Chapter 133

turyapadavicāro nāma sargaḥ |
trayastriṃśaduttaraśatatamaḥ sargaḥ |
vasiṣṭhaḥ |
akartṛkarmakaraṇamasi cittattvamakṣayam |
jāgratsvapnasuṣuptākhyo bhramaḥ saṅkalpitastvasan || 1 ||
[Analyze grammar]

atremaṃ śṛṇu vṛttāntaṃ kathyamānaṃ mayādhunā |
prabuddho'pi yathā bodhamupaiṣi vibudhopamaḥ || 2 ||
[Analyze grammar]

kasmiṃścitkānane kāṣṭhamaunasthitamarindama |
dṛṣṭadrutamṛgaṃ kañcinmuniṃ papraccha lubdhakaḥ || 3 ||
[Analyze grammar]

paścādupagato bāṇabhinnaṃ mṛgamabhidrutaḥ |
kva prayāto mṛga iti pratyuvāca sa taṃ muniḥ || 4 ||
[Analyze grammar]

śamaśīlā vayaṃ sādho munayo vanavāsinaḥ |
nāsmākamastyahaṅkāro vyavahāreṣu yaḥ kṣamaḥ || 5 ||
[Analyze grammar]

sarvāṇīndriyakarmāṇi karoti hi sakhe manaḥ |
ahaṅkāramayaṃ tanme nūnaṃ pragalitaṃ ciram || 6 ||
[Analyze grammar]

maṇicandrārkadahanaprakāśāḥ kārukaṃ yathā |
audāsīnyena tiṣṭhanto yojayanti kriyākrame || 7 ||
[Analyze grammar]

ahaṅkāro manonāmā sa cendriyagaṇaṃ nṛṇām |
niyojayati kāryeṣu sveṣu sākṣivadāsthitaḥ || 8 ||
[Analyze grammar]

sa evābhyupaśānto naśśaradīva payodharaḥ |
kastiṣṭhatvindriyārtheṣu mṛtaḥ ka iva valgati || 9 ||
[Analyze grammar]

cittaṃ śāntimupāyātamasmākaṃ vananāyaka |
mṛtacittā vayamiha sthitā dārumayā iva || 10 ||
[Analyze grammar]

asmākaṃ nāstyahaṅkāro raso vā śuṣkabhūruhām |
ahaṅkāro hi sarveṣāṃ karmaṇāṃ mūlakāraṇam || 11 ||
[Analyze grammar]

tantau muktāphalānīva prayānti samavāyitām |
ahaṅkṛtāvindriyāṇi sāmantā iva rājani || 12 ||
[Analyze grammar]

ahaṅkāramahātantau chinne tvindriyabālakāḥ |
itaścetaśca gacchanti sāmantā vinṛpā iva || 13 ||
[Analyze grammar]

nirahaṅkṛticittāni viśarārūṇi lubdhaka |
mamendriyāṇi kāryeṣu na lagantyapsvivāmbujam || 14 ||
[Analyze grammar]

mithaḥ saṃśleṣamāyānti na mamendriyabālakāḥ |
vināhaṅkārajatunā śītalāyaḥkaṇā iva || 15 ||
[Analyze grammar]

na me buddhīndriyaṃ kañcidvetti karmendriyakramam |
citrasthā iva tiṣṭhanti sveṣvartheṣvīkṣaṇādayaḥ || 16 ||
[Analyze grammar]

sādho yadindriyaṃ vakti tena dṛṣṭo na te mṛgaḥ |
yasya vā darśane śaktirvaktuṃ jānāti tanna naḥ || 17 ||
[Analyze grammar]

na kānicinmamaitāni galitāhaṅkṛteḥ kila |
tadvyādha kastvāṃ kathayatvārtimanmṛgadarśanam || 18 ||
[Analyze grammar]

sarveṣāmindriyāṇāṃ hi paśūnāmiva pālakam |
cittaṃ tacca vilīnaṃ naḥ sarvārtharahite pade || 19 ||
[Analyze grammar]

itaścetaśca vikṣiptarūpāṇyetāni tatkatham |
kiṃ vā tvā kathayantvaṅga gatānīhaiva pañcatām || 20 ||
[Analyze grammar]

nirmātṛpitṛko yadvadviśarāruśśiśuvrajaḥ |
tathākṣavṛndamadhṛti nirahambhāvavāsanam || 21 ||
[Analyze grammar]

jāgratsvapnasuṣuptākhyā daśā vedmi na kāścana |
turya evāvatiṣṭhe'haṃ tatra dṛśyaṃ na vidyate || 22 ||
[Analyze grammar]

iti nirvacanībhāvaṃ yathārthakathanena saḥ |
lubdhako muninā nīto jagāmābhimatāṃ diśam || 23 ||
[Analyze grammar]

ato vacmi mahābāho nāsti turyetarā daśā |
nirvikalpā hi citturyaṃ tadevāstīha netarat || 24 ||
[Analyze grammar]

satyaṃ dṛṣṭvā brahmabhāvaṃ gate jīve nirarthakam |
dehe bhavantīndriyāṇi citrabhittāvivānagha || 25 ||
[Analyze grammar]

yatreṣṭāniṣṭasambandhe nodayaḥ sukhaduḥkhayoḥ |
na taccittaṃ bhaved rāma tatsattvaṃ turyagaṃ viduḥ || 26 ||
[Analyze grammar]

svapnakāle svapna eva jāgradvyagrāparigrahāt |
jāgracca svapnatāmeti smaraṇīyatayā tayā || 27 ||
[Analyze grammar]

asatyaṃ jāgrati svapnaḥ svapne jāgradasanmayam |
jāgratsvapnavikārāntā ghanamohā suṣuptabhūḥ || 28 ||
[Analyze grammar]

jāgratsvapnasuṣuptākhyaṃ trayamaṅga bhramodbhavam |
varatrāyāmivāhitvaṃ vijñāne prasphuratsthitam || 29 ||
[Analyze grammar]

turyamastyanavacchinnaṃ śuddhacinmātrarūpi yat |
tatraitatsphurati bhrāntyā taraṅgatvamivāmbhasi || 30 ||
[Analyze grammar]

yathābhūtārthavijñānāttrayametadvilīyate |
jīvanmuktapadaṃ śuddhaṃ turyamevāvaśiṣyate || 31 ||
[Analyze grammar]

proktaṃ videhamuktatvaṃ turyānta iti paṇḍitaiḥ |
cidbrahmetyevamādīnāṃ vacasāṃ tadagocaraḥ || 32 ||
[Analyze grammar]

jāgratsvapnasuṣuptākhyaṃ trayaṃ rūpaṃ hi cetasaḥ |
śāntaṃ ghoraṃ ca mūḍhaṃ ca tryātma cittamiha sthitam || 33 ||
[Analyze grammar]

ghoraṃ jāgranmayaṃ cittaṃ śāntaṃ svapnamayaṃ sthitam |
mūḍhaṃ suṣuptabhāvasthaṃ tribhirhīnaṃ mṛtaṃ bhavet || 34 ||
[Analyze grammar]

yatra cittaṃ mṛtaṃ tatra sattvamekaṃ sthitaṃ samam |
tadviddhi jīvanmuktatvaṃ tatturyaṃ tanmahatpadam || 35 ||
[Analyze grammar]

tatraite munayaḥ siddhā brahmaviṣṇuharādayaḥ |
sattvātmake turyapade jīvanmuktā vyavasthitāḥ || 36 ||
[Analyze grammar]

yaṃ taṃ muniṃ vane vyādhaḥ pṛṣṭavānmṛgahetunā |
sa saṃsthitasturyapade śuddhasattvodayātmani || 37 ||
[Analyze grammar]

cittācāraṃ na jānāti mṛtacittaḥ sa kañcana |
śāntāśeṣaviśeṣāṃśamadvaitaikyapadaṃ gataḥ || 38 ||
[Analyze grammar]

samastasaṅkalpavilāsamukte turye pade tiṣṭha nirāmayātmā |
yatra sthitāḥ sādhu sadehamuktāḥ praśāntabhedā munayo mahāntaḥ || 39 ||
[Analyze grammar]