Chapter 30

paramārthayogopadeśo nāma sargaḥ |
triṃśaḥ sargaḥ |
vālmīkiḥ |
ityākarṇayati svacchasamacetasi rāghave |
viśrānte svātmani svairaṃ paramānandamāgate || 1 ||
[Analyze grammar]

tatrastheṣu ca sarveṣu teṣūpaśamaśāliṣu |
aparikṣubdhacitteṣu sthiteṣvabhyuditātmasu || 2 ||
[Analyze grammar]

saṃśāntasakalaspandaśabdasaṃvyavahāriṇi |
sabhābhoge sthite somye rātrāviva mahītale || 3 ||
[Analyze grammar]

pramūkamugdhaghaṇṭāsu niṣaṇṇāsu nabhastale |
śṛṇvantīṣviva śuddhāsu patākāsu vaco muneḥ || 4 ||
[Analyze grammar]

śāntasañcārasaṅkrāntaniścalāsyeṣu pakṣiṣu |
svapatsvantaḥpurāṇāṃ ca pañjareṣvālayeṣu ca || 5 ||
[Analyze grammar]

vicārayatsu tattvārthaṃ buddhyā prāptavikāsayā |
sutattvajñeṣu sabhyeṣu sahajānandaśāliṣu || 6 ||
[Analyze grammar]

paropaśamaśālinyā tayā sadvākyamālayā |
vinayāvanatistheṣu krīḍāmarkaṭakeṣvapi || 7 ||
[Analyze grammar]

rāghavasyātmaviśrāntisthityarthaṃ vacanaughataḥ |
virarāma munirvāri sasetvātmarayādiva || 8 ||
[Analyze grammar]

atha yāte muhūrtārdhe rāghave pratibodhite |
punarāha tamevārthaṃ vasiṣṭho vadatāṃ varaḥ || 9 ||
[Analyze grammar]

vasiṣṭhaḥ |
rāma samyakprabuddho'si svātmānamasi labdhavān |
etamevāvalambyāntastiṣṭha meha madaṃ kṛthāḥ || 10 ||
[Analyze grammar]

idaṃ saṃsāracakraṃ hi nābhau saṅkalpamātrake |
saṃrodhitāyāṃ vahanād raghunandana rudhyate || 11 ||
[Analyze grammar]

bodhitāyāṃ manonābhyāmidaṃ saṃsāracakrakam |
prayatnād rodhitamapi pravahatyeva vegataḥ || 12 ||
[Analyze grammar]

paraṃ pauruṣamāśritya balaṃ prajñāṃ ca yuktitaḥ |
nābhiṃ saṃsāracakrasya cittameva nirodhayet || 13 ||
[Analyze grammar]

prajñāsaujanyayuktena śāstrasaṃvalitena ca |
pauruṣeṇa na yatprāptaṃ na tatkvacana labhyate || 14 ||
[Analyze grammar]

daivaikaparatāṃ tyaktvā bālabodhopakalpitām |
nijaṃ prayatnamāśritya cittamādau nirodhayet || 15 ||
[Analyze grammar]

ā viriñcātpravṛttena bhrameṇājñānarūpiṇā |
asadeva sadābhāsamidamālakṣyate'nagha || 16 ||
[Analyze grammar]

ajñānabhramavistāramithyaikākṛtayo'nagha |
ime dehā bhramantīha sarva evāsadutthitāḥ || 17 ||
[Analyze grammar]

saṅkalpapuruṣasyeva dehasyārthe kadācana |
sukhaduḥkhavikāritvaṃ na kāryaṃ rāma dhīmatā || 18 ||
[Analyze grammar]

duḥkhamlānamukhakledī prasannātkledavarjitāt |
api citranarāddehanarastucchataraḥ smṛtaḥ || 19 ||
[Analyze grammar]

ādhivyādhiparimlāne svayaṃ kledini nāśini |
na tathā sthiratā dehe citrapuṃsi yathā kila || 20 ||
[Analyze grammar]

vināśito hi citrastho deho naśyati nānyathā |
avaśyanāśo nāśātmā svayaṃ deho vinaśyati || 21 ||
[Analyze grammar]

pālitaḥ susthirāṃ śobhāmādatte citramānavaḥ |
dehastu pālito'pyuccairnaśyatyeva na vardhate || 22 ||
[Analyze grammar]

tena śreṣṭhaścitradeho nāyaṃ saṅkalpadehakaḥ |
ye guṇāścitradehe hi na te saṅkalpadehake || 23 ||
[Analyze grammar]

citradehādapi jaḍād yo'yaṃ tucchataraḥ kila |
tasminmāṃsamaye dehe kevāsthā bhavato'nagha || 24 ||
[Analyze grammar]

dīrghasaṅkalpadeho'yamasmin kvāsthā mahāmate |
svalpasaṅkalpajāddehādapi tucchataro hyayam || 25 ||
[Analyze grammar]

svalpasaṅkalpajo dīrghaiḥ sukhaduḥkhairna gṛhyate |
dīrghasaṅkalpajaścāyaṃ dīrghaduḥkhena duḥkhitaḥ || 26 ||
[Analyze grammar]

deho hi saṅkalpamayo nāyamasti na nāsti ca |
kiṃ vyarthametadarthaṃ hi mūḍho'yaṃ kleśabhāgjanaḥ || 27 ||
[Analyze grammar]

yathā citramaye puṃsi kṣate kṣīṇe na vaḥ kṣatiḥ |
yathā saṅkalpapuruṣe kṣate kṣīṇe na vaḥ kṣatiḥ || 28 ||
[Analyze grammar]

yathā manorājyamaye kṣate kṣīṇe na vaḥ kṣatiḥ |
yathā dvitīye śaśini kṣate kṣīṇe na vaḥ kṣatiḥ || 29 ||
[Analyze grammar]

yathā svapnasamārambhe kṣate kṣīṇe na vaḥ kṣatiḥ |
yathā ghanātapajale kṣate kṣīṇe na vaḥ kṣatiḥ || 30 ||
[Analyze grammar]

saṅkalpamātrakalite prakṛtyaiva vināśini |
tathā śarīrayantre'smin kṣate kṣīṇe na vaḥ kṣatiḥ || 31 ||
[Analyze grammar]

dīrghasvapnamaye hyasmiṃścirasaṅkalpakalpite |
bhūṣite dūṣite dehe na hi kiñciccitaḥ kṣatam || 32 ||
[Analyze grammar]

na cidastamupāyāti nātmā calati rāghava |
na brahma vikṛtiṃ yāti kiṃ vo dehakṣaye kṣatam || 33 ||
[Analyze grammar]

bhramaccakroparistho hi tyaktacakro'pi cakravat |
yathā paśyati dikcakraṃ bhramadatyantamohitaḥ || 34 ||
[Analyze grammar]

akasmādeva rūḍhena mithyājñānena valgatā |
abhyastena tathaivedaṃ dṛśyate dehacakrakam || 35 ||
[Analyze grammar]

bhramitaṃ ca bhramadrūpaṃ patadrūpaṃ ca pātitam |
hataṃ ca hanyamānaṃ ca vapurdurvāsanāvaśāt || 36 ||
[Analyze grammar]

ajñānajaṃ bhramaṃ tyaktvā satyāṃ dṛṣṭimavekṣya ca |
dhīratāmalamālambya ghanaṃ bhramamidaṃ tyajet || 37 ||
[Analyze grammar]

saṅkalpena kṛto deho mithyājñānena sanna san |
asatyena kṛtaṃ yatsyānna tatsatyaṃ kadācana || 38 ||
[Analyze grammar]

asadabhyutthito deho rajjvāmiva bhujaṅgamaḥ |
asatyāmeva cemāṃ ca karoti ca jagatkriyām || 39 ||
[Analyze grammar]

jaḍena rāma kriyate yattanna kṛtamucyate |
kurvannapi tato deho na kartā kvacideva hi || 40 ||
[Analyze grammar]

nirīho hi jaḍo deho nātmano'styabhivāñchitam |
kartā na kaścidevāto draṣṭā kevalamasyajaḥ || 41 ||
[Analyze grammar]

yathā dīpo nivātasthaḥ svātmanyeva hi tiṣṭhati |
sākṣivatsarvabhāveṣu tathā tiṣṭha jagatsthitau || 42 ||
[Analyze grammar]

yathā divasakāryāṇi bhāskaraḥ svastha eva san |
karotyevamimāṃ rāma kuru pārthivasaṃsthitim || 43 ||
[Analyze grammar]

asmin hyasanmaye dehagehe śūnye samutthite |
sattāmupagate mithyā bālakalpitayakṣavat || 44 ||
[Analyze grammar]

kuto'pyāgatya nissāraḥ sarvasajjanavarjitaḥ |
ahaṅkārakuvetālaḥ praviṣṭaścittanāmabhṛt || 45 ||
[Analyze grammar]

bhṛtyatāṃ māsya gaccha tvamahaṅkārasya durmateḥ |
asya bhṛtyatayā rāma nirayaḥ prāpyate phalam || 46 ||
[Analyze grammar]

svasaṅkalpavilāsena dehagehe nirākṛtiḥ |
unmattacittavetālaḥ parivalgati līlayā || 47 ||
[Analyze grammar]

śūnyadehagṛhaṃ prāpya cittayakṣeṇa tatkṛtam |
bhītā yena mahānto'pi samādhiniratāḥ sthitāḥ || 48 ||
[Analyze grammar]

cittavetālamudvāsya svaśarīraikamandirāt |
saṃsāraśūnyanagare na bibheṣi kadācana || 49 ||
[Analyze grammar]

cittabhūtābhibhūte'sminye śarīragṛhe ratāḥ |
citramadyāpi te kasmādghaṭṭitā nāśmavatsthitāḥ || 50 ||
[Analyze grammar]

graste cittapiśācena dehaveśmani yā dhṛtiḥ |
piśācasyaiva sā buddhirnāpiśācasya rāghava || 51 ||
[Analyze grammar]

ahaṅkārabṛhadyakṣe gṛhe dagdhaśarīrake |
viharānāsthayā sādho na tavaitatkila sthiram || 52 ||
[Analyze grammar]

ahaṅkārānucaratāṃ tyaktvā vitatayā dhiyā |
ahaṅkāramṛtiṃ prāpya svātmaivāśvavalambyatām || 53 ||
[Analyze grammar]

ahaṅkārapiśācena grastā ye nirayaiṣiṇaḥ |
teṣāṃ mohāmayāndhānāṃ na mitrāṇi na bandhavaḥ || 54 ||
[Analyze grammar]

ahaṅkāropahatayā buddhyā yā kriyate kriyā |
viṣavallyā iva phalaṃ tasyāḥ syānmaraṇātmakam || 55 ||
[Analyze grammar]

vivekadhairyahīnena svāhaṅkāramahāśavam |
mūrkheṇālambitaṃ yena naṣṭamevāśu viddhi tam || 56 ||
[Analyze grammar]

ahaṅkārapiśācena varākā ye vaśīkṛtāḥ |
ta ete narakāgnīnāṃ rāghavendhanatāṃ gatāḥ || 57 ||
[Analyze grammar]

ahaṅkārorago yasya parisphurati koṭare |
sa dehapādapo dhīrairacireṇa nipātyate || 58 ||
[Analyze grammar]

ahaṅkārapiśāco'smindehe tiṣṭhatu yātu vā |
tvamenamālokaya mā manasā mahatāṃ vara || 59 ||
[Analyze grammar]

avadhūto hyavajñātaścetasaiva tiraskṛtaḥ |
ahaṅkārapiśācaste neha kiñcitkariṣyati || 60 ||
[Analyze grammar]

dehālaye sphuratyasmin rāma cittapiśācake |
asyānantavilāsasya kimivāgatamātmanaḥ || 61 ||
[Analyze grammar]

cittayakṣābhibhūtānāṃ yāḥ puṃsāṃ vitatāpadaḥ |
śakyante parisaṅkhyātuṃ na tā varṣaśatairapi || 62 ||
[Analyze grammar]

hato mṛto'smi dagdho'smītyetā durbhagavṛttayaḥ |
ahaṅkārapiśācasya śaktayo'nyasya nānagha || 63 ||
[Analyze grammar]

sarvago'pi yathākāśaḥ sambaddho neha kenacit |
sarvago'pi tathaivātmā nāhaṅkāreṇa saṅgataḥ || 64 ||
[Analyze grammar]

yatkaroti yadādatte dehayantramidaṃ calam |
vātarajjuyutaṃ rāma tadahaṅkāraceṣṭitam || 65 ||
[Analyze grammar]

vṛkṣonnatau yathā heturakartrapi kilāmbaram |
ātmasaṃsthastathehātmā cittaceṣṭāsu kāraṇam || 66 ||
[Analyze grammar]

ātmasannidhimātreṇa kuḍyarūpamivāmalam |
dīpasannidhimātreṇa sphuratyāttavapurmanaḥ || 67 ||
[Analyze grammar]

ativiśliṣṭayo rāma nityamevātmacittayoḥ |
dyāvāpṛthivyoriva kaḥ sambandhaḥ prakaṭāndhayoḥ || 68 ||
[Analyze grammar]

calanaspandanehābhirātmaśaktibhirāvṛtam |
cittamātmeti maurkhyeṇa dṛśyate raghunandana || 69 ||
[Analyze grammar]

ātmā prakāśarūpo hi nityaḥ sarvagato vibhuḥ |
cittaṃ śaṭhamahaṅkāraṃ viddhi hārdaṃ bṛhattamaḥ || 70 ||
[Analyze grammar]

ātmāsi raghusarvasva jaḍā nāsi manodṛṣat |
dūrīkuru manomohaṃ kimetenāsi saṅgataḥ || 71 ||
[Analyze grammar]

piśāco hi manonāmā śūnye dehagṛhe sthitaḥ |
bhāyayatyeṣa duṣṭātmā mainamuttama saṃspṛśa || 72 ||
[Analyze grammar]

bhayapradamakalyāṇaṃ dhairyasarvasvahāriṇam |
manaḥpiśācamutsārya yo'si sa tvaṃ sthiro bhava || 73 ||
[Analyze grammar]

cittayakṣadṛḍhākrāntaṃ na śāstrāṇi na bandhavaḥ |
śaknuvanti paritrātuṃ guravo na ca mānavam || 74 ||
[Analyze grammar]

saṃśāntacittavetālaṃ guruśāstrārthabandhavaḥ |
śaknuvanti samuddhartuṃ svalpapaṅkānmṛgaṃ yathā || 75 ||
[Analyze grammar]

asmiñjagacchūnyapure sarvameva pradūṣitam |
dehagehaṃ pramattena cittayakṣeṇa valgatā || 76 ||
[Analyze grammar]

cittavetālavalitasamastagṛhaṣaṇḍakā |
iyaṃ jagadaraṇyānī śūnyā kasya na bhītaye || 77 ||
[Analyze grammar]

jagannagaryāmasyāṃ tu śāntacittapiśācakam |
dehagehaṃ katipayaiḥ sevyate sadbhireva ca || 78 ||
[Analyze grammar]

iha saṃśrīyate yā yā diksaiva raghunandana |
pramattamohavetālaiḥ pūrṇā dehaśmaśānakaiḥ || 79 ||
[Analyze grammar]

asyāṃ jagadaraṇyānyāṃ muhūrtaṃ mugdhabālavat |
svayamālambya dhairyāṃśamātmanātmānamuddhara || 80 ||
[Analyze grammar]

jagajjaradaraṇye'smiṃścaradbhūtamṛgavraje |
dhṛtiṃ tṛṇarasai rāma mā gaccha mṛgapotavat || 81 ||
[Analyze grammar]

asminmahītalāraṇye carannṛmṛgapotake |
tvamajñānagajaṃ bhaṅktvā saiṃhīṃ vṛttimupāśraya || 82 ||
[Analyze grammar]

anye naramṛgā mugdhā jambudvīpe svajaṅgale |
viharanti yathā rāma tathā mā viharānagha || 83 ||
[Analyze grammar]

atyalpakālaṃ śiśire kardamālepadāyini |
na maṅktavyaṃ vadhūrūpe mahiṣeṇeva palvale || 84 ||
[Analyze grammar]

bhogābhogā bahiṣkāryā āryasyānusaretpadam |
pravicārya mahāryaiḥ svamekamātmānamāśrayet || 85 ||
[Analyze grammar]

apavitrasya tucchasya durbhagasya durākṛteḥ |
dehasyārthe na maṅktavyaṃ cintācuṇṭīṣu cāruṇā || 86 ||
[Analyze grammar]

anyena racito deho yakṣeṇānyena saṃśritaḥ |
duḥkhamanyasya bhoktānyaścitreyaṃ maurkhyacakrikā || 87 ||
[Analyze grammar]

yathaikarūpā ghanatā dṛṣado'pyātmanastathā |
sattāmātraikasāmānyāditarasyātyasambhavāt || 88 ||
[Analyze grammar]

yathopalasya ghanatā manastā hi tathātmanaḥ |
sattāmātrādabhinnā svādabhāvādanyasaṃvidaḥ || 89 ||
[Analyze grammar]

yathopalasya ghanatā tathāsya paramātmanaḥ |
rūpaikarūpā saṃvittiḥ sattāsāmānyarūpataḥ || 90 ||
[Analyze grammar]

pṛthaksambhavatīhāṅga na jāḍyaṃ na ca cetanam |
mithyāsaṅkalparacite ete hi śiśuyakṣavat || 91 ||
[Analyze grammar]

yathekṣurasamātrasya tvekasyaiva pṛthaṅmayī |
ayaṃ guḍa idaṃ khaṇḍamiti māyā mudhoditā || 92 ||
[Analyze grammar]

paramātmana ekasya sattāsāmānyarūpataḥ |
mudhaivābhyuditaiveyaṃ jāḍyājāḍyamatistathā || 93 ||
[Analyze grammar]

kṣīyate prekṣitaivaiṣā prekṣāmātraikanāśinī |
śuktirupyamatiprakhyā na satī nāsatī tataḥ || 94 ||
[Analyze grammar]

nāsato vidyate bhāvo yo nāstyeveha sanna saḥ || 95 ||
[Analyze grammar]

svarūpamātraniṣṭhatvāddvaitaikyābhāvayogataḥ |
abhāvādanyasaṃvitteḥ samatvamupalātmanoḥ || 96 ||
[Analyze grammar]

ananyo'nanta ekātmā svasattānubhavī yathā |
tathopalaḥ svatāniṣṭho na jaḍo na ca cetanaḥ || 97 ||
[Analyze grammar]

anyāsambhavato nityadvaitaikyābhāvayogataḥ |
cetyasyāsambhavādātmā na jaḍo na ca cetanaḥ || 98 ||
[Analyze grammar]

jaḍājaḍadṛśau vandhyāputravadvyomavṛkṣavat |
samāyāte na cāyāte prekṣite na ca vīkṣite || 99 ||
[Analyze grammar]

jaḍacetanaśabdārthāvasantau rajjusarpavat |
bhavatastau kathaṃ satyamaprekṣāmātrakādṛte || 100 ||
[Analyze grammar]

yacca cetanamātmeti jaḍaścopala ityapi |
uktaṃ tadīdṛgvāgyogyabodhyabodhanahetukam || 101 ||
[Analyze grammar]

bodhyaḥ paratare bodhe yayā yuktyā prabodhyate |
sopadeśyā na gṛhṇāti mūḍhastatsahasā padam || 102 ||
[Analyze grammar]

cittaṃ pṛthakpṛthagimāni hatendriyāṇi kartā na dṛśyata idaṃ ca gṛhaṃ mudhaiva |
ko'pyanya eva parivalgati nissvabhāva eṣo'hamityalamaho mahadindrajālam || 103 ||
[Analyze grammar]

lolāsu saṃsṛtiṣu bhūtaparamparāṇāṃ krīḍāsu cānyapuruṣasya cidekavṛtteḥ |
tattvaṃ vicārya ramate hi mahānubhāvo mantrī yatholbaṇaviṣāsu bhujaṅgamīṣu || 104 ||
[Analyze grammar]

na tvaṃ śiro na nayane na ca raktamāṃse nāsthīni naiva ca mano na ca bhūtajālam |
mā mohamehi na śarīramasi prasannā cittvaṃ prapannasakalāmalasarvageti || 105 ||
[Analyze grammar]