Chapter 44

[English text for this chapter is available]

yudhiṣṭhira uvāca |
phālgunasyāsite pakṣe kiṃnāmaikādaśībhavet |
kathayasva prasādena vāsudeva mamāgrataḥ || 1 ||
[Analyze grammar]

śrīkṛṣṇa uvāca |
nāradaḥ paripapraccha brahmāṇaṃ kamalāsanam |
phālgunasyāsite pakṣe vijayānāma nāmataḥ |
tasyāḥ puṇyaṃ dvijaśreṣṭha kathayasva prasādataḥ || 2 ||
[Analyze grammar]

brahmovāca |
śṛṇu nārada vakṣyāmi kathāṃ pāpaharāmparām |
yanna kasyacidākhyātaṃ mayaitadvijayāvratam || 3 ||
[Analyze grammar]

purātanaṃ vrataṃ hyetatpavitraṃ pāpanāśanam |
jayaṃ dadāti vijayā nṛpāṇāṃ vai na saṃśayaḥ || 4 ||
[Analyze grammar]

purā rāmo vanaṃ yāto varṣāṇyeva caturdaśa |
nyavasatpaṃcavaṭyāṃ tu sahasītaḥ salakṣmaṇaḥ || 5 ||
[Analyze grammar]

tatraiva vasatastasya rāmasya vijayātmanaḥ |
rāvaṇena hṛtā laulyādbhāryā sītā yaśasvinī || 6 ||
[Analyze grammar]

tena duḥkhena rāmo'pi mohamabhyāgatastadā |
bhramanjaṭāyuṣamatho dadarśa vigatāyuṣam || 7 ||
[Analyze grammar]

kabaṃdho nihataḥ paścādbhramatāraṇyamadhyataḥ |
sugrīveṇa samaṃ tasya sakhitvaṃ samapadyata || 8 ||
[Analyze grammar]

vānarāṇāmanīkāni rāmārthaṃsaṃgatāni ca |
tato hanumatā dṛṣṭā laṃkodyāne tu jānakī || 9 ||
[Analyze grammar]

rāmasaṃjñāpanaṃ tasyai dattaṃ karma mahatkṛtam |
punaḥ sametya rāmeṇa sarvaṃ tatra niveditam || 10 ||
[Analyze grammar]

atha śrutvā rāmacaṃdro vākyaṃ caiva hanūmataḥ |
sugrīvānumatenaiva prasthānaṃ samarocayat || 11 ||
[Analyze grammar]

saumitrekena puṇyena tīryate varuṇālayaḥ |
agādho nitarāmeṣa yādobhiśca samākulaḥ |
upāyaṃ naiva paśyāmi yenāsau sutaro bhavet || 12 ||
[Analyze grammar]

lakṣmaṇa uvāca |
ādidevastvamevāsi purāṇapuruṣottamaḥ |
bakadālbhyo muniścātra vartate dvīpamadhyataḥ || 13 ||
[Analyze grammar]

asmātsthānādyojanārddhamāśramastasya rāghava |
anye ca brāhmaṇāstatra bahavo raghunaṃdana || 14 ||
[Analyze grammar]

taṃ pṛccha gatvā rājeṃdra purāṇamṛṣipuṃgavam |
iti vākyaṃ tataḥ śrutvā lakṣmaṇasyātiśobhanam || 15 ||
[Analyze grammar]

jagāma rāghavo draṣṭuṃ bakadālbhyaṃ mahāmunim |
praṇanāma muniṃ mūrdhnā rāmo viṣṇumivāmaraḥ || 16 ||
[Analyze grammar]

jñātvā munistato rāmaṃ purāṇaṃ puruṣottamam |
kenāpi kāraṇenaiva praviṣṭo mānuṣīṃ tanum || 17 ||
[Analyze grammar]

uvāca sa ṛṣistuṣṭaḥ kuto rāma tavāgamaḥ || 18 ||
[Analyze grammar]

rāma uvāca |
tvatprasādādahaṃ vipra tīraṃ nadanadīpateḥ |
āgato'smi sasainyo'tra laṃkāṃ jetuṃ sarākṣasām || 19 ||
[Analyze grammar]

bhavataścānukūlatvāttīryate'bdhiryathā mayā |
tamupāyaṃ vada mune prasādaṃ kuru sāṃpratam || 20 ||
[Analyze grammar]

etasmātkāraṇādeva draṣṭuṃ tvāhamihāgataḥ |
rāmasya vacanaṃ śrutvā bakadālbhyo mahāmuniḥ || 21 ||
[Analyze grammar]

uvāca suprasannātmā rāmaṃ rājīvalocanam |
kartavyamadya te rāma vratānāṃ vratamuttamam || 22 ||
[Analyze grammar]

kṛtena yena sahasā vijayaste bhaviṣyati |
laṃkāṃ jitvā rākṣasāṃśca svacchāṃ kīrtimavāpsyasi || 23 ||
[Analyze grammar]

ekāgramānaso bhūtvā vratametatsamācara |
phālgunasyāsite pakṣe vijayaikādaśī bhavet || 24 ||
[Analyze grammar]

tasyā vratena he rāma vijayaste bhaviṣyati |
niḥsaṃśayaṃ samudraṃ tvaṃ tariṣyasi savānaraḥ || 25 ||
[Analyze grammar]

vidhistu śrūyatāṃ rājanvratasyāsya phalapradaḥ |
daśamyāṃ divase prāpte kuṃbhamekaṃ tu kārayet || 26 ||
[Analyze grammar]

haimaṃ vā rājataṃ vāpi tāmraṃ vāpyatha mṛnmayam |
sthāpayecchobhitaṃ caiva jalapūrṇaṃ sapallavam || 27 ||
[Analyze grammar]

saptadhānyānyadhastasya yavānupari vinyaset |
tasyopari nyaseddevaṃ haimaṃ nārāyaṇaṃ prabhum || 28 ||
[Analyze grammar]

ekādaśīdine prāpte prātaḥ snānaṃ samācaret |
niścalaṃ sthāpayetkuṃbhaṃ kaṃṭhamālyānulepanaiḥ || 29 ||
[Analyze grammar]

pūgīphalairnālikeraiḥ pūjayecca viśeṣataḥ |
gaṃdhairdhūpaiścadīpaiśca naivedyairvividhairapi || 30 ||
[Analyze grammar]

kuṃbhāgre taddinaṃ rāma nīyate satkathādibhiḥ |
rātrau jāgaraṇaṃ caiva tasyāgre kārayedbudhaḥ || 31 ||
[Analyze grammar]

prakāśayedghṛtadīpamakhaṃḍavratahetave |
dvādaśīdivase prāpte mārtaṃḍasyodaye sati || 32 ||
[Analyze grammar]

nītvā kuṃbhaṃ jaloddeśe nadyāḥ prasravaṇe tathā |
taḍāge sthāpayitvā taṃ pūjayitvā yathāvidhi || 33 ||
[Analyze grammar]

dadyātsadevaṃ taṃ kuṃbhaṃ brāhmaṇe vedapārage |
kuṃbhena saha rājeṃdra mahādānāni dāpayet || 34 ||
[Analyze grammar]

anenavidhinā rāma yūthapaiḥ saha saṃgataḥ |
kuru vrataṃ prayatnena vijayaste bhaviṣyati || 35 ||
[Analyze grammar]

iti śrutvā tato rāmo yathoktamakarottadā |
kṛte vrate sa vijayī babhūva raghunaṃdanaḥ || 36 ||
[Analyze grammar]

prāptā sītā jitā laṃkā paulastyo nihato raṇe |
anenavidhinā putra ye kurvaṃti narā vratam || 37 ||
[Analyze grammar]

ihalokajayaprāptiḥ paralokastathākṣayaḥ |
etasmātkāraṇātputra kartavyaṃ vijayāvratam || 38 ||
[Analyze grammar]

vijayāyāśca māhātmyaṃ sarvakilbiṣanāśanam |
paṭhanācchravaṇāccaiva vājapeyaphalaṃ labhet || 39 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe phālgunakṛṣṇāvijayāmāhātmyaṃnāma catuścatvāriṃśo'dhyāyaḥ || 44 ||
[Analyze grammar]