Chapter 240

pāṣāṇopākhyāne śivasvarūpavarṇanaṃ nāma sargaḥ |
catvāriṃśaduttaradviśatatamaḥ sargaḥ |
vasiṣṭhaḥ |
cinmātraparamākāśa eṣa yaḥ kathito mayā |
eṣo'sau śiva ityuktastadā rudraḥ pranṛtyati || 1 ||
[Analyze grammar]

yāsau tasyākṛtirnāsāvākṛtiḥ kṛtināṃ vara |
taccinmātraghanaṃ vyoma tathā kacati tādṛśam || 2 ||
[Analyze grammar]

mayā dṛṣṭaṃ tadākāśameva śāntaṃ tadākṛti |
mayaiva tatparijñātaṃ nānyaḥ paśyati tattathā || 3 ||
[Analyze grammar]

yathā nāma sa kalpāntaḥ sa rudraḥ sā ca bhairavī |
māyāmātraṃ tathā sarvaṃ parijñātamalaṃ mayā || 4 ||
[Analyze grammar]

cidvyomaiva paraṃ śūnyaṃ sanniveśena netarat |
tathā saṃlakṣyate rāma bhairavākāratāṃ gatam || 5 ||
[Analyze grammar]

vācyavācakasambandhaṃ vinā bodho na jāyate |
yasmāttasmāttvayi mayā dṛṣṭamevaṃ pravarṇitam || 6 ||
[Analyze grammar]

yadeva vācyupārūḍhametad rāma tadeva te |
rūḍhādhibhautikadṛśaḥ kṣaṇātsatyātmatāṃ gatam || 7 ||
[Analyze grammar]

na bhairavī sā naivāsau bhairavo naiva sa kṣayaḥ |
samastameva tadbhrāntimātraṃ cidvyoma bhāsate || 8 ||
[Analyze grammar]

svapnanirmāṇapuravatsaṅkalparaṇavegavat |
kathārthasārtharasavanmanorājyavilāsavat || 9 ||
[Analyze grammar]

yathā svapnapuraṃ svacche vyomni mauktikadhīryathā |
yathā keśoṇḍukaṃ vyomni tathā cidbhāti cidghane || 10 ||
[Analyze grammar]

cinmātrākāśamevācchaṃ kacati svātmanātmani |
yathā nāma tathābhāti tadātmaiva jagattayā || 11 ||
[Analyze grammar]

yathā cidvyomni kacati sva evātmā jagattayā |
tathā kacati tattatra kalpāntaśivanartanam || 12 ||
[Analyze grammar]

śivayorevamākāro nirākāro'ṅga varṇitaḥ |
adhunā śṛṇu vakṣye te nṛttasyānṛttatāsthitim || 13 ||
[Analyze grammar]

cetanaṃ cetanāddhetoḥ kiñcitsaṃspandanaṃ vinā |
kvacitsthātuṃ na śaknoti vastvavastutayā yathā || 14 ||
[Analyze grammar]

svabhāvāccetanaṃ tasmād rudratvena tathā sthitam |
hemeva rūpakatvena sanniveśavilāsinā || 15 ||
[Analyze grammar]

yannāma cetanaṃ yatra tadavaśyaṃ svabhāvataḥ |
spandadharmi bhavatyeva vastutā hi svabhāvajā || 16 ||
[Analyze grammar]

yaḥ spandaścidghanasya svaśśivasyāsya sa eva naḥ |
svavāsanāveśavaśānnṛttamityeva rājate || 17 ||
[Analyze grammar]

ataḥ sa kalpāntaśivo rudro raudrākṛtirdrutam |
yannṛtyati hi tadviddhi cidghanaspandanaṃ nijam || 18 ||
[Analyze grammar]

rāmaḥ |
prāmāṇikadṛśā dṛśyamidaṃ nāstyeva vastutaḥ |
yadi vāstyeva tatsarvaṃ kalpānte pravinaśyati || 19 ||
[Analyze grammar]

tatkalpāntamahāśūnye etasminparamāmbare |
kathaṃ kiṃ nāma vā cetyaṃ cettā cetati cidghanaḥ || 20 ||
[Analyze grammar]

vasiṣṭhaḥ |
etadeva tadāpyaṅga dvaitaikyāmbhodaśāntaye |
yadi cinmātranabhasaścetyamasti na kiñcana || 21 ||
[Analyze grammar]

na kiñciccetati tataḥ kvacitkaścitkadācana |
sarvaṃ śāntaṃ dṛṣanmaunaṃ vijñānaghanamambaram || 22 ||
[Analyze grammar]

yaccedaṃ cetyate nāma tatsvabhāvo'sya valgati |
citsvabhāvasya śāntasya svasattāyāmavasthiteḥ || 23 ||
[Analyze grammar]

yathā svapne cidevāntaḥ purapattanavadbhavet |
purādi na tu tatkiñcidvijñānākāśameva tat || 24 ||
[Analyze grammar]

ātmanātmani cicchūnyaṃ jñātāraṃ jñeyamapyalam |
tathādisargādārabhya vetti svaṃ kacanaṃ ca tat || 25 ||
[Analyze grammar]

svayamantaḥ kacatkāntiścidākāśaḥ svabhāvakhe |
ayaṃ so'hamayaṃ ca tvaṃ karotītyādikalpanam || 26 ||
[Analyze grammar]

tasmānna dvaitamastīha na caikyaṃ na ca śūnyatā |
na cettā cetanaṃ caiva maunameva na tacca vā || 27 ||
[Analyze grammar]

na cetati kvacitkiñcitkaściccetyādyabhāvataḥ |
tena cettāpi nāstyeva maunameveti śiṣyate || 28 ||
[Analyze grammar]

nirvikalpasamādhirhi siddhāntaḥ sarvavāṅmaye |
tacca jīvaddṛṣanmaunaṃ tūṣṇīmevāta āsyatām || 29 ||
[Analyze grammar]

kurvannijaṃ prakṛtameva yathāpravāhamācārajālamacalaḥ paramārthamaunāt |
nirmānamohamadabhedamanaṅgajīvamākāśakośaviśadāśaya śāntamāssva || 30 ||
[Analyze grammar]