Chapter 234

puṣkarāvartāḍambaraṃ nāma sargaḥ |
catustriṃśaduttaradviśatatamaḥ sargaḥ |
vasiṣṭhaḥ |
athāvanipayastejaḥpavanānāṃ yugakṣaye |
jāte paramasaṅkṣobhe babhūvāsmiñjagattrayam || 1 ||
[Analyze grammar]

tāpiñchavipinoḍḍītinibhabhasmābhrabhāsuram |
mahārṇavamahāvartavṛttidhūmavivartanam || 2 ||
[Analyze grammar]

līnajvālālavollāsahelāṭimiṭimāraṭi |
skannabāṣpābhrasambhārapūrṇalokāntarāntaram || 3 ||
[Analyze grammar]

ucchaladdīrghajhāṅkāraiśchamacchamamayātmakaiḥ |
tūryairunnamadāsāravisārijayaghoṣaṇam || 4 ||
[Analyze grammar]

bhramadbhasmābhadhūmrābhraṃ bṛhatkalpābhrasambhramam |
bāṣpābhravibhramodbhrāntaṃ śīkarogrābhravṛndavat || 5 ||
[Analyze grammar]

brahmāṇḍabhittibhāṅkārabhīṣaṇairmātariśvanaḥ |
prasarairambaroḍḍīnadagdhendrādipurotkaram || 6 ||
[Analyze grammar]

jalānilānalollāsasphuṭatkoṭiśatāśmanām |
pravighaṭṭanaṭāṅkārairjaḍībhūtāntakaśruti || 7 ||
[Analyze grammar]

nabhasstambhanibhābaddhadhārānīrandhravarṣaṇaiḥ |
karṣaṇaiḥ kalpavallīnāṃ chamacchamaghanadhvani || 8 ||
[Analyze grammar]

gaṅgā taraṅgikā yeṣāṃ tādṛśaiḥ saritāṃ gaṇaiḥ |
abhrairiva nabho bhīmaiḥ pūryamāṇākhilārṇavam || 9 ||
[Analyze grammar]

tāpiñchapattravṛndasthapuṣpagucchasamopamaiḥ |
tapadbhirarkairālīḍhapītakalpābhramaṇḍalam || 10 ||
[Analyze grammar]

vahadgirisaridvyūḍhaśikharidvīpapattanam |
kalpānilaghanakṣobhakṛtaparvatakuṭṭanam || 11 ||
[Analyze grammar]

grahatārāgaṇairugrairvyagrairvigrahadurgrahaiḥ |
patadbhirdviguṇālātalatamāvartapātibhiḥ || 12 ||
[Analyze grammar]

arṇavotthajalādrīndrasaṅghaṭṭāsphoṭaghaṭṭitam |
mahāpralayaparyastaparvataprāntakuṭṭitam || 13 ||
[Analyze grammar]

ghanaśātkṛtabāṣpābhraiḥ kalpābhrairapi meduraiḥ |
andhīkṛtārkajālāṃśutamonibiḍamantharam || 14 ||
[Analyze grammar]

viśīrṇavasudhāpīṭhakhaṇḍakhaṇḍairgalattaṭaiḥ |
uhyamānairluṭhacchailapattanaiḥ saṅkaṭārṇavam || 15 ||
[Analyze grammar]

ūrmyadryunnayanacchinnaghanairghargharamārutaiḥ |
samudraghoṣairgambhīranirghātairbhagnadiktaṭam || 16 ||
[Analyze grammar]

brahmāṇḍakuḍyakroḍāgrakuṭṭakaiḥ kaṭuṭāṅkṛtaiḥ |
kalpābhravikaṭāsphoṭairghaṭṭitaikārṇavāraṭi || 17 ||
[Analyze grammar]

svargapātālabhūlokakhaṇḍakhaṇḍairvimiśritaiḥ |
yathāsvabhāvaṃ tiṣṭhadbhirmarudbhugnairvṛtāmbaram || 18 ||
[Analyze grammar]

mṛtārdhamṛtadagdhārdhadagdhāṅgairdevadānavaiḥ |
anyo'nyadarśanādvātavellitairbhramitāyudham || 19 ||
[Analyze grammar]

kalpāntapavanodbhrāntairlokāntarajarattṛṇaiḥ |
ārabdhārjunavātākhyastambhamuddhūmabhasmabhiḥ || 20 ||
[Analyze grammar]

uhyamānaśilājālaprahāraviluṭhattaṭaiḥ |
patallokāntaraistāraṭuṣkārakaṭuṭāṅkṛtam || 21 ||
[Analyze grammar]

vātodvyūḍhagirivrātaguhābhāṅkārabhāsuram |
patadbhirvihitāvartaṃ lokapālapurīpuraiḥ || 22 ||
[Analyze grammar]

kṛtakarkaśanirhrādairasurairiva mārutaiḥ |
uhyamānavanavyūhaprotavātāyanairvṛtam || 23 ||
[Analyze grammar]

puramaṇḍaladaityāgnisuranāgavivasvatām |
nikurumbaṃ dadhadvyomni maṣakānāmivoccayam || 24 ||
[Analyze grammar]

naśyannagavarābhogabhāgairbhagnasurālayaiḥ |
āvartaghargharārāvairjalamūrdhvamadho'nalam || 25 ||
[Analyze grammar]

kurvajjalādriniṣpeṣairdikpālapurakuṭṭanam |
nipataddevadaityendrasiddhagandharvapattanam || 26 ||
[Analyze grammar]

kuṭṭanaṃ parvatādīnāṃ praśāntāṅgārarūpiṇām |
vātaiḥ kurvatpadārthānāmāsāraṃ rajasāmiva || 27 ||
[Analyze grammar]

purāṇyamaradaityānāṃ bhramadbhittīni śātayat |
ratnaiḥ khanakhanāyanti payāṃsīva payasvatām || 28 ||
[Analyze grammar]

pūrṇāmbaraṃ paripatallokasaptakamandiraiḥ |
cakrāvṛttyā bhramadrūpairaparaiḥ sāgarairiva || 29 ||
[Analyze grammar]

hemasphaṭikavaiḍūryasasāramaṇimandiraiḥ |
divaḥ patadbhirākīrṇamudyajjhaṇajhaṇasvanaiḥ || 30 ||
[Analyze grammar]

utpeturdhūmabhasmābdāḥ peturdhārāpurotkarāḥ |
unmamajjustaraṅgaughā mamajjurbhūtalādrayaḥ || 31 ||
[Analyze grammar]

āvartaghargharārāvā mithovidalanodyatāḥ |
jughūrṇurarṇavāḥ kīrṇāḥ parṇavatprauḍhaparvatāḥ || 32 ||
[Analyze grammar]

krandacchiṣṭāmaragaṇaṃ dalatsajjīvabhūtakam |
bhramatketuśatotpātaṃ duṣprekṣamabhavajjagat || 33 ||
[Analyze grammar]

mṛtārdhamṛtayā bhūtasantatyānilalolayā |
abhūnnīrandhramākāśaṃ jīrṇaparṇasavarṇayā || 34 ||
[Analyze grammar]

jagadāsītpatacchṛṅgasthūladhāraughanirbharam |
bhraśyadbṛhadgiripuravrātapūrṇasaricchatam || 35 ||
[Analyze grammar]

śāmyacchamaśamāśabdaśatasaṅgihutāśanam |
calābdhivalanādolālolaśailasarittaṭam || 36 ||
[Analyze grammar]

tṛṇarāśisarinnyāyamiśradvīpārṇavotkaram |
atyantadūradigvyomakṣaṇajvālāmahāvanam || 37 ||
[Analyze grammar]

varṣaśāmyaddhutāśotthabhasmāmodapatatsuram |
bhūtapūrvajagadbhūtaṃ parivismṛtasargakam || 38 ||
[Analyze grammar]

nirargalollasannādaṃ sārgalopaśamakramam |
sargalobhollasaccheṣaṃ vargalokavivarjitam || 39 ||
[Analyze grammar]

anārataviparyāsakārimārutanirdhutam |
bījarāśimivājasraṃ pūyamānaṃ punaḥ punaḥ || 40 ||
[Analyze grammar]

ulmukānyo'nyaniṣpeṣavahni cūrṇasuvarṇajaiḥ |
rajobhirvivṛtairhemakuṭṭimākāśakoṭaram || 41 ||
[Analyze grammar]

bhūmaṇḍalabṛhatkhaṇḍairbhraṣṭaiḥ sadvīpasāgaraiḥ |
pūrṇasaptamapātālaṃ luṭhatpātālamaṇḍalaiḥ || 42 ||
[Analyze grammar]

āsaptamasutālāntamāmahītalaparvatam |
āvyomaikārṇavībhūtaṃ pūrṇaṃ pralayavāyubhiḥ || 43 ||
[Analyze grammar]

ekārṇavo'tha vavṛdhe śanaiśśīghraṃ saricchataiḥ |
bhuvane jaḍakallolaiḥ kopo mūrkhāśaye yathā || 44 ||
[Analyze grammar]

musulopamayā pūrvaṃ tataḥ stambhanibhāṅgayā |
tatastāladrumākāradhārayāsārasārayā || 45 ||
[Analyze grammar]

tato nadīpravāhograjalapātaikapātayā |
saptadvīpamahīpīṭhasamamedurameghayā || 46 ||
[Analyze grammar]

vahnirvidāhakṛdvṛṣṭyā śamamabhyāyayau tathā |
śāstrasajjanasaddṛṣṭyā maurkhyamāpatpradaṃ yathā || 47 ||
[Analyze grammar]

ūrdhvādharasthaparivṛttapadārthajātamantaḥkvaṇatkhanakhanāyitaśailamajjam |
brahmāṇḍakoṭaramabhūdvidhuraṃ kubālalīlāvilolamiva bilvaphalaṃ viśuṣkam || 48 ||
[Analyze grammar]