Chapter 109

jīvanmuktavyavahṛtiyogopadeśo nāma sargaḥ |
navottaraśatatamaḥ sargaḥ |
śikhidhvajaḥ |
evaṃ sthite mahābhāga kathamudvegamīdṛśam |
labdhavānasi devo'pi svargādapi sukhāspadāt || 1 ||
[Analyze grammar]

kumbhaḥ |
śṛṇu kāryamidaṃ citraṃ madīyaṃ vasudhādhipa |
kathayāmi tavāśeṣaṃ svarge yadvṛttamadya me || 2 ||
[Analyze grammar]

suhṛdyāveditaṃ duḥkhaṃ paramāyāti tānavam |
ghanaṃ jaḍaṃ kṛṣṇamapi muktavṛṣṭirivāmbudaḥ || 3 ||
[Analyze grammar]

suhṛdā pṛcchatā sādhu ceto yāti prasannatām |
snihyatopagatenāśu katakena jalaṃ yathā || 4 ||
[Analyze grammar]

ahaṃ tāvadito yāto bhavate puṣpamañjarīm |
dattvā gaganamullaṅghya samprāptaśca triviṣṭapam || 5 ||
[Analyze grammar]

tatra pitrā sahendrasya sabhāsthāne yathākramam |
sthitvotthāya tathotthānakāle pitrā visarjitaḥ || 6 ||
[Analyze grammar]

ihāgantumahaṃ svargaṃ tyaktvā samprāptavānnabhaḥ |
divākarahayaiḥ sārdhaṃ vahāmyanilavartmani || 7 ||
[Analyze grammar]

athaikatra gato bhānurekenānyena vartmanā |
āgacchāmyahamākāśasāgarātpatitākṛtiḥ || 8 ||
[Analyze grammar]

athāgre vāripūrṇānāṃ meghānāṃ madhyavartmanā |
apaśyaṃ munimāyāntamahaṃ durvāsasaṃ javāt || 9 ||
[Analyze grammar]

payodharapaṭacchannaṃ vidyudvalayabhūṣitam |
abhisārikayā tulyaṃ dhārādhautāṅgasañcayam || 10 ||
[Analyze grammar]

sthitaṃ sumeghacchāyāyāṃ śyāmāyāṃ vasudhātale |
vegenābhisarantaṃ taṃ tapolakṣmīmiva priyām || 11 ||
[Analyze grammar]

tasya kṛtvā namaskāramuktaṃ ca vahatā mayā |
mune nīlābdavastrastvamabhisārikayā samaḥ || 12 ||
[Analyze grammar]

ityākarṇya cukopāsau mayi mānada mānahā |
visphārya rakte nayane prāha gambhīranissvanam || 13 ||
[Analyze grammar]

pautro'smi padmajasyeti garvitastvaṃ kimīdṛśaḥ |
bhavyā hi natimāyānti guṇairvṛkṣāḥ phalairiva || 14 ||
[Analyze grammar]

veśyābhisārikārūpo bhavānityaśubhaṃ vacaḥ |
mayi vakṣi durācāra mūḍha devakumāraka || 15 ||
[Analyze grammar]

stanakeśavatī kāntā hāvabhāvavikāriṇī |
gacchānena duruktena rātrau veśyā bhaviṣyasi || 16 ||
[Analyze grammar]

iti śrutvāśubhaṃ vākyamujjhitaṃ jarjaradvijāt |
vimṛṣyāmi manāg yāvattāvadantarhito muniḥ || 17 ||
[Analyze grammar]

ityudvignamanāḥ sādho samprāpto'smi nabhastalāt |
etatte kathitaṃ sarvaṃ sampanno'smi niśāṅganā || 18 ||
[Analyze grammar]

ativāhyaṃ dinānteṣu strītvametanmayā katham |
yonistanavatā rātrau vaktavyaṃ kiṃ mayā pituḥ || 19 ||
[Analyze grammar]

saṃsṛtau bhavitavyānāmaho nu viṣamā gatiḥ |
ahamapyanyavaddaivād yūnāmāmiṣatāṃ gataḥ || 20 ||
[Analyze grammar]

kaṣṭaṃ madapahāreṇa kalaho jāyate'dhunā |
divi devakumārāṇāṃ kāmākuladhiyāmiha || 21 ||
[Analyze grammar]

gurudevadvijātīnāṃ lajjāparavaśātmanā |
kathamagre mayā samyaksthātavyaṃ yāminīstriyā || 22 ||
[Analyze grammar]

vasiṣṭhaḥ |
ityuktvā kṣaṇamekaṃ sa tūṣṇīṃ sthitvā muneḥ sutaḥ |
dhairyamālambya kumbho'tra punarāha raghūdvaha || 23 ||
[Analyze grammar]

kimajña iva śocāmi kiṃ mama kṣatamātmanaḥ |
yathāgatamayaṃ deho matto'nyo'nubhaviṣyati || 24 ||
[Analyze grammar]

śikhidhvajaḥ |
paridevanayā ko'rtho devaputra tavaitayā |
yadāyāti tadāyātu dehasyātmā na lipyate || 25 ||
[Analyze grammar]

kānicid yāni duḥkhāni sukhāni vihitāni vā |
tāni sarvāṇi dehasya dehino na tu kānicit || 26 ||
[Analyze grammar]

yadi tvamapi kāryāṇāmakhedārho'pi khidyasi |
tadanyeṣāmupāyaḥ syātka ivāgamabhūṣaṇa || 27 ||
[Analyze grammar]

khede'khedocitaṃ vācyamiti kiṃ ca tvamuktavān |
idānīṃ samatāmetya tiṣṭhākhinno yathāsthitaḥ || 28 ||
[Analyze grammar]

vasiṣṭhaḥ |
tāvevamādibhirvākyairanyo'nyāśvāsanaṃ svayam |
kṛtvā sthitau vane snigdhau suhṛdau khedinau mithaḥ || 29 ||
[Analyze grammar]

athārkastasya kumbhasya strītvamutpādayanniva |
jagāmāstaṃ jagaddīpo dīpaḥ snehakṣayādiva || 30 ||
[Analyze grammar]

vyavahārabharaiḥ sārdhaṃ padmāḥ saṅkocamāyayuḥ |
mārgāśca pathikaiḥ sārdhaṃ pānthastrīhṛdayāni ca || 31 ||
[Analyze grammar]

dāśavadvihagān sarvān kurvadekatra puñjitān |
tārakāratnajālāḍhyaṃ bhuvanaṃ śyāmatāṃ yayau || 32 ||
[Analyze grammar]

khaṃ hasanniva tārāḍhyaṃ vikāsaṃ kumudākaraḥ |
yayāv unnādacakrāhvaṃ bhramadbhramarapeṭakaḥ || 33 ||
[Analyze grammar]

suhṛdau tāvathotthāya sandhyāmudyanniśākarām |
vandayitvā tathā kṛtvā japyaṃ gulmāntare sthitau || 34 ||
[Analyze grammar]

tataḥ kumbhaśśanaistatra straiṇamabhyāharanvapuḥ |
śikhidhvajaṃ purassaṃsthaṃ provāca galadakṣaram || 35 ||
[Analyze grammar]

patāmīva sphurāmīva dravāmīvāṅgayaṣṭibhiḥ |
lajjayeva ca he rājanmanye strītvaṃ vrajāmyaham || 36 ||
[Analyze grammar]

paśyeme parivardhante rājanmama śiroruhāḥ |
prasphurattārakāmālā dinānte timirā iva || 37 ||
[Analyze grammar]

paśyemau mama jāyete pronmukhāv urasi stanau |
korakāviva padminyā vasante gaganonmukhau || 38 ||
[Analyze grammar]

āgulphameva lambāni sampadyante'mbarāṇi me |
dehādeva sakhe paśya striyā iva śanaiśśanaiḥ || 39 ||
[Analyze grammar]

bhūṣaṇānyururatnāni mālyāni vividhāni ca |
paśyemānyaṅga jāyante svāṅgebhyo vṛkṣapuṣpavat || 40 ||
[Analyze grammar]

paśyāyaṃ svayamevodyaccandrāṃśubharasundaraḥ |
mūrdhni paṭṭāṃśuko jāto nīhāro'drāvivāṅga me || 41 ||
[Analyze grammar]

sarvāṇi kāntāliṅgāni jātāni mama mānada |
hā dhikkaṣṭaṃ viṣādo me kiṃ karomyaṅganāsmyaham || 42 ||
[Analyze grammar]

hā dhikkaṣṭamaho sādho sthita evāhamaṅganā |
saṃvidānubhavāmyantarnitambaṃ jaghanānvitam || 43 ||
[Analyze grammar]

vipine kumbha ityuktvā tūṣṇīṃ khinno babhūva ha |
rājāpi ca tamālokya tathaivāsīdviṣaṇṇadhīḥ || 44 ||
[Analyze grammar]

muhūrtamātreṇovāca śikhidhvaja idaṃ vacaḥ |
kaṣṭaṃ so'yaṃ mahāsattvaḥ sampanno varavarṇinī || 45 ||
[Analyze grammar]

sādho viditavedyastvaṃ jānāsi niyatergatim |
avaśyabhāvinyarthe'sminmā khinnahṛdayo bhava || 46 ||
[Analyze grammar]

āpatanti daśāstāta sudhiyāṃ dehamātrake |
na cetasyadhiyāṃ tvetāścittaṃ yānti sadehakam || 47 ||
[Analyze grammar]

kumbhaḥ |
evamastvanutiṣṭhāmi yāminīstrītvamātmanaḥ |
na khedamanugacchāmi niyatiḥ kena laṅghyate || 48 ||
[Analyze grammar]

iti nirṇīya tau khedaṃ taṃ nītvā tanutāṃ mithaḥ |
ekatalpe niśāṃ tūṣṇīṃ nītavantau cireṇa tām || 49 ||
[Analyze grammar]

atha prabhāte tatsvairaṃ vapurutsṛjya yauvatam |
babhūva kumbhaḥ kumbhābhakucaprojjhitamūrtimān || 50 ||
[Analyze grammar]

iti sā rājamahiṣī cūḍālā varavarṇinī |
kumbhatvamāsthitā bhartuḥ paścātstrītvamupāgatā || 51 ||
[Analyze grammar]

vijahāra vanānteṣu kumārī dharmiṇī niśi |
kumbharūpadharā cāhni bhartrā mitreṇa saṃyutā || 52 ||
[Analyze grammar]

kailāsamandarasumerumahendrasahyasānuṣvaviskhalitayogagamāgamā sā |
sārdhaṃ priyeṇa suhṛdā vibhunā yathecchaṃ sragdāmahāravalitā vijahāra nārī || 53 ||
[Analyze grammar]