Chapter 89

[English text for this chapter is available]

viṣṇuruvāca |
kuṃjalastu sutaṃ vākyaṃ samujjvalamathābravīt |
bhavānkathaya bhoḥ putra kimapūrvaṃ tu dṛṣṭavān || 1 ||
[Analyze grammar]

tanme kathaya suprītaḥ śrotukāmo'smi sāṃpratam |
evamādiśya taṃ putraṃ virarāma sa kuṃjalaḥ || 2 ||
[Analyze grammar]

pitaraṃ pratyuvācātha vinayāvanatassutaḥ |
samujjvala uvāca |
himavaṃtaṃ nagaśreṣṭhaṃ devavṛṃdasamanvitam || 3 ||
[Analyze grammar]

āhārārthaṃ pragacchāmi bhavataścātmanaḥ pitaḥ |
paśyāmi kautukaṃ tatra na dṛṣṭaṃ na śrutaṃ purā || 4 ||
[Analyze grammar]

pradeśamṛṣigaṇākīrṇamapsarobhiḥ praśobhitam |
bahukautukaśobhāḍhyaṃ maṃgalyaṃ maṃgalairyutam || 5 ||
[Analyze grammar]

bahupuṇyaphalopetairvanairnānāvidhaistataḥ |
anekakautukabharairmanasaḥ parimohanam || 6 ||
[Analyze grammar]

tatra dṛṣṭaṃ mayā tāta apūrvaṃ mānasāṃtike |
bahuhaṃsaiḥ samākīrṇo haṃsa ekaḥ samāgataḥ || 7 ||
[Analyze grammar]

evaṃ kṛṣṇā mahābhāga anye tatra samāgatāḥ |
sitetaraiścaṃcupādairanyataḥ śuklavigrahāḥ || 8 ||
[Analyze grammar]

tādṛśāste ca nīlā vai anye śubhrā mahāmate |
catasrastatra vai nāryo raudrākārā vibhīṣaṇāḥ || 9 ||
[Analyze grammar]

daṃṣṭrākarālasaṃkrūrā ūrdhvakeśyo bhayānakāḥ |
paścāttāstu samāyātāstasminsarasi mānase || 10 ||
[Analyze grammar]

kṛṣṇā haṃsāstu saṃsnātā mānase tāta matpuraḥ |
vibhrāṃtāḥ paritaścānye na snātāstatra mānase || 11 ||
[Analyze grammar]

jahasustāḥ striyastāta hāsyairaṭṭāṭṭadāruṇaiḥ |
tasmātsarādviniṣkrāṃto haṃsa eko mahātanuḥ || 12 ||
[Analyze grammar]

paścāttrayo viniṣkrāṃtāstaiścāhaṃ samupekṣitaḥ |
yātā ākāśamārgeṇa vivadaṃtaḥ parasparam || 13 ||
[Analyze grammar]

tāstu striyo mahābhīmāḥ samaṃtātparibabhramuḥ |
viṃdhyasya śikhare puṇye vṛkṣacchāyāsupakṣiṇaḥ || 14 ||
[Analyze grammar]

niṣaṇṇāstatra te sarve dagdhā duḥkhaiḥ sudāruṇaiḥ |
teṣāṃ suvīkṣamāṇānāṃ bhilla ekaḥ samāgataḥ || 15 ||
[Analyze grammar]

mṛgānsa pīḍayitvā tu bāṇapāṇirdhanurddharaḥ |
śilātalaṃ samāśritya niṣasāda sukhena vai || 16 ||
[Analyze grammar]

paścādbhillī samāyātā annamādāya sodakam |
svaṃ priyaṃ vīkṣate rājñā muditairlakṣaṇairyutam || 17 ||
[Analyze grammar]

anyādṛśaṃ samāvīkṣya svakāṃtaṃ tejasāvṛtam |
divyatejaḥ samākrāṃtaṃ yathā sūryaṃ divisthitam || 18 ||
[Analyze grammar]

naramanyaṃ parijñāya taṃ parityajya sā yayau |
vyādha uvāca |
ehyehi tvaṃ priye cātra kasmānmāṃ tvaṃ na paśyasi || 19 ||
[Analyze grammar]

kṣudhayā pīḍyamānohaṃ tvāmahaṃ cāvalokaye |
tasya vākyaṃ samākarṇya śīghraṃ vyādhī samāgatā || 20 ||
[Analyze grammar]

bhartuḥ pārśvaṃ samāsādya vismitā sābhavattadā |
koyaṃ tejaḥ samācāro devoyaṃ māṃ samāhvayet || 21 ||
[Analyze grammar]

tamuvāca tato vyādhī bhartāraṃ dīptatejasam |
atra kiṃ te kṛtaṃ vīra bhavānko divyalakṣaṇaḥ || 22 ||
[Analyze grammar]

sūta uvāca |
evamābhāṣito vyādhyā vyādhaḥ priyāmabhāṣata |
ahaṃ te vallabhaḥ kāṃte bhavatī ca mama priyā || 23 ||
[Analyze grammar]

kasmāttvaṃ māṃ na jānāsi kathaṃ śaṃkā pravartate |
kṣudhayā pīḍyamānena payaścānnaṃ pratīkṣyate || 24 ||
[Analyze grammar]

vyādhyuvāca |
barbaraḥ kṛṣṇavarṇaśca raktākṣaḥ kṛṣṇakaṃcukaḥ |
īdṛśaścāsti me bhartā sarvasatvabhayaṃkaraḥ || 25 ||
[Analyze grammar]

bhavānko divyadehastu priyetyuktvā samāhvayet |
eṣa me saṃśayo jāto vada satyaṃ mamāgrataḥ || 26 ||
[Analyze grammar]

kulaṃ nāma svakaṃ grāmaṃ krīḍāṃ ligaṃ sutaṃ sutām |
samācaṣṭa priyāgre tu tasyāḥ pratyaya hetave || 27 ||
[Analyze grammar]

pratyuvāca svabhartāraṃ sā vyādhī hṛṣṭamānasā |
kasmātte īdṛśaḥ kāyaḥ śvetakaṃcukadhārakaḥ || 28 ||
[Analyze grammar]

kathaṃ jātaḥ samācakṣva mamāścaryaṃ pravartate |
evaṃ saṃpṛcchamānastu bhāryayā mṛgaghātakaḥ || 29 ||
[Analyze grammar]

sūta uvāca |
pratyuvāca tataḥ śrutvā tāṃ priyāṃ praśrayānvitām |
narmadā uttare kūle saṃgamaścāsti suvrate || 30 ||
[Analyze grammar]

ātapenākulo jīvo mama jātoti supriye |
asminvai saṃgame kāṃte śramaśrāṃto hi satvaraḥ || 31 ||
[Analyze grammar]

gataḥ snātvā jalaṃ pītvā paścāccāhaṃ samāgataḥ |
tadāprabhṛti me kāya īdṛśastejasāvṛtaḥ || 32 ||
[Analyze grammar]

saṃjāto vastrasaṃyuktaḥ kaṃcukaḥ śubhratāṃ gataḥ |
pūrvoktaliṃgasaṃsthānaiḥ kulaiḥ sthānena vai tathā || 33 ||
[Analyze grammar]

svapriyaṃ lakṣayitvā tu jñātvā puṇyasya saṃbhavam |
pratyuvācātha bhartāraṃ saṃgamaṃ mama darśaya || 34 ||
[Analyze grammar]

tava paścātpradāsyāmi bhojanaṃ pānasaṃyutam |
ityuktaḥ priyayā vyādhaḥ satvareṇa jagāma ha || 35 ||
[Analyze grammar]

saṃgamo darśitastena tatogre pāpanāśanaḥ |
samuḍḍīnā mahābhāga pakṣiṇo laghuvikramāḥ || 36 ||
[Analyze grammar]

tayā sārddhaṃ yayuḥ sarve revāsaṃgamamuttamam |
teṣāṃ tu vīkṣamāṇānāṃ pakṣiṇāṃ mama paśyataḥ || 37 ||
[Analyze grammar]

tayā hi snāpito bhartā punaḥ snātā hi sā svayam |
divyadehadharau cobhau divyakāṃtisamanvitau || 38 ||
[Analyze grammar]

saṃjātau pakṣiṇāṃ śreṣṭha divyavastrānulepanau |
divyamālāṃbaradharau divyagaṃdhānulepanau || 39 ||
[Analyze grammar]

vaiṣṇavaṃ yānamāsādya munigaṃdharvapūjitau |
gatau tau vaiṣṇavaṃ lokaṃ vaiṣṇavaiḥ paripūjitau || 40 ||
[Analyze grammar]

stūyamānau mahātmānau daṃpatī dṛṣṭavānaham |
vrajaṃtau svargamārgeṇa kūjaṃte pakṣiṇastathā || 41 ||
[Analyze grammar]

tīrtharājaṃ paraṃ dṛṣṭvā harṣavyaktākṣaraistadā |
catvāraḥ kṛṣṇahaṃsāste saṃgame pāpanāśane || 42 ||
[Analyze grammar]

snātvā vai bhāvaśuddhāste prāptā ujjvalatāṃ punaḥ |
snātvā pītvā jalaṃ te tu punarbahirvinirgatāḥ || 43 ||
[Analyze grammar]

tāvatyastāḥ striyaḥ kṛṣṇā mṛtāstatsnānamātrataḥ |
kraṃdamānā viceṣṭaṃtyo hāhākāra vikaṃpitāḥ || 44 ||
[Analyze grammar]

yamalokaṃ gatāstāstu tāta dṛṣṭā mayā tadā |
uḍḍīnāstu tato haṃsāḥ svasthānaṃ pratijagmire || 45 ||
[Analyze grammar]

evaṃ tāta mayā dṛṣṭaṃ pratyakṣaṃ kathitaṃ tava |
kṛṣṇapakṣā mahākāyā dhārtarāṣṭrāstu tāḥ striyaḥ || 46 ||
[Analyze grammar]

kathayasva prasādena ke bhaviṣyaṃti vai pitaḥ |
nirgatānmānasānmadhyāddhārtarāṣṭrānvadasva me || 47 ||
[Analyze grammar]

ke bhaviṣyaṃti te tāta kathaya tvaṃ tu sāṃpratam |
kasmātsukṛṣṇatāṃ prāptā haṃsāḥ śuddhāśca te punaḥ || 48 ||
[Analyze grammar]

saṃjātāstatkṣaṇāttāta kasmānmṛtāstu tāḥ striyaḥ |
evaṃ me saṃśayastāta saṃjāto dāruṇo hṛdi || 49 ||
[Analyze grammar]

chettumarhasi adyaiva bhavāñjñānavicakṣaṇaḥ |
prasādasumukho bhūtvā praṇatasya sadaiva me || 50 ||
[Analyze grammar]

evaṃ saṃbhāṣya pitaraṃ virarāma samujjvalaḥ |
tataḥ pravaktumārebhe sa śukaḥ kuṃjalābhidhaḥ || 51 ||
[Analyze grammar]

iti śrīpadmapurāṇe bhūmikhaṃḍe venopākhyāne gurutīrthavarṇane cyavanacaritre ekonanavatitamo'dhyāyaḥ || 89 ||
[Analyze grammar]