Chapter 29

bhusuṇḍopākhyānaṃ samāptam |
ekonatriṃśaḥ sargaḥ |
vasiṣṭhaḥ |
evaṃ bhusuṇḍavṛttāntaḥ kathitaste mayānagha |
anayā prajñayā tīrṇo bhusuṇḍo mohasaṅkaṭāt || 1 ||
[Analyze grammar]

etāṃ dṛṣṭimavaṣṭabhya svaprāṇābhyāsapūrvikām |
bhusuṇḍavanmahābāho bhava tīrṇabhavārṇavaḥ || 2 ||
[Analyze grammar]

yathā jñānena yogena santatābhyāsajanmanā |
bhusuṇḍo'vāptavānprāpyaṃ tathā sādhaya tatpadam || 3 ||
[Analyze grammar]

asaktabuddhayaḥ santo bhusuṇḍavadavasthitim |
prāpnuvanti pare tattve prāṇāpānāvalokinaḥ || 4 ||
[Analyze grammar]

etā vicitrā bhavatā śrutā vijñānadṛṣṭayaḥ |
idānīṃ dhiyamālambya yathecchasi tathā kuru || 5 ||
[Analyze grammar]

rāmaḥ |
bhagavanbhavatā bhūmibhāsvatā jñānaraśmibhiḥ |
hārdamuddāmadaurātmyaṃ pramṛṣṭamakhilaṃ tamaḥ || 6 ||
[Analyze grammar]

prabuddhāḥ smaḥ prahṛṣṭāḥ smaḥ praviṣṭāḥ smaḥ svamāspadam |
sthitāḥ smo jñātavijñeyā bhavanto hyaparā iva || 7 ||
[Analyze grammar]

aho bhusuṇḍacaritaṃ paraṃ vismayakārakam |
bhagavanbhavatā proktamuttamārthāvabodhadam || 8 ||
[Analyze grammar]

bhusuṇḍacarite brahmannetasminyattvayā vibho |
taccharīragṛhaṃ proktaṃ māṃsacarmāsthinirmitam || 9 ||
[Analyze grammar]

tatkena nāma racitaṃ kuto vā tatsamutthitam |
kathaṃ vā sthitimāyātaṃ ko vā tatrāvatiṣṭhate || 10 ||
[Analyze grammar]

vasiṣṭhaḥ |
paramārthāvabodhāya doṣāpākaraṇāya ca |
śṛṇu rāghava tattvena vakṣyamāṇamidaṃ mayā || 11 ||
[Analyze grammar]

asthisthūṇaṃ navadvāraṃ raktamāṃsāvalepanam |
śarīrasadanaṃ rāma na kenacididaṃ kṛtam || 12 ||
[Analyze grammar]

ābhāsamātramevedamitthamevāvabhāsate |
dvicandravibhramākāraṃ sadasacca vyavasthitam || 13 ||
[Analyze grammar]

dvicandravibhramavidhau dvicandratvaṃ sadeva hi |
vastutaścaika evenduḥ sthitirdehe tathaiva hi || 14 ||
[Analyze grammar]

dehapratyayakāle hi deho'yaṃ sanvyavasthitaḥ |
asanneva vastutaḥ sa proktaḥ sadasadātmakaḥ || 15 ||
[Analyze grammar]

svapnaḥ svapnavidhau satyastvanyadā sa mudhaiva hi |
budbudo budbudavidhau satyo mithyaiva cānyadā || 16 ||
[Analyze grammar]

deho dehāvadhau satyo'pyasatya itarāvadhau |
pratibhāsāvadhau tāpe jalaṃ sadasadanyadā || 17 ||
[Analyze grammar]

pratibhāsāvadhau dehaḥ sannasaṃstvanyadā smṛtaḥ |
ābhāsamātramevedamitthaṃ samprati bhāsate || 18 ||
[Analyze grammar]

ayaṃ nāmāhamityantargṛhītamananaṃ sthitam || 19 ||
[Analyze grammar]

māṃsāsthimayanirmāṇaṃ deho nānyaditi bhramam |
tyaja saṅkalpanirmāṇā dehāḥ santi sahasraśaḥ || 20 ||
[Analyze grammar]

varatalpagato yena svapne dehena diktaṭam |
paribhramasi he rāma sa dehaste kva saṃsthitaḥ || 21 ||
[Analyze grammar]

jāgarāyāṃ manorājye yena svargapurāntaram |
paribhramasi meruṃ vā sa dehaste kva saṃsthitaḥ || 22 ||
[Analyze grammar]

svapneṣvapi ca yaḥ svapnastatra yena mahītaṭān |
paribhramasi he rāma sa dehaste kva saṃsthitaḥ || 23 ||
[Analyze grammar]

gatairdehairmanorājye mahāvibhavabhūmiṣu |
paribhramasi yeneha sa dehaste kva saṃsthitaḥ || 24 ||
[Analyze grammar]

manorājye manorājye vicitrā yā jagatkriyāḥ |
prakaroṣi mahābāho yairdehaiste kva saṃsthitāḥ || 25 ||
[Analyze grammar]

vilāsinyānurāgiṇyā yena saṅkalpakāntayā |
nirvṛtiṃ yāsi dehena sa dehaste kva saṃsthitaḥ || 26 ||
[Analyze grammar]

ete rāma yathā dehā mānasaspandasanmayāḥ |
tathaiva tādṛgārambho deho'yaṃ mānasaḥ smṛtaḥ || 27 ||
[Analyze grammar]

idaṃ dhanamayaṃ deho deśo'yamiti yo bhramaḥ |
tatsarvaṃ cittavīryasya saṅkalpasya vijṛmbhitam || 28 ||
[Analyze grammar]

dīrghaṃ svapnamimaṃ viddhi dīrghaṃ vā cittavibhramam |
dīrghaṃ vāpi manorājyaṃ saṃsāraṃ raghunandana || 29 ||
[Analyze grammar]

prabodhameṣyasi yadā paramātmecchayā svayā |
drakṣyasi tvaṃ tadā samyagidamūrdhvādadho yathā || 30 ||
[Analyze grammar]

svapnasaṅkalpakalane yathānyeva jagatsthitiḥ |
tathaiveyaṃ hi saṅkalpakalanā kācideva ha || 31 ||
[Analyze grammar]

yathā pūrvaṃ mayotpattiḥ proktā kamalajanmanaḥ |
manasaḥ svayamevāntaḥ saṅkalpakalanodbhavā || 32 ||
[Analyze grammar]

vicitraracanopetamanantaśatavibhramam |
saṅkalpakalanāmātraṃ tathedamavabhāsate || 33 ||
[Analyze grammar]

yathā kalita ābhāso manaso'bjajatāgatau |
dehavaccintito dehaḥ sthito'nyastadvadeva hi || 34 ||
[Analyze grammar]

prākpravāhacirābhyasto vāsanāvilayena yaḥ |
tathaiva dṛśyate dehastadākṛtyudayena saḥ || 35 ||
[Analyze grammar]

pauruṣeṇa prayatnena saṅkalpo hyayameva cet |
anyathā bhāvyate rāma bhūyate tadihānyathā || 36 ||
[Analyze grammar]

ayaṃ so'haṃ mamāyaṃ ca saṃsāra iti bhāvite |
satyo'yaṃ bhāsate rāma bhāvanādārḍhyasambhavaḥ || 37 ||
[Analyze grammar]

bhāvitaṃ tīvravegena yadevāśu tadeva ca |
sarvatra dṛśyate rāma kāntevātyantavallabhā || 38 ||
[Analyze grammar]

aharvyāpṛtirabhyastā yathā svapne'pi dṛśyate |
tathā sambhāvanābhyastaḥ saṃsāro'pyavalokyate || 39 ||
[Analyze grammar]

yathā svapnāvadhau kṣipramaharvadavabhāsate |
tathedaṃ sarvakālasthamapi saṃlakṣyate ciram || 40 ||
[Analyze grammar]

vyomanyeva yathā tāpasantapte dṛśyate sarit |
dharāpyavidyamānaiva saṅkalpāddṛśyate tathā || 41 ||
[Analyze grammar]

dṛśyate dṛṣṭivairūpyād yathā vyomani piñchikā |
tathaiveyaṃ jagallakṣmīrdurjñānādeva bhāsate || 42 ||
[Analyze grammar]

bhīrurapyeti na yathā svasaṅkalpeṣu sambhramam |
svasaṅkalpe'pi saṃsāre na tathaiti bhayaṃ sudhīḥ || 43 ||
[Analyze grammar]

sva eva hi svabhāvo'yamitthaṃ samprati bhāsate |
saṃsārasaraṇisthityā kasmātko'tra vibhāti kim || 44 ||
[Analyze grammar]

sa eva kiñcitsaṃśodhyaśśuddhyā vimalatāṃ gate |
tasminna dṛśyate rāma moho'yaṃ jāgataścalaḥ || 45 ||
[Analyze grammar]

samyagālokamātreṇa svabhāvaśśuddhimṛcchati |
na gṛhṇāti malaṃ bhūyastāmratāmiva kāñcanam || 46 ||
[Analyze grammar]

ābhāsamātramevaitanna sannāsajjagattrayam |
ityanyakalanātyāgaṃ samyagālokanaṃ viduḥ || 47 ||
[Analyze grammar]

maraṇaṃ jīvitaṃ svargo jñānamajñānameva ca |
cidābhāsādṛte nāstītyekatā samyagīkṣaṇam || 48 ||
[Analyze grammar]

tvamahantādisaṃsāramidametā diśo daśa |
sarvaṃ svābhāsameveti samyagālokanaṃ viduḥ || 49 ||
[Analyze grammar]

sadasanmayasaṃsāre yathābhūtārthadarśanāt |
nāstameti na codeti samyagālokanānmanaḥ || 50 ||
[Analyze grammar]

nirṇīya sarvabhāvānāmasattvaṃ sattvameva vā |
niṣkāmaṃ śāntimabhyeti samyagālokanānmanaḥ || 51 ||
[Analyze grammar]

na nindati na ca stauti na hṛṣyati na śocati |
śītalaṃ satyatāmeti samyagālokanānmanaḥ || 52 ||
[Analyze grammar]

avaśyameva martavyaṃ sarvaireva hi bandhubhiḥ |
iti bandhuviyogeṣu kiṃ vṛthā paritapyase || 53 ||
[Analyze grammar]

avaśyameva ca mayā martavyamiti niścaye |
ityātmamaraṇaprāptau kiṃ mudhā paritapyase || 54 ||
[Analyze grammar]

avaśyameva jātena kiñcitsvavibhavādikam |
prāptavyaṃ puruṣeṇeti harṣasyāvasaro hi kaḥ || 55 ||
[Analyze grammar]

sarvasyaiva hi saṃsāre narasya vyavahāriṇaḥ |
anarthāya bhavatyāpacchokasyāvasaro hi kaḥ || 56 ||
[Analyze grammar]

bruḍatyudeti sphurati budbudaugha ivārṇave |
idaṃ hi janatājālaṃ kimatra paridevanā || 57 ||
[Analyze grammar]

satsadeva sadaivaitadasadevāsadeva hi |
kriyāvaicitryamātre tu kimasminparidevanā || 58 ||
[Analyze grammar]

nāhamasmi na cābhūvaṃ na bhaviṣyāmi cādhunā |
deho'haṃ cittadoṣo'yaṃ kimanyatparidevyate || 59 ||
[Analyze grammar]

dehāccedanya evāhaṃ cidābhāsastadaṅga he |
kau tau me sadasadbhāvau yanniṣṭhaṃ paritapyate || 60 ||
[Analyze grammar]

iti niścayavattvantaḥ samyagjñānānmano muneḥ |
nāstameti na codeti na cāntaḥ paritapyate || 61 ||
[Analyze grammar]

paratāmeva tāṃ so'ntaranuttarapadasthitām |
ādatte tittirirmṛdvīṃ tṛṇakoṭimivāmalām || 62 ||
[Analyze grammar]

etadarthamasatye'sminnāsthā kāryā manāgapi |
surajjveva balīvardo badhyate janturāsthayā || 63 ||
[Analyze grammar]

asatsvapnaṃ dṛḍhamidamiti nirṇīya buddhitaḥ |
āsthārahitayā dṛṣṭyā vihartavyamihānagha || 64 ||
[Analyze grammar]

kartavyameva kartavyaṃ yasya na pratibhāsate |
so'ntaśśītalatāmeti dinānte bhuvanaṃ yathā || 65 ||
[Analyze grammar]

pravibhāgaṃ parityajya padārthapaṭalavraje |
ābhāsamātrasāmānyamidamālokayānagha || 66 ||
[Analyze grammar]

ābhāsamātrakaṃ rāma cintāmarśakalaṅkitam |
tatastadapi santyajya nirābhāso bhavottamaḥ || 67 ||
[Analyze grammar]

cidākāśamayo nityaḥ sarvagaḥ sarvavarjitaḥ |
ābhāsasya parityāge bhavasyekāntanirmalaḥ || 68 ||
[Analyze grammar]

nāhamasmi na me bhogāḥ satyā ityabhibhāvite |
nedamāḍambaraṃ vyarthamanarthāyāvabhāsate || 69 ||
[Analyze grammar]

ahameva hi vā sarvaṃ cidityevābhibhāvite |
nedamāḍambaraṃ vyarthamanarthāyāvabhāsate || 70 ||
[Analyze grammar]

darśanadvayamapyetatsatyamatyantasiddhidam |
yadekametayorvetsi ramyaṃ tad rāma saṃśraya || 71 ||
[Analyze grammar]

dvābhyāmevātha vai tābhyāṃ darśanābhyāmihānagha |
viharan kuru kalyāṇaṃ rāgadveṣaparikṣayāt || 72 ||
[Analyze grammar]

yatkiñciducitaṃ loke yannabhasyatha yatpare |
tatsarvaṃ prāpyate rāma rāgadveṣaparikṣayāt || 73 ||
[Analyze grammar]

rāgāhihitayā buddhyā yādṛg rāma viceṣṭyate |
tattadeva prayātyāśu mūḍhānāṃ viparītatām || 74 ||
[Analyze grammar]

dveṣadoṣoparuddhāsu na guṇāścittavṛttiṣu |
padaṃ kurvanti dagdhāsu sthalīṣu hariṇā iva || 75 ||
[Analyze grammar]

rāgo dveṣaśca sarpau dvau na nilīnau manobile |
yasya kalpatarostasmātkiṃ nāmāṅga na labhyate || 76 ||
[Analyze grammar]

ye hi prājñāḥ suniyatā vidagdhāśśāstraśālinaḥ |
rāgadveṣamayāste cejjambukāstaddhigastu tān || 77 ||
[Analyze grammar]

maddhanaṃ bhuktamanyena dhanaṃ bhuktaṃ mayānyataḥ |
itthaṃ saṃvyavahārehā ko rāgadveṣayoḥ kramaḥ || 78 ||
[Analyze grammar]

dhanāni bandhavo mitraṃ punarāyānti yānti ca |
kimeteṣu naraḥ prājño rajyate vā virajyate || 79 ||
[Analyze grammar]

bhāvābhāvabhavābhogā māyeyaṃ pārameśvarī |
saṃsāraracanāsarpī prasaktaṃ pradahatyalam || 80 ||
[Analyze grammar]

na dhanaṃ na jano nāsmi satyaṃ rāghava vastutaḥ |
mithyaiva mithyāvalitamitīdaṃ parilakṣyate || 81 ||
[Analyze grammar]

ādyantayoḥ sarvamasanmadhye'pyasthiramādhimat |
kva badhnātu dhṛtiṃ dhīro hyanyakalpitakhadrume || 82 ||
[Analyze grammar]

ekena kalpitā khe strī bhuṅkte tāṃ dūrago'paraḥ |
itīyamaṅga saṃsāraracanā netaraḥ kramaḥ || 83 ||
[Analyze grammar]

ihājavañjavībhāvamimamākulamātatam |
gandharvapuranirmāṇavināśena samaṃ viduḥ || 84 ||
[Analyze grammar]

svapnasaṅkalpapuravadasadevedamutthitam |
kāladairghyadhiyā jātapratyayaṃ jātamadya vaḥ || 85 ||
[Analyze grammar]

nāsi nāyaṃ paṭo nārtho vidyate bhittibhāgavān |
saṅkalpakalanaiveyamabhyāsātpuṣṭatāṃ gatā || 86 ||
[Analyze grammar]

suṣuptasaṃsthito nityaṃ vitate śāśvate pade |
na kaścideva parame bhavānātmani saṃsthitaḥ || 87 ||
[Analyze grammar]

sarvaṃ tatrastha evedaṃ suṣuptapadavicyutaḥ |
paripaśyasi saṃsāradīrghasvapnamurubhramam || 88 ||
[Analyze grammar]

ajñānanidrāsughanasvasvabhāvānmanākcyutaḥ |
saṃsārasvapnasambhrānto bhavānayamiha sthitaḥ || 89 ||
[Analyze grammar]

tadetāṃ vitatāṃ nidrāṃ ghanājñānamayātmikām |
tyajālakṣmīmiva prāptanidhānaḥ puruṣottama || 90 ||
[Analyze grammar]

prabodhamehi paśyācchamātmānamuditaṃ sadā |
nirvikalpacidābhāsaṃ prātaḥ padmo raviṃ yathā || 91 ||
[Analyze grammar]

prabudhyasva prabudhyasva punaḥ punarayaṃ mayā |
prabodhyase mahābāho paśyātmārkamanāmayam || 92 ||
[Analyze grammar]

mayaitenātiśītena vṛṣṭena jñānavāriṇā |
suśabdaśālinā rāma ghanenevāsi bodhitaḥ || 93 ||
[Analyze grammar]

bodhamāsādaya paraṃ prabuddho'syeva rāghava |
satyamālokayālīkaṃ tyaktvemaṃ jāgataṃ bhramam || 94 ||
[Analyze grammar]

na te janma na te duḥkhaṃ na doṣaste na te bhramaḥ |
sarvasaṅkalpamuktastvaṃ svātmanātmani saṃsthitaḥ || 95 ||
[Analyze grammar]

parigalitavikalpadoṣajālaḥ samasitasārasuṣuptasomyavṛttiḥ |
ativitatamidaṃ ca somyarūpaṃ samupaśamātmani tiṣṭha he mahātman || 96 ||
[Analyze grammar]