Chapter 88

[English text for this chapter is available]

kuṃjala uvāca |
vrataṃ stotraṃ mahājñānaṃ dhyānaṃ caiva suputraka |
mayākhyātaṃ tavāgre vai viṣṇoḥ pāpapraṇāśanam || 1 ||
[Analyze grammar]

evaṃ catuṣṭayaṃ sā hi yadā puṇyaṃ samācaret |
prayāti vaiṣṇavaṃ lokaṃ devānāmapi durlabham || 2 ||
[Analyze grammar]

ito gatvā vrataṃ vatsa divyāṃ devīṃ prabodhaya |
aśūnyaśayanaṃ nāma vratarājaṃ vadasva tām || 3 ||
[Analyze grammar]

samuddhara mahāpāpādrājakanyāṃ yaśasvinīm |
tvayā pṛṣṭaṃ mayā khyātaṃ puṇyadaṃ pāpanāśanam || 4 ||
[Analyze grammar]

gaccha gaccha mahābhāga ityuktvā virarāma saḥ |
śrīviṣṇuruvāca |
ujjvalopyevamuktastu sa pitrā kuṃjalena hi || 5 ||
[Analyze grammar]

praṇamya pādau dharmātmā mātāpitrormahāmatiḥ |
jagāma tvarito rājanplakṣadvīpaṃ sa ujjvalaḥ || 6 ||
[Analyze grammar]

taṃ giriṃ sarvatobhadraṃ nānādhātusamākulam |
nānāratnamayaistuṃgaiḥ śikharairupaśobhitam || 7 ||
[Analyze grammar]

nānāpravāhasaṃpūrṇairudakairujjvalairnṛpa |
nadyaḥ saṃti svacchanīrāstasmingirivarottame || 8 ||
[Analyze grammar]

kinnarāstatra gāyaṃti gaṃdharvāḥ susvarairnṛpa |
apsarobhiḥ samākīrṇaṃ devavṛṃdairupāvṛtam || 9 ||
[Analyze grammar]

siddhacāraṇasaṃghuṣṭaṃ munivṛṃdairalaṃkṛtam |
nānāpakṣininādaiśca sarvatra parināditam || 10 ||
[Analyze grammar]

evaṃ giriṃ samāsādya ujjvalo laghuvikramaḥ |
susvareṇāpi sā kanyā girau tasminpraroditi || 11 ||
[Analyze grammar]

rorūyamāṇāṃ sa prājño vacanaṃ cedamabravīt |
kā tvaṃ bhavasi kalyāṇi kasmādrodiṣi sāṃpratam || 12 ||
[Analyze grammar]

kamāśritā mahābhāge kena te vipriyaṃ kṛtam |
samācakṣva mamādyaiva sarvaduḥkhasya kāraṇam || 13 ||
[Analyze grammar]

divyādevyuvāca |
vipāko hi mahābhāga karmaṇāṃ mama sāṃpratam |
iha tiṣṭhāmi duḥkhena vaidhavyena samanvitā || 14 ||
[Analyze grammar]

bhavānko hi mahābhāga kṛpayā mama pīḍitaḥ |
pakṣirūpadharo vatsa sotsavaṃ paribhāṣate || 15 ||
[Analyze grammar]

evamākarṇya tatsarvaṃ bhāṣitaṃ rājakanyayā |
ahaṃ pakṣī mahābhāge kṛpayā tava pīḍitaḥ || 16 ||
[Analyze grammar]

pakṣirūpadharo bhadre nāhaṃ siddho na jñānavān |
rudamānāṃ mahālāpairbhavatīṃ dṛṣṭavāniha || 17 ||
[Analyze grammar]

tataḥ pṛcchāmyahaṃ devi vada me kāraṇaṃ tviha |
piturgehe yathāvṛttamātmavṛttāṃtameva hi || 18 ||
[Analyze grammar]

tayā niveditaṃ sarvaṃ yathāsaṃkhyena duḥkhadam |
samāsena samākarṇya ujjvalastu mahamanāḥ || 19 ||
[Analyze grammar]

tāmuvāca mahāpakṣī divyādevīṃ suduḥkhitām |
yathā vivāhakāle te bhartāro maraṇaṃ gatāḥ || 20 ||
[Analyze grammar]

svayaṃvaranimittaṃ te kṣayaṃ yātāśca kṣatriyāḥ |
etatte ceṣṭitaṃ sarvaṃ mayā pitari bhāṣitam || 21 ||
[Analyze grammar]

anyajanmakṛtaṃkarmatava pāpaṃ sulocane |
mama pitrā mamāgre tu kṛpayā paribhāṣitam || 22 ||
[Analyze grammar]

tena doṣeṇa saṃpuṣṭā liptā jātā varānane |
etāvatkāraṇaṃ sarvaṃ tātena paribhāṣitam || 23 ||
[Analyze grammar]

pūrvakarmavipākaṃ tu bhuṃkṣva tvaṃ ca samāśvasa |
evaṃ sā bhāṣitaṃ tasya śrutvā kanyojjvalasya tat || 24 ||
[Analyze grammar]

pratyuvāca mahātmānaṃ bruvaṃtaṃ pakṣiṇaṃ punaḥ |
praṇatā dīnayā vācā kuru pakṣinkṛpāṃ mama || 25 ||
[Analyze grammar]

kathayasva prasādena tasya pāpasya niṣkṛtim |
prāyaścittaṃ supuṇyaṃ ca mama pātakaśodhanam || 26 ||
[Analyze grammar]

yena vrajāmyahaṃ puṇyaṃ viśuddhādhautakalmaṣā |
prāyaścittaṃ mahābhāga vada me tvaṃ prasādataḥ || 27 ||
[Analyze grammar]

ujjvala uvāca |
tavārthaṃ tu mahābhāge pitaraṃ pṛṣṭavānaham |
samākhyātamataḥ pitrā prāyaścittamanuttamam || 28 ||
[Analyze grammar]

tattvaṃ kuru mahābhāge sarvapātakaśodhanam |
dhyāyasva hi hṛṣīkeśaṃ śatanāmajapasva ca || 29 ||
[Analyze grammar]

bhava jñānaparā nityaṃ kuru vratamanuttamam |
aśūnyaśayanaṃ puṇyaṃ vrataṃ pāpapraṇāśakam || 30 ||
[Analyze grammar]

samācaṣṭa sa dharmātmā sarvajñānaprakāśakam |
jñānaṃ stotraṃ vrataṃ dhyānaṃ viṣṇoścaiva mahātmanaḥ || 31 ||
[Analyze grammar]

viṣṇuruvāca |
tasmātsā hi prajagrāha saṃsthitā nirjane vane |
sarvadvaṃdvavinirmuktā saṃjātā tapasi sthitā || 32 ||
[Analyze grammar]

vrataṃ cakre jitāhārā nirādhārā suduḥkhitā |
kāmakrodhavihīnā sā vargaṃ saṃyamya nityaśaḥ || 33 ||
[Analyze grammar]

iṃdriyāṇāṃ mahārāja mahāmohaṃ nirasya sā |
abde caturthake prāpte suprasanno janārdanaḥ || 34 ||
[Analyze grammar]

tasyai varaṃ dātukāmaścāyāto varanāyakaḥ |
tasyai saṃdarśayāmāsa svarūpaṃ varadaḥ prabhuḥ || 35 ||
[Analyze grammar]

sūta uvāca |
iṃdranīlaghanaśyāmaṃ śaṃkhacakragadādharam |
sarvābharaṇaśobhāḍhyaṃ padmahastaṃ maheśvaram || 36 ||
[Analyze grammar]

baddhāṃjalipuṭā bhūtvā vepamānā nirāśrayā |
uvāca gadgadairvākyaiḥ praṇatā madhusūdanam || 37 ||
[Analyze grammar]

tejasā tava divyena sthātuṃ śaknomi naiva hi |
divyarūpo bhaveḥ kastvaṃ kṛpayā mama cāgrataḥ || 38 ||
[Analyze grammar]

kathayasva prasādena kimatra tava kāraṇam |
sarvameva prasādena prabravīhi mahāmate || 39 ||
[Analyze grammar]

devamevaṃ vijānāmi tejasā iṃgitaistava |
jñānahīnā jagannātha na jāne rūpanāmanī || 40 ||
[Analyze grammar]

kiṃ brahmā vā bhavānviṣṇuḥ kiṃ vā śaṃkara eva hi |
evamuktvā praṇamyaivaṃ daṃḍavaddharaṇīṃ gatā || 41 ||
[Analyze grammar]

tāmuvāca jagannāthaḥ praṇatāṃ rājanaṃdinīm |
śrībhagavānuvāca |
trayāṇāmapi devānāmaṃtaraṃ nāsti śobhane || 42 ||
[Analyze grammar]

brahmā samarcito yena śaṃkaro vā varānane |
tenāhamarcito nityaṃ nātra kāryā vicāraṇā || 43 ||
[Analyze grammar]

etau mamābhinnatarau nityaṃ cāpi trirūpavān |
ahaṃ hi pūjito yaiśca tāvetau taiḥ supūjitau || 44 ||
[Analyze grammar]

ahaṃ devo hṛṣīkeśaḥ kṛpayā tava cāgataḥ |
stavenānena puṇyena vratena niyamena ca || 45 ||
[Analyze grammar]

saṃjātā kalmaṣairhīnā varaṃ varaya śobhane |
divyādevyuvāca |
vijayasva hṛṣīkeśa kṛṣṇakleśāpahāraka || 46 ||
[Analyze grammar]

namāmi caraṇadvaṃdvaṃ māmuddhara sureśvara |
varaṃ me dātukāmo'si cakrapāṇe prasīda me || 47 ||
[Analyze grammar]

ātmapādayugasyāpi bhaktiṃ dehi mamānagha |
darśayasva jagannātha mokṣamārgaṃ nirāmayam || 48 ||
[Analyze grammar]

dāsatvaṃ dehi vaikuṃṭha yadi tuṣṭo janārdana |
śrībhagavānuvāca |
evamastu mahābhāge gaccha nirdhūtakalmaṣā || 49 ||
[Analyze grammar]

vaiṣṇavaṃ paramaṃ lokaṃ durlabhaṃ yogibhiḥ sadā |
gaccha gaccha paraṃ lokaṃ prasādānmama sāṃpratam || 50 ||
[Analyze grammar]

evamukte tato vākye mādhavena mahātmanā |
divyādevī abhūddivyā sūryatejaḥ samaprabhā || 51 ||
[Analyze grammar]

paśyatāṃ sarvalokānāṃ divyābharaṇabhūṣitā |
divyamālānvitā sā ca divyahāravilaṃbinī || 52 ||
[Analyze grammar]

gatā sā vaiṣṇavaṃ lokaṃ dāhapralayavarjitam |
punaḥ pakṣī samāyātaḥ svagṛhaṃ harṣasaṃyutaḥ || 53 ||
[Analyze grammar]

tatsarvaṃ kathayāmāsa pitaraṃ prati sattamaḥ || 54 ||
[Analyze grammar]

iti śrīpadmapurāṇe bhūmikhaṃḍe venopākhyāne gurutīrthe cyavanacaritre'ṣṭāśītitamo'dhyāyaḥ || 88 ||
[Analyze grammar]