Chapter 183

maṅkibodhanaṃ nāma sargaḥ |
tryaśītyuttaraśatatamaḥ sargaḥ |
vasiṣṭhaḥ |
saṃsāramārge gahane patitasyāpatanti hi |
vṛttavṛttāntalakṣyāṇi kāṣṭhā iva ghanāgame || 1 ||
[Analyze grammar]

sarva eva tvime bhāvāḥ parasparamasaṅginaḥ |
aṭavyāmupalānīva bhāvanaiteṣu śṛṅkhalā || 2 ||
[Analyze grammar]

cittamāndhyāya vṛttāntadrumairgahanayan sthitaḥ |
rasarañjanayā loko vasanta iva kānanam || 3 ||
[Analyze grammar]

aho bata vicitrāṇi vāsanāvaśato'vaśaiḥ |
bhūtakairanubhūyante sukhaduḥkhāni janmasu || 4 ||
[Analyze grammar]

aho batātiviṣamā vāsanā yadvaśājjanaiḥ |
avidyamāna evāyaṃ bhramo'ntaranubhūyate || 5 ||
[Analyze grammar]

āhlādino'mṛtavataśśuddhasyālokakāriṇaḥ |
śītalasyākhilārtheṣu jñasyendośca kimantaram || 6 ||
[Analyze grammar]

pūrvāparamanālocya yatkiñcidabhivāñchataḥ |
nirmaryādasya mūḍhasya bālasya ca kimantaram || 7 ||
[Analyze grammar]

labdhamāprāṇaparyantaṃ śubhāśubhamanujjhatoḥ |
āmiṣe ko viśeṣo'sti vada mārjāramūḍhayoḥ || 8 ||
[Analyze grammar]

sarva eva tvime bhāvā dehadāradhanādayaḥ |
kṣipramāśuṣkasikatāśarāvaviśarāravaḥ || 9 ||
[Analyze grammar]

ābrahmastambaparyantamapi yoniśateṣu ca |
ākalpaṃ bhramataścittaśāntirnāsti śamādṛte || 10 ||
[Analyze grammar]

paryālocanamātreṇa bandhagandho na bādhate |
gacchato mārgavaiṣamyamivālokanakāriṇaḥ || 11 ||
[Analyze grammar]

na tavāvahitaṃ cittaṃ kāmaḥ kavalayiṣyati |
sāvadhānasya buddhasya piśācaḥ kiṃ kariṣyati || 12 ||
[Analyze grammar]

yathekṣaṇaprasaraṇaṃ rūpālokanamātrakam |
saṃvitprasaramātrātma tathā sāhaṃ jagatsthitam || 13 ||
[Analyze grammar]

yathākṣisaṃvṛtiḥ sarvarūpālokaśamo'rihan |
saṃvitsaṃvaraṇaṃ nāma sarvadṛśyaśamastathā || 14 ||
[Analyze grammar]

asadeva jagatsāhaṃ śuddhā saṃvittanoti khe |
īṣatprasaraṇenāśu spandanaṃ pavano yathā || 15 ||
[Analyze grammar]

sadivāsatyamevedamakurvatyaiva manyate |
vidā hemneva kumbhatvamapṛthaglabhyamātmagam || 16 ||
[Analyze grammar]

śūnyamātraṃ yathā vyoma spandamātraṃ yathānilaḥ |
jalamātraṃ yathormyādi saṃvinmātraṃ jagattathā || 17 ||
[Analyze grammar]

avyavacchinnanirbhāgasaṃvinmātraṃ jagattrayam |
viddhi śāntaṃ tathā vyoma yathā vāriṇi parvatam || 18 ||
[Analyze grammar]

nirvāṇasyopaśāntasya jñasya sodeti śītatā |
antaryatrendavo'pyete dīptajvalanabandhavaḥ || 19 ||
[Analyze grammar]

kiṃ kena kathamekāntaśāntātataśivātmani |
nirāloke parāloke śūnye jagati janyate || 20 ||
[Analyze grammar]

yā sattā brahmaśabdākhyā rūpaṃ sarvasya tannijam |
na yatra kācidbādhāsti sarvaṃ tanmayamavyayam || 21 ||
[Analyze grammar]

yadidaṃ tu padārthatvaṃ yatra bādhānubhūyate |
yacca vā bādhanaṃ prekṣya tanna vidmaḥ khapuṣpavat || 22 ||
[Analyze grammar]

jña evāpagatasvāntaṃ śāntamāssva mahāśmavat |
abodhamanano maunamanantamajamavyayam || 23 ||
[Analyze grammar]

ākāśakalpe sve bhāve tiṣṭhato'ṅgādivedanam |
bhavatyabhyāsadārḍhyena vinā svapnavikāravat || 24 ||
[Analyze grammar]

nirupādānasambhāramabhittāveva cetati |
brahmākartṛ jagaccitraṃ na kaścidvā na kiñcana || 25 ||
[Analyze grammar]

tanoti yattadātmaiva tasya tatra tathā sthitam |
dṛśyābhāvādataddarśī tena kaḥ kva karoti kim || 26 ||
[Analyze grammar]

ahaṃ sukhīti sukhitā ahaṃ duḥkhīti duḥkhitāḥ |
sarva eva svabhāvasthā vyomātmāno'pi pārthivāḥ || 27 ||
[Analyze grammar]

sarveṣāmeva bhāvānāṃ vidākāśātmanāmapi |
mithyaiva svapnaśailānāmiva pārthivatāsti te || 28 ||
[Analyze grammar]

ahantollekhataḥ sattā bhramabhāravikāriṇī |
tadabhāvātsvabhāvaikaniṣṭhatā śamaśālinī || 29 ||
[Analyze grammar]

hemnaḥ kaṭakaśabdārtho vyatirikto yathāsti no |
vyatiriktā tathāsatyā nāhantāsti śamātmanaḥ || 30 ||
[Analyze grammar]

nirvāṇo nirmanā maunī kartākartā ca śītalaḥ |
jña ekaśśānta evāste śūnya evābhipūritaḥ || 31 ||
[Analyze grammar]

nirvāsanaṃ spandamāno yantraputrakagātravat |
sa yathāsthitamevāste jñaḥ saṃvyavaharannapi || 32 ||
[Analyze grammar]

yathā mañcakasaṃsthasya spandate naiva vā śiśoḥ |
aṅgāliranusandhānaṃ vinaivaṃ viditātmanaḥ || 33 ||
[Analyze grammar]

nissambodhaikabodhasya nirāśehaiṣaṇāśiṣaḥ |
śāntāhantvātmarūpatvādanusandhānitā kutaḥ || 34 ||
[Analyze grammar]

adraṣṭurapadṛśyasya dṛgrūpasyāparūpiṇaḥ |
kutaḥ kilānusandhānamanapekṣasya paśyataḥ || 35 ||
[Analyze grammar]

apekṣaiva ghano bandho hyanapekṣaiva muktatā |
sarvaśabdānvitā tasyāṃ viśrāntena kimīkṣyate || 36 ||
[Analyze grammar]

pārthivatve śarīre'smin svasvapnādrāvivāsati |
bhramamātrātmani kutaḥ kva kasya kimapekṣaṇam || 37 ||
[Analyze grammar]

upaśāntasamastehaṃ vigatākhilakautukam |
nirastavedanaṃ jñena vidā kevalamāsyate || 38 ||
[Analyze grammar]

maṅkineti śrutavatā tato moho mahānapi |
aśeṣeṇa parityaktastatra vai tvagivāhinā || 39 ||
[Analyze grammar]

pravāhāpatitaṃ kāryaṃ kurvatāpāstavāsanam |
tena varṣaśatasyānte sthitamadrau samādhinā || 40 ||
[Analyze grammar]

tatrādya yāvatpāṣāṇasamadharmā sa tiṣṭhati |
śāntāntaḥkaraṇo yogī bodhyamānaḥ prabudhyate || 41 ||
[Analyze grammar]

etena rāghava vivekapadena śāntimāsādayodayavatā manasā vihartum |
mā dīnatāṃ vrajatu rāgamayī matiste kṣīṇā kṣaṇādasalileva śaradghanālī || 42 ||
[Analyze grammar]