Chapter 110

[English text for this chapter is available]

dharmadatta uvāca |
jayaśca vijayaścaiva viṣṇordvāsthau mayā śrutau |
kiṃtu tābhyāṃ purā cīrṇaṃ yasmāttadrūpadhāriṇau || 1 ||
[Analyze grammar]

gaṇāvūcatuḥ |
tṛṇabiṃdostu kanyāyāṃ devahūtyāṃ purā dvija |
kardamasya tu dṛṣṭyaiva putrau dvau saṃbabhūvatuḥ || 2 ||
[Analyze grammar]

jyeṣṭho jayaḥ kaniṣṭho'bhūdvijayaśceti nāmataḥ |
anyasyāmabhavatpaścātkapilo yogadharmavit || 3 ||
[Analyze grammar]

jayaśca vijayaścaiva viṣṇubhaktiratau sadā |
saṃniyamyeṃdriyagrāmaṃ dharmaśīlau babhūvatuḥ || 4 ||
[Analyze grammar]

nityamaṣṭākṣarī jāpyau viṣṇuvratakarāvubhau |
sākṣātkāraṃ dadau viṣṇustayornityārcane sadā || 5 ||
[Analyze grammar]

maruttena kadācittāvāhūtau yajñakarmaṇi |
jagmaturyajñakuśalau devarṣigaṇasevitau || 6 ||
[Analyze grammar]

jayastatrābhavadbrahmā yājako vijayo'bhavat |
tato yajñavidhiṃ kṛtsnaṃ paripūrṇaṃ ca cakratuḥ || 7 ||
[Analyze grammar]

maruto'vabhṛthasnātastābhyāṃ vittaṃ dadau bahu |
tatsamādāya tau vittaṃ jagmatuḥ svāśramaṃ prati || 8 ||
[Analyze grammar]

yajanāya tadā viṣṇostuṣṭyarthaṃ tau tadā mune |
taddhanaṃ vibhajaṃto vai pasparddhāte parasparam || 9 ||
[Analyze grammar]

jayo'bravītsamo bhāgaḥ kriyatāmiti tatra saḥ |
vijayaścābravīttatra yallabdhaṃ yena tasya tat || 10 ||
[Analyze grammar]

tato jayo'śapatkrodhādvijayaṃ kṣubdhamānasaḥ |
gṛhītvā na dadāsyetattasmādgrāho bhaveti tam || 11 ||
[Analyze grammar]

vijayastasya taṃ śāpaṃ śrutvā so'pyaśapacca tam |
madabhrāṃtośapadyasmāttasmānmātaṃgatāṃ vraja || 12 ||
[Analyze grammar]

tau tathā cakhyaturviṣṇuṃ dṛṣṭvā nityārcane vibhum |
śāpayostunivṛttiṃ tau yayācāte ramāpatim || 13 ||
[Analyze grammar]

bhaktāvāvāṃ kathaṃ deva grāhamāṃtagayonigau |
bhaviṣyāvaḥ kṛpāsiṃdho tacchāpo vinivartyatām || 14 ||
[Analyze grammar]

śrībhagavānuvāca |
madbhaktayorvaco'satyaṃ na kadācidbhaviṣyati |
mayāpi nānyathā kartuṃ śakyate tatkadācana || 15 ||
[Analyze grammar]

prahlādavacanātstaṃbha'pyāvirbhūto hyahaṃ purā |
tathāṃbarīṣavākyena jāto mārge svayaṃ kila || 16 ||
[Analyze grammar]

tasmāddhruvamimau śāpāvanubhūya svayaṃkṛtau |
labhetāṃ matpadaṃ nityamityuktvāṃtardadhe hariḥ || 17 ||
[Analyze grammar]

gaṇāvūcatuḥ |
tatastau grāhamātaṃgā babhūtāṃ gaṃḍakī taṭe |
jātismarau ca tadyonyāmapi viṣṇuvrate sthitau || 18 ||
[Analyze grammar]

kadācitsa gajaḥ snātuṃ kārtike gaṃḍakīṃ gataḥ |
tāvajjagrāha ca grāhaḥ saṃsmarañchāpakāraṇam || 19 ||
[Analyze grammar]

grāhagṛhīto'sau nāgaḥ saṃsmāra śrīpatiṃ tadā |
tāvadāvirabhūdviṣṇuḥ śaṃkhacakragadādharaḥ || 20 ||
[Analyze grammar]

tṝtastau grāhamātaṃgau cakraṃ kṣiptvā samuddhṛtau |
dattvā ca nijasārūpyaṃ vaikuṃṭhamanayadvibhuḥ || 21 ||
[Analyze grammar]

tadāprabhṛti tatsthānaṃ harikṣetramiti śrutam |
cakrasaṃgharṣaṇādyasminpāṣāṇo'pi hi lāṃchitaḥ || 22 ||
[Analyze grammar]

tāvimau viśrutau loke jayaśca vijayaśca ha |
nityaṃ viṣṇupriyau dvāḥsthau pṛṣṭau yau hi tvayā dvija || 23 ||
[Analyze grammar]

atastvamapi dharmajña nityaṃ viṣṇuvrate sthitaḥ |
tyaktamātsaryadaṃbho hi bhava svasamadarśanaḥ || 24 ||
[Analyze grammar]

tulāmakarameṣeṣu prātaḥsnāyī sadā bhava |
ekādaśīvrate tiṣṭha tulasīvanapālakaḥ || 25 ||
[Analyze grammar]

brāhmaṇānapi gāścāpi vaiṣṇavāṃśca sadā bhaja |
masūrāścāranālāśca vṛṃtākānapi khāda mā || 26 ||
[Analyze grammar]

evaṃ tvamapi dehāṃte tadviṣṇoḥ paramaṃ padam |
prāpnoṣi dharmadatta tvaṃ tadbhaktyaiva yathā vayam || 27 ||
[Analyze grammar]

tavājanmavratāttasmādviṣṇusaṃtuṣṭikārakāt |
na yajñā na ca dānāni na tīrthānyadhikāni vai || 28 ||
[Analyze grammar]

dhanyo'si viprāgrya yatastvayaitadvrataṃ kṛtaṃ tuṣṭikaraṃ jagadguroḥ |
yatpuṇyabhāgāptaphalaṃ murāreḥ praṇīyatesmābhiriyaṃ salokatām || 29 ||
[Analyze grammar]

nārada uvāca |
itthaṃ tau dharmadattaṃ tamupadiśya vimānagau |
tayā kalahayā sārddhaṃ vaikuṃṭhabhavanaṃ gatau || 30 ||
[Analyze grammar]

dharmadattopyasau jātapratyayastadvrate sthitaḥ |
dehāṃte tadvibhoḥ sthānaṃ bhāryābhyāmanvito'bhyagāt || 31 ||
[Analyze grammar]

itihāsamimaṃ purābhavaṃ śṛṇute yaśca pumānyathāvidhi |
harisaṃnidhikāriṇīṃ matiṃ labhate'sau kṛpayā jagadguroḥ || 32 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāmuttara |
khaṇḍe kārtikamāhātmye śrīkṛṣṇasatyabhāmāsaṃvāde kalahopākhyāne gaṇapūrvapuṇyavarṇanonāma daśādhiśatatamo'dhyāyaḥ || 110 ||
[Analyze grammar]