Chapter 27

[English text for this chapter is available]

bhīṣma uvāca |
taṭākārāmakūpeṣu vāpīṣu nalinīṣu ca |
vidhiṃ vadasva me brahmandevatāyataneṣu ca || 1 ||
[Analyze grammar]

ke tatra ṛtvijo viprā vedī vā kīdṛśī bhavet |
dakṣiṇābalayaḥ kālaḥ sthānamācārya eva ca || 2 ||
[Analyze grammar]

dravyāṇi kāni śastāni sarvamācakṣva suvrata |
pulastya uvāca |
śṛṇu rājanmahābāho taṭākādiṣu yo vidhiḥ || 3 ||
[Analyze grammar]

purāṇeṣvitihāsoyaṃ paṭhyate rājasattama |
prāpya pakṣaṃ śubhaṃ śuklaṃ saṃprāpte cottarāyaṇe || 4 ||
[Analyze grammar]

puṇyehni vipraiḥ kathite kṛtvā brāhmaṇavācanam |
aśubhairvarjite deśe taṭākasya samīpataḥ || 5 ||
[Analyze grammar]

caturhastāṃ samāṃ vedīṃ caturaśrāṃ caturmukhīm |
tathā ṣoḍaśahastaḥ syānmaṃḍapaśca caturmukhaḥ || 6 ||
[Analyze grammar]

vedyāstu parito gartāratnimātrāstrimekhalāḥ |
nava saptātha vā paṃca ṛjuvaktrā nṛpātmaja || 7 ||
[Analyze grammar]

vitastimātrā yoniḥ syātṣaṭsaptāṃguli vistṛtā |
gartāśca hastamātrāḥ syustriparvocchritamekhalāḥ || 8 ||
[Analyze grammar]

sarvatastu savarṇāḥ syuḥ patākādhvajasaṃyutāḥ |
aśvatthoduṃbaraplakṣavaṭaśākhākṛtāni tu || 9 ||
[Analyze grammar]

maṃḍapasya pratidiśaṃ dvārāṇyetāni kārayet |
śubhāstatrāṣṭahotāro dvārapālāstathāṣṭa vai || 10 ||
[Analyze grammar]

aṣṭau tu jāpakāḥ kāryā brāhmaṇā vedapāragāḥ |
sarvalakṣaṇasaṃpūrṇānmaṃtrajñānvijiteṃdriyān || 11 ||
[Analyze grammar]

kulaśīlasamāyuktānsthāpayedvai dvijottamān |
pratigarteṣu kalaśā yajñopakaraṇāni ca || 12 ||
[Analyze grammar]

vyajane cāsanaṃ śubhraṃ tāmrapātraṃ suvistaram |
tatastvanekavarṇāsyurbalayaḥ pratidaivatam || 13 ||
[Analyze grammar]

ācāryaḥ prakṣipedbhūmāvanumaṃtrya vicakṣaṇaḥ |
aratnimātro yūpaḥ syātkṣīravṛkṣavinirmitaḥ || 14 ||
[Analyze grammar]

yajamānapramāṇo vā saṃsthāpyo bhūtimicchatā |
hemālaṃkāriṇaḥ kāryāḥ paṃcaviṃśati ṛtvijaḥ || 15 ||
[Analyze grammar]

kuṃḍalāni ca haimāni keyūrakaṭakāni ca |
tathāṃgulipavitrāṇi vāsāṃsi vividhāni ca || 16 ||
[Analyze grammar]

dadyātsamāni sarveṣāmācārye dviguṇaṃ smṛtam |
dadyācchayanasaṃyuktamātmanaścāpi yatpriyam || 17 ||
[Analyze grammar]

sauvarṇau kūrmamakarau rājatau matsyaḍuṇḍubhau |
tāmrau kuṃbhīramaṃḍūkā vāyasaḥ śiṃśumārakaḥ || 18 ||
[Analyze grammar]

evamāsādya tatsarvamādāveva viśāṃpate |
śuklamālyāmbaradharaḥ śuklaṃgaṃdhānulepanaḥ || 19 ||
[Analyze grammar]

sarvauṣadhyudakaiḥ sarvaiḥ snāpito vedapāragaiḥ |
yajamānaḥ sapatnīkaḥ putrapautrasamanvitaḥ || 20 ||
[Analyze grammar]

paścimadvāramāsādya praviśedyāgamaṃḍapam |
tato maṃgalaśabdena bherīṇāṃ niḥsvanena ca || 21 ||
[Analyze grammar]

rajasā maṃḍalaṃ kuryātpaṃcavarṇena tattvavit |
ṣoḍaśāraṃ tataścakraṃ padmagarbhaṃ caturmukham || 22 ||
[Analyze grammar]

caturaśraṃ tu parito vṛttaṃ madhye suśobhanam |
vedyāścoparitaḥ kṛtvā grahānlokapatīṃstataḥ || 23 ||
[Analyze grammar]

saṃnyasenmaṃtrataḥ sarvānpratidikṣu vicakṣaṇaḥ |
kalaśaṃ sthāpayenmadhye vāruṇaṃ maṃtramāśritam || 24 ||
[Analyze grammar]

brahmāṇaṃ ca śivaṃ viṣṇuṃ tatraiva sthāpayedbudhaḥ |
vināyakaṃ ca vinyasya kamalāmaṃbikāṃ tathā || 25 ||
[Analyze grammar]

śāṃtyarthaṃ sarvalokānāṃ bhūtagrāmaṃ nyasettataḥ |
puṣpabhakṣyaphalairyuktamevaṃ kṛtvādhivāsanam || 26 ||
[Analyze grammar]

kuṃbhāṃśca ratnagarbhāṃstānvāsobhiḥ pariveṣṭayet |
puṣpagaṃdhairalaṃkṛtya dvārapālānsamaṃtataḥ || 27 ||
[Analyze grammar]

yajaddhvamiti tānbrūyādācāryamabhipūjayet |
bahvṛcau pūrvataḥ sthāpyau dakṣiṇena yajurvidau || 28 ||
[Analyze grammar]

sāmagau paścime sthāpyāvuttareṇa atharvaṇau |
udaṅmukho dakṣiṇato yajamāna upāviśet || 29 ||
[Analyze grammar]

yajadhvamiti tānbrūyādyājakānpunareva tān |
utkṛṣṭamaṃtrajāpyena tiṣṭhadhvamiti jāpakān || 30 ||
[Analyze grammar]

evamādiśya tānsarvānsaṃdhukṣyāgniṃ samaṃtravit |
juhuyādāhutīrmaṃtrairājyaṃ ca samidhastathā || 31 ||
[Analyze grammar]

ṛtvigbhiścaiva hotavyaṃ vāruṇaireva sarvataḥ |
grahebhyo vidhivaddhutvā tatheṃdrāyeśvarāya ca || 32 ||
[Analyze grammar]

marudbhyo lokapālebhyo vidhivadviśvakarmaṇe |
śāntisūktaṃ ca raudraṃ ca pāvamānaṃ ca maṃgalam || 33 ||
[Analyze grammar]

japecca pauruṣaṃ sūktaṃ pūrvato bahvṛcaḥ pṛthak |
śākraṃ raudraṃ ca saumyaṃ ca kauśmāṃḍaṃ jātavedasam || 34 ||
[Analyze grammar]

sauraṃ sūktaṃ japeyuste dakṣiṇena yajurvidaḥ |
vairājaṃ pauruṣaṃ sūktaṃ sauparṇaṃ rudrasaṃhitam || 35 ||
[Analyze grammar]

śaiśavaṃ paṃcanidhanaṃ gāyatraṃ jyeṣṭhasāma ca |
vāmadevyaṃ bṛhatsāma rauravaṃ ca rathaṃtaram || 36 ||
[Analyze grammar]

gavāṃ vrataṃ vikīrṇaṃ ca rakṣoghnaṃ ca yamaṃ tathā |
gāyeyuḥ sāmagā rājanpaścimadvāramāśritāḥ || 37 ||
[Analyze grammar]

ātharvaṇāścottarataḥ śāṃtikaṃ pauṣṭikaṃ tathā |
japeyurmanasā devamāśritā varuṇaṃ prabhum || 38 ||
[Analyze grammar]

pūrve dyurabhito rātrāvevaṃ kṛtvādhivāsanam |
gajāśvarathavalmīka saṃgamādvrajagokulāt || 39 ||
[Analyze grammar]

mṛdamādāya kuṃbheṣu prakṣipedoṣadhīstathā |
rocanāṃ ca sasiddhārthāṃ gaṃdhānguggulumeva ca || 40 ||
[Analyze grammar]

snāpanaṃ tasya karttavyaṃ paṃcagavyasamanvitaṃ |
pūrvaṃ karturmahāmaṃtrairevaṃ kṛtvā vidhānataḥ || 41 ||
[Analyze grammar]

ativāhya kṣapāmevaṃ vidhiyuktena karmaṇā |
tataḥ prabhāte vimale saṃjāte tu śataṃ gavāṃ || 42 ||
[Analyze grammar]

brāhmaṇebhyaḥ pradātavyamaṣṭaṣaṣṭyathavā punaḥ |
paṃcāśadvātha ṣaṭtriṃśatpaṃcaviṃśati vā punaḥ || 43 ||
[Analyze grammar]

tataścāvasaraprāpte śuddhe lagne suśobhane |
vedaśabdaiḥ sagaṃdharvairvādyaiśca vividhaiḥ punaḥ || 44 ||
[Analyze grammar]

kanakālaṃkṛtāṃ kṛtvā jale gāmavatārayet |
sāmagāya ca sā deyā brāhmaṇāya viśāṃpate || 45 ||
[Analyze grammar]

pātrīmādāya sauvarṇī paṃcaratnasamanvitām |
tato nikṣipya makarānmatsyādīṃścaiva sarvaśaḥ || 46 ||
[Analyze grammar]

dhṛtāṃ caturbhirvipraiśca vedavedāṃgapāragaiḥ |
mahānadījalopetāṃ dadhyakṣatavibhūṣitām || 47 ||
[Analyze grammar]

uttarābhimukhāṃ nyubjāṃ jalamadhye tu kārayet |
ātharvaṇena susnātāṃ punarmāyāṃ tathaiva ca || 48 ||
[Analyze grammar]

āpohiṣṭheti maṃtreṇa kṣiptvāgatya ca maṃḍapaṃ |
pūjayitvā sadasyānvai baliṃ dadyātsamaṃtataḥ || 49 ||
[Analyze grammar]

punardināni hotavyaṃ catvāri rājasattama |
caturthīkarma karttavyaṃ deyaṃ tatrāpi śaktitaḥ || 50 ||
[Analyze grammar]

kṛtvā tu yajñapātrāṇi yajñopakaraṇāni ca |
ṛtvigbhyastu samaṃ dadyānmaṃḍapaṃ vibhajetpunaḥ || 51 ||
[Analyze grammar]

hemapātrīṃ ca śayyāṃ ca viprāya ca nivedayet |
tataḥ sahasraṃ viprāṇāmathavā'ṣṭaśataṃ tathā || 52 ||
[Analyze grammar]

bhojanīyaṃ yathāśakti paṃcāśadvātha viṃśatiḥ |
evameṣa purāṇeṣu taṭākavidhirucyate || 53 ||
[Analyze grammar]

kūpavāpīṣu sarvāsu tathā puṣkariṇīṣu ca |
eṣa eva vidhirdṛṣṭaḥ pratiṣṭhāsu tathaiva ca || 54 ||
[Analyze grammar]

maṃtratastu viśeṣaḥ syātprāsādodyānabhūmiṣu |
ayaṃ tvaśaktāvardhena vidhirdṛṣṭaḥ svayaṃbhuvā || 55 ||
[Analyze grammar]

svalpeṣvekāgnivatkāryo vittaśāṭhyavivarjitaiḥ |
prāvṛṭkāle sthitaṃ toyamagniṣṭomasamaṃ smṛtam || 56 ||
[Analyze grammar]

śaratkālasthitaṃ yatsyāttaduktaphaladāyakam |
vājapeyātirātrābhyāṃ hemaṃte śiśire sthitam || 57 ||
[Analyze grammar]

aśvamedhasamaṃ prāhurvasaṃtasamaye sthitam |
grīṣmepi yatsthitaṃ toyaṃ rājasūyādviśiṣyate || 58 ||
[Analyze grammar]

etānmahārāja viśeṣadharmānkaroti corvyāmatiśuddhabuddhiḥ |
sa yāti brahmālayameva śuddhaḥ kalpānanekāndivi modate ca || 59 ||
[Analyze grammar]

anekalokānvicaransvarādīnbhuktvā parārdhadvayamaṅganābhiḥ |
sahaiva viṣṇoḥ paramaṃ padaṃ yatprāpnoti tadyogabalena bhūyaḥ || 60 ||
[Analyze grammar]

iti śrīpādmapurāṇe prathame sṛṣṭikhaṃḍe taṭākapratiṣṭhāvidhirnāma saptaviṃśo'dhyāyaḥ || 27 ||
[Analyze grammar]