Chapter 52

[English text for this chapter is available]

vyāsa uvāca |
bhuktvā pītvā ca suptvā ca snātvā rathyopasarpaṇe |
oṣṭhāvalomakau spṛṣṭvā vāso viparidhāya ca || 1 ||
[Analyze grammar]

retomūtrapurīṣāṇāmutsarge'nṛtabhāṣaṇe |
ṣṭhīvitvā'dhyayanāraṃbhe kāsaśvāsāgame tathā || 2 ||
[Analyze grammar]

catvaraṃ vā śmaśānaṃ vā samākramya dvijottamaḥ |
saṃdhyayorubhayostadvadācāṃto'pyācametpunaḥ || 3 ||
[Analyze grammar]

caṃḍālamlecchasaṃbhāṣe strīśūdrocchiṣṭabhāṣaṇe |
ucchiṣṭaṃ puruṣaṃ dṛṣṭvā bhojyaṃ cāpi tathāvidham || 4 ||
[Analyze grammar]

ācāmedaśrupāte vā lohitasya tathaiva ca |
bhojane saṃdhyayoḥ snātvā pītvā mūtrapurīṣayoḥ || 5 ||
[Analyze grammar]

āgato vācametsuptvā sakṛtsakṛdathānyataḥ |
agnergavāmathālaṃbhe spṛṣṭvā prayatameva vā || 6 ||
[Analyze grammar]

strīṇāmathātmanaḥ sparśe nīladyaṃ vā paridhāya ca |
upasparśejjalaṃ vārtaṃ tṛṇaṃ vā bhūmimeva ca || 7 ||
[Analyze grammar]

keśānāṃ cātmanaḥ sparśe vāsasaḥ skhalitasya ca |
anuṣṇābhirakeśābhiraduṣṭābhiśca dharmataḥ || 8 ||
[Analyze grammar]

śauce'psu sarvadā cāmedāsīnaḥ prāgudaṅmukhaḥ |
śiraḥ prāvṛtya kaṃṭhaṃ vā muktakeśaśikho'pi vā || 9 ||
[Analyze grammar]

akṛtvā pādayoḥ śaucaṃ mārgato na śucirbhavet |
sopānatkopānastho vā noṣṇīṣī cācamedbudhaḥ || 10 ||
[Analyze grammar]

na caiva varṣadhārābhirna tiṣṭhannuddhṛtodakaiḥ |
naikahastārpitajalairvinā sūtreṇa vā punaḥ || 11 ||
[Analyze grammar]

na pādukāsanastho vā bahirjānurathāpi vā |
na jalpanna hasanprekṣanśayānastalpa eva ca || 12 ||
[Analyze grammar]

nāvikṣitābhiḥ phenādyairupetābhirathāpi vā |
śūdrāśucikaronmuktairnakṣārābhistathaiva ca || 13 ||
[Analyze grammar]

na caivāṃgulibhiḥ śabdaṃ na kuryānnānyamānasaḥ |
na varṇarasaduṣṭābhirna caiva pradarodakaiḥ || 14 ||
[Analyze grammar]

na pāṇikṣubhitābhirvā na bahirgaṃdha eva vā |
hṛdgābhiḥ pūyate vipraḥ kaṃṭhyābhiḥ kṣatriyaḥ śuciḥ || 15 ||
[Analyze grammar]

prāśitābhistathā vaiśyaḥ strīśūdrau sparśatoṃ'tataḥ |
aṃguṣṭhamūlāṃtarato rekhāyāṃ brāhmamucyate || 16 ||
[Analyze grammar]

aṃtarāṃguṣṭhadeśinyaiḥ pitṝṇāṃ tīrthamucyate |
kaniṣṭhāmūlataḥ paścātprājāpatyaṃ pracakṣate || 17 ||
[Analyze grammar]

aṃgulyagraṃ smṛtaṃ daivaṃ tadevārṣaṃ prakīrtitam |
mūlena daivamārṣaṃ syādāgneyaṃ madhyataḥ smṛtam || 18 ||
[Analyze grammar]

tadeva saumikaṃ tīrthametajjñātvā na muhyati |
brāhmeṇaiva tu tīrthena dvijo nityamupaspṛśet || 19 ||
[Analyze grammar]

homayedvātha daivena na tu pitryeṇa vai dvijāḥ |
triḥprāśnīyādapaḥ pūrvaṃ brāhmeṇa prayatastataḥ || 20 ||
[Analyze grammar]

saṃmṛjyāṃguṣṭhamūlena mukhaṃ vai samupaspṛśet |
aṃguṣṭhānāmikābhyāṃ tu spṛśennetradvayaṃ tataḥ || 21 ||
[Analyze grammar]

tarjanyaṃguṣṭhayogena spṛśennāsāpuṭadvayam |
kaniṣṭhāṃguṣṭhayogena śravaṇe samuspṛśet || 22 ||
[Analyze grammar]

sarvāsāmathayogena hṛdayaṃ tu tanavā |
spṛśedvai śirasastadvadaṃguṣṭhenāṃsakadvayam || 23 ||
[Analyze grammar]

triḥprāśnīyādyadaṃbhastu prītāstenāsya devatāḥ |
brahmāviṣṇurmaheśaśca bhavaṃtītyanuśuśruma || 24 ||
[Analyze grammar]

gaṃgā ca yamunā caiva prīyete parimārjanāt |
saṃspṛṣṭayorlocanayoḥ prīyete śaśibhāskarau || 25 ||
[Analyze grammar]

nāsatyadasrau prīyete spṛśennāsāpuṭadvayam |
karṇayoḥ spṛṣṭayostadvatprīyete cānilānalau || 26 ||
[Analyze grammar]

saṃspṛṣṭe hṛdaye cāsya prīyaṃte sarvadevatāḥ |
mūrdhni saṃsparśanādekaḥ prītaḥ sa puruṣo bhavet || 27 ||
[Analyze grammar]

nocchiṣṭaṃ kurvate vaktre vipruṣoṃge lagaṃti yāḥ |
daṃtavaddaṃtalagneṣu jihvāsparśe śucirbhavet || 28 ||
[Analyze grammar]

spṛśaṃti biṃdavaḥ pādau ya ācāmayataḥ parān |
bhūmipāṃśusamā jñeyā na tairaspṛśyatā bhavet || 29 ||
[Analyze grammar]

madhuparke ca some ca tāṃbūlasya ca bhakṣaṇe |
phalamūle cekṣudaṃḍena doṣaṃ prāha vai manuḥ || 30 ||
[Analyze grammar]

pracaraṃścānnapāneṣu dravyahasto bhavennaraḥ |
bhūmau nikṣipya taddravyamācamyābhyukṣayettu tat || 31 ||
[Analyze grammar]

taijasaṃ vai samādāya yadyucchiṣṭo bhaveddvijaḥ |
bhūmau nikṣipya taddravyamācamyābhyukṣayettu tat || 32 ||
[Analyze grammar]

yadyaddravyaṃ samādāya bhaveduccheṣaṇānvitaḥ |
anidhāyaiva taddravyaṃ bhūmau tvaśucitāmiyāt || 33 ||
[Analyze grammar]

vastrādiṣu vikalpaḥ syāttatsaṃspṛśyācamediha |
araṇye nirjane rātrau cauravyāghrākule pathi || 34 ||
[Analyze grammar]

kṛtvā mūtraṃ purīṣaṃ vā dravyahasto na duṣyati |
nidhāya dakṣiṇe karṇe brahmasūtramudaṅmukhaḥ || 35 ||
[Analyze grammar]

ahni kuryācchakṛnmūtraṃ rātrau ceddakṣiṇāmukhaḥ |
aṃtardhāya mahīṃ kāṣṭaiḥ patrairloṣṭatṛṇena vā || 36 ||
[Analyze grammar]

prāvṛtya ca śiraḥ kuryādviṇmūtrasya visarjanam |
chāyākūpanadīgoṣṭhacaityāṃbhaḥ pathi bhasmasu || 37 ||
[Analyze grammar]

agnau caiva śmaśāne ca viṇmūtraṃ na samācaret |
na gomayena kāṣṭhe vā mahāvṛkṣe'tha śādvale || 38 ||
[Analyze grammar]

na tiṣṭhanna ca nirvāsā na ca parvatamaṃḍale |
na jīrṇadevāyatane valmīke na kadācana || 39 ||
[Analyze grammar]

na sasatveṣu garteṣu na gacchanna samācaret |
tuṣāṃgārakapāleṣu rājamārge tathaiva ca || 40 ||
[Analyze grammar]

na kṣetre na bile vāpi na tīrthe na catuṣpathe |
nodyāne'pāsamīpe vā noṣare nagarāśaye || 41 ||
[Analyze grammar]

na sopānatpāduko vā chatrī vā nāṃtarikṣake |
na caivābhimukhaḥ strīṇāṃ gurubrāhmaṇayorgavām || 42 ||
[Analyze grammar]

na devadevālayayorapāmapi kadācana |
na jyotīṃṣi nirīkṣanvānavāpratimukhotha vā || 43 ||
[Analyze grammar]

pratyādityaṃ pratyanalaṃ pratisomaṃ tathaiva ca |
āhṛtya mṛttikāṃ kūlāllepagaṃdhāpakarṣaṇīm || 44 ||
[Analyze grammar]

kuryādataṃdritaḥ śaucaṃ viśuddhairuddhṛtodakaiḥ |
nāharenmṛtikāṃ vipraḥ pāṃśulāṃ na sakardamām || 45 ||
[Analyze grammar]

na mārgānnoṣarāddeśācchaucaśiṣṭāṃ parasya ca |
na devāyatanātkūpāddhāmno na ca jalāttathā || 46 ||
[Analyze grammar]

upaspṛśettato nityaṃ pūrvoktena vidhānataḥ || 47 ||
[Analyze grammar]

iti śrīpādme mahāpurāṇe svargakhaṃḍe karmayogakathane |
dvipaṃcāśattamo'dhyāyaḥ || 52 ||
[Analyze grammar]