Chapter 146

jagadākāśaikyapratipādanaṃ nāma sargaḥ |
ṣaṭcatvāriṃśaduttaraśatatamaḥ sargaḥ |
vasiṣṭhaḥ |
yathā pustamayaṃ sainyaṃ mahārambhamapi sphuṭam |
vidyamānamanantaṃ ca sahasrāṅgāyudhādikam || 1 ||
[Analyze grammar]

svarūpaṃ prati tajjāḍyānnityāsambhavadīhanam |
arūpālokamananamadikkālakalādikam || 2 ||
[Analyze grammar]

kevalaṃ kevalaṃ śāntaṃ samanirvāṇamātmani |
dṛṣṭairanumitairjñātairitareṇa daśābhramaiḥ || 3 ||
[Analyze grammar]

manāgapyaparāmṛṣṭaṃ vidyamānamasanmayam |
ahamāditvamādyaṃ ca tathaivākhaṇḍitaṃ jagat || 4 ||
[Analyze grammar]

brahmapustamayaṃ sarvaṃ vidyamānamasanmayam |
rūpālokamanaskāraśabdārthaparivarjitam || 5 ||
[Analyze grammar]

anyenānumitairarthairmuktamātmani saṃsthitam |
na ca satyaṃ na cāsatyamātmanyadvayatāvaśāt || 6 ||
[Analyze grammar]

rāmaḥ |
anyo'sti pustasainyānāmasmadādirmunīśvara |
asmadādestu ko'nyaḥ syādanantādbrahmaṇaḥ padāt || 7 ||
[Analyze grammar]

vasiṣṭhaḥ |
nāstyeva yaḥ sa no'nyo'sti brahmapustamayātmakaḥ |
asannabhyudito mohaḥ prekṣito yo na labhyate || 8 ||
[Analyze grammar]

sa etānasato'nanyāndūrādbhāvavikārakān |
paśyatyunmattako janturjīvannātmamṛtiṃ yathā || 9 ||
[Analyze grammar]

sa eṣo'prekṣaṇātmaiva śuktau rajatadhīriva |
na vidyate prekṣitaḥ sañchuktau rajatadhīriva || 10 ||
[Analyze grammar]

asmābhiḥ prekṣitastena nūnaṃ nirmūlatāṃ gataḥ |
anālokaḥ puro rūḍhaṃ vastu neti vilokanāt || 11 ||
[Analyze grammar]

yaistu na prekṣyate teṣāṃ śataśākhaṃ vijṛmbhate |
asatya eva satyena bālavetālasainyavat || 12 ||
[Analyze grammar]

rāmaḥ |
āsṛṣṭikaramārudramiyaṃ bhrāntirupasthitā |
tathāpyanantaduḥkhāya kiṃ śubhaṃ jñātayānayā || 13 ||
[Analyze grammar]

vasiṣṭhaḥ |
asannivartate rāma kṣaṇādeva nirīkṣitam |
satyaṃ tu vastu kṛcchreṇa kṣīyate naiva vānagha || 14 ||
[Analyze grammar]

avidyā jñātamātraiva śāmyatyāśu na bādhate |
na vipralambhayatyantarmṛgatṛṣṇāmbudhīriva || 15 ||
[Analyze grammar]

yadevāsyāḥ parijñānaṃ sa evāsyāḥ parikṣayaḥ |
śreyase paramāyaiva mitre śatrudhiyo yathā || 16 ||
[Analyze grammar]

parijñātaiva galati lagatyajñānarūṣitā |
svabhāvataśca nāstyeva mithyā yakṣamatiryathā || 17 ||
[Analyze grammar]

nāstyavidyālamityeva pratyayo jñānamucyate |
rūḍhiṃ gatājñe jñe tveṣā brahma mokṣaḥ sa eva ca || 18 ||
[Analyze grammar]

asatprekṣitamevāsatsattu naiva nivartate |
yadāsatyajagadbhrāntistadaiṣāśu nivartate || 19 ||
[Analyze grammar]

kalpanāmātrasampattirakalpanavilāyinī |
manassatteva mṛdvaṅgī narāyattabhavābhavā || 20 ||
[Analyze grammar]

puruṣāyattajananamaraṇāyāmakhindataḥ |
yathāvadasyāṃ buddhāyāṃ mokṣa evāvaśiṣyate || 21 ||
[Analyze grammar]

adridyūrvīnadīśādikalpanāmātrakātmakām |
pītvākalpanamātreṇa nirvāti nipuṇaṃ pumān || 22 ||
[Analyze grammar]

yadi śailādi satyaṃ syāttatkena vinivāryate |
nāsato vidyate bhāvo nābhāvo vidyate sataḥ || 23 ||
[Analyze grammar]

yathā prasarati spandāccakravṛndamasajjale |
tathollasati saṅkalpāccitkhe saṃsāramaṇḍalam || 24 ||
[Analyze grammar]

nijaspandavaśādekaṃ śatāvartaṃ payo yathā |
nijaspandavaśādekaṃ jagadātma paraṃ tathā || 25 ||
[Analyze grammar]

pravicāritamanviṣṭaṃ yāvaccakrādi nāmbhasi |
asti nāpi ca sargādi cidvyomni na ca kalpanā || 26 ||
[Analyze grammar]

svayatnamātrasaṅkalpaprāpyau sargāpavargakau |
ya eva rocate yasmai tayostaṃ so'nugacchati || 27 ||
[Analyze grammar]

avittvādapavargatvaṃ vittvājjanmacamatkṛtiḥ |
vedyamasti ca no satyaṃ yathecchasi tathā kuru || 28 ||
[Analyze grammar]

asadvedyaṃ vinirmāya bhuṅkte ka iva duḥkhadam |
prakṣālanāddhi paṅkasya dūrādasparśanaṃ varam || 29 ||
[Analyze grammar]

ka īdṛśo'sti muktātmā yo vinirmāya yakṣakam |
tenaiva ghaṭṭayatyārtaṃ svayamātmānamakṣatam || 30 ||
[Analyze grammar]

yasmai vā sargavetālasamutthānaṃ virocate |
ātmanāśāya saṅkalpādutthāpayatu so'ṅga tam || 31 ||
[Analyze grammar]

dṛśyaṃ nirmāya draṣṭṛtvametyātmānaṃ nibadhya ca |
ya icchati sukhaṃ sa svaṃ vidadhātu yathepsitam || 32 ||
[Analyze grammar]

yathābhūtārthakathane vayaṃ nāma samudyatāḥ |
śrutvā satyamasatyaṃ tu gṛhṇātu svecchayā janaḥ || 33 ||
[Analyze grammar]

sargārthī sargayuktīho mokṣārthī mokṣayuktimān |
bhavatvatra mahābāho na naḥ kaścidapi grahaḥ || 34 ||
[Analyze grammar]

sargādvyāvṛttasaṃvid yaḥ sabāhyābhyantarātmanaḥ |
sargāsattāvabodhātmā so'mṛtatvāya kalpate || 35 ||
[Analyze grammar]

sargāsattāpratyayena sargasaṃvinnivartate |
sāhantā samanaskārā śiṣyate yadanāma tat || 36 ||
[Analyze grammar]

suvicāritamanviṣṭaṃ yāvatsargo na vidyate |
sāhantādimanaskāraḥ kimanyadbhramakāraṇam || 37 ||
[Analyze grammar]

pātālamāviśasi yāsi nabho vilaṅghya diṅmaṇḍalaṃ bhramasi cettadanātmatātmā |
bhrāntītaro'hamiti nāsti na sargavargaḥ spandetaro'nila ivāmbvitareva dhārā || 38 ||
[Analyze grammar]