Chapter 110

strītvalābho nāma sargaḥ |
daśottaraśatatamaḥ sargaḥ |
vasiṣṭhaḥ |
tataḥ katipayeṣveva divaseṣu gateṣu sā |
idaṃ provāca bhartāraṃ kumbharūpadharā satī || 1 ||
[Analyze grammar]

rājan rājīvapattrākṣa mamedaṃ vacanaṃ śṛṇu |
niśāyāṃ pratyahaṃ tāvatsthita evāhamaṅganā || 2 ||
[Analyze grammar]

tadicchāmyaṅganādharmaṃ nipuṇīkartumīdṛśam |
bhartre kasmaicidātmānaṃ vivāhena dadāmyaham || 3 ||
[Analyze grammar]

tadbhavāneva me bhartā rocate bhuvanatraye |
gṛhāṇa māṃ vivāhena bhāryātve niśi sarvadā || 4 ||
[Analyze grammar]

ayatnopanataṃ sādho priyeṇa suhṛdā saha |
strīsukhaṃ bhoktumicchāmi mā me vighnakaro bhava || 5 ||
[Analyze grammar]

kramapravṛttamā sṛṣṭeḥ sukhasādhyaṃ manoramam |
prakṛtaṃ kurvataḥ kāryaṃ doṣaḥ ka iva jāyate || 6 ||
[Analyze grammar]

icchānicchādṛśoraikyātsamatvātsarvavastuṣu |
vayaṃ na secchā nānicchāḥ kurvastenaitadīpsitam || 7 ||
[Analyze grammar]

śikhidhvajaḥ |
kṛtenānena kāryeṇa na śubhaṃ nāśubhaṃ sakhe |
paśyāmi tanmahābuddhe yathecchasi tathā kuru || 8 ||
[Analyze grammar]

samatāṃ samprayātena cetasedaṃ jagattrayam |
kharūpameva paśyāmi yathecchasi tathācara || 9 ||
[Analyze grammar]

kumbhaḥ |
yadyevaṃ tanmahīpāla lagnamadyaiva śobhanam |
rākeyaṃ śrāvaṇasyāsya hyaḥ sarvaṃ gaṇitaṃ mayā || 10 ||
[Analyze grammar]

rātrāvadyodite candre paripūrṇakalāmale |
janyatraṃ nau mahābāho dvayoreva bhaviṣyati || 11 ||
[Analyze grammar]

mahendrādriśiraśśṛṅgasānāvasminmanorame |
ratnadīpaprakāśāḍhyamaṇimandiramaṇḍite || 12 ||
[Analyze grammar]

puṣpabhārānatottuṅgavṛkṣajanyavirājite |
vanapuṣpalatālāsyanārīnṛttamanohare || 13 ||
[Analyze grammar]

niśi vyomagatāstārā bhartrā pūrṇendunā saha |
āvayoḥ paripaśyantu karṇāntāgatalocanāḥ || 14 ||
[Analyze grammar]

uttiṣṭhātmavivāhārthaṃ kurvaḥ kānanakoṭarāt |
rājaṃścandanapuṣpādisambhāraṃ ratnasaṃyutam || 15 ||
[Analyze grammar]

ityuktvā kumbha utthāya saha tena mahībhṛtā |
kusumāvacayaṃ cakre tathā ratnādisañcayam || 16 ||
[Analyze grammar]

tato muhūrtamātreṇa ratnasānau same śubhe |
samālambhanapuṣpāḍhyāstābhyāṃ vai rāśayaḥ kṛtāḥ || 17 ||
[Analyze grammar]

hārāmbaramaṇīndrādirāśayaste virejire |
saubhāgyasyeva kāmena kośāḥ kālena sambhṛtāḥ || 18 ||
[Analyze grammar]

tathā janyatrasambhāraṃ kṛtvā kāñcanakandare |
yayatustau mahāmitre snātuṃ mandākinīṃ nadīm || 19 ||
[Analyze grammar]

tatrainaṃ snapayāmāsa mahārājamathādarāt |
gajakumbhopamaskandhaṃ kumbho maṅgalapūrvakam || 20 ||
[Analyze grammar]

bhaviṣyadvanitārūpāṃ bhaviṣyatpatitāṃ gataḥ |
cūḍālāṃ snapayāmāsa kumbharūpadharāṃ priyām || 21 ||
[Analyze grammar]

pūjayāmāsatuḥ snātau tatra devānpitṝnmunīn |
yathā kriyāphale'nicchau kriyātyāge tathaiva tau || 22 ||
[Analyze grammar]

nityaṃ jñānarasātṛptau vyavasthārthaṃ jagatsthiteḥ |
cakrāte bhojanaṃ bhavyau tāvanyo'nyasamīritau || 23 ||
[Analyze grammar]

kalpavṛkṣadugūlāni paridhāya sitāni tau |
phalāni bhuktvā janyatrasthānamāyayatuḥ kramāt || 24 ||
[Analyze grammar]

etāvatātra kālena tayorjanyatrasotkayoḥ |
priyaṃ kartumivāstādrau jhagityevāviśad raviḥ || 25 ||
[Analyze grammar]

atha sandhyākrame vṛtte kṛte japyāghamarṣaṇe |
vivāhadarśanāyeva tārājāle khamāgate || 26 ||
[Analyze grammar]

mithunaikasakhī yāmā kumudotkarahāsinī |
prāleyajālaprakaraṃ vikirantī samāyayau || 27 ||
[Analyze grammar]

ratnadīpānbahūn samyakkumbhaḥ sānāvayojayat |
jyotīṃṣīndvarkayuktāni padmodbhava ivāmbarāt || 28 ||
[Analyze grammar]

bhūṣayāmāsa rājānaṃ strītvaṃ gacchanniśāmukhe |
candanāgurukarpūrapūrairmṛgajakuṅkumaiḥ || 29 ||
[Analyze grammar]

hārakeyūrakaṭakaistathā kalpalatāṃśukaiḥ |
sragdāmairavataṃsaiśca mālyaiśca vividhombhitaiḥ || 30 ||
[Analyze grammar]

tathā kalpalatāgucchairmandāraiḥ pārijātakaiḥ |
santānairbahuratnaiśca maulinā cendurūpiṇā || 31 ||
[Analyze grammar]

etāvatātha kālena vadhūtvaṃ kumbha āyayau |
ghanastanataṭākrānto babhūvāśu vilāsavān || 32 ||
[Analyze grammar]

idaṃ sañcintayāmāsa sampanno'yamahaṃ vadhūḥ |
kāmāyātmā mayādeyaḥ kāryaṃ kālocitaṃ kila || 33 ||
[Analyze grammar]

iyamasmi vadhūḥ kāntā bhartāyaṃ me puraḥ sthitaḥ |
gṛhāṇa kāma māmehi kālo'yaṃ tava hṛcchaya || 34 ||
[Analyze grammar]

iti sañcintya bhartāramagrasthamabhimaṇḍitam |
udayantamivādityaṃ ratiḥ kāmamivāha sā || 35 ||
[Analyze grammar]

ahaṃ madanikā nāma bhāryāsmi tava mānada |
pataye te praṇāmo'yaṃ sasnehaṃ kriyate mayā || 36 ||
[Analyze grammar]

ityuktvā sānavadyāṅgī lajjāvanamitānanā |
lolālakena śirasā praṇanāma nayātpatim || 37 ||
[Analyze grammar]

uvācedaṃ ca he nātha tvaṃ māṃ bhūṣaya bhūṣaṇaiḥ |
krameṇāgniṃ ca sañjvālya matpāṇigrahaṇaṃ kuru || 38 ||
[Analyze grammar]

rājase'titarāṃ nātha māṃ karoṣi smarāturām |
ratervivāhe madanamabhibhūyādhitiṣṭhasi || 39 ||
[Analyze grammar]

indorivāṃśujālāni rājanmālyāni bhānti te |
merugaṅgāpravāhābhāṃ dhatte hārastavorasi || 40 ||
[Analyze grammar]

mandārakusumaprotaiḥ kuntalairnṛpa rājase |
kanakābjamivālolairbhṛṅgaiḥ kesaradhūsaraiḥ || 41 ||
[Analyze grammar]

ratnāṃśujālaiḥ kusumaiśśriyā sthairyeṇa tejasā |
unnatyā ca vibho merumabhibhūyāvatiṣṭhase || 42 ||
[Analyze grammar]

evamādi vadantau tau bhaviṣyannavadampatī |
pracchannapūrvadāmpatyau mithastuṣṭau babhūvatuḥ || 43 ||
[Analyze grammar]

mahārājñīṃ madanikāṃ mahārājaśśikhidhvajaḥ |
kāñcanāmalaparyaṅke niyojyābhūṣayatsvayam || 44 ||
[Analyze grammar]

avataṃsaistathā mālyairmaṇimuktāvibhūṣaṇaiḥ |
vastrairvilepanaiḥ puṣpairucitasthānayojitaiḥ || 45 ||
[Analyze grammar]

sā babhau bhūṣitā tanvī madanī madadāyinī |
girijeva vivāhotkā kāmakānteva kāminī || 46 ||
[Analyze grammar]

mahārājo mahārājñīṃ bhūṣayitvedamāha tām |
rājase mṛgaśāvākṣi lakṣmīriva navotthitā || 47 ||
[Analyze grammar]

śakreṇa saha yacchacyā yal lakṣmyā hariṇā saha |
yadgauryāśśambhunā sārdhaṃ tatte bhavatu maṅgalam || 48 ||
[Analyze grammar]

padmakandāṅkuraradā lolanīlotpalekṣaṇā |
āmodasubhagākārā tvaṃ sthitā padminīsamā || 49 ||
[Analyze grammar]

suraktapallavakarā stabakastanadhāriṇī |
tvameva phaladā manye kāmakalpatarorlatā || 50 ||
[Analyze grammar]

himaśītāvadātāṅgī jyotsnāprasarahāsinī |
pūrṇenduśrīrivodyuktā dṛṣṭaivāhlādayasyalam || 51 ||
[Analyze grammar]

taduttiṣṭha varārohe vedīṃ vaivāhikīṃ svayam |
ratnapuṣpalatājālai racayāvo yathākramam || 52 ||
[Analyze grammar]

ityuktvā dampatī kāntau racayāmāsatustadā |
vedīmātmavivāhāya mahendramaṇikandare || 53 ||
[Analyze grammar]

muktājālaiḥ sajhāṅkāraiḥ puṣpottaṃsaiḥ saṣaṭpadaiḥ |
ratnamālyaiḥ saṭāṅkārairvaijayantīpaṭaiścalaiḥ || 54 ||
[Analyze grammar]

kalpavṛkṣalatāsūtraiḥ kalpastabakamaṇḍalaiḥ |
kalpapādapapaṭṭaiśca kalpadrumaphalotkaraiḥ || 55 ||
[Analyze grammar]

devadārulatājālaiḥ kāṇḍapratisarāṅkitaiḥ |
muktākusumalājānāṃ prakaraistārakopamaiḥ || 56 ||
[Analyze grammar]

caturdikkaṃ caturbhiśca nārikelamahāphalaiḥ |
pūrṇakumbhatayā gāṅgavāripūraiḥ prakalpitaiḥ || 57 ||
[Analyze grammar]

jvalayāmāsatustasyāṃ madhye candanadārubhiḥ |
jvalanaṃ jvalitajvālaṃ dakṣiṇasthapradakṣiṇam || 58 ||
[Analyze grammar]

pūrvābhimukhamagnestāvagre pallavaviṣṭare |
niyojya dampatī kāntau tayorviviśatuḥ svayam || 59 ||
[Analyze grammar]

sa hutvā tilalājādi pāvakāya śikhidhvajaḥ |
utthāyotthāpya kāntāṃ ca pāṇibhyāṃ svayamādade || 60 ||
[Analyze grammar]

anyo'nyaṃ śobhamānau tāvanyāviva navau śivau |
cakraturdampatī tasya pāvakasya pradakṣiṇam || 61 ||
[Analyze grammar]

svadāyaṃ jñānasarvasvaṃ hṛdayaṃ prema cācalam |
dadatustau mitho mānyau smitakāntamukhaśriyau || 62 ||
[Analyze grammar]

pradakṣiṇatrayaṃ kṛtvā lājān santyajya vahnaye |
madbhāryāmambarāddṛṣṭvā karau tatyajatuḥ kramāt || 63 ||
[Analyze grammar]

smayamānamukhau kāntau candrāviva navoditau |
pūrvoparacite puṣpatalpe viviśaturnave || 64 ||
[Analyze grammar]

etasminnantare candraścaturbhāgaṃ nabhastalāt |
śanairākramayāmāsa śobhāṃ draṣṭumivaitayoḥ || 65 ||
[Analyze grammar]

tasmin sānau latācchidrairdraṣṭuṃ dṛṣṭīrivābhitaḥ |
lolaiḥ sañcārayāmāsa karānindurvarāṅgane || 66 ||
[Analyze grammar]

taistaistatra kathālāpairindāvabhyudite tathā |
tāvāsāṃ cakratuḥ kāntau dampatī tu muhūrtakam || 67 ||
[Analyze grammar]

athotthāya jvaladratnadīpāṃ kāñcanakandarām |
svayaṃ pūrvoparacitāṃ guptāṃ viviśatuḥ priyau || 68 ||
[Analyze grammar]

navaṃ dadṛśatustatra talpaṃ kusumakalpitam |
parito vyāptamutphullairhemapaṅkajarāśibhiḥ || 69 ||
[Analyze grammar]

mandārādibhiranyaiśca puṣpairmlānivivarjitaiḥ |
uccakaiḥ puṃpramāṇena nirmitaṃ kusumaiḥ samaiḥ || 70 ||
[Analyze grammar]

dīrghendubimbapratimaṃ tuṣārasthalaśītalam |
kṣīrodajaladhārābhaṃ jyotsnāsampiṇḍapāṇḍuram || 71 ||
[Analyze grammar]

pratibimbamanantasya ratnabhittāviva sthitam |
sugandhamunnataṃ kāntaṃ viśarārutayojjhitam || 72 ||
[Analyze grammar]

mithunaṃ puṣparāśau tatpapāta dhavalāmale |
tasmin samasamābhoge kṣīrode mandaro yathā || 73 ||
[Analyze grammar]

taistaistataḥ praṇatipeśalavāgvilāsaistatkālakāryasubhagaiḥ praṇayopacāraiḥ |
satkāntayornavanavena tayoḥ sukhena dīrghā muhūrta iva sā rajanī jagāma || 74 ||
[Analyze grammar]