Chapter 242

śivaśaktivarṇanaṃ nāma sargaḥ |
dvicatvāriṃśaduttaradviśatatamaḥ sargaḥ |
vasiṣṭhaḥ |
iti nṛtyati sā devī dīrghairdordaṇḍamaṇḍalaiḥ |
parispandātmakairvyoma kurvāṇā ghanakānanam || 1 ||
[Analyze grammar]

kriyāsau nṛtyati tathā citiśaktiranāmayā |
asyā vibhūṣaṇaṃ śūrpakuṇālapaṭalādikam || 2 ||
[Analyze grammar]

śaraśaktigadāprāsamusulāsiśilādi ca |
bhāvābhāvapadārthaughakalākālakramādi ca || 3 ||
[Analyze grammar]

citspando'ntarjagaddhatte kalpaneva puraṃ hṛdi |
saiva vā jagadityeva kalpanaiva yathā puraṃ || 4 ||
[Analyze grammar]

pavanasya yathā spandastathaivecchā śivasya sā |
yathāspando'nilaśśāntaḥ praśāntecchastathā śivaḥ || 5 ||
[Analyze grammar]

amūrto mūrtamākāśe śabdāḍambaramānilaḥ |
yathā spandastanotyevaṃ śivecchā kurute jagat || 6 ||
[Analyze grammar]

nṛtyantyātha yadā tatra tayā tasminparāmbare |
kākatālīyayogena saṃrambhavaśataḥ svayam || 7 ||
[Analyze grammar]

nikaṭasthaśśivaḥ spṛṣṭaḥ sa manāṅmātramantikāt |
vāḍavo'gniḥ svanāśāya vahantyevāmbulekhayā || 8 ||
[Analyze grammar]

spṛṣṭamātre śive tasmiṃstataḥ paramakāraṇe |
pravṛttā prakṛtirgantuṃ sā śanaistanutāṃ tadā || 9 ||
[Analyze grammar]

anantākāratāṃ tyaktvā sampannā girimātrikā |
tato nagaramātrāsau tataśca drumasundarī || 10 ||
[Analyze grammar]

tato vyomasamākārā śivasyaivākṛtiṃ tataḥ |
sā praviṣṭā saricchāntasaṃrambheva mahārṇavam || 11 ||
[Analyze grammar]

eka evābhavadatho śivayā parivarjitaḥ |
śiva eva śive śānte ākāśe śamaśobhitaḥ || 12 ||
[Analyze grammar]

rāmaḥ |
bhagavañchivasaṃspṛṣṭā sā śivā parameśvarī |
kimarthamāgatā śāntimiti me brūhi tattvataḥ || 13 ||
[Analyze grammar]

vasiṣṭhaḥ |
sā rāma prakṛtiḥ proktā śivecchā parameśvarī |
jaganmāyeti vikhyātā spandaśaktirakṛtrimā || 14 ||
[Analyze grammar]

sa paraḥ prakṛteḥ proktaḥ puruṣaḥ pāvanākṛtiḥ |
śivarūpadharaśśāntaḥ paramākāśaśaktimān || 15 ||
[Analyze grammar]

bhramati prakṛtistāvatsaṃsāre bhramarūpiṇī |
spandamātrātmikā secchā cicchaktiḥ parameśvarī || 16 ||
[Analyze grammar]

yāvanna paśyati śivaṃ nityatṛptamanāmayam |
ajaḍaṃ padamādyantavarjitaṃ tarjitadvayam || 17 ||
[Analyze grammar]

saṃvinmātraikadharmatvātkākatālīyayogataḥ |
saṃviddevī śivaṃ spṛṣṭvā tanmayyeva bhavatyalam || 18 ||
[Analyze grammar]

prakṛtiḥ puruṣaṃ spṛṣṭvā prakṛtitvaṃ samujjhati |
tadantarekatāṃ gatvā nadī rūpamivārṇave || 19 ||
[Analyze grammar]

āpagā hi payomātrā saṅgatārṇava eva sā |
yadā tadā tamevāśu prāpya tatraiva līyate || 20 ||
[Analyze grammar]

citiśśivecchā sā devaṃ tamevāsādya śāmyati |
janmasthānaṃ śilāṃ prāpya tīkṣṇā dhārā yathāyasī || 21 ||
[Analyze grammar]

puṃsaśchāyā nijā chāyāṃ praviṣṭasya śarīrakam |
yathāśu praviśatyeva prakṛtiḥ puruṣaṃ tathā || 22 ||
[Analyze grammar]

cetitvā cinnijaṃ bhāvaṃ puruṣākhyaṃ sanātanam |
bhūyo bhramati saṃsāre neha tattāṃ prayāti hi || 23 ||
[Analyze grammar]

sādhurvasati cauraughe tāvad yāvadasau na tam |
parijānāti vijñāya na tatra ramate punaḥ || 24 ||
[Analyze grammar]

dvaite tāvadasadrūpe ramate'numate citiḥ |
paraṃ paśyati no yāvattaṃ dṛṣṭvā tanmayī bhavet || 25 ||
[Analyze grammar]

citi nirvāṇarūpaṃ tatprakṛtiḥ paramaṃ padam |
prāpya tattāmavāpnoti saridabdhāvivābdhitām || 26 ||
[Analyze grammar]

tāvadvimohavaśataścitirākuleṣu sargeṣu saṃsarati janmadaśāśriteṣu |
yāvanna paśyati paraṃ tamathāśu dṛṣṭvā tatraiva majjati ghanaṃ madhunīva bhṛṅgī || 27 ||
[Analyze grammar]

samprāpya kastyajati nāma tadātmatattvaṃ prāpyānubhūya ca jahāti rasāyanaṃ kaḥ |
śāmyanti yena sakalāni nirantarāṇi duḥkhāni janmamṛtimohamayāni rāma || 28 ||
[Analyze grammar]