Chapter 111

[English text for this chapter is available]

pṛthuruvāca |
kṛṣṇaveṇyātaṭādyasmātśivaviṣṇugaṇaiḥ purā |
vaṇikśarīrātkalahā nirmitā kathitā tvayā || 1 ||
[Analyze grammar]

prabhāvo'yaṃ tayornadyoḥ kiṃvā kṣetrasya tasya vā |
tanme kathaya dharmajña vismayo'tra mahānmama || 2 ||
[Analyze grammar]

nārada uvāca |
kṛṣṇā kṛṣṇatanuḥ sākṣādveṇyā devo maheśvaraḥ |
tatsaṃgamaprabhāvaṃ tu nālaṃ vaktuṃ caturmukhaḥ || 3 ||
[Analyze grammar]

tathāpi tatsamutpattiṃ kīrtayiṣyāmi tacchṛṇu |
cākṣuṣasyāṃtare pūrvaṃ manordevaḥ pitāmahaḥ || 4 ||
[Analyze grammar]

sahyādriśikhare ramye yajanāyodyato'bhavat |
sa kṛtvā yajñasaṃbhārānsarvadevagaṇairvṛtaḥ || 5 ||
[Analyze grammar]

yukto hariharābhyāṃ ca tadgireḥ śikharaṃ yayau |
bhṛgvādayo munigaṇā muhūrte brahmadaivate || 6 ||
[Analyze grammar]

tasya dīkṣāvidhānāya samājaṃ tatra cakrire |
atha jyeṣṭhāṃ svarāṃ patnīṃ viṣṇurāhvayata dvijaiḥ || 7 ||
[Analyze grammar]

sāśanairāyayau tāvadbhṛgurviṣṇumuvāca ha |
bhṛguruvāca |
viṣṇo svarā tvayāhūtā āyāti na hi satvarā || 8 ||
[Analyze grammar]

muhūrttātikramaścāyaṃ kāryo dīkṣāvidhiḥ katham |
viṣṇuruvāca |
nāyāti cetsvarā śīghraṃ gāyatryatra vidhīyatām || 9 ||
[Analyze grammar]

eṣāpi na bhavatyasya bhāryā kiṃ puṇyakarmaṇi |
nārada uvāca |
evameva hi rudro'pi viṣṇorvākyamamodata || 10 ||
[Analyze grammar]

tacchrutvā sa bhṛgurvākyaṃ gāyatrīṃ brahmaṇastadā |
niveśya dakṣiṇe bhāge dīkṣāvidhimathākarot || 11 ||
[Analyze grammar]

yāvaddīkṣāvidhiṃ tasya vidheścakrurvidhānataḥ |
tāvadabhyāyayau tatra svarā yajñasthale nṛpa || 12 ||
[Analyze grammar]

tatastāṃ dīkṣitāṃ dṛṣṭvā gāyatrīṃ brahmaṇā saha |
sapatnīrṣāparā krodhātsvarā vacanamabravīt || 13 ||
[Analyze grammar]

svarovāca |
apūjyā yatra pūjyante pūjyānāṃ ca vyatikramaḥ |
trīṇi tatra bhaviṣyaṃti durbhikṣaṃ maraṇaṃ bhayam || 14 ||
[Analyze grammar]

mamāsane kaniṣṭheyaṃ bhavadbhiḥ sanniveśitā |
tasmātsarve jaḍībhūtā nānārūpā bhaviṣyatha || 15 ||
[Analyze grammar]

idaṃ ca dakṣiṇebhāge hyupaviṣṭā madāsane |
tasmāllokaiḥ sadā'dṛśyā tanurvahatu nimnagā || 16 ||
[Analyze grammar]

nārada uvāca |
tatastacchāpamākarṇya gāyatrī kaṃpitā tadā |
samutthāyāśapaddevairvāryamāṇāpi tāṃ svarām || 17 ||
[Analyze grammar]

tava bharttā yathā brahmā mamāpyeṣa tathā khalu |
vṛthāśapastvaṃ yasmānmāṃ bhava tvamapi nimnagā || 18 ||
[Analyze grammar]

nārada uvāca |
tato hāhākṛtāḥ sarve śivaviṣṇumukhāḥ surāḥ |
tadā lokatrayaṃ hyetadvināśaṃ yāsyati dhruvam || 19 ||
[Analyze grammar]

devā ūcuḥ |
devi sarve vayaṃ śaptā brahmādyā yattvayādhunā |
yadi sarve jaḍībhūtā bhaviṣyāmo'tra nimnagāḥ || 20 ||
[Analyze grammar]

tadā lokatrayaṃ hyetadvināśaṃ yāsyati dhruvam |
avivekaḥ kṛtastasmācchāpo'yaṃ vinivartyatām || 21 ||
[Analyze grammar]

svarovāca |
nārcito hi gaṇādhyakṣo yajñādau yatsurottamāḥ |
tasmādvighnaṃ samutpannaṃ matkrodhajamidaṃ khalu || 22 ||
[Analyze grammar]

nāpi madvacanaṃ hyetadasatyaṃ jāyate khalu |
tasmātsvāṃśairjaḍībhūtā yūyaṃ bhavata nimnagāḥ || 23 ||
[Analyze grammar]

āvāmapi sapatnyau ca svāṃśābhyāmapi nimnage |
bhaviṣyāvo'tra vai devāḥ paścimābhimukhāvahe || 24 ||
[Analyze grammar]

nārada uvāca |
iti tadvacanaṃ śrutvā brahmaviṣṇumaheśvarāḥ |
jaḍībhūtābhavannadyaḥ svāṃśaireva tadā nṛpa || 25 ||
[Analyze grammar]

tatra viṣṇurabhūtkṛṣṇa veṇyā devo maheśvaraḥ |
brahmā kakudminīgaṃgā pṛthagevābhavattadā || 26 ||
[Analyze grammar]

devā svānapitānaṃśānjaḍīkṛtvā vicakṣaṇāḥ |
sahyādriśikharebhyastāḥ pṛthagāsansunimnagāḥ || 27 ||
[Analyze grammar]

devāṃśaiḥ pūrvavāhinyo babhūvuḥ saritāṃ varāḥ |
gāyatrī ca svarā caiva paścimābhimukhe tadā || 28 ||
[Analyze grammar]

yogenābhavatāṃ nadyau sāvitrīti prathāṃ gate |
brahmaṇā sthāpitau tatra yajñe hariharāvubhau || 29 ||
[Analyze grammar]

mahābalātibalinau nāmnā devau babhūvatuḥ |
tayornadyostu māhātmyaṃ nāhaṃ vaktuṃ kṣamo nṛpa |
yayurbrahmādayo devāḥ svāṃśaistiṣṭhaṃti cāpagāḥ || 30 ||
[Analyze grammar]

kṛṣṇodbhavaṃ pāpaharaṃ paraṃ yaḥ śṛṇoti yaḥ śrāvayate ca bhaktyā |
syāttasya puṇyā sakalākriyāpi taddarśanasnānasamudbhavaṃ phalam || 31 ||
[Analyze grammar]

iti śrīpādmemahāpurāṇe paṃcapaṃcāśatsahasrasaṃhitāyāmuttarakhaṃḍe kārtikamāhātmye satya bhāmāsaṃvādekṛṣṇāveṇyāmāhātmyavarṇanonāma ekādaśādhikaśatatamo'dhyāyaḥ || 111 ||
[Analyze grammar]