Chapter 132

saṃvedyacikitsanayogopadeśo nāma sargaḥ |
dvātriṃśaduttaraśatatamaḥ sargaḥ |
vasiṣṭhaḥ |
jīvasya trīṇi rūpāṇi sthūlasūkṣmaparāṇi tu |
tatrāsya yatparaṃ rūpaṃ tadbhaja dve'pare tyaja || 1 ||
[Analyze grammar]

asyāsatī tu dve rūpe dvicandratvamivotthite |
vicārādeva naśyete paraṃ rūpaṃ na naśyati || 2 ||
[Analyze grammar]

jīvasya yadanāśaṃ tu rūpaṃ rāghava tadbhavān |
tatraivācalavadbaddhapadamāssva ramasva ca || 3 ||
[Analyze grammar]

rāmaḥ |
jīvasya yāni bhagavaṃstrīṇi rūpāṇi tāni me |
yathāvatkathayānāśaṃ rūpaṃ vedmi yathāsya tat || 4 ||
[Analyze grammar]

vasiṣṭhaḥ |
pāṇipādamayo yo'yaṃ deho bhogāya valgati |
bhogārthametajjīvasya rūpaṃ sthūlamiha sthitam || 5 ||
[Analyze grammar]

svasaṅkalpacidākāraṃ yāvatsaṃsārabhāvi yat |
cittaṃ tadviddhi jīvasya rūpaṃ rāmātivāhikam || 6 ||
[Analyze grammar]

sati cāsati dehe'sminprāṇavātarathasthitam |
etadasya manorūpaṃ jagadbhrāmyatyavāritam || 7 ||
[Analyze grammar]

āmodaḥ pavanārūḍhaḥ puṣpaṃ tyaktvā yathāmbare |
bhavatyevaṃ śarīreṣu naṣṭeṣu prāṇagaṃ manaḥ || 8 ||
[Analyze grammar]

yathā rakṣārthasūtrasya granthayo vividhāḥ sthitāḥ |
yathā veṇulatāyāśca parvāṇyaṅge sthitāni vā || 9 ||
[Analyze grammar]

cittatantau sudīrghe'smiñcharīrāṇi tathānagha |
utpatyotpatya nāśīni saridrayataraṅgavat || 10 ||
[Analyze grammar]

ādyantarahitaṃ satyaṃ cinmātraṃ nirvikalpakam |
yattadviddhi paraṃ rūpaṃ jīvasyādyaṃ tṛtīyakam || 11 ||
[Analyze grammar]

jagatprajāyate tasmāttasminneva pralīyate |
manāksphuritvā tadrūpamūrmijālamivārṇave || 12 ||
[Analyze grammar]

jāgratsvapnasuṣuptānāṃ bhavanāśodbhavasthiteḥ |
etatturyapadaṃ śuddhamatra baddhapado bhava || 13 ||
[Analyze grammar]

rāmaḥ |
brahmanyeyaṃ vinā nidrāṃ grāhyagrāhakasaṅgadṛk |
sā lolā jāgradāstheti jānāmyeva na saṃśayaḥ || 14 ||
[Analyze grammar]

jāgradvatsvapnakāle yā nidrāyāṃ sphurati bhrame |
grāhyagrāhakasaṃvittiḥ sā svapnākhyeti vedmyaham || 15 ||
[Analyze grammar]

bhāvijāgratsvapnadaśā yā dṛṣadvadvimūḍhatā |
sā suṣuptadaśetyeva jānāmyeva munīśvara || 16 ||
[Analyze grammar]

jāgratsvapnasuṣupteṣu sthitaṃ triṣvapyalakṣitam |
turyaṃ tūryādatītaṃ ca tadviprendra kimucyate || 17 ||
[Analyze grammar]

vasiṣṭhaḥ |
ahambhāvānahambhāvau tyaktvā sadasatī tathā |
yadasaktaṃ samaṃ svacchaṃ sthitaṃ tatturyamucyate || 18 ||
[Analyze grammar]

yā svasthā samatā śāntā jīvanmuktavyavasthitiḥ |
sākṣyavasthā vyavahṛtau sā turyakalanocyate || 19 ||
[Analyze grammar]

rāgadveṣaviyuktaistu viṣayānindriyaiścaran |
ātmavaśyairvidheyātmā turyatāmupagacchati || 20 ||
[Analyze grammar]

samatā svacchatā cāntarekatā nirvikalpatā |
śunyatā bhāvitā yena turyāvasthāmasau gataḥ || 21 ||
[Analyze grammar]

sarva eva mahānto'pi brahmaviṣṇuharādayaḥ |
narāśca kecijjīvanto muktāsturye vyavasthitāḥ || 22 ||
[Analyze grammar]

naitajjāgranna ca svapnaḥ saṅkalpānāmasambhavāt |
suṣuptabhāvo nāpyetadabhāvājjaḍatāntayoḥ || 23 ||
[Analyze grammar]

rajjusarpabhramanibhaṃ nātra cittaṃ vivalgati |
sattāsāmānyamekātma sattvamatra samaṃ sthitam || 24 ||
[Analyze grammar]

ātmārāmāmalānandā saṃśāntasakalaiṣaṇā |
jīvanmuktadaśā rāma turyaśabdena kathyate || 25 ||
[Analyze grammar]

yathā svapne jagadbhānamidaṃ citkacanaṃ tviti |
bodhāddveṣabhayonmuktaṃ śāntamapratighaṃ bhavet || 26 ||
[Analyze grammar]

atyantāsambhavāddṛśyadṛśāṃ brahmātmatodayāt |
tathā rāgādinirmuktamāsitaṃ turyamucyate || 27 ||
[Analyze grammar]

śāntaṃ samyakprabuddhānāṃ yathāsthitamidaṃ jagat |
vilīnaṃ turyamityāhurabuddhānāṃ sthiraṃ sthitam || 28 ||
[Analyze grammar]

jīvanmuktapadādūrdhvaṃ vacasāṃ yanna gocare |
śāntaṃ videhamuktatvaṃ turyātītaṃ taducyate || 29 ||
[Analyze grammar]

jīvanmuktapade turye kañcitkālaṃ yadṛcchayā |
sthitvā videhamuktatvaṃ yāhi turyottaraṃ padam || 30 ||
[Analyze grammar]

turye baddhapado bhūtvā paramāṃ samatāṃ gataḥ |
mākartā mā ca kartā tvaṃ bhava prakṛtakarmaṇi || 31 ||
[Analyze grammar]

ahaṅkārakalātyāge śāntataivānubhūyatām |
viśarārau kṣate citte turyāvasthopatiṣṭhate || 32 ||
[Analyze grammar]

yā karmasviha saṃsṛtau vyavahṛtiḥ sa svapnajāgradbhramo yanmaurkhyaṃ ghanameva mohavalitaṃ sāsau suṣuptasthitiḥ |
jīvanmuktapadaṃ vivāsanatayā yatturyamāryeha tatturyātītamadehamokṣa iha no vaktuṃ girā pāryate || 33 ||
[Analyze grammar]