Analyze grammar]

rudrakopācca ko hyatra samartho rakṣaṇe tava |
na yasyābhimataṃ dakṣa yastvāṃ rakṣati durmatiḥ || 27 ||
[Analyze grammar]

kiṃ karma kimakarmeti tatra paśyasi durmate |
samarthaṃ kevalaṃ karma na bhaviṣyati sarvadā || 28 ||
[Analyze grammar]

svakarmaviddhi tadyena samarthatvena jāyate |
na tvanyaḥ karmaṇo dātā śaṃ bhavedīśvaraṃ vinā || 29 ||
[Analyze grammar]

īśvarasya ca yo bhaktyā śāṃtastadgatamānasaḥ |
karmaṇo hi phalaṃ tasya prayacchati tadā śivaḥ || 30 ||
[Analyze grammar]

kevalaṃ jñānamāśritya nirīśvaraparā narāḥ |
nirayaṃ te ca gacchaṃti kalpakoṭiśatāni ca || 31 ||
[Analyze grammar]

punaḥ karmamayaiḥ pāśairvaddhā janmani janmani |
nirayeṣu prapacyaṃte kevalaṃ karmarūpiṇaḥ || 32 ||
[Analyze grammar]

ayaṃ rudragaṇādhīśo vīrabhadro'ri mardanaḥ |
rudrakopāgnisaṃbhūtaḥ samāyātodhvarāṃgaṇe || 33 ||
[Analyze grammar]

ayamasmadvināśārthamāgatosti na saṃśayaḥ |
aśakyamasya nāstyeva kimapyastu tu vastutaḥ || 34 ||
[Analyze grammar]

prajvālyāsmānayaṃ sarvān dhruvameva mahāprabhuḥ |
tataḥ praśāṃtahṛdayo bhaviṣyati na saṃśayaḥ || 35 ||
[Analyze grammar]

śrīmahādevaśapathaṃ samullaṃghya bhramānmayā |
yataḥ sthitaṃ tataḥ prāpyaṃ mayā duḥkhaṃ tvayā saha || 36 ||
[Analyze grammar]

śaktirmama tu nāstyeva dakṣādyaitannivāraṇe |
śapathollaṃghanādeva śivadrohī yatosmyaham || 37 ||
[Analyze grammar]

kālatrayepi na yato maheśadrohiṇāṃ sukham |
tato'vaśyaṃ mayā prāptaṃ duḥkhamadya tvayā saha || 38 ||
[Analyze grammar]

sudarśanābhidhaṃ cakrametasminna lagiṣyati |
śaivacakramidaṃ yasmādaśaivalayakāraṇam || 39 ||
[Analyze grammar]

vināpi vīrabhadreṇa nāmaitaccakramaiśvaram |
hatvā gamiṣyatyadhunā satvaraṃ harasannidhau || 40 ||
[Analyze grammar]

śaivaṃ śapathamullaṃghya sthitaṃ māṃ cakramīdṛśam |
asaṃhatyaiva sahasā kṛpayaiva sthiraṃ param || 41 ||
[Analyze grammar]

ataḥ paramidaṃ cakramapi na sthāsyati dhruvam |
gamiṣyatyadhunā śīghraṃ jvālāmālāsamākulam || 42 ||
[Analyze grammar]

vīrabhadraḥ pūjitopi śīghramasmābhirādarāt |
mahākrodhasamākrāṃto nāsmānsaṃrakṣayiṣyati || 43 ||
[Analyze grammar]

akāṃḍapralayo'smākamāgatodya hi hā hahā |
hā hā bata tavedānīṃ nāśosmākamupasthitaḥ || 44 ||
[Analyze grammar]

śaraṇyo'smākamadhunā nāstyeva hi jagattraye |
śaṃkaradrohiṇo loke kaśśaraṇyo bhaviṣyati || 45 ||
[Analyze grammar]

tanunāśepi saṃprāpyāstaiścāpi yamayātanāḥ |
tānaiva śakyate soḍhuṃ bahuduḥkhapradāyinīḥ || 46 ||
[Analyze grammar]

śivadrohiṇamālokya daṣṭadaṃto yamaḥ svayam |
taptatailakaṭāheṣu pātayatyeva nānyathā || 47 ||
[Analyze grammar]

gantumevāhamudyuktaṃ sarvathā śapathottaram |
tathāpi na gataśśīghraṃ duṣṭasaṃsargapāpataḥ || 48 ||
[Analyze grammar]

yadadya kriyatesmābhiḥ palāyanamitastadā |
śārvo nā karṣakaśśastrairasmānākarṣayiṣyati || 49 ||
[Analyze grammar]

svarge vā bhuvi pātāle yatra kutrāpi vā yataḥ |
śrīvīrabhadraśastrāṇāṃ gamanaṃ na hi durla bham || 50 ||
[Analyze grammar]

yāvataśca gaṇāssaṃti śrīrudrasya triśūlinaḥ |
tāvatāmapi sarveṣāṃ śaktiretādṛśī dhuvam || 51 ||
[Analyze grammar]

śrīkālabhairavaḥ kāśyāṃ nakhāgreṇaiva līlayā |
purā śiraśca ciccheda paṃcamaṃ brahmaṇo dhruvam || 52 ||
[Analyze grammar]

etaduktvā sthito viṣṇuratitrastamukhāmbujaḥ |
vīrabhadropi saṃprāpa tadaivā'dhvaramaṃḍapam || 53 ||
[Analyze grammar]

evaṃ bruvati govinda āgataṃ sainyasāgaram |
vīrabhadreṇa sahitaṃ dadṛśuśca surādayā || 54 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe satyupākhyāne viṣṇuvākyavarṇanaṃ nāma paṃcatriṃśo'dhyāyaḥ || 35 ||
[Analyze grammar]