Chapter 111

līlāvivāho nāma sargaḥ |
ekādaśottaraśatatamaḥ sargaḥ |
vasiṣṭhaḥ |
atha sūryāṃśuraṅgeṇa rañjite bhuvanodare |
śikhidhvajāṅganā bhūyo madanī kumbhatāṃ yayau || 1 ||
[Analyze grammar]

evaṃ mahendradaryāṃ tāv ubhau kumbhaśikhidhvajau |
svayaṃ vivāhitāviṣṭau sampannau navadampatī || 2 ||
[Analyze grammar]

vilesaturvicitrāsu pratyahaṃ vanarājiṣu |
prapakvaphalabhārāsu puṣpapallavinīṣu ca || 3 ||
[Analyze grammar]

divā priyatare mitre yāminyāmiṣṭadampatī |
prabhādīpāviva śliṣṭau na viyuktau babhūvatuḥ || 4 ||
[Analyze grammar]

remāte vanakuñjeṣu guhāsu ca mahībhṛtām |
tamālasālaṣaṇḍeṣu mandāragahaneṣu ca || 5 ||
[Analyze grammar]

sahyadardurakailāsamahendramalayeṣu ca |
gandhamādanavindhyādrilokālokataṭeṣu ca || 6 ||
[Analyze grammar]

dinaistribhistribhirgatvā nidrāṃ gatavati priye |
cūḍālā rājakāryāṇi kṛtvā svānyāyayau punaḥ || 7 ||
[Analyze grammar]

tau divā suhṛdau rātrau dampatī kumbhabhūmipau |
nānākusumasaṃvītau tasthaturmuditau mithaḥ || 8 ||
[Analyze grammar]

māsamekaṃ mahendrādrisānau saralasaṅkule |
ratnakuḍye guhāgehe pūjitau surakinnaraiḥ || 9 ||
[Analyze grammar]

hastalabhyoditendau ca mandāravanamālite |
evaṃ śuktimataḥ pṛṣṭhe pakṣaṃ pakṣaṃ latāgṛhe || 10 ||
[Analyze grammar]

māsadvayamṛkṣavato girerdakṣiṇatastaṭe |
pārijātavane devapuṣpastabakamaṇḍape || 11 ||
[Analyze grammar]

jambūṣaṇḍatale meroḥ pāde jambūnadītaṭe |
jāmbūnadamaye māsaṃ jambūphalarasāvanau || 12 ||
[Analyze grammar]

daśottarakurūṇāṃ ca maṇḍale divasāni tau |
kailāsasyottarastheṣu saptaviṃśativāsarān || 13 ||
[Analyze grammar]

evamanyeṣu deśeṣu vicitreṣu mahībhṛtām |
sthitavantau mahābhāgau suhṛdau snigdhadampatī || 14 ||
[Analyze grammar]

tato yāteṣu māseṣu śanaiḥ katipayeṣu sā |
cūḍālā cintayāmāsa devaputrakarūpiṇī || 15 ||
[Analyze grammar]

suropabhogabhāreṇa parīkṣe'haṃ śikhidhvajam |
mā kadācana ceto'sya bhogeṣu ratimeṣyati || 16 ||
[Analyze grammar]

iti sañcintya cūḍālā māyayā svāmino vane |
āgataṃ darśayāmāsa sasurāpsarasaṃ harim || 17 ||
[Analyze grammar]

indramabhyāgataṃ dṛṣṭvā parivārasamanvitam |
yathāvatpūjayāmāsa vanasaṃsthaśśikhidhvajaḥ || 18 ||
[Analyze grammar]

śikhidhvajaḥ |
ātmanaḥ kiṃ kṛtā dūrādabhyāgamakadarthanā |
devarāja prasādānme yathāvadvaktumarhasi || 19 ||
[Analyze grammar]

indraḥ |
ime vayamihānītāstvadguṇātiśayena khāt |
hṛdi lagnena sūtreṇa khagā dūragatā iva || 20 ||
[Analyze grammar]

uttiṣṭha svargamāgaccha tatra sarve tvadunmukhāḥ |
tvadguṇaśravaṇāścaryāḥ sthitā devagaṇāṅganāḥ || 21 ||
[Analyze grammar]

ime rathā idaṃ yānamayamuccaiśśravā hayaḥ |
ayamairāvaṇo nāgo yathābhimatamāśraya || 22 ||
[Analyze grammar]

pādukāgulikākhaḍgarasādīdamathāpi ca |
gṛhītvā siddhamārgeṇa svīkuru svargamaṇḍalam || 23 ||
[Analyze grammar]

ākalpaṃ vaibudhā bhogāstvayā vibudhasadmani |
jīvanmuktena bhoktavyāstena tvāmahamāgataḥ || 24 ||
[Analyze grammar]

vimānayanti samprāptāṃ na tiraskaraṇaiśśriyam |
nābhivāñchanti cāprāptāṃ tvādṛśāḥ sādhusādhavaḥ || 25 ||
[Analyze grammar]

avighnamāgatenādya sukhaṃ viharatā tvayā |
svargaḥ pavitratāṃ yātu hariṇeva jagattrayam || 26 ||
[Analyze grammar]

śikhidhvajaḥ |
svargaṃ svargasamācāraṃ vedmi devādināyaka |
kiṃ tu sarvatra me svargo niyato na tu kutracit || 27 ||
[Analyze grammar]

sarvatraiva hi tuṣyāmi sarvatraiva rame prabho |
avāñchanatvānmanasaḥ sarvatrānandavānaham || 28 ||
[Analyze grammar]

niyataṃ kiñcidekatra sthitaṃ svargakamīdṛśam |
śakra gantuṃ na jānāmi nājñātaṃ ca karomyaham || 29 ||
[Analyze grammar]

indraḥ |
sādho viditavedyānāṃ paripūrṇadhiyāṃ satām |
sajjanācaritaṃ yuktaṃ manye bhogopasevanam || 30 ||
[Analyze grammar]

deveśe proktavatyevaṃ tūṣṇīmeva sthite nṛpe |
kimevaṃ nopayāmyeva tvāmiti proktavān hariḥ || 31 ||
[Analyze grammar]

bāḍhamityeva kālena vadatīṣacchikhidhvaje |
kalyāṇaṃ te'stu kumbheti vadannantardhimāyayau || 32 ||
[Analyze grammar]

taddevavṛndamakhilaṃ tridaśeśayuktaṃ tatra kṣaṇādalamadṛśyamabhūdvilīnam |
kallolajālamiva vārinidhau praśāntavāte sphuranmakaraphenaphaṇīndraśabdam || 33 ||
[Analyze grammar]