Chapter 202

manovipadvarṇanaṃ nāma sargaḥ |
dvyuttaradviśatatamaḥ sargaḥ |
vasiṣṭhaḥ |
iti viśrāntimāneṣa manohariṇako'rihan |
tatraiva ratimāyāti na yāti viṭapāntaram || 1 ||
[Analyze grammar]

etāvatātha kālena sa vivekadrumaḥ phalam |
antassthaṃ paramārthātma śanaiḥ prakaṭayatyalam || 2 ||
[Analyze grammar]

dhyānadrumaphalaṃ puṇyaṃ tadasau svamanomṛgaḥ |
adhassthitaḥ prāntagataṃ tasya paśyati sattaroḥ || 3 ||
[Analyze grammar]

ārohati tato vṛkṣaṃ tadāsvādayituṃ phalam |
anyagardhaparityāge vitatādhyavasāyavān || 4 ||
[Analyze grammar]

vivekarasamākrāmanvṛttīstyajati bhūgatāḥ |
uttamaṃ padamāsādya bhūyo nādhaḥ samīhate || 5 ||
[Analyze grammar]

tenottamaphalārthena saṃskārānprāktanānasau |
vivekapadamārūḍhastyajatyahiriva tvacam || 6 ||
[Analyze grammar]

hasatyuccaiḥ padārūḍhamātmānamavalokayan |
etāvantamahaṃ kālaṃ kṛpaṇaḥ ko'bhavaṃ tviti || 7 ||
[Analyze grammar]

karuṇādiṣu teṣvastabhramaśśākhāntareṣu saḥ |
lobhavyālamadhaḥ kurvan samrāḍiva virājate || 8 ||
[Analyze grammar]

hṛdayendorghanaśreṇīrmukhābjatimirāvalīḥ |
kṛṣṇāyaśśṛṅkhalāstṛṣṇā dinānudinamujjhati || 9 ||
[Analyze grammar]

upekṣate na samprāptaṃ nāprāptamabhivāñchati |
somasomyo bhavatyantaśśītalaḥ sarvavṛttiṣu || 10 ||
[Analyze grammar]

śāstrārthapallaveṣveva niṣaṇṇātmāvatiṣṭhate |
unnatāvanatāpātā adhaḥ paśyañjagadgatīḥ || 11 ||
[Analyze grammar]

bhīmadrumalatotkīrṇapuṣpaprakaradanturāḥ |
prāktanīḥ svāḥ sthalīḥ paśyan hasatyantarvarākatām || 12 ||
[Analyze grammar]

teṣu tatskandhadeśeṣu tayoḍḍīnaviḍīnayā |
hāriṇyā viharan gatyā rājeva parirājate || 13 ||
[Analyze grammar]

putradārakalatrāṇi mitrāṇi ca dhanāni ca |
janmāntarakṛtānīva svapnajānīva paśyati || 14 ||
[Analyze grammar]

rāgadveṣabhayonmādamānamohamahārtayaḥ |
naṭasyevāsya dṛśyante śītalāmalacetasaḥ || 15 ||
[Analyze grammar]

unmattaceṣṭitākārā hasatyapi puro'satīḥ |
taraṅgabhaṅgurādhārāḥ saṃsārasarito gatīḥ || 16 ||
[Analyze grammar]

na sa cetayate kāścil lokadāradhanaiṣaṇāḥ |
apūrvapadaviśrānto jīvanneva yathā śavaḥ || 17 ||
[Analyze grammar]

kevalaṃ kevale śuddhe bodhātmani mahonnatau |
dattadṛṣṭiḥ phale tasmindūraṃ samadhirohati || 18 ||
[Analyze grammar]

smṛtvā smṛtvāpadaḥ pūrvāḥ santoṣāmṛtapoṣitaḥ |
arthānāmapyanarthānāṃ nāśe na paritapyate || 19 ||
[Analyze grammar]

vyavahāreṣu kāryeṣu bhogasampādakeṣvapi |
paramudvegamāyāti sanidra iva bodhitaḥ || 20 ||
[Analyze grammar]

dīrghādhvaga ivodārāmanāratamabādhitām |
ciraṃ maurkhyaśramākrānto viśrāntimabhivāñchati || 21 ||
[Analyze grammar]

niśśvāsabodhito'pyagniranindhana ivātmani |
śvāsamātrabhrame'pyantaratiṣṭhanneva śāmyati || 22 ||
[Analyze grammar]

āpatantīṃ balādeva padārtheṣvaratiṃ śanaiḥ |
na śaknoti nirākartuṃ vṛṣṭimabhracyutāmiva || 23 ||
[Analyze grammar]

tāṃ mahāpadavīṃ gacchanparamārthaphalapradām |
bhūmiṃ kāmapyupāyāti vacasāmapyagocarām || 24 ||
[Analyze grammar]

kuto'pyaceṣṭiteṣveva samprāpteṣu vidhervaśāt |
bhogeṣvaratimāyāti pāntho marumahīṣviva || 25 ||
[Analyze grammar]

ghūrṇan kṣīva ivānandī suptaḥ saṃsāravṛttiṣu |
antaḥpūrṇamanā maunī kāmapi sthitimṛcchati || 26 ||
[Analyze grammar]

sa tādṛgrūpatāmetya paramārthaphalasya tat |
kramānnikaṭamāpnoti khago'rkapadavīmiva || 27 ||
[Analyze grammar]

tatastadakhilā buddhīrvihāya viyatā samaḥ |
gṛhṇātyathāsvādayati bhuṅkte'tha paritṛpyati || 28 ||
[Analyze grammar]

sakalārthaparityāgāddinānudinamātatāt |
śuddhasvabhāvaviśrāntiḥ paramārthāptirucyate || 29 ||
[Analyze grammar]

bhedabuddhau vilīnāyāṃ bodha evāvaśiṣyate |
śuddhamekamanādyantaṃ tadbrahmeti vidurbudhāḥ || 30 ||
[Analyze grammar]

lokaiṣaṇāviraktena tyaktadāraiṣaṇena ca |
dhanaiṣaṇāvimuktena tasminviśramyate pade || 31 ||
[Analyze grammar]

pareṇa pariṇāmena mithaścitparamārthayoḥ |
tāpena himalekheva bhedabuddhirvilīyate || 32 ||
[Analyze grammar]

tajjñasyākliṣṭamuktasya svabhāvaṃ susamaṃ vinā |
sthitiḥ sragdāmakasyeva na sambhavati kācana || 33 ||
[Analyze grammar]

yathāprakaṭitāṅgāntaḥ saṃsthitā sālabhañjikā |
na satī nāsatī stambhe tathā viśvasthitiḥ pare || 34 ||
[Analyze grammar]

dhyānaṃ na śakyate kartuṃ na caitadupayujyate |
abodhena vibuddhastu svayamatraiva tiṣṭhati || 35 ||
[Analyze grammar]

ātyantikī virasatā yasya dṛśyeṣu dṛśyate |
sa buddho nāprabuddhasya dṛśyatyāge hi śaktatā || 36 ||
[Analyze grammar]

dṛśyasya bodhatābodho yo bodhādaparikṣayaḥ |
sa samādhānaśabdena kathyate susamāhitaiḥ || 37 ||
[Analyze grammar]

draṣṭṛdṛśyaikatārūpaḥ pratyayo manaso yadā |
udetyekasamādhāne tadā viśrāmyati svayam || 38 ||
[Analyze grammar]

svabhāvo dṛśyavairasyameva tattvavido janāḥ |
dṛśyasvadanamevāhuratattvajñatvamuttamāḥ || 39 ||
[Analyze grammar]

atajjñasyaiva viṣayāḥ svadante na tu tadvidaḥ |
na hi pītāmṛtāyāntaḥ svadate kaṭu kāñcikam || 40 ||
[Analyze grammar]

vitṛṣṇasyātmaniṣṭhatvādeṣaṇātrayamujjhataḥ |
jñasyāpyanicchato dhyānamarthāyātaṃ pravartate || 41 ||
[Analyze grammar]

bodhaḥ sphurati tṛṣṇāyāṃ saiva yasya na vidyate |
tasya svaṃ rūpamutsṛjya kvāsau tiṣṭhati kaḥ katham || 42 ||
[Analyze grammar]

jñasyānādhārako'dhyeyo bodho neyattayā bhavet |
ananto'sāvatṛṣṇasya nirvibhāgoditaḥ svayam || 43 ||
[Analyze grammar]

anantamapatṛṣṇasya svayameva pravartate |
dhyānaṃ galitapakṣasya saṃsthānamiva bhūbhṛtaḥ || 44 ||
[Analyze grammar]

śuddhabodhātmani jñatvādasamāhitatoditā |
labhyate na samiddhe'gnau bukapuṣpamiva sthitam || 45 ||
[Analyze grammar]

paraṃ viṣayavaitṛṣṇyaṃ samādhānamudāhṛtam |
āhṛtaṃ yena tannūnaṃ tasmai nṛbrahmaṇe namaḥ || 46 ||
[Analyze grammar]

nūnaṃ viṣayavaitṛṣṇye pariprauḍhimupāgate |
śaknuvanti nihantuṃ na dhyānaṃ sendrāḥ surāsurāḥ || 47 ||
[Analyze grammar]

paraṃ viṣayavaitṛṣṇyaṃ vajradhyānaṃ prasādhyatām |
bhede vigalite jñānādanyānandatṛṇena kim || 48 ||
[Analyze grammar]

mūrkhastho viśvaśabdārtho na tajjñaviṣayo yathā |
tajjñastho viśvaśabdārtho na mūrkhaviṣayastathā || 49 ||
[Analyze grammar]

tajjñājñayostayoścaiva sthitayorviśvayoryathā |
yatraikībhūya kacanaṃ tatra viśramyatāṃ budhāḥ || 50 ||
[Analyze grammar]

bodhabhūmiṣu siddhānāmarthānāṃ vāvivekinām |
sattāsatte dvayaikye ca nirṇīte neha kenacit || 51 ||
[Analyze grammar]

upāya ekaśśāstrārtho dvitīyo jñasamāgamaḥ |
dhyānaṃ tṛtīyo nirvāṇe śreṣṭhastvatrottarottaraḥ || 52 ||
[Analyze grammar]

jīvādarśo mitho rūpaṃ gṛhṇātyeṣāṃ mahadvapuḥ |
jagatyudeti saṅghaṭṭādaviśeṣaṃ same'same || 53 ||
[Analyze grammar]

jñātapūrvāparāśeṣajagadaṣṭāpadasthiteḥ |
ekasiddhau dvayoḥ siddhirbhogavaitṛṣṇyadā yayoḥ || 54 ||
[Analyze grammar]

mativātyā dhuto vyomni dagdho jñānāgninākhilaḥ |
jagattūlaḥ pare śānte na jāne kvāśu gacchati || 55 ||
[Analyze grammar]

citrāgnineva bodhena tena jāḍyaṃ na śāmyati |
nirmūlāpi jagadbhrāntiryenāśu na vilīyate || 56 ||
[Analyze grammar]

yathājñasya jagajjñaptirapajñānātpradīpyate |
tathā jñasya parijñānāttadajñaptiḥ pradīpyate || 57 ||
[Analyze grammar]

tajjñasya trijagajjñaptiśabdārtharahitā sthitā |
yathā sthithaiva trijagajjñaptiścitra ivoditā || 58 ||
[Analyze grammar]

śūnyatveneva racitā svapnatveneva nirmitā |
bhāsate bhāmayīvācchā jagajjñaptirjñacetasi || 59 ||
[Analyze grammar]

nūnaṃ bodhe virūḍhasya nāhantā na jagatsthitiḥ |
bhāsate paramābhāsarūpiṇaḥ kāpyavasthitiḥ || 60 ||
[Analyze grammar]

bodhābodhātmakaṃ cittaṃ bhāti śuṣkārdrakāṣṭhavat |
bodhādekaṃ jagadbhāvairjāḍyānnānātvamāgatam || 61 ||
[Analyze grammar]

mitho'bodhādvivadati maitrīṃ bhajati bodhataḥ |
ya evāsyādhiko bhāgastanmayatvena tiṣṭhati || 62 ||
[Analyze grammar]

buddhaḥ saṃstattvamāvetti jagato'bhāvabhāvayoḥ |
jāgratsvapnasuṣuptānāṃ svabhāvamiva turyagaḥ || 63 ||
[Analyze grammar]

vāsanaiva manaḥ seyaṃ svavicāreṇa naśyati |
avastutvādato mokṣe nātmanāśaḥ pravartate || 64 ||
[Analyze grammar]

dhyānadrumātsvayamanalpamupoḍhapākātkālena bodhamupayātavataḥ krameṇa |
bhuktvā rasāyanaphalaṃ parabodhamādyamitthaṃ manohariṇako nigaḍādvimuktaḥ || 65 ||
[Analyze grammar]