Chapter 97

sarvatyāgo nāma sargaḥ |
saptanavatitamaḥ sargaḥ |
vasiṣṭhaḥ |
athotthāya dadāhāsau śuṣkaṃ tatparṇamandiram |
ajñena svena manasā vṛthā saṅkalpyakalpitam || 1 ||
[Analyze grammar]

śiṣṭaṃ yatkiñcidabhavattatra tatsa śikhidhvajaḥ |
asaṃrabdhamanā maunī krameṇa samayā dhiyā || 2 ||
[Analyze grammar]

dadāha dūre cikṣepa tatyāja ca babhañja ca |
bhāṇḍajātaṃ svavasanabhojanādyapi ruṣṭavat || 3 ||
[Analyze grammar]

sa babhūvāśramastasya dagdhanaṣṭanijasthitiḥ |
vīrabhadrabaladhvastadakṣayajñāśramopamaḥ || 4 ||
[Analyze grammar]

āśramātte mṛgakhagāstyaktaromanthamudyayuḥ |
sāgnidāhātpuravarādbhītabhītā janā iva || 5 ||
[Analyze grammar]

bhāṇḍajātaṃ dahatyagnau saha śuṣkendhanena tat |
kevalākṛtirasnehastuṣṭimānāha bhūpatiḥ || 6 ||
[Analyze grammar]

śikhidhvajaḥ |
aho nu cirakālena devaputra prabodhitaḥ |
sampannaḥ kevalaśśuddhaḥ sukhito bodhavānaham || 7 ||
[Analyze grammar]

kiṃ nāma kila vastvetadbhavetsāṅkalpikakramam |
yadbhāṇḍopaskarasthānasadanādyavalambanam || 8 ||
[Analyze grammar]

yāvad yāvatprahīyante vibandhā bandhahetavaḥ |
tāvattāvatsamāyāti paramāṃ nirvṛtiṃ manaḥ || 9 ||
[Analyze grammar]

śāmyāmi parinirvāmi sukhito'smi jayāmyaham |
vibandhāḥ prakṣayaṃ yātāḥ sarvatyāgo mayā kṛtaḥ || 10 ||
[Analyze grammar]

digambaro diksadano diksakho'yamahaṃ sthitaḥ |
devaputra mahātyāgātkimanyadavaśiṣyate || 11 ||
[Analyze grammar]

kumbhaḥ |
sarvameva na santyaktaṃ tvayā rājañchikhidhvaja |
sarvatyāgaparānandaṃ mā mudhābhinayīkuru || 12 ||
[Analyze grammar]

tavāstyevāparityaktaḥ sarvasmādbhāga uttamaḥ |
yaṃ parityajya niśśeṣaṃ parāmāyāsyaśokatām || 13 ||
[Analyze grammar]

vasiṣṭhaḥ |
iti śrutavatā tena kiñcitsañcintya bhūbhṛtā |
idamuktaṃ mahābāho rāma rājīvalocana || 14 ||
[Analyze grammar]

śikhidhvajaḥ |
indriyavyālasaṅghāto raktamāṃsamayākṛtiḥ |
śiṣyate sarvasantyāge deho me devatātmaja || 15 ||
[Analyze grammar]

tadutthāya purassaṃsthabhṛgupātādavighnajāt |
vināśātmakatāṃ nītvā sarvatyāgī bhavāmyaham || 16 ||
[Analyze grammar]

vasiṣṭhaḥ |
ityuktvā dehamagrasthe śvabhre tyaktumasau javāt |
karoti yāvadutthānaṃ tāvatkumbho'bhyuvāca ha || 17 ||
[Analyze grammar]

kumbhaḥ |
rājan kimiti dehaṃ tvaṃ nirāgaskaṃ mahāvaṭe |
tyajasyajño hi vṛṣabhaḥ kupito hanti tarṇakam || 18 ||
[Analyze grammar]

jaḍo varāko mūkātmā tapasvī dehako hyayam |
na kaścana tavaitasmai mā mudhaiva ruṣaṃ kuru || 19 ||
[Analyze grammar]

ātmanyevaiṣa mūḍhātmā dhyānavāniva tiṣṭhati |
sañcālyate pareṇaiva taraṅgeṇeva kāṣṭhakam || 20 ||
[Analyze grammar]

kṣobhayatyanya evainaṃ nigrahārho muhurbalāt |
tapasvinaṃ yathaikāntasaṃsthitaṃ mattataskaraḥ || 21 ||
[Analyze grammar]

sukhaduḥkhānubhūtyā hi nāparādhi śarīrakam |
nātmanaḥ phalapātātsa spandairvṛkṣo'parādhavān || 22 ||
[Analyze grammar]

vātaḥ phalaśikhāpuṣpapātanaṃ kurute sphuran |
taruṇā sādhunā sādhoraparāddhaṃ kimātmanaḥ || 23 ||
[Analyze grammar]

tyaktenāpi śarīreṇa kila tāmarasekṣaṇa |
sarvatyāgo na te yāti niṣpattiṃ viṣamo hi saḥ || 24 ||
[Analyze grammar]

bhṛgoḥ kevalametattvaṃ nirāgaskaṃ śarīrakam |
mudhā kṣipasi no dehatyāgena tyāgitā bhavet || 25 ||
[Analyze grammar]

yenāyaṃ kṣobhyate deho mattebheneva pādapaḥ |
tatsantyajasi cetpāpaṃ tanmahātyāgavānbhavān || 26 ||
[Analyze grammar]

tasmiṃstyakte bhavettyaktaṃ sarvaṃ dehādi bhūpate |
no cennirdagdhamapyetadbhūyo bhūyaḥ prarohati || 27 ||
[Analyze grammar]

śikhidhvajaḥ |
kenāyaṃ cālyate dehaḥ kiṃ bījaṃ janmakarmaṇām |
kasmiṃstyakte parityaktaṃ sarvaṃ bhavati sundara || 28 ||
[Analyze grammar]

kumbhaḥ |
sādho na dehatyāgena na rājyatyajanena ca |
na coṭajādiploṣeṇa sarvatyāgo bhavennṛṇām || 29 ||
[Analyze grammar]

yatsarvaṃ sarvato yacca tasmin sarvaikakāraṇe |
sarvasmin samparityakte sarvatyāgaḥ kṛto bhavet || 30 ||
[Analyze grammar]

śikhidhvajaḥ |
sarvaṃ sarvagataṃ sārvaṃ heyaṃ tyājyaṃ ca sarvathā |
sarvaṃ kimucyate brūhi sarvatattvavidāṃ vara || 31 ||
[Analyze grammar]

kumbhaḥ |
sādho sarvakalādhāraṃ jīvaprāṇādināmakam |
na jaḍaṃ nājaḍaṃ bhrāntaṃ cittaṃ sarvamiti smṛtam || 32 ||
[Analyze grammar]

rājyāderatha dehāderāśramādermahīpate |
sarvasyaiva mano bījaṃ tarubījaṃ taroriva || 33 ||
[Analyze grammar]

sarvasya bīje santyakte sarvaṃ tyaktaṃ bhavatyalam |
sambhavāsambhavādbhūyaḥ sarvatyāgo bhavediti || 34 ||
[Analyze grammar]

sarvaṃ dharmādyadharmādi rājyādi vipinādi ca |
sacittasya paraṃ duḥkhaṃ niścittasya paraṃ sukham || 35 ||
[Analyze grammar]

idaṃ vivartate sarvaṃ cittameva jagattayā |
dehādyākārajālena bījaṃ vṛkṣatayā yathā || 36 ||
[Analyze grammar]

pādapaḥ pavaneneva bhūkampeneva parvataḥ |
bhastrā bhastrāhinevāyaṃ dehaścittena cālyate || 37 ||
[Analyze grammar]

sarvabhūtopabhogyānāṃ jarāmaraṇajanmanām |
mahāmaṇīnāṃ sudṛḍhaṃ cittaṃ viddhi samudgakam || 38 ||
[Analyze grammar]

cittaṃ jīvo mano māyā prāṇaścetyādibhirmune |
kriyānurūpairabhidhāvyāpāraiścittamucyate || 39 ||
[Analyze grammar]

cittaṃ sarvamiti prāhustasmiṃstyakte mahīpate |
sarvādhivyādhisīmānte sarvatyāgaḥ kṛto bhavet || 40 ||
[Analyze grammar]

cittatyāgaṃ viduḥ sarvatyāgaṃ tyāgavidāṃ vara |
tasmin siddhe mahābāho satyaṃ kenāpi bhūyate || 41 ||
[Analyze grammar]

citte tyakte layaṃ yāti dvaitamaikyaṃ ca sarvataḥ |
kenacidbhūyate śāntaṃ svacchamekamanāmayam || 42 ||
[Analyze grammar]

asyāḥ kṣetraṃ viduścittaṃ saṃsṛteḥ sasyasantateḥ |
kṣetre tvakṣetratāṃ yāte śāleḥ ka iva sambhavaḥ || 43 ||
[Analyze grammar]

cittameva vicitrehaṃ bhāvābhāvavilāsinā |
vivartate'rthabhāvena jalamūrmitayā yathā || 44 ||
[Analyze grammar]

cittotsādanarūpeṇa sarvatyāgena bhūpate |
sarvamāsādyate samyaksāmrājyeneva sarvadā || 45 ||
[Analyze grammar]

sarvatyāgasya viṣayo yathaivānyo'sti te tathā |
tvamapyanyasya bhavasi tyāgin gṛhṇāsi cennṛpa || 46 ||
[Analyze grammar]

sūtraṃ muktāphaleneva jagajjālaṃ trikālagam |
sarvamantaḥkṛtaṃ tena yena sarvaṃ samujjhitam || 47 ||
[Analyze grammar]

yena sarvaṃ parityaktaṃ tasmiñchūnye'pi saṃsthitaṃ |
jagatsarvaṃ trikālasthaṃ tanturmuktāphale yathā || 48 ||
[Analyze grammar]

sasneheneva dīpena tena sarvaṃ prakāśitam |
sthitaḥ sarvaṃ parityajya yaśśānto'snehadīpavat || 49 ||
[Analyze grammar]

asneheneva dīpena yena sarvaṃ tirohitam |
sa rājate prakāśātmā samaḥ sasnehadīpavat || 50 ||
[Analyze grammar]

samastavastuniṣkāse yathā khamavaśiṣyate |
sarvatyāge kṛte tādṛgvijñānamavaśiṣyate || 51 ||
[Analyze grammar]

samastavastūdāso hi yathā khaṃ netarannṛpa |
sarvasantyāga evāṅga tathā nirvāṇamucyate || 52 ||
[Analyze grammar]

sarvatyāgo hi śūnyātmāpyāśrayaḥ sarvasampadām |
anantānāmudārāṇāṃ khamivedaṃ divaukasām || 53 ||
[Analyze grammar]

sarvatyāgarasāpānājjarāmaraṇabhītayaḥ |
na kāścana prabādhante khasyeva malalekhikāḥ || 54 ||
[Analyze grammar]

sarvatyāgo mahattvasya kāraṇaṃ nirmaladyuteḥ |
sarvaṃ tyajati khaṃ yasmāttasmācchuddhaṃ sthiraṃ bṛhat || 55 ||
[Analyze grammar]

sarvatyāgaḥ parānando duḥkhamanyatsudāruṇam |
ityomityurarīkṛtya yadicchasi tadācara || 56 ||
[Analyze grammar]

sarvaṃ tyajati yastasya sarvamevopatiṣṭhate |
yathaivāmbu viśatyagnau tathaivāyāti vāridhau || 57 ||
[Analyze grammar]

sarvatyāgāntarevāsti jñānamātmaprasādakam |
yacchūnyaṃ kila bhāṇḍasya tatra ratnādi tiṣṭhati || 58 ||
[Analyze grammar]

sarvatyāgavaśādeva hatakāle kalāvapi |
śākyena vigatāśaṅkaṃ muninā meruvatsthitam || 59 ||
[Analyze grammar]

sarvatyāgo mahārāja sarvasampatsamāśrayaḥ |
na gṛhṇāti hi yaḥ kaścitsarvaṃ tasmai pradīyate || 60 ||
[Analyze grammar]

kṛtvā sarvaparityāgaṃ śāntaḥ svaccho viyatsamaḥ |
somyo bhavasi yadrūpastadrūpo bhava bhūpate || 61 ||
[Analyze grammar]

sarvaṃ parityajya mahānubhāva tyajasyalaṃ yena ca tadvihāya |
tyāgaṃ ca sādānamalaṃ vimucya vimuktarūpo bhava bhūmipāla || 62 ||
[Analyze grammar]