Chapter 67

[English text for this chapter is available]

śeṣa uvāca |
atha saumitrirāgatya jānakīṃ natavānmuhuḥ |
premagadgadayā śaṃsanvācaṃ rāmapraṇoditām || 1 ||
[Analyze grammar]

sītā samāgataṃ dṛṣṭvā lakṣmaṇaṃ vinayānvitam |
tanmukhādrāmasaṃdeśaṃ śrutvovāca vilajjitā || 2 ||
[Analyze grammar]

saumitre kathamāgacche rāmatyaktā mahāvane |
tiṣṭhāmi rāmaṃ smarantī vālmīkerāśrame tvaham || 3 ||
[Analyze grammar]

tasyā mukhoditaṃ vākyaṃ śrutvā saumitrirabravīt |
mātaḥ pativrate rāmastvāmākārayate muhuḥ || 4 ||
[Analyze grammar]

pativratā patikṛtaṃ doṣaṃ nānayate hṛdi |
tasmādāgaccha hi mayā sthitvā syaṃdana uttame || 5 ||
[Analyze grammar]

ityādi vacanaṃ śrutvā jānakī patidevatā |
manoroṣaṃ parityajya tasthau saumitriṇā rathe || 6 ||
[Analyze grammar]

tāpasīḥ sakalā natvā munīṃśca nigamojjvalān |
rāmaṃ smaraṃtī manasā rathe sthitvāgamatpurīm || 7 ||
[Analyze grammar]

krameṇa nagarīṃ prāptā mahārhābharaṇānvitā |
sarayūṃ saritaṃ prāpa yatra rāmaḥ svayaṃ sthitaḥ || 8 ||
[Analyze grammar]

rathāduttīrya lalitā lakṣmaṇena samanvitā |
rāmasya pādayorlagnā pativrataparāyaṇā || 9 ||
[Analyze grammar]

rāmastāmāgatāṃ dṛṣṭvā jānakīṃ premavihvalām |
sādhvi tvayā sahedānīṃ kurve yajñasamāpanam || 10 ||
[Analyze grammar]

vālmīkiṃ sā namaskṛtya tathānyānviprasattamān |
jagāma mātṛpadayoḥ sannatiṃ kartumutsukā || 11 ||
[Analyze grammar]

kauśalyā tāmathāyāṃtīṃ vīrasūṃ jānakīṃ priyām |
āśīrbhirabhisaṃyujya yayau harṣamanekadhā || 12 ||
[Analyze grammar]

kaikeyīpadayornamrāṃ vīkṣya vaidehaputrikām |
bhartrā saha ciraṃ jīva saputretyāśiṣaṃ vyadhāt || 13 ||
[Analyze grammar]

sumitrā svapadenamrāṃ vīkṣya vaidehaputrikām |
āśiṣaṃ vyadadhāttasyāḥ putrapautrapradāyinīm || 14 ||
[Analyze grammar]

sītā tāḥ sarvato natvā rāmacaṃdra priyā satī |
paramaṃ harṣamāpannā babhūva kila vāḍava || 15 ||
[Analyze grammar]

samāgatāṃ vīkṣya patnīṃ rāmacaṃdrasya kuṃbhajaḥ |
suvarṇapatnīṃ dhikkṛtya tāmadhāddharmacāriṇīm || 16 ||
[Analyze grammar]

rāmastadā yajñamadhye śuśubhe sītayā saha |
tārayānugato yadvacchaśīva śaradutprabhaḥ || 17 ||
[Analyze grammar]

prayogamakarottatra kāle prāpte manorame |
vaidehyā dharmacāriṇyā sarvapāpāpanodanam || 18 ||
[Analyze grammar]

sītayā sahitaṃ rāmaṃ prasaktaṃ yajñakarmaṇi |
nirīkṣya jahṛṣustatra kautukena samanvitāḥ || 19 ||
[Analyze grammar]

vasiṣṭhaṃ prāha sumatiṃ rāmastatra kratau vare |
kiṃ kartavyaṃ mayā svāminnataḥ paramavaśyakam || 20 ||
[Analyze grammar]

rāmasya vacanaṃ śrutvā guruḥ prāha mahāmatiḥ |
brāhmaṇānāṃ prakartavyā pūjā saṃtoṣakārikā || 21 ||
[Analyze grammar]

maruttena kratuḥ sṛṣṭaḥ pūrvaṃ saṃbhārasaṃbhṛtaḥ |
brāhmaṇāstatra vittādyaistoṣitā abhavaṃstadā || 22 ||
[Analyze grammar]

atyaṃtaṃ vittasaṃbhāraṃ netuṃ viprāśakannahi |
prākṣipanhimavaddeśe vittabhārāsahā dvijāḥ || 23 ||
[Analyze grammar]

tasmāttvamapi rājāgrya lakṣmīvānnṛpasattama |
dehi dānādi viprebhyo yathā syātprītiruttamā || 24 ||
[Analyze grammar]

etacchrutvā sa rājāgryaḥ pūjyaṃ matvā ghaṭodbhavam |
prathamaṃ pūjayāmāsa brahmaputraṃ tapodhanam || 25 ||
[Analyze grammar]

anekaratnasaṃbhāraiḥ svarṇabhārairanekadhā |
deśairjanaiḥ parivṛtairatyaṃtaprītidāyakaiḥ || 26 ||
[Analyze grammar]

agastyaṃ pūjayāmāsa sapatnīkaṃ manoramam |
tathaiva ratnaiḥ svarṇaiśca deśaiśca vividhairapi || 27 ||
[Analyze grammar]

vyāsaṃ satyavatīputraṃ tathaiva samapūjayat |
cyavanaṃ bhāryayā sākaṃ suratnaiḥ samapūjayat || 28 ||
[Analyze grammar]

anyānapi munīnsarvānṛtvijastapasāṃ nidhīn |
pūjayāmāsa ratnaughaiḥ svarṇabhārairanekadhā || 29 ||
[Analyze grammar]

adāttadā kratau rāmo viprebhyo bhūridakṣiṇām |
lakṣaṃlakṣaṃ suvarṇasya pratyekaṃ tvagrajanmane || 30 ||
[Analyze grammar]

dīnāṃdhakṛpaṇebhyaśca dadau dānamanekadhā |
yathāsaṃtoṣavihitairvittai ratnairmanoharaiḥ || 31 ||
[Analyze grammar]

vāsāṃsi ca vicitrāṇi bhojanāni mṛdūni ca |
tatra prādādyathāśāstraṃ sarveṣāṃ prītidāyakam || 32 ||
[Analyze grammar]

hṛṣṭapuṣṭajanākīrṇaṃ sarvasattvopabṛṃhitam |
atyaṃtamabhavaddhṛṣṭaṃ puraṃ puṃstrīsamāvṛtam || 33 ||
[Analyze grammar]

dānaṃ dadaṃtaṃ sarveṣāṃ vīkṣya kuṃbhodbhavo muniḥ |
atyaṃtaparamaprītiṃ yayau kratuvare dvijaḥ || 34 ||
[Analyze grammar]

tadābhiṣekasnānārthaṃ pānīyamamṛtopamam |
ānetuṃ ca catuḥṣaṣṭi nṛpānsastrīnsamāhvayat || 35 ||
[Analyze grammar]

rāmastu sītayā sārddhamānetumudakaṃ yayau |
ghaṭena svarṇavarṇena sarvālaṃkāraśobhayā || 36 ||
[Analyze grammar]

saumitrirapyūrmilayā māṃḍavyā bharato nṛpaḥ |
śatrughnaḥ śrutakīrtyā ca kāṃtimatyā ca puṣkalaḥ || 37 ||
[Analyze grammar]

subāhuḥ satyavatyā ca satyavānvīrabhūṣayā |
sumadastatra satkīrtyā rājñyā ca vimalo nṛpaḥ || 38 ||
[Analyze grammar]

rājāvīramaṇistatra śrutavatyā manojñayā |
lakṣmīnidhiḥ komalayā riputāpoṃgasenayā || 39 ||
[Analyze grammar]

vibhīṣaṇo mahāmūrtyā pratāpāgryaḥ pratītayā |
ugrāśvaḥ kāmagamayā nīlaratnodhiramyayā || 40 ||
[Analyze grammar]

surathaḥ sumanohāryā tathā mohanayā kapiḥ |
ityādīnnṛpatīnvipro vasiṣṭhaḥ prāhiṇonmuniḥ || 41 ||
[Analyze grammar]

vasiṣṭhaḥ sarayūṃ gatvā śivapuṇyajalāplutām |
udakaṃ maṃtrayāmāsa vedamaṃtreṇa maṃtravit || 42 ||
[Analyze grammar]

payaḥ punīhyamuṃ vāhamudakena manohṛtā |
yajñārthaṃ rāmacaṃdrasya sarvalokaikarakṣituḥ || 43 ||
[Analyze grammar]

udakaṃ tanmunispṛṣṭaṃ sarve rāmādayo nṛpāḥ |
ājahrurmaṃḍapatale vipravaryairupastute || 44 ||
[Analyze grammar]

payobhirnirmalaiḥ snāpya vājinaṃ kṣīrasannibham |
maṃtreṇa maṃtrayāmāsa rāma hastena kuṃbhajaḥ || 45 ||
[Analyze grammar]

punīhi māṃ mahāvāha asminbrahmasamākule |
tvanmedhenākhilā devāḥ prīṇaṃtu paritoṣitāḥ || 46 ||
[Analyze grammar]

ityuktvā sa nṛpo rāmaḥ sītayā samamaspṛśat |
tadā sarve dvijāścitramamanyaṃta kutūhalāt || 47 ||
[Analyze grammar]

parasparamavocaṃste yannāmasmaraṇānnarāḥ |
mahāpāpātpramucyaṃte sa rāmaḥ kiṃ vadatyaho || 48 ||
[Analyze grammar]

ityuktavati bhūmīśe rāme kuṃbhodbhavo muniḥ |
karavālaṃ cābhimaṃtrya dadau rāmakare muniḥ || 49 ||
[Analyze grammar]

karavāle dhṛte spṛṣṭe rāmeṇa sa hayaḥ kratau |
paśutvaṃ tu vihāyāśu divyarūpamapadyata || 50 ||
[Analyze grammar]

vimānavaramārūḍhaścāpsarobhiḥ samaṃtataḥ |
cāmarairvījyamānaśca vaijayaṃtyā vibhūṣitaḥ || 51 ||
[Analyze grammar]

tadā taṃ vājitāṃ tyaktvā divyarūpadharaṃ varam |
vīkṣya lokāḥ kratau sarve vismayaṃ prāpnuvaṃstadā || 52 ||
[Analyze grammar]

tadā rāmaḥ svayaṃ jānañjñāpayansarvato narān |
papraccha divyarūpaṃ taṃ suraṃ paramadhārmikaḥ || 53 ||
[Analyze grammar]

kastvaṃ divyavapuḥ prāptaḥ kasmāttvaṃ vājitāṃ gataḥ |
kathaṃ surastrīsahitaḥ kiṃ cikīrṣasi tadvada || 54 ||
[Analyze grammar]

rāmasya vacanaṃ śrutvā devaḥ provāca bhūmipam |
hasanmegharavāṃ vāṇīmavadatsumanoharām || 55 ||
[Analyze grammar]

tavājñātaṃ na sarvatra bāhyābhyaṃtaracāriṇaḥ |
tathāpi pṛcchate tubhyaṃ kathayāmi yathātatham || 56 ||
[Analyze grammar]

ahaṃ purābhave rāma dvijaḥ paramadhārmikaḥ |
acaraṃ pratikūlaṃ vai vedasya riputāpana || 57 ||
[Analyze grammar]

kadāciddhutapāpāyāstīre'haṃ gatavānpurā |
anekavṛkṣalalite sarvatrasumanorame || 58 ||
[Analyze grammar]

tatra snātvā pitṝṃstṛptvā dānaṃ dattvā yathāvidhi |
dhyānaṃ tava mahābāho kṛtavānvedasaṃmitam || 59 ||
[Analyze grammar]

tadā janāḥ samāyātā bahavastatra bhūpate |
teṣāṃ pravaṃcanārthāya daṃbhamenamakāriṣam || 60 ||
[Analyze grammar]

anekakratusaṃbhāraiḥ pūrṇamajiramuttamam |
vāsobhiśchāditaṃ ramyaṃ caṣālādiyutaṃ mahat || 61 ||
[Analyze grammar]

agnihotrodbhavodhūmaḥ sarvato nabhasoṃgaṇam |
cakāra ramyamatulaṃ citrakārivapurdharaḥ || 62 ||
[Analyze grammar]

anekatilakaśrībhiḥ śobhitāṃgo mahattapāḥ |
darbhaśobhaḥ samitpāṇirdaṃbho mūrtidharaḥ kimu || 63 ||
[Analyze grammar]

durvāsāstatra svacchaṃdaṃ paryaṭañjagatītalam |
prāpa tatra mahātejā dhūtapāpasarittaṭe || 64 ||
[Analyze grammar]

dadarśa māṃ daṃbhakaraṃ maunadhāriṇamagrataḥ |
anarghyakaramunmattamasvāgatavacaḥ karam || 65 ||
[Analyze grammar]

dṛṣṭvātīva krudhākrāṃtaḥ samudra iva parvaṇi |
śaśāpāsau munistīvro daṃbhinaṃ māṃ mahāmatiḥ || 66 ||
[Analyze grammar]

daṃbhaṃ karoṣi cettīre saritastvaṃ sudurmate |
tasmātprāpnuhi nirvācyaṃ paśutvaṃ tāpasādhama || 67 ||
[Analyze grammar]

śāpaṃ pradattaṃ saṃśrutya duḥkhito'haṃ tadābhavam |
agrāhiṣaṃ pade tasya munerdurvāsasaḥ kila || 68 ||
[Analyze grammar]

tadā me kṛtavānrāma dvijo'nugrahamuttamam |
vājitāṃ prāpnuhi makhe rājarājasya tāpasa || 69 ||
[Analyze grammar]

paścāttaddhastasaṃparkādyāhi tatparamaṃ padam |
divyaṃ vapurmanohāri dhṛtvā daṃbhavivarjitam || 70 ||
[Analyze grammar]

tena śāpopisaṃdiṣṭo mamānugrahatāṃ gataḥ |
yadahaṃ tava hastasya sparśaṃ prāpto manoramam || 71 ||
[Analyze grammar]

yadeva rāma devādidurlabhaṃ bahujanmabhiḥ |
tatte'haṃ karajasparśaṃ prāptavāniha durlabham || 72 ||
[Analyze grammar]

ājñāpaya mahārāja tvatprasādādahaṃ mahat |
gacchāmi śāśvataṃ sthānaṃ tava duḥkhādivarjitam || 73 ||
[Analyze grammar]

na yatra śoko na jarā na mṛtyuḥ kālavibhramaḥ |
tatsthānaṃ deva gacchāmi tvatprasādānnarādhipa || 74 ||
[Analyze grammar]

ityuktvā taṃ parikramya vimānavaramāruhat |
anekaratnakhacitaṃ sarvadevādhivaṃditam || 75 ||
[Analyze grammar]

gato'sau śāśvatasthānaṃ rāmapādaprasādataḥ |
punarāvṛttirahitaṃ śokamohavivarjitam || 76 ||
[Analyze grammar]

tena tatkathitaṃ śrutvā rāmaṃ jñātvetare janāḥ |
vismayaṃ prāpire sarve parasparamudunmadāḥ || 77 ||
[Analyze grammar]

śṛṇu dvijamahābuddhe daṃbhenāpi smṛto hariḥ |
dadāti mokṣaṃ sutarāṃ kiṃ punardaṃbhavarjanāt || 78 ||
[Analyze grammar]

yathākathaṃcidrāmasya kartavyaṃ smaraṇaṃ param |
yena prāpnoti paramaṃ padaṃ devādidurlabham || 79 ||
[Analyze grammar]

taccitraṃ vīkṣya munayaḥ kṛtārthaṃ menire nijam |
yadrāmacaraṇaprekṣā karasparśapavitritam || 80 ||
[Analyze grammar]

gate tasminsure svargaṃ hayarūpadhare purā |
uvāca rāmastapasāṃ nidhīnvedaviduttamān || 81 ||
[Analyze grammar]

kiṃ kartavyaṃ mayābrahmanhayo naṣṭo gataḥ sukham |
homaḥ kathaṃ purobhāvī sarvadaivatatarpakaḥ || 82 ||
[Analyze grammar]

yathā syātsurasaṃtṛptiryathā me makha uttamaḥ |
tathā kurvaṃtu munayo yathā me syādvidhiśrutam || 83 ||
[Analyze grammar]

iti vākyaṃ samāśrutya jagāda munisattamaḥ |
vasiṣṭhaḥ sarvadevānāṃ cittābhijñānakovidaḥ || 84 ||
[Analyze grammar]

karpūramāhara kṣipraṃ yena devāḥ svayaṃ purā |
prāpya havyaṃ grahīṣyaṃti madvākyapreritādhunā || 85 ||
[Analyze grammar]

iti vākyaṃ samākarṇya rāmaḥ kṣipramupāharat |
karpūraṃ bahudevānāṃ prītyarthaṃ bahuśobhanam || 86 ||
[Analyze grammar]

tadā muniḥ prahṛṣṭātmā devānāhvayadadbhutān |
te sarve tatkṣaṇātprāptāḥ svaparīvārasaṃvṛtāḥ || 87 ||
[Analyze grammar]

iti śrīpadmapurāṇe pātālakhaṇḍe śeṣavātsyāyanasaṃvāde rāmāśvamedhe |
yajñaprāraṃbhonāma saptaṣaṣṭitamo'dhyāyaḥ || 67 ||
[Analyze grammar]