Chapter 51

[English text for this chapter is available]

ṛṣaya ūcu |
karmayogaḥ kathaṃ sūta yena cārādhito hariḥ |
prasīdati mahābhāga vada no vadatāṃ vara || 1 ||
[Analyze grammar]

yenāsau bhagavānīśaḥ samārādhyo mumukṣubhiḥ |
tadvadākhilalokānāṃ rakṣaṇaṃ dharmasaṃgraham || 2 ||
[Analyze grammar]

taṃ karmayogaṃ vada naḥ sūta mūrtimayastu yaḥ |
iti śuśrūṣavo viprā bhavadagre vyavasthitāḥ || 3 ||
[Analyze grammar]

sūta uvāca |
evameva purā pṛṣṭo vyāsaḥ satyavatīsutaḥ |
ṛṣibhiragnisaṃkāśairvyāsastānāha tacchṛṇu || 4 ||
[Analyze grammar]

vyāsa uvāca |
śṛṇudhvaṃmṛṣayaḥ sarve vakṣyamāṇaṃ sanātanam |
karmayogaṃ brāhmaṇānāmātyaṃtikaphalapradam || 5 ||
[Analyze grammar]

āmnāyasiddhamakhilaṃ brāhmaṇārthaṃ pradarśitam |
ṛṣīṇāṃ śṛṇvatāṃ pūrvaṃ manurāha prajāpatiḥ || 6 ||
[Analyze grammar]

sarvavyādhiharaṃ puṇyamṛṣisaṃghairniṣevitam |
samāhitadhiyo yūyaṃ śṛṇudhvaṃ gadato mama || 7 ||
[Analyze grammar]

kṛtopanayano vedānadhīyīta dvijottamaḥ |
garbhāṣṭame'ṣṭamevābde svasūtroktavidhānataḥ || 8 ||
[Analyze grammar]

daṃḍī ca mekhalī sūtrī kṛṣṇājinadharo muniḥ |
bhikṣāhāro guruhito vīkṣyamāṇo gurormukham || 9 ||
[Analyze grammar]

kārpāsamupavītārthaṃ nirmitaṃ brahmaṇā purā |
brāhmaṇānāṃ trivṛtsūtraṃ kauśaṃ vā vastrameva vā || 10 ||
[Analyze grammar]

sadopavītī caiva syātsadābaddha śikho dvijaḥ |
anyathā yatkṛtaṃ karmma tadbhavatyayathākṛtam || 11 ||
[Analyze grammar]

vasedavikṛtaṃ vāsaḥ kārpāsaṃ vā kaṣāyakam |
tadeva paridhānīyaṃ śuklaṃ tāṃtavamuttamam || 12 ||
[Analyze grammar]

uttaraṃ tu samāmnātaṃ vāsaḥ kṛṣṇājinaṃ śubham |
abhāve gāvayamapi rauravaṃ vā vidhīyate || 13 ||
[Analyze grammar]

uddhṛtya dakṣiṇaṃ bāhuṃ savyabāhau samarpitam |
upavītaṃ bhavennityaṃ nivītaṃ kaṃṭhasajjane || 14 ||
[Analyze grammar]

savyabāhuṃ samuddhṛtya dakṣiṇe tu dhṛtaṃ dvijāḥ |
prācīnāvītamityuktaṃ pitryekarmaṇi yojayet || 15 ||
[Analyze grammar]

agnyāgāre gavāṃ goṣṭhe home tapye tathaiva ca |
svādhyāye bhojane nityaṃ brāhmaṇānāṃ ca sannidhau || 16 ||
[Analyze grammar]

upāsane gurūṇāṃ ca saṃdhyayoḥ sādhusaṃgame |
upavītī bhavennityaṃ vidhireṣa sanātanaḥ || 17 ||
[Analyze grammar]

mauṃjī trivṛtsamāṃ śliṣṭāṃ kuryādviprasya mekhalām |
muṃjābhāve kuśenāhurgraṃthinaikena vā tribhiḥ || 18 ||
[Analyze grammar]

dhārayedvaiṇavapālāśau daṃḍau keśāṃtikau dvijaḥ |
yajñārhavṛkṣajaṃ vātha saumyamavraṇameva ca || 19 ||
[Analyze grammar]

sāyaṃprātardvijaḥ saṃdhyāmupāsīta samāhitaḥ |
kāmāllobhādbhayānmohāttyaktvaināṃ patito bhavet || 20 ||
[Analyze grammar]

agnikāryaṃ tataḥ kuryātsāyaṃprātaḥ prasannadhīḥ |
snātvā saṃtarpayeddevānṛṣīnpitṛgaṇāṃstathā || 21 ||
[Analyze grammar]

devatābhyarcanaṃ kuryātpuṣpaiḥ patrairyavāṃbubhiḥ |
abhivādanaśīlaḥ syānnityaṃ vṛddheṣu dharmataḥ || 22 ||
[Analyze grammar]

asāvahaṃ bho nāmeti samyakpraṇatipūrvakam |
āyurārogyasiddhyarthaṃ taṃdrādiparivarjitaḥ || 23 ||
[Analyze grammar]

āyuṣmānbhava saumyeti vaco vipro'bhivādane |
ākāraścāsya nāmnoṃ'te vācyaḥ pūrvākṣaraplutaḥ || 24 ||
[Analyze grammar]

yo na vettyabhivādasya vipraḥ pratyabhivādanam |
nābhivādyaḥ sa viduṣā yathā śūdrastathaiva saḥ || 25 ||
[Analyze grammar]

vyatyastapāṇinā kāryaṃ pādasaṃgrahaṇaṃ guroḥ |
savyena savyaḥ spraṣṭavyo dakṣiṇena tu dakṣiṇaḥ || 26 ||
[Analyze grammar]

laukikaṃ vaidikaṃ vāpi tathādhyātmikameva vā |
avāpya prayato jñānaṃ taṃ pūrvamabhivādayet || 27 ||
[Analyze grammar]

nodakaṃ dhārayedbhaikṣyaṃ puṣpāṇi samidhastathā |
evaṃvidhāni cānyāni na devārtheṣu karmmasu || 28 ||
[Analyze grammar]

brāhmaṇaṃ kuśalaṃ pṛcchetkṣatrabaṃdhumanāmayam |
vaiśyaṃ kṣemaṃ samāgamya śūdramārogyameva ca || 29 ||
[Analyze grammar]

upādhyāyaḥ pitā jyeṣṭho bhrātā trātā ca bhītitaḥ |
mātulaḥ śvaśuraścaiva mātāmaha pitāmahau || 30 ||
[Analyze grammar]

varṇaśreṣṭhaḥ pitṛvyaśca puṃso'tra guravaḥ smṛtāḥ |
mātā mātāmahī gurvī piturmātuśca sodarāḥ || 31 ||
[Analyze grammar]

śvaśrūḥ pitāmahī jyeṣṭhā dhātrī ca guravaḥ striyaḥ |
jñeyastu guruvargo'yaṃ mātṛtaḥ pitṛto dvijāḥ || 32 ||
[Analyze grammar]

anuvartanameteṣāṃ manovākkāyakarmabhiḥ |
gurūndṛṣṭvā samuttiṣṭhedabhivādya kṛtāñjali || 33 ||
[Analyze grammar]

naitairupaviśetsārddhaṃ vivadennātmakāraṇāt |
jīvitārthamapi dveṣādgurubhirnaiva bhāṣaṇam || 34 ||
[Analyze grammar]

udrikto'pi guṇairanyairgurudveṣī patatyadhaḥ |
gurūṇāmapi sarveṣāṃ paṃca pūjyā viśeṣataḥ || 35 ||
[Analyze grammar]

teṣāmādyāstrayaḥ śreṣṭhāsteṣāṃ mātā supūjitā |
yo bhāvayati yā sūte yena vidyopadiśyate || 36 ||
[Analyze grammar]

jyeṣṭho bhrātā ca bhartā ca paṃcaite guravaḥ smṛtāḥ |
ātmanaḥ sarvayatnena prāṇatyāgena vā punaḥ || 37 ||
[Analyze grammar]

pūjanīyā viśeṣeṇa paṃcaite bhūtimicchatā |
yāvatpitā ca mātā ca dvāvetau nirvikāriṇau || 38 ||
[Analyze grammar]

tāvatsarvaṃ parityajya putraḥ syāttatparāyaṇaḥ |
pitā mātā ca suprītau syātāṃ putraguṇairyadi || 39 ||
[Analyze grammar]

sa putraḥ sakalaṃ dharmaṃ prāpnuyāttena karmaṇā |
nāsti mātṛsamaṃ daivaṃ nāsti pitṛsamo guruḥ || 40 ||
[Analyze grammar]

tayoḥ pratyupakāro'pi na kathaṃcana vidyate |
tayornityaṃ priyaṃ kuryātkarmaṇā manasā girā || 41 ||
[Analyze grammar]

na tābhyāmananujñāto dharmamanyaṃ samācaret |
varjayitvā muktiphalaṃ nityaṃ naimittikaṃ tathā || 42 ||
[Analyze grammar]

dharmasāraḥ samuddiṣṭaḥ pretyānaṃtaphalapradaḥ |
samyagārādhya vaktāraṃ visṛṣṭastadanujñayā || 43 ||
[Analyze grammar]

śiṣyo vidyāphalaṃ bhuṃkte pretya cāpadyate divi |
yo bhrātaraṃ pitṛsamaṃ jyeṣṭhaṃ mūḍho'vamanyate || 44 ||
[Analyze grammar]

tena doṣeṇa saṃpretya nirayaṃ ghoramṛcchati |
puṃsāṃ vartmani sṛṣṭena pūjyo bhartā tu sarvadā || 45 ||
[Analyze grammar]

api mātari loke'sminnupakārāddhi gauravam |
mātulāṃśca pitṛvyāṃśca śvaśurānṛtvijo gurūn || 46 ||
[Analyze grammar]

asāvahamiti brūyātpratyutthāyābhivādayet |
avācyo dīkṣito nāmnā yavīyānapi yo bhavet || 47 ||
[Analyze grammar]

bho bhavatpūrvakaṃ tvenamabhibhāṣeta dharmavit |
abhivādyaśca pūjyaśca śirasānamya eva ca || 48 ||
[Analyze grammar]

brāhmaṇakṣatriyādyaiśca śrīkāmaiḥ sādaraṃ sadā |
nābhivādyāśca vipreṇa kṣatriyādyāḥ kathaṃcana || 49 ||
[Analyze grammar]

jñānakarmaguṇopetā yadyapyete bahuśrutāḥ |
brāhmaṇaḥ sarvavarṇānāṃ svasti kuryāditi śrutiḥ || 50 ||
[Analyze grammar]

savarṇena savarṇānāṃ kāryamevābhivādanam |
gururagnirdvijātīnāṃ varṇānāṃ brāhmaṇo guruḥ || 51 ||
[Analyze grammar]

patireko guruḥ strīṇāṃ sarvatrābhyāgato guruḥ |
vidyākarmavayobaṃdhurvittaṃ bhavati paṃcamam || 52 ||
[Analyze grammar]

mānyasthānāni paṃcāhuḥ pūrvaṃ pūrvaṃ gurūttarāt |
paṃcānāṃ triṣu varṇeṣu bhūyāṃsi balavaṃti ca || 53 ||
[Analyze grammar]

yatra syuḥ so'tra mānārhaḥ śūdro'pi daśamīṃ gataḥ |
paṃthā deyo brāhmaṇāya striyai rājñe vicakṣuṣe || 54 ||
[Analyze grammar]

vṛddhāya bhārabhagnāya rogiṇe durbalāya ca |
bhikṣāmāhṛtya śiṣṭānāṃ gṛhebhyaḥ prayato'nvaham || 55 ||
[Analyze grammar]

nivedya guruve'śnīyādvāgyatastadanujñayā |
bhavatpūrvaṃ caredbhaikṣyamupavītī dvijottamaḥ || 56 ||
[Analyze grammar]

bhavanmadhyaṃ tu rājanyo vaiśyastu bhavaduttaram |
mātaraṃ vā svasāraṃ vā māturvā bhaginīṃ nijām || 57 ||
[Analyze grammar]

bhikṣeta bhikṣāṃprathamaṃ yācainaṃ na vimānayet |
sajātīyagṛheṣveva sārvavarṇikameva vā || 58 ||
[Analyze grammar]

bhaikṣyasyācaraṇaṃ proktaṃ patitā divi varjitam |
vedayajñairahīnānāṃ praśastānāṃ svakarmmasu || 59 ||
[Analyze grammar]

brahmacāryyāharedbhaikṣyaṃ gṛhebhyaḥ prayato'nvaham |
guroḥ kule na bhikṣeta na jñātikulabaṃdhuṣu || 60 ||
[Analyze grammar]

alābhetvanyagehānāṃ pūrvaṃ pūrvaṃ vivarjayet |
sarvaṃ vā vicaredgrāmaṃ pūrvoktānāmasaṃbhave || 61 ||
[Analyze grammar]

niyamya prayato vācaṃ diśastvanavalokayan |
samāhṛtya tu bhaikṣyānnaṃ yāvadarthamamāyayā || 62 ||
[Analyze grammar]

bhuṃjīta prayato nityaṃ vāgyato'nanyamānasaḥ |
bhaikṣyeṇa vartayennityaṃ naivekānno bhavedvratī || 63 ||
[Analyze grammar]

bhaikṣyaiṇa varttino vṛttirupavāsasamā smṛtā |
pūjayedaśanaṃ nityamadyāccainamakutsayan || 64 ||
[Analyze grammar]

dṛṣṭvā hṛṣyetprasīdecca pratinaṃdecca sarvaśaḥ |
anārogyamanāyuṣyamasvargyaṃ cātibhojanam || 65 ||
[Analyze grammar]

apuṇyaṃ lokavidviṣṭaṃ tasmāttatparivarjayet |
prāṅmukho'nnāni bhuṃjīta sūryābhimukhameva vā || 66 ||
[Analyze grammar]

nādyādudaṅmukho nityaṃ vidhireṣa sanātanaḥ |
prakṣālya pāṇipādau ca bhuṃjāno dvirupaspṛśet || 67 ||
[Analyze grammar]

śuddhe deśe samāsīno bhuktvā ca dvirupaspṛśet || 68 ||
[Analyze grammar]

iti śrīpādme mahāpurāṇe svargakhaṃḍe karmayogakathanaṃ |
nāma ekapaṃcāśattamo'dhyāyaḥ || 51 ||
[Analyze grammar]