Chapter 13

[English text for this chapter is available]

śeṣa uvāca |
iti vākyaṃ samākarṇya sumadasya taponidheḥ |
jagaduḥ kāmasenāstaṃ raṃbhādyapsaraso mudā || 1 ||
[Analyze grammar]

tvattapobhirvayaṃ kāṃta prāptāḥ sarvavarāṃganāḥ |
tāsāṃ yauvanasarvasvaṃ bhuṃkṣva tyaja tapaḥphalam || 2 ||
[Analyze grammar]

iyaṃ ghṛtācī subhagā caṃpakābhaśarīrabhṛt |
karpūragaṃdhalalitaṃ bhunaktu tvanmukhāmṛtam || 3 ||
[Analyze grammar]

etāṃ mahābhāga suśobhivibhramāṃ |
manoharāṃgīṃ ghanapīnasatkucām |
kāṃtopabhuṃkṣvāśu nijograpuṇyataḥ |
prāptāṃ punastvaṃ tyaja duḥkhajātam || 4 ||
[Analyze grammar]

māmapyanarghyābharaṇopaśobhitāṃ |
maṃdāramālāpariśobhivakṣasam |
nānāratākhyānavicāracaṃcurāṃ |
dṛḍhaṃ yathā syātpariraṃbhaṇaṃ kuru || 5 ||
[Analyze grammar]

pibāmṛtaṃ māmakavaktranirgataṃ |
vimānamāruhya varaṃ mayā saha |
sumeruśṛṃgaṃ bahupuṇyasevitaṃ |
saṃprāpya bhogaṃ kuru sattapaḥ phalam || 6 ||
[Analyze grammar]

tilottamā yauvanarūpaśobhitā |
gṛhṇātu te mūrdhani tāpavāraṇam |
sucāmarau saṃtatadhārayāṃkitau |
gaṃgāpravāhāviva suṃdarottama || 7 ||
[Analyze grammar]

śṛṇuṣva bhoḥ kāmakathāṃ manoharāṃ |
pibāmṛtaṃ devagaṇādivāṃchitam |
udyānamāsādya ca naṃdanābhidhaṃ |
varāṃganābhirviharaṃ kuru prabho || 8 ||
[Analyze grammar]

ityuktamākarṇya mahāmatirnṛpo |
vicārayāmāsa kuto hyupasthitāḥ |
mayā susṛṣṭāstapasā surāṃganāḥ |
pratyūha evātra vidheyameṣa kim || 9 ||
[Analyze grammar]

iti ciṃtāturo rājā svāṃte saṃciṃtayansudhīḥ |
jagāda matimānvīraḥ sumado devatāṅganāḥ || 10 ||
[Analyze grammar]

yūyaṃ tu mamacittasthā jaganmātṛsvarūpakāḥ |
mayā saṃciṃtyate yā hi sāpi tvadrūpiṇī matā || 11 ||
[Analyze grammar]

idaṃ tucchaṃ svargasukhaṃ tvayoktaṃ savikalpakam |
matsvāminī mayā bhaktyā sevitā dāsyate varam || 12 ||
[Analyze grammar]

yatkṛpāto vidhiḥ satyalokaṃ prāpto mahānabhūt |
sā me dāsyati sarvaṃ hi bhaktaduḥkhāṃtakāriṇī || 13 ||
[Analyze grammar]

kiṃ naṃdanaṃ kiṃ tu giriḥ kanakena sumaṇḍitaḥ |
kiṃ sudhā svalpapuṇyena prāpyā dānavaduḥkhadā || 14 ||
[Analyze grammar]

iti vākyaṃ samākarṇya kāmastu vividhaiḥ śaraiḥ |
prāharannaradevasya kartuṃ kiṃcinna vai prabhuḥ || 15 ||
[Analyze grammar]

kaṭākṣairnūpurārāvaiḥ pariraṃbhairvilokanaiḥ |
na tasya cittaṃ vibhrāṃtaṃ kartuṃ śaktā varāṃganāḥ || 16 ||
[Analyze grammar]

gatvā yathāgataṃ śakraṃ jagadurdhīradhīrnṛpaḥ |
tacchrutvā maghavā bhītaḥ sevāmārabhatātmanaḥ || 17 ||
[Analyze grammar]

atha niścitamālokya pādapadme svakeṃ'bikā |
jiteṃdriyaṃ mahārājaṃ pratyakṣābhūtsutoṣitā || 18 ||
[Analyze grammar]

paṃcāsyapṛṣṭhalalitā pāśāṃkuśadharāvarā |
dhanurbāṇadharā mātā jagatpāvanapāvanī || 19 ||
[Analyze grammar]

tāṃ vīkṣya mātaraṃ dhīmānsūryakoṭisamaprabhām |
dhanurbāṇasṛṇīpāśāndadhānāṃ harṣamāptavān || 20 ||
[Analyze grammar]

śirasā bahuśo natvā mātaraṃ bhaktibhāvitām |
hasaṃtīṃ nijadeheṣu spṛśaṃtīṃ pāṇinā muhuḥ || 21 ||
[Analyze grammar]

tuṣṭāva bhaktyutkalitacittavṛttirmahāmatiḥ |
gadgadasvarasaṃyuktaḥ kaṃṭakāṃgopaśobhitaḥ || 22 ||
[Analyze grammar]

jaya devi mahādevi bhaktavṛṃdaikasevite |
brahmarudrādideveṃdra sevitāṃghriyuge'naghe || 23 ||
[Analyze grammar]

mātastava kalāviddhametadbhāti carācaram |
tvadṛte nāsti sarvaṃ tanmātarbhadre namostu te || 24 ||
[Analyze grammar]

mahī tvayā'dhāraśaktyā sthāpitā calatīha na |
saparvatavanodyāna diggajairupaśobhitā || 25 ||
[Analyze grammar]

sūryastapati khe tīkṣṇairaṃśubhiḥ pratapanmahīm |
tvacchaktyā vasudhāsaṃsthaṃ rasaṃ gṛhṇanvimuṃcati || 26 ||
[Analyze grammar]

aṃtarbahiḥ sthito vahnirlokānāṃ prakarotu śam |
tvatpratāpānmahādevi surāsuranamaskṛte || 27 ||
[Analyze grammar]

tvaṃ vidyā tvaṃ mahāmāyā viṣṇorlokaikapālinaḥ |
svaśaktyā sṛjasīdaṃ tvaṃ pālayasyapi mohini || 28 ||
[Analyze grammar]

tvattaḥ sarve surāḥ prāpya siddhiṃ sukhamayaṃti vai |
māṃ pālaya kṛpānāthe vaṃdite bhaktavallabhe || 29 ||
[Analyze grammar]

rakṣa māṃ sevakaṃ mātastvadīyacaraṇāraṇam |
kuru me vāṃchitāṃ siddhiṃ mahāpuruṣapūrvaje || 30 ||
[Analyze grammar]

sumatiruvāca |
evaṃ tuṣṭā jaganmātā vṛṇīṣva varamuttamam |
uvāca bhaktaṃ sumadaṃ tapasā kṛśadehinam || 31 ||
[Analyze grammar]

ityetadvākyamākarṇya prahṛṣṭaḥ sumado nṛpaḥ |
vavre nijaṃ hṛtaṃ rājyaṃ hatadurjanakaṃṭakam || 32 ||
[Analyze grammar]

maheśīcaraṇadvaṃdve bhaktimavyabhicāriṇīm |
prāṃte muktiṃ tu saṃsāravāridhestāriṇīṃ punaḥ || 33 ||
[Analyze grammar]

kāmākṣovāca |
rājyaṃ prāpnuhi sumada sarvatrahatakaṃṭakam |
mahilāratnasaṃjuṣṭapādapadmadvayo bhava || 34 ||
[Analyze grammar]

tatavairiparābhūtirmābhūyātsumadābhidha |
yadā tu rāvaṇaṃ hatvā raghunātho mahāyaśāḥ || 35 ||
[Analyze grammar]

kariṣyatyaśvamedhaṃ hi sarvasaṃbhāraśobhitam |
tasya bhrātā mahāvīraḥ śatrughnaḥ paravīrahā || 36 ||
[Analyze grammar]

pālayanhayamāyāsyatyatra vīrādibhirvṛtaḥ |
tasmai sarvaṃ samarpya tvaṃ rājyamṛddhaṃ dhanādikam || 37 ||
[Analyze grammar]

pālayiṣyasi yodhaiḥ svairdhanurdhāribhirudbhaṭaiḥ |
tataḥ pṛthivyāṃ sarvatra bhramiṣyasi mahāmate || 38 ||
[Analyze grammar]

tato rāmaṃ namaskṛtya brahmeṃdreśādisevitam |
muktiṃ prāpsyasi duṣprāpāṃ yogibhiryamasādhanaiḥ || 39 ||
[Analyze grammar]

tāvatkālamihasthāsye yāvadrāmahayāgamaḥ |
paścāttvāṃ tu samuddhṛtya gaṃtāsmi paramaṃ padam || 40 ||
[Analyze grammar]

ityuktvāṃtardadhe devī surāsuranamaskṛtā |
sumado'pyahicchatrāyāṃ śatrūnhatvā nṛpo'bhavat || 41 ||
[Analyze grammar]

eṣa rājā samartho'pi balavāhanasaṃyutaḥ |
na grahīṣyati te vāhaṃ mahāmāyāsuśikṣitaḥ || 42 ||
[Analyze grammar]

śrutvā prāptaṃ purī pārśve hayamedhahayottamam |
tvāṃ ca sarvairmahārājaiḥ sevitāṃghriṃ mahāmatim || 43 ||
[Analyze grammar]

sarvaṃ dāsyati sarvajña rājā sumadanāmadhṛk |
adhunātanmahārāja rāmacaṃdra pratāpataḥ || 44 ||
[Analyze grammar]

śeṣa uvāca |
iti vṛttaṃ samākarṇya sumadasya mahāyaśāḥ |
sādhusādhviti covāca jaharṣa matimānbalī || 45 ||
[Analyze grammar]

ahicchatrāpatiḥ sarvaiḥ svagaṇaiḥ parivāritaḥ |
sabhāyāṃ sukhamāste yo bahurājanyasevitaḥ || 46 ||
[Analyze grammar]

brāhmaṇā vedaviduṣo vaiśyā dhanasamṛddhayaḥ |
rājānaṃ paryupāsaṃte sumadaṃśo bhayānvitam || 47 ||
[Analyze grammar]

vedavidyāvinodena nyāyino brāhmaṇā varāḥ |
āśīrvadaṃti taṃ bhūpaṃ sarvalokaikarakṣakam || 48 ||
[Analyze grammar]

etasminsamaye kaścidāgatya nṛpatiṃ jagau |
svāminna jāne kasyāsti hayaḥ patradharoṃ'tike || 49 ||
[Analyze grammar]

tacchrutvā sevakaṃ śreṣṭhaṃ preṣayāmāsa satvaraḥ |
jānīhi kasya rājño'yamaśvo mama purāṃtike || 50 ||
[Analyze grammar]

gatvātha sevakastatra jñātvā vṛttāṃtamāditaḥ |
nivedayāmāsa nṛpaṃ mahārājanyasevitam || 51 ||
[Analyze grammar]

sa śrutvā raghunāthasya hayaṃ nityamanusmaran |
ājñāpayāmāsa janaṃ sarvaṃ rājāviśāradaḥ || 52 ||
[Analyze grammar]

lokā madīyāḥ sarve ye dhanadhānyasamākulāḥ |
toraṇādīni geheṣu maṃgalāni sṛjaṃtviha || 53 ||
[Analyze grammar]

kanyāḥ sahasraśo ramyāḥ sarvābharaṇabhūṣitāḥ |
gajoparisamārūḍhā yāṃtu śatrughnasaṃmukham || 54 ||
[Analyze grammar]

ityādisarvamājñāpya yayau rājā svayaṃ tataḥ |
putrapautramahiṣyādiparivārasamāvṛtaḥ || 55 ||
[Analyze grammar]

śatrughnaḥ sumahāmātyaiḥ subhaṭaiḥ puṣkalādibhiḥ |
saṃyuto bhūpatiṃ vīraṃ dadarśa sumadābhidham || 56 ||
[Analyze grammar]

hastibhiḥ sādisaṃyuktaiḥ pattibhiḥ paratāpanaiḥ |
vājibhirbhūṣitairvīraiḥ saṃyutaṃ vīraśobhitam || 57 ||
[Analyze grammar]

athāgatya mahārājaḥ śatrughnaṃ natavānmudā |
dhanyo'smi kṛtakṛtyo'smi satkṛtaṃ ca kṛtaṃ vapuḥ || 58 ||
[Analyze grammar]

idaṃ rājyaṃ gṛhāṇāśu mahārājopaśobhitam |
mahāmāṇikyamuktādi mahādhanasupūritam || 59 ||
[Analyze grammar]

svāmiṃściraṃ pratīkṣe'haṃ hayasyāgamanaṃ prati |
kāmākṣākathitaṃ pūrvaṃ jātaṃ saṃprati tattathā || 60 ||
[Analyze grammar]

vilokaya puraṃ mahyaṃ kṛtārthānkuru mānavān |
pāvayāsmatkulaṃ sarvaṃ rāmānuja mahīpate || 61 ||
[Analyze grammar]

ityuktvārohayāmāsa kuṃjaraṃ caṃdrasuprabham |
puṣkalaṃ ca mahāvīraṃ tathā svayamathāruhat || 62 ||
[Analyze grammar]

bherīpaṇavatūryāṇāṃ vīṇādīnāṃ svanastadā |
vyāpnoti sma mahārāja sumadena praṇoditaḥ || 63 ||
[Analyze grammar]

kanyāḥ samāgatya mahānareṃdraṃ |
śatrughnamiṃdrādikasevitāṃghrim |
karisthitā mauktikavṛṃdasaṃghai |
rvardhāpayāmāsurinaprayuktāḥ || 64 ||
[Analyze grammar]

śanaiḥśanaiḥ samāgatya purīmadhye janairmudā |
vardhāpito gṛhaṃ prāpa toraṇādikabhūṣitam || 65 ||
[Analyze grammar]

hayaratnena saṃyuktastathā vīraiḥ suśobhitaḥ |
rājñā puraskṛto rājā śatrughnaḥ prāpa maṃdiram || 66 ||
[Analyze grammar]

arghādibhiḥ pūjayitvā raghunāthānujaṃ tadā |
sarvaṃ samarpayāmāsa rāmacaṃdrāya dhīmate || 67 ||
[Analyze grammar]

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe |
śatrughnāhicchatrāpurīpraveśonāma trayodaśo'dhyāyaḥ || 13 ||
[Analyze grammar]