Chapter 241

pāṣāṇopakhyāne viśvarūpavarṇanaṃ nāma sargaḥ |
ekacatvāriṃśaduttaradviśatatamaḥ sargaḥ |
rāmaḥ |
anantaraṃ mune brūhi kālī kimiva nṛtyati |
kiṃ śūrpahalakuddālamusulādisrajāṃ dhṛtiḥ || 1 ||
[Analyze grammar]

vasiṣṭhaḥ |
sa bhairavaścidākāśaśśiva ityabhidhīyate |
ananyāṃ tasya tāṃ viddhi spandaśaktimanāmayām || 2 ||
[Analyze grammar]

yathaikaṃ pavanaspandāvekamauṣṇyānalau yathā |
cinmātraṃ spandaśaktiśca tathaivaikātma sarvadā || 3 ||
[Analyze grammar]

spandena lakṣyate vāyurvahnirauṣṇyena lakṣyate |
tatspandamayyā śaktyaivaṃ lakṣyate nānyathā kila || 4 ||
[Analyze grammar]

śivaṃ brahma viduśśāntamavācyaṃ vāgvidāmapi |
spandaśaktistadicchedaṃ dṛśyābhāsaṃ tanoti sā || 5 ||
[Analyze grammar]

sākārasya narasyecchā yathā vā kalpanāpuram |
karotyevaṃ śivasyecchā karotīdamanākṛteḥ || 6 ||
[Analyze grammar]

saiṣā citiriti proktā cetyonmukhatayoditā |
saiṣoktā vāsanānāmnī vāsanāddṛśyasaṃvidaḥ || 7 ||
[Analyze grammar]

saiṣā jīvakalā proktā jīvanājjīvanaiṣaṇā |
prakṛtitvena sargasya svayaṃ prakṛtitāṃ gatā || 8 ||
[Analyze grammar]

dṛśyābhāsānubhūtīnāṃ karaṇātprocyate kriyā |
vāḍavāgniśikhākārā śoṣācchuṣketi kathyate || 9 ||
[Analyze grammar]

caṇḍitvāccaṇḍikā proktā sotpalotpalavarṇataḥ |
jayā jayaikaniṣṭhatvātsiddhā siddhisamāśrayāt || 10 ||
[Analyze grammar]

jayantī ca jayātproktā vijayā vijayāśrayāt |
proktāparājitā vīryāddurgā durgraharūpataḥ || 11 ||
[Analyze grammar]

oṅkārasāraśaktitvād sāreti parikīrtitā |
gāyatrī gāyanātmatvātsāvitrī prasavasthiteḥ || 12 ||
[Analyze grammar]

saraṇātsarvadṛṣṭīnāṃ kathitaiṣā sarasvatī |
gaurī gaurāṅgadehatvādbhavadehānuṣaṅgiṇī || 13 ||
[Analyze grammar]

suptānāmatha buddhānāmammātroccāraṇāddhṛdi |
nityaṃ trailokyabhūtānāmametīndukalocyate || 14 ||
[Analyze grammar]

śivayorvyomarūpatvādasitaṃ lakṣyate vapuḥ |
nabho hi māṃsametābhyāṃ dṛṣṭikṛṣṭaṃ vilokyate || 15 ||
[Analyze grammar]

āste nabho nabhasyeva tena tau nabhasi sthitau |
nabhonibhāvabhūtāṅgāvacchau vyomna ivāgrajau || 16 ||
[Analyze grammar]

hastapādāṃsamūrdhnāṃ yadbahutvālpatvabhedataḥ |
nānātvaṃ halaśūrpādisragdharatvaṃ ca tacchṛṇu || 17 ||
[Analyze grammar]

sā hi kriyā bhagavatī parispandaikarūpiṇī |
dadyātsnāyācca juhuyādityādyugraśarīriṇī || 18 ||
[Analyze grammar]

citiśaktiranādyantā tathābhātātmanātmani |
sākāśarūpiṇī śāntā dṛśyaśrīḥ spandarūpiṇī || 19 ||
[Analyze grammar]

devyāstasyā hi yāḥ kālyā nānābhinayavartanāḥ |
tā imā brahmaṇaḥ sargajarāmaraṇarītayaḥ || 20 ||
[Analyze grammar]

kriyāsau grāmanagaradvīpamaṇḍalamālikāḥ |
spandātkaroti dhatte'ntaḥ kalpitāvayavātmikāḥ || 21 ||
[Analyze grammar]

kālī kamalinī kālī kriyā brahmāṇḍakālikā |
dhatte svāvayavībhūtāṃ dṛśyalakṣmīmimāṃ hṛdi || 22 ||
[Analyze grammar]

na kadācana ciddevī nirdṛśyāvayavā kvacit |
śivatvavyatirekeṇa śivataiva vidṛśyatā || 23 ||
[Analyze grammar]

yathāṅgaṃ śūnyatā vyomnaḥ spandanaṃ mātariśvanaḥ |
jyotsnāyāśśaityamaṅgaṃ hi dṛśyamevaṃ citeḥ kriyā || 24 ||
[Analyze grammar]

śivaṃ śāntamanāyāsamavācyaṃ viddhi nirmalam |
na manāgapi tatrāsti staimityātspandadharmatā || 25 ||
[Analyze grammar]

sā kriyaiva tathārūpā satī bodhavaśād yadā |
vyāvṛttyaiva tathaivāste śiva ityucyate tadā || 26 ||
[Analyze grammar]

citiśakteḥ kriyādevyāḥ pratiṣṭhānaṃ yadātmani |
tathābhūtasthitereva tadaiva śiva ucyate || 27 ||
[Analyze grammar]

devyāḥ kriyāyāścicchakteḥ kharūpiṇyā mahākṛteḥ |
kalpitākāradhāriṇyā ananyāvayavā ime || 28 ||
[Analyze grammar]

sargāḥ sajanatāvargā lokā ālokabhāsurāḥ |
sadvīpasāgarāḥ pṛthvyaḥ savanāvanayo'drayaḥ || 29 ||
[Analyze grammar]

sāṅgopāṅgāstrayo vedāḥ savidyāsthānagītayaḥ |
savidhipratiṣedhārthāḥ saśubhāśubhakalpanāḥ || 30 ||
[Analyze grammar]

sadakṣiṇāgnayo yajñāḥ puroḍāśājyaśaṃsinaḥ |
kuṇālolūkhalabṛsīśūrpayūpādisaṃyutāḥ || 31 ||
[Analyze grammar]

saṅgrāmāḥ sāyudhagrāmāḥ saśūlaśaraśaktayaḥ |
sabhusuṇḍigadāprāsahayebhabhaṭabhāsurāḥ || 32 ||
[Analyze grammar]

jātayo bhūtasaṅghānāṃ caturdaśa surādikāḥ |
caturdaśābdhidvīporvyastathā lokāścaturdaśa || 33 ||
[Analyze grammar]

rāmaḥ |
citeḥ kālīśarīriṇyāḥ sargā ye'ṅge sthitāstathā |
te kimātmani satyāḥ syurutāsatyā vadeti me || 34 ||
[Analyze grammar]

vasiṣṭhaḥ |
rāmāsau kila cicchaktistayā yaccoditaṃ tathā |
tatpracetitamevāntaḥ satyaṃ cedamivākhilam || 35 ||
[Analyze grammar]

na tatprabimbitaṃ bāhyānmakurapratibimbavat |
satyaṃ tadantarevāsti citernāsatyamarthataḥ || 36 ||
[Analyze grammar]

cidrūpasya tathāpyantaḥ satsaṅkalpapuraṃ bhavet |
dṛḍhadhyānādviśuddhāyāściterbhavatu mā katham || 37 ||
[Analyze grammar]

ādarśe'stvatha vā svapne sargaḥ saṅkalpane'stu vā |
sa ātmanyarthakāritvātsatya ityeva me matiḥ || 38 ||
[Analyze grammar]

mama nārthāya sa iti vakṣi cettatkathaṃ na te |
deśāntaragatāḥ sarve bhavantyarthāya samprati || 39 ||
[Analyze grammar]

yathā deśāntaragrāmastadgatasyārthakṛdbhavet |
sarve tathaite tadbhāvaṃ gatasyārthāya niścayāt || 40 ||
[Analyze grammar]

yad yathābhūtasarvārthakriyākāri pradṛśyate |
tatsatyamātmano'nyasya naiva tattāmupeyuṣaḥ || 41 ||
[Analyze grammar]

tasmāccicchaktikośasthāḥ sarvāḥ sargaparamparāḥ |
satyā ātmani tadbhāvaṃ gatasyānyasya nākhilāḥ || 42 ||
[Analyze grammar]

bhūtabhavyabhaviṣyatsthāḥ saṅkalpasvapnapūrgaṇāḥ |
sarve satyāḥ paraṃ tattvaṃ sarvātma kathamanyathā || 43 ||
[Analyze grammar]

cālitasya yathā gāḍhanidrasya svapnapattanam |
na luṭhatyeva luṭhitamityapyanumitaṃ sphuṭam || 44 ||
[Analyze grammar]

tathā calantyā luṭhitaṃ tasyā dehagataṃ jagat |
na luṭhatyeva makurapratibimbamiva sthitaṃ || 45 ||
[Analyze grammar]

sa trailokyamahārambhaḥ satyo'pi bhrāntimātrakam |
bhrāntimātrasya ke nāma luṭhanāluṭhane vada || 46 ||
[Analyze grammar]

kadā svapnapuraṃ satyaṃ kadā svapnapuraṃ mudhā |
kadā svapnapuraṃ bhagnaṃ kadā svapnapuraṃ sthitaṃ || 47 ||
[Analyze grammar]

bhrāntirna kevalaṃ saiva dṛśyaśrīryāvadagragām |
tvaṃ viddhīmāmapi bhrāntiṃ jagallakṣmīmavāstavīm || 48 ||
[Analyze grammar]

saṅkalpane manorājye svapne saṅkathane bhrame |
yathā purānubhavanaṃ trailokyānubhavastathā || 49 ||
[Analyze grammar]

ahamiti jagaditi svāntarbhrāntiriyaṃ prakacatīva citeḥ |
paramākāśakṛśāṅgyāśśāmyati nipuṇaṃ parijñātā || 50 ||
[Analyze grammar]