Chapter 196

nirvāṇavarṇanaṃ nāma sargaḥ |
ṣaṇṇavatyuttaraśatatamaḥ sargaḥ |
vasiṣṭhaḥ |
sañjātakṛtrimakṣīṇasaṃsṛtipratyayaḥ pumān |
asaṅkalpo na saṅkalpaṃ vetti tenāsadeva saḥ || 1 ||
[Analyze grammar]

śvāsānmlānirivādarśe kuto'pyahamiti sthitā |
viddhi sākāraṇā dṛṣṭā naśyatyāśu na labhyate || 2 ||
[Analyze grammar]

yasya kṣīṇāvaraṇatā śāntasandehatoditā |
paramāmṛtapūrṇātmā sattayaiva sa rājate || 3 ||
[Analyze grammar]

sarvasandehaduḥkhāntamihikāmātariśvanā |
bhāti bhāsvaddhiyā deśastena pūrṇenduneva kham || 4 ||
[Analyze grammar]

visaṃsṛtirasandeho labdhajyotirnirāvṛtiḥ |
śaradākāśaviśado jñenaiva jñāyate budhaḥ || 5 ||
[Analyze grammar]

nissaṅkalpo nirādhāraśśāntaḥ sparśātpavitratām |
antaśśītala ādhatte brahmalokādivānilaḥ || 6 ||
[Analyze grammar]

asadrūpopalambhānāmiyaṃ vastusvabhāvatā |
yatsargavedanaṃ svapnavandhyāputropalambhavat || 7 ||
[Analyze grammar]

avidyamānamevedaṃ jagad yadanubhūyate |
asadrūpopalambhasya saiṣā vastusvabhāvatā || 8 ||
[Analyze grammar]

asatyeṣveva saṃsāreṣvāstāmarthaḥ kuto bhavet |
svargāpavargayośśabdāveva vandhyāsutopamau || 9 ||
[Analyze grammar]

jagadbrahmatayā satyamanirmitamabhāvitam |
aniṣṭhitaṃ cānyathā tu nāhaṃ nāvagataṃ ca tat || 10 ||
[Analyze grammar]

ātmasvabhāvaviśrānteriyaṃ vastusvabhāvatā |
yadahantādisargādidṛśyādyanupalambhatā || 11 ||
[Analyze grammar]

kṣaṇād yojanalakṣāntaṃ prāpte deśāntaraṃ tvitaḥ |
cetane tasya yad rūpaṃ mārgamadhye nirañjanam || 12 ||
[Analyze grammar]

aspandavātasadṛśaṃ khakośābhācchacinmayam |
acetyaṃ śāntamuditaṃ latāvikasanopamam || 13 ||
[Analyze grammar]

sarvasya vastujātasya tatsvabhāvaṃ vidurbudhāḥ |
sarvopalambho galati tatrasthasya vivekinaḥ || 14 ||
[Analyze grammar]

suṣupte svapnadhīrnāsti svapne nāsti suṣuptadhīḥ |
sarganirvāṇayorbhrāntī suṣuptasvapnayoriva || 15 ||
[Analyze grammar]

bhrāntirvastusvabhāvo'sau na svapno na suṣuptatā |
na sargo na ca nirvāṇaṃ satyaṃ śāntamaśeṣataḥ || 16 ||
[Analyze grammar]

bhrāntistvasanmātramayī prekṣitā cenna labhyate |
śuktirupyamivāsatyaṃ kila samprāpyate katham || 17 ||
[Analyze grammar]

yanna labdhaṃ ca tannāsti tena bhrānterna sambhavaḥ |
svabhāvādupalambho'nyo nāsti kaścana kasyacit || 18 ||
[Analyze grammar]

svabhāva eva sarvasmai svadate kila sarvadā |
anānaiva hi nāneva kiṃ vādaiḥ sa vibhāvyatām || 19 ||
[Analyze grammar]

asvabhāve mahadduḥkhaṃ svabhāve kevalaṃ śamaḥ |
iti buddhyā vicāryāntaryadiṣṭaṃ tadvidhīyatām || 20 ||
[Analyze grammar]

sūkṣme bīje'styagaḥ sthūlo dṛṣṭamityupapadyate |
śive'mūrte jaganmūrtamastītyuttamasaṅkathā || 21 ||
[Analyze grammar]

rūpālokamanaskārabuddhyahantādayaḥ pare |
svarūpabhūtāḥ salile dravatvamiva khātmakāḥ || 22 ||
[Analyze grammar]

mūrto yathā svasadṛśaiḥ karotyavayavaiḥ kriyāḥ |
ātmabhūtaistathā bhūtaiścidākāśamakartṛ sat || 23 ||
[Analyze grammar]

ātmasthādahamityādirasmadāderasaṃsṛteḥ |
śabdo'rthabhāvamukto'yaṃ paṭahādiva jāyate || 24 ||
[Analyze grammar]

yadbhrāntaṃ prekṣayā nāsti tannāstyeva nirantaram |
jagadrūpamarūpātma brahma brahmaṇi saṃsthitam || 25 ||
[Analyze grammar]

yeṣāmasti jagatsvapnaste svapnapuruṣā mithaḥ |
na santyātmani mithyāṅgā nāsmāsvambarapuṣpavat || 26 ||
[Analyze grammar]

mayi brahmaikarūpaṃ te śāntamākāśakośavat |
vāyau spandairivābhinnairvyavahāraśca tairmayi || 27 ||
[Analyze grammar]

ahaṃ tu sanmayasteṣāṃ svapnaḥ svapnavatāmiva |
te tu nūnamasanto me suṣupte svapnakā iva || 28 ||
[Analyze grammar]

taistu yo vyavahāro me tadbrahma brahmaṇi sthitam |
te yatpaśyanti paśyantu tattairalamalaṃ mama || 29 ||
[Analyze grammar]

ahamātmani naivāsmi brahmasatteyamātatā |
tvadarthaṃ samudetīva tathārūpaiva vāgiyam || 30 ||
[Analyze grammar]

aniruddhasya ruddhasya śuddhasaṃvinmayātmanaḥ |
na bhogecchā na mokṣecchā hṛdi sphurati tadvidaḥ || 31 ||
[Analyze grammar]

svabhāvamātrāyatte'sminbandhamokṣakrame nṛṇām |
kadarthanetyaho mohādgoṣpade'pyudadhibhramaḥ || 32 ||
[Analyze grammar]

abhāvasādhane mokṣe bhāvopaśamarūpiṇi |
na dhanānyupakurvanti na mitrāṇi na ca kriyāḥ || 33 ||
[Analyze grammar]

tailabindurbhavatyuccaiścakramappatito yathā |
tathāśu cetyasaṅkalpe sthitā bhavati cijjagat || 34 ||
[Analyze grammar]

jāgrati svapnavṛttāntasthitiryādṛgrasā smṛtau |
tādṛgrasāhantvajagajjālasaṃsthā vivekinaḥ || 35 ||
[Analyze grammar]

tenaivābhyāsayogena yāti tattanutāṃ tathā |
yathā nāhaṃ na saṃsāraśśāntamevāvaśiṣyate || 36 ||
[Analyze grammar]

yadā yadā svabhāvārkaḥ sthitimeti tadā tadā |
bhogāndhakāro galati na sannapyanubhūyate || 37 ||
[Analyze grammar]

so'yamahantārahitaḥ sphurati sṛtau bhavati bhāsate ca tathā |
buddhyādikaraṇanikaro yasmāddīpādivālokaḥ || 38 ||
[Analyze grammar]