Chapter 40

[English text for this chapter is available]

yudhiṣṭhira uvāca |
pauṣasya kṛṣṇapakṣe tu kiṃ nāmaikādaśī bhavet |
kiṃ nāma ko vidhistasyā etadvistarato vada |
etadākhyāhi bho svāminko devastatra pūjyate || 1 ||
[Analyze grammar]

śrīkṛṣṇa uvāca |
kathayiṣyāmi rājeṃdra bhavataḥ snehabaṃdhanāt |
tuṣṭirme na tathā rājanyajñairbahuladakṣiṇaiḥ || 2 ||
[Analyze grammar]

yathā me tuṣṭirāyāti hyekādaśīvratena vai |
tasmātsarvaprayatnena karttavyo harivāsaraḥ || 3 ||
[Analyze grammar]

satyametanna vai mithyā dharmiṣṭhānāṃ viśārada |
pauṣasya kṛṣṇapakṣe yā saphalā nāma nāmataḥ || 4 ||
[Analyze grammar]

tasyāṃ nārāyaṇaṃ devaṃ pūjayecca yathāvidhi |
pūrveṇaiva vidhānena karttavyaikādaśī śubhā || 5 ||
[Analyze grammar]

nāgānāṃ ca yathā śeṣo pakṣiṇāṃ pannagāśanaḥ |
devānāṃ ca yathā viṣṇurdvipadānāṃ yathā dvijaḥ || 6 ||
[Analyze grammar]

vratānāṃ ca yathā rājanśreṣṭhā caikādaśī tithiḥ |
te janāścaiva bho rājanpūjyā vai sarvadā mama || 7 ||
[Analyze grammar]

harivāsarasaṃlīnāḥ kurvaṃtyekādaśīvratam |
ihaiva dhanasaṃyuktā mṛtā mokṣaṃ labhaṃti te || 8 ||
[Analyze grammar]

saphalāyāṃ phalai rājanpūjayennāmato harim |
nārikelaphalaiścaiva kramukairbījapūrakaiḥ || 9 ||
[Analyze grammar]

jaṃbīrairdāḍimaiścaiva tathā dhātrīphalaiḥ śubhaiḥ |
lavaṃgairbadarībhiśca tathāmraiśca viśeṣataḥ || 10 ||
[Analyze grammar]

pūjayeddevadeveśaṃ dhūpadīpaistathaiva ca |
saphalāyāṃ viśeṣeṇa dīpadānaṃ tu kārayet || 11 ||
[Analyze grammar]

rātrau jāgaraṇaṃ caiva karttavyaṃ saha vaiṣṇavaiḥ |
yāvannimeṣo netrasya tāvajjāgarti yo niśi || 12 ||
[Analyze grammar]

ekāgramanaso rājantasya puṇyaṃ śṛṇuṣva hi |
tatsamo nāsti yajño vai tīrthaṃ vā tatsamaṃ nahi || 13 ||
[Analyze grammar]

sarvavratāni rājeṃdra kalāṃ nārhaṃti ṣoḍaśīm |
evaṃ varṣasahasrāṇi tapasā naiva yatphalam || 14 ||
[Analyze grammar]

tatphalaṃ samavāpnoti yaḥ karoti hi jāgaram |
śrūyatāṃ rājaśārdūla saphalāyāḥ kathā śubhā || 15 ||
[Analyze grammar]

caṃpāvatīti vikhyātā purī māhiṣmatasya ca |
babhūvustasya rājarṣeḥ putrāḥ paṃca kumārakāḥ || 16 ||
[Analyze grammar]

teṣāṃ madhye tu jyeṣṭho vai mahāpāparataḥ sadā |
paradārābhicārī ca veśyāsaktaśca madyapaḥ || 17 ||
[Analyze grammar]

piturdravyaṃ tu tenaiva gamitaṃ pāpakarmaṇā |
asadvṛttirato nityaṃ bhūsurāṇāṃ tu niṃdakaḥ || 18 ||
[Analyze grammar]

vaiṣṇavānāṃ ca devānāṃ nityaṃ niṃdāṃ karoti saḥ |
īdṛśaṃ tu tato dṛṣṭvā putraṃ māhiṣmato nṛpaḥ || 19 ||
[Analyze grammar]

nāmnā tu luṃpaka iti rājaputreṣu cāpaṭhat |
rājyānniṣkāsitastena pitrā caiva tu baṃdhubhiḥ || 20 ||
[Analyze grammar]

sa caivaṃ parivāraistu tyaktaśca paripaṃthivat |
luṃpako'pi tathā tyaktaściṃtayāmāsa vai tadā || 21 ||
[Analyze grammar]

tyakto'haṃ bāṃdhavaiḥ pitrā rājyānniṣkāsitaḥ kila |
iti saṃciṃtyamāno'sau matiṃ pāpe tadākarot || 22 ||
[Analyze grammar]

mayā gaṃtavyamevāstu dāruṇe gahane vane |
tasmāccaiva puraṃ sarvaṃ luṃpayiṣyāmi vai pituḥ || 23 ||
[Analyze grammar]

ityevaṃ sa matiṃ kṛtvā luṃpako daivayogataḥ |
nirjagāma purāttasmādgato'sau gahane vane || 24 ||
[Analyze grammar]

jīvaghātarato nityaṃ steyadyūtakalānidhiḥ |
sarvaṃ ca nagaraṃ tena muṣitaṃ pāpakarmaṇā || 25 ||
[Analyze grammar]

steyābhigāmī nagare gṛhītaḥ sa niśācaraiḥ |
uvāca tānsuto'haṃ vai rājño māhiṣmatasya ca || 26 ||
[Analyze grammar]

sa tairmuktaḥ pāpakarmā cāgato vipinaṃ punaḥ |
āmiṣābhirato nityaṃ tarorvai phalabhakṣaṇe || 27 ||
[Analyze grammar]

āśramastasya duṣṭasya vāsudevasya saṃnidhau |
aśvattho varttate tatra jīrṇaśca bahuvārṣikaḥ || 28 ||
[Analyze grammar]

devatvaṃ tasya vṛkṣasya vipine vartate mahat |
tatraiva nivasaṃścaiva luṃpakaḥ pāpabuddhimān || 29 ||
[Analyze grammar]

gate bahutithe kāle kasyacitpuṇyasaṃcayāt |
pauṣasya kṛṣṇapakṣe tu daśamyāṃ divase tathā || 30 ||
[Analyze grammar]

phalāni bhuktvā vṛkṣāṇāṃ rātrau śītena pīḍitaḥ |
luṃpako nāma pāpiṣṭho vastrahīno gatekṣaṇaḥ || 31 ||
[Analyze grammar]

pīḍyamāno'tiśītena harivṛkṣasamīpataḥ |
na nidrā na sukhaṃ tasya gataprāṇa ivābhavat || 32 ||
[Analyze grammar]

āchādya daśanairāsyamevaṃ nītā niśākhilā |
bhānūdaye'pi pāpiṣṭho na lebhe cetanāṃ tadā || 33 ||
[Analyze grammar]

luṃpako gatasaṃjñastu saphalāyā dine tathā |
ravau madhyaṃgate caiva saṃjñāṃ lebhe sa luṃpakaḥ || 34 ||
[Analyze grammar]

itastato vilokyātha vyathitaśca tadāsanāt |
skhalatpadbhyāṃ pracalitaḥ khaṃjanniva muhurmuhuḥ || 35 ||
[Analyze grammar]

vanamadhye gatastatra kṣutkṣāmaḥ pīḍito'bhavat |
na śaktirjīvaghāte tu luṃpakasya durātmanaḥ || 36 ||
[Analyze grammar]

phalāni ca tadā rājannājahāra sa luṃpakaḥ |
yāvatsamāgatastatra tāvadastaṃ gato raviḥ || 37 ||
[Analyze grammar]

kiṃ bhaviṣyati tāteti sa vilāpaṃ cakāra ha |
phalāni tatra bhūrīṇi vṛkṣamūle nyaveśayat || 38 ||
[Analyze grammar]

ityuvāca phalairebhiḥ śrīpatistuṣyatāṃ hariḥ |
ityuktvā luṃpakaścaiva nidrāṃ lebhe na vai niśi || 39 ||
[Analyze grammar]

rātrau jāgaraṇaṃ mene viṣṇustasya durātmanaḥ |
phalaistu pūjanaṃ mene saphalāyāstathānagha || 40 ||
[Analyze grammar]

akasmādvratamevaitatkṛtavānvai sa luṃpakaḥ |
tena puṇyaprabhāvena prāptaṃ rājyamakaṃṭakam || 41 ||
[Analyze grammar]

sūryasyodayanaṃ yāvattāvadviṣṇurjagāma ha |
divi tatkālamutpannā vāguvācāśarīriṇī || 42 ||
[Analyze grammar]

rājyaṃ prāpsyasi putratvaṃ saphalāyāḥ prasādataḥ |
tathetyukte tu vacasi divyarūpadharo'bhavat || 43 ||
[Analyze grammar]

matirāsīttatastasya paramā vaiṣṇavī nṛpa |
divyābharaṇaśobhāḍhyo lebhe rājyamakaṃṭakam || 44 ||
[Analyze grammar]

kṛtaṃ rājyaṃ tu tenaivaṃ varṣāṇi daśapaṃca ca |
manodāstasyaputrāstu dārāḥ kṛṣṇaprasādataḥ || 45 ||
[Analyze grammar]

āśu rājyaṃ parityajya putre caiva samarpya ca |
gataḥ kṛṣṇasya sāṃnidhyaṃ yatra gatvā na śocati || 46 ||
[Analyze grammar]

evaṃ yaḥ kurute rājansaphalāvratamuttamam |
ihaloke sukhaṃ prāpya mṛto mokṣamavāpnuyāt || 47 ||
[Analyze grammar]

dhanyāste mānavā loke saphalāyāṃ ca ye ratāḥ |
teṣāṃ ca saphalaṃ janma nātra kāryā vicāraṇā || 48 ||
[Analyze grammar]

paṭhanācchravaṇāccaiva karaṇācca viśāṃpate |
rājasūyasya yajñasya phalamāpnoti mānavaḥ || 49 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde pauṣakṛṣṇāsaphalaikādaśīnāma |
catvāriṃśo'dhyāyaḥ || 40 ||
[Analyze grammar]