Chapter 106

[English text for this chapter is available]

pṛthuruvāca |
setihāsamimaṃ brahmanmāhātmyaṃ kathitaṃ tvayā |
atyāścaryakaraṃ samyaktulasyāstu śrutaṃ mahat || 1 ||
[Analyze grammar]

yadūrjavratinaḥ puṃsaḥ phalaṃ mahadudāhṛtam |
tatpunarbrūhi māhātmyaṃ kena cīrṇamidaṃ katham || 2 ||
[Analyze grammar]

nārada uvāca |
āsītsahyādriviṣaye karavīrapure purā |
brāhmaṇo dharmavitkaściddharmadatto'tiviśrutaḥ || 3 ||
[Analyze grammar]

viṣṇuvratakaraḥ śaśvadviṣṇupūjārataḥ sadā |
dvādaśākṣaravidyāyāṃ japaniṣṭho'tithipriyaḥ || 4 ||
[Analyze grammar]

kadācitkārtike māsi harijāgaraṇāya saḥ |
rātryā turyāṃśaśeṣāyāṃ jagāma harimaṃdiram || 5 ||
[Analyze grammar]

haripūjopakaraṇānpragṛhya vrajatā tadā |
tena dṛṣṭā samāyātā rākṣasī bhīmaniḥsvanā || 6 ||
[Analyze grammar]

vakradaṃṣṭrānanā jihvā nimagnā raktalocanā |
digaṃbarā śuṣkamāṃsā laṃboṣṭhī ghargharasvanā || 7 ||
[Analyze grammar]

tāṃ dṛṣṭvā bhayavitrastaḥ kaṃpitāvayavastadā |
pūjopakaraṇairvegātpayobhiścāhanadbhayāt || 8 ||
[Analyze grammar]

saṃsmṛtya ca harernāma tulasīyutavāriṇā |
sā hatā pātakaṃ tasmāttasyāḥ sarvamagātkṣayam || 9 ||
[Analyze grammar]

atha saṃsmṛtya sā pūrvajanmakarmavipākajam |
svāṃ daśāmabravītsarvāṃ daṃḍavattaṃ praṇamya sā || 10 ||
[Analyze grammar]

kalahovāca |
pūrvakarmavipākena daśāmetāṃ gatā hyaham |
tatkathaṃ tu punarvipra yāmyuttamagatiṃ śubhām || 11 ||
[Analyze grammar]

nārada uvāca |
tāṃ dṛṣṭvā praṇatāmagre vadamānāṃ svakarma tat |
atīva vismito viprastadā vacanamabravīt || 12 ||
[Analyze grammar]

dharmadatta uvāca |
kena karmavipākena tvaṃ daśāmīdṛśīṃ gatā |
kutastvaṃ kā ca kiṃ śīlā tatsarvaṃ kathayasva me || 13 ||
[Analyze grammar]

kalahovāca |
saurāṣṭranagare brahmanbhikṣunāmābhavaddvijaḥ |
tasyā'haṃ gṛhiṇī pūrvaṃ kalahākhyāti niṣṭhurā || 14 ||
[Analyze grammar]

na kadācinmayā bharturvacasāpi śubhaṃ kṛtam |
nārpitaṃ tasya miṣṭānnaṃ bharturvacanabhaṃgayā || 15 ||
[Analyze grammar]

kalahapriyayā nityaṃ bhayodvignastadā dvijaḥ |
pariṇetuṃ tadā'nyā sa matiṃ cakre patirmama || 16 ||
[Analyze grammar]

tato garaṃ samādāya prāṇāstyaktā mayā dvija |
atha badhvā badhyamānāṃ māṃ vininyuryamānugāḥ || 17 ||
[Analyze grammar]

yamaśca māṃ tadā dṛṣṭvā citraguptamapṛcchata |
yama uvāca |
anayā kiṃ kṛtaṃ karma citragupta vilokaya || 18 ||
[Analyze grammar]

prāpnotveṣā karmaphalaṃ śubhaṃ vāśubhameva ca |
citraguptastato vākyaṃ bhartsayansamuvāca ha || 19 ||
[Analyze grammar]

citragupta uvāca |
anayā tu śubhaṃ karma kṛtaṃ kiṃcinna vidyate |
miṣṭānnaṃ bhuktamanayā na bhartari tadarpitam || 20 ||
[Analyze grammar]

ataśca valgulī yonyāṃ svaviṣṭhādāvatiṣṭhatu |
bharturdveṣakarī tveṣā nityaṃ kalahakāriṇī || 21 ||
[Analyze grammar]

viṣṭhādā śūkarī yonyāṃ tatastiṣṭhatviyaṃ hare |
pākabhāṃḍe sadā bhuktaṃ nityaṃ caivānayā yataḥ || 22 ||
[Analyze grammar]

tasmāddoṣādbiḍālī tu svajātāpatyabhakṣiṇī |
bhartāramanayoddiśya hyātmaghātaḥ kṛto yataḥ || 23 ||
[Analyze grammar]

tasmātpretapiśāceṣu tiṣṭhatveṣātiniṃditā |
tataścaiva maruṃ deśaṃ prāpitavyā bhaṭaiḥ saha || 24 ||
[Analyze grammar]

tatra pretaśarīrākhyā ciraṃ tiṣṭhatviyaṃ tataḥ |
itthaṃ yonitrayaṃ tveṣā bhunaktvā śubhakāriṇī || 25 ||
[Analyze grammar]

kalahovāca |
sāhaṃ paṃcaśatābdāni pretadehe sthitā kila |
kṣutṛḍbhyāṃ pīḍitā nityaṃ duḥkhitā svena karmaṇā || 26 ||
[Analyze grammar]

tataḥ kṣutpīḍitā nityaṃ śarīraṃ vaṇijastvaham |
āyātā dakṣiṇaṃ deśaṃ kṛṣṇāveṇyāstu saṃgame || 27 ||
[Analyze grammar]

tattīrasaṃśritā yāvattāvattasya śarīrataḥ |
śivaviṣṇugaṇairdūramapākṛṣṭā balādaham || 28 ||
[Analyze grammar]

tataḥ kṣutkṣāmayā dṛṣṭo bhramaṃtyā tvaṃ mayā dvija |
prakṣiptatulasīvārisaṃsargagatapāpayā || 29 ||
[Analyze grammar]

tatkṛpāṃ kuru vipreṃdra kathaṃ muktimiyāmyaham |
yonitrayādati bhayādasmācca pretadehataḥ || 30 ||
[Analyze grammar]

itthaṃ niśamya kalahā vacanaṃ dvijaśca tatkarmapākabhavavismayaduḥkhayuktaḥ |
tadglānidarśanakṛpācalacittavṛttirdhyātvā ciraṃ sa vacanaṃ nijagāda duḥkhāt || 31 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe kārtikamāhātmye kalahopākhyānaṃnāma ṣaḍadhikaśatatamo'dhyāyaḥ || 106 ||
[Analyze grammar]