Chapter 233

mahākalpāntāgnivarṇanaṃ nāma sargaḥ |
trayastriṃśaddviśatatamaḥ sargaḥ |
vasiṣṭhaḥ |
atha kalpāntamaruti vahatyavadhutācale |
balenāmbhodhikallolairnabhasyāvartakāriṇi || 1 ||
[Analyze grammar]

samudreṣu vimudreṣu maryādollaṅghane ghane |
aghaneṣu ghaneṣvambudāridryopadravadrute || 2 ||
[Analyze grammar]

bhūtale bhūtaleśāṃśavarjite vahnibharjite |
pātālamapi pātāle gate kimapi kālataḥ || 3 ||
[Analyze grammar]

divi cāvidyamānāyāṃ viśīrṇe sargavargake |
loke vyapagatāloke śokaukasi kakubgaṇe || 4 ||
[Analyze grammar]

kuto'pyākāśakuharāddṛptadaityagaṇā iva |
puṣkarāvartakā meghāścakrurgulagulāravam || 5 ||
[Analyze grammar]

brahmavisphoṭitasvāṇḍakuḍyavisphoṭanodbhaṭam |
anyo'nyāsphālanottālamattārṇavaravābilam || 6 ||
[Analyze grammar]

lokāntarapurodgīrṇaghanakolāhalolbaṇam |
patatkulācalaskandhabaddhograravaghargharam || 7 ||
[Analyze grammar]

brahmāṇḍaśaṅkhajaṭharapūraṇāvartamantharam |
svarlokarodhaḥpātālatalātatisagulmakam || 8 ||
[Analyze grammar]

samastadūradigbhittihelāhananaharṣulam |
mahāpralayasammattapānakāpānatarṣulaṃ || 9 ||
[Analyze grammar]

prasṛtapralayākhyendramattairāvaṇabṛṃhitam |
ākalpakṣubdhameghābdhinirhrādamiva sambhṛtam || 10 ||
[Analyze grammar]

mahāpralayasaṅkṣubdhakṣīrodamathanāravam |
brahmāṇḍogrāraghaṭṭe'sminvāryantramiva sāravam || 11 ||
[Analyze grammar]

athāsmin sati kalpāgnau sthitimeti kathaṃ ghanaḥ |
iti vismitavānasmi dṛśaṃ digdaśake'tyajam || 12 ||
[Analyze grammar]

yāvanna kvacidevābhraṃ paśyāmyāśāsu kevalam |
taranti taralāsphālamulmukāśanivṛṣṭayaḥ || 13 ||
[Analyze grammar]

tena jvalanatāpena bahuyojanakoṭiṣu |
padārthā bhasmatāṃ yānti dūre dikṣu daśasvapi || 14 ||
[Analyze grammar]

anantaraṃ kṣaṇādvyomni dūre'hamanubhūtavān |
ūrdhvataśśītalaṃ vātamadhastādvānalopamam || 15 ||
[Analyze grammar]

etāvati nabhomārge dūre kalpāmbudāḥ sthitāḥ |
yasteṣāmagnitāpānāṃ viṣayo na ca maddṛśām || 16 ||
[Analyze grammar]

atha vāruṇadigbhāgādāyayau kalpamārutaḥ |
yasmiṃstṛṇavaduhyante vindhyameruhimādrayaḥ || 17 ||
[Analyze grammar]

tena jvālācalāḥ prāntaḍīnāṅgāravihaṅgamāḥ |
lololmukavanākrāntā jagmuragnidiśaṃ drutam || 18 ||
[Analyze grammar]

sandhyābhrasadṛśākārāsteruraṅgāravāridāḥ |
bhremurbhasmabharābhrāṇi protāṅgārarajāṃsi khe || 19 ||
[Analyze grammar]

sa jvālācalasaṅghāto dṛṣṭo'naladiśaṃ vrajan |
hemādrīṇāṃ sapakṣāṇāmanīkaṃ dravatāmiva || 20 ||
[Analyze grammar]

dharādrimaṇḍalābhoge'somyāṅgārabharātmani |
jvālācalaghane yāte bhāti tejasi bhāsvatām || 21 ||
[Analyze grammar]

arṇaveṣvanalārṇassu kvathanotphālavāriṣu |
vaneṣvasmṛtaparṇeṣu dīptāgnitaruvāriṣu || 22 ||
[Analyze grammar]

brahmalokasthanātheṣu lokapālapureṣvadhaḥ |
sāṅganābālavṛddheṣu dagdheṣu nipatatsu khāt || 23 ||
[Analyze grammar]

kalpāntānalapadminyā brahmāṇḍograsarovare |
jvālāpallavaśālinyāḥ sabījāyāḥ saholmukaiḥ || 24 ||
[Analyze grammar]

analātmasu mūleṣu nāgeṣu ca nageṣu ca |
āpātālaṃ nimagneṣu mahatyaṅgārakardame || 25 ||
[Analyze grammar]

uṣṭrasainyamivālakṣyagatirmannikaṭaṃ nabhaḥ |
āyayāvañjanaśyāmaḥ kalpāmbudagaṇaḥ kṣaṇam || 26 ||
[Analyze grammar]

sthirakalpānalajvālātulyavidyunmayācalaḥ |
ekakoṇakaviśrāntasaptāmbudhipayobharaḥ || 27 ||
[Analyze grammar]

bhittibhāsuranīhārabhāranirbharadiktaṭaḥ |
brahmāṇḍakuḍyanibiḍamaṇḍalāsphoṭapaṇḍitaḥ || 28 ||
[Analyze grammar]

kalpānte kṣubhito'mbhodhirvartulāvartavṛttimān |
taḍijjalecaraḥ sphāranirhrādaḥ khamivāgataḥ || 29 ||
[Analyze grammar]

mṛto dagdho niśānāthaloko dviguṇaśītalaḥ |
anyamākāramāśritya paralokamivāgataḥ || 30 ||
[Analyze grammar]

himasambhārarūpeṇa himācalamivākhilam |
jāḍyastambhitaniśśeṣajalakāṣṭhācalaṃ dadhat || 31 ||
[Analyze grammar]

atha brahmāṇḍavisphoṭakaṭhināsphāṭitāmbaram |
prākkṛtvodbhaṭatuṣkāraṃ kaṣṭā vṛṣṭiḥ papāta ha || 32 ||
[Analyze grammar]

agnidāhavanākāśavidyudunmeṣabhīṣaṇā |
caṭadguḍaguḍāsphoṭasphuṭadbrahmāṇḍamaṇḍalā || 33 ||
[Analyze grammar]

pṛṣatotkaraśītkāraśatakṣveḍākṣayāravā |
śītaśīkaranīhārabhittibandhamayāmbarā || 34 ||
[Analyze grammar]

rodomaṇḍapavaiḍūryastambhasambhārabhāsuraiḥ |
dhārāsārairdharādhairyaśailaśātanaśālinī || 35 ||
[Analyze grammar]

dharācaṭacaṭāsphoṭasphuṭadaṅgārapattanā |
garjanorjitasampātapatallokāntarākulā || 36 ||
[Analyze grammar]

sā babhūvātha sāṅgārajagadgehavilāsinī |
kṛtapratyudgamā bāṣpaśriyājvalanayā bhuvaḥ || 37 ||
[Analyze grammar]

jvālālavollalanaḍambaramambaraṃ tadvyūḍhasthalābjadalajālamivālamāsīt |
dhārā bhramadbhramarapaṅktinibhāstadāsaṃstatra sphuracchiśiraśīkarapakṣipuñjāḥ || 38 ||
[Analyze grammar]

udyadbṛhaccaṭacaṭāravapūritāśo bhīmo'bhavatsa salilānalasannipātaḥ |
durvāravairiviṣamo mahatāṃ balānāṃ saṅgrāma ugra iva hetihatograhetiḥ || 39 ||
[Analyze grammar]