Chapter 11

avidyācikitsā nāma sargaḥ |
ekādaśaḥ sargaḥ |
vasiṣṭhaḥ |
punaḥ punaridaṃ rāma prabodhārthaṃ mayocyate |
abhyāsena vinā sādho nābhyudetyātmabhāvanam || 1 ||
[Analyze grammar]

ajñānametadbalavadavidyetaranāmakam |
janmāntaraśataprauḍhaṃ nūnaṃ sthitimupāgatam || 2 ||
[Analyze grammar]

sabāhyābhyantaraṃ sarvairindriyairanubhūyate |
bhāvābhāveṣu dehasya tenātighanatāṃ gatam || 3 ||
[Analyze grammar]

ātmajñānaṃ tu sarveṣāmindriyāṇāmagocaram |
sattāṃ kevalamāyāti manaṣṣaṣṭhendriyakṣaye || 4 ||
[Analyze grammar]

prollaṅghyendriyajāśśaktīryatsthitaṃ tatkathaṃ kila |
yāti pratyakṣatāṃ jantoḥ pratyakṣātītavṛttimat || 5 ||
[Analyze grammar]

nityamajñānamevātaḥ svabhyastaṃ sarvadehinām |
na kadācana vijñānamiha vāmutra vānagha || 6 ||
[Analyze grammar]

tasmādavidyābhāgena pradhānenetaraṃ dahet |
tāvad yāvanmithogharṣātsvayaṃ śāmyecchivaṃ bhavet || 7 ||
[Analyze grammar]

na hyabhyāsaṃ vinā kiñcitphaladaṃ bhavati kvacit |
yad yadāsādyate yatra tadabhyāsataroḥ phalam || 8 ||
[Analyze grammar]

avidyāṃ sucirābhyastāṃ prarūḍhāmapi yatnataḥ |
ātmajñānadṛḍhābhyāsādanudvegācchamaṃ nayet || 9 ||
[Analyze grammar]

tvamavidyālatāmetāṃ prarūḍhāṃ hṛdayadrume |
jñānābhyāsavilāsāsipātena cchinddhi siddhaye || 10 ||
[Analyze grammar]

yathā viharati jñātajñeyo janakabhūpatiḥ |
ātmajñānaghanābhyāsastathā vihara rāghava || 11 ||
[Analyze grammar]

niścayo yo maruttasya kāryākāryavicāraṇe |
jāgratastiṣṭhato vāpi tajjñānaṃ tena satyatā || 12 ||
[Analyze grammar]

niścayena hariryena vividhācārakāraṇāt |
yoniṣvavataratyurvyāṃ tattajjñatvamudāhṛtam || 13 ||
[Analyze grammar]

niścayo yastrinetrasya kāntayā saha tiṣṭhataḥ |
brahmaṇo vāpyarāgasya sa te bhavatu rāghava || 14 ||
[Analyze grammar]

yo niścayaḥ suragurorvākpaterbhārgavasya ca |
divākarasya śaśinaḥ pavanasyānalasya ca || 15 ||
[Analyze grammar]

nāradasya pulastyasya mama vāṅgirasastathā |
pracetaso bhṛgoścaiva kratoratreśśukasya ca || 16 ||
[Analyze grammar]

anyeṣāṃ devaviprendrarājarṣīṇāṃ ca rāghava |
yo niścayo'ntarmuktānāṃ jīvatāṃ te bhavatvasau || 17 ||
[Analyze grammar]

rāmaḥ |
yenaite bhagavanvīrā niścayena mahādhiyaḥ |
viśokāḥ saṃsthitāstaṃ me brahmanprabrūhi tattvataḥ || 18 ||
[Analyze grammar]

vasiṣṭhaḥ |
rājaputra mahābāho viditākhilavedya he |
sphuṭaṃ śṛṇu yathāpṛṣṭamayameteṣu niścayaḥ || 19 ||
[Analyze grammar]

yadidaṃ kiñcidābhogi jagajjālaṃ pradṛśyate |
tatsarvamamalaṃ brahma bṛṃhayetthaṃ vyavasthitam || 20 ||
[Analyze grammar]

brahma digbrahma bhuvanaṃ brahma bhūtaparamparā |
brahmāhaṃ brahma macchatrurbrahma manmitrabāndhavāḥ || 21 ||
[Analyze grammar]

brahma khānilatejāṃsi brahma bhūmirjalādi vā |
brahma kālatrayaṃ tacca brahmaṇyeva vyavasthitam || 22 ||
[Analyze grammar]

taraṅgamālayāmbhodhiryathātmani vivardhate |
tathā padārthalakṣmyetthamidaṃ brahma vivardhate || 23 ||
[Analyze grammar]

gṛhyate brahmaṇā brahma bhujyate brahma brahmaṇā |
brahma brahmaṇi bṛṃhābhirbrahmaśaktyaiva bṛṃhati || 24 ||
[Analyze grammar]

brahma macchatrurūpaṃ cedbrahma me priyakṛd yadi |
tadbrahma brahmaṇi śliṣṭaṃ kimanyatkasya kiṃ kṛtaṃ || 25 ||
[Analyze grammar]

rāgādīnāmavastūnāṃ kalpitānāṃ khavṛkṣavat |
asaṅkalpananaṣṭānāṃ kaḥ prasaṅgo'tra vardhane || 26 ||
[Analyze grammar]

brahmaṇyeva hi sarvasmiṃścalanaspandanādikam |
sphurati brahma sakalaṃ sukhitāduḥkhite kutaḥ || 27 ||
[Analyze grammar]

brahma brahmaṇi saṃvettṛ brahma brahmaṇi saṃsthitam |
sphurati brahmaṇi brahma nāyamastītarātmakaḥ || 28 ||
[Analyze grammar]

ghaṭo brahma paṭo brahma brahmāhamidamātatam |
ato rāgavirāgāṇāṃ mudhaiva kalanaiva kā || 29 ||
[Analyze grammar]

maraṇabrahmaṇi svairaṃ dehabrahmaṇi saṅgate |
duḥkhitā nāma keva syād rajjusarpabhramopamā || 30 ||
[Analyze grammar]

sambhogādau sukhe brahmaṇyāsthite dehabrahmaṇi |
sampannametanma iti mudhā syātkalanā kutaḥ || 31 ||
[Analyze grammar]

vīcyambhasoḥ spandavatorna stastvanmanmatī yathā |
tvattāmatte tathā na sto brahmaṇi spandarūpiṇi || 32 ||
[Analyze grammar]

yathāvarte mṛte toye na kiñcinmriyate kvacit |
mṛte brahmatvamāyāte dehabrahmaṇi vai tathā || 33 ||
[Analyze grammar]

yathā calācale toye tvattāmatte na tiṣṭhataḥ |
tathā jaḍājaḍe rūpe na sthite paramātmani || 34 ||
[Analyze grammar]

kaṭakatvaṃ yathā hemno yathāvarto jalasya ca |
tadatadbhāvarūpeyaṃ tathā prakṛtirātmanaḥ || 35 ||
[Analyze grammar]

idaṃ hi bhūtaṃ jīvātma jaḍarūpamidaṃ bhavet |
ityajñātātmano moho na tu jñātātmanaḥ kvacit || 36 ||
[Analyze grammar]

ajñasya duḥkhaughamayaṃ jñasyānandamayaṃ jagat |
andhaṃ bhuvanamandhasya prakāśaṃ tu sacakṣuṣaḥ || 37 ||
[Analyze grammar]

jagadekātmakaṃ jñasya jaḍasya dvaitaduḥkhadam |
śiśoreva sphuradyakṣā niśā puṃsastu kevalā || 38 ||
[Analyze grammar]

asminbrahmaghane nityamekasmin sarvataḥ sthite |
na kiñcinmriyate rāma na ca kiñcana jīvati || 39 ||
[Analyze grammar]

yathollāsavilāseṣu na naśyati na jāyate |
taraṅgādi mahāmbhodhau bhūtavṛndaṃ tathātmani || 40 ||
[Analyze grammar]

idaṃ nāstīdamastīti bhrāntināmnātmanātmani |
śaktirnirhetukaivāntaḥ sphurati sphaṭikāṃśuvat || 41 ||
[Analyze grammar]

jagacchaktyātmanātmaiva brahma svātmani saṃsthitam |
taraṅgakaṇajālena payasīva payoghanam || 42 ||
[Analyze grammar]

śarīranāśena kathaṃ brahmaṇo mṛtadhīrbhavet |
brahmaṇo vyatiriktaṃ hi na śarīrādi vidyate |
payaso vyatirekeṇa taraṅgādi yathārṇave || 43 ||
[Analyze grammar]

yaḥ kaṇo yā ca kaṇikā yā vīcī yastaraṅgakaḥ |
yaḥ pheno yā ca laharī tad yathā vāri vāriṇi || 44 ||
[Analyze grammar]

yo deho yā ca kalanā yaddṛśyaṃ yau kṣayāvyayau |
yehā yā racanā yo'rthastattathā brahma brahmaṇi || 45 ||
[Analyze grammar]

saṃsthānaracanā citrā brahmaṇaḥ kanakādiva |
nānyarūpā vimūḍhānāṃ mudhaiva dvitvabhāvanam || 46 ||
[Analyze grammar]

mano buddhirahaṅkārastanmātrāṇīndriyāṇi ca |
brahmaiva sarvaṃ nānyātma sukhaduḥkhādi vidyate || 47 ||
[Analyze grammar]

ayaṃ so'hamayaṃ ca tvamityādyarthotthayā girā |
śabdaḥ pratiśraveṇādrāvivātmātmani jṛmbhate || 48 ||
[Analyze grammar]

brahmaivājñātamajñatvamabhyāgatamiva sthitam |
tathā hi dṛśyate svapnacetasātmātmanā mṛtaḥ || 49 ||
[Analyze grammar]

abhāvitaṃ brahmatayā brahmājñānamayaṃ bhavet |
abhāvitaṃ hematayā yathā hemaiva mṛdbhavet || 50 ||
[Analyze grammar]

jñātaṃ brahmatayā brahma brahmaiva bhavati kṣaṇāt |
jñātaṃ hematayā hema hemaiva bhavati kṣaṇāt || 51 ||
[Analyze grammar]

brahmātmā sarvaśaktirhi yad yathā bhāvayatyalam |
nirhetukaṃ svayaṃ śaktyā tattathāśu prapaśyati || 52 ||
[Analyze grammar]

akarmakartṛkaraṇamakāraṇamanāmayam |
svayaṃprabhu mahātmaitadbrahma brahmavido viduḥ || 53 ||
[Analyze grammar]

aparijñātamajñānamajñānamiti kathyate |
parijñātaṃ bhavejjñānamajñānaparināśanam || 54 ||
[Analyze grammar]

bandhurevāparijñāto hyabandhuriti kathyate |
parijñāto bhavedbandhurabandhubhramanāśanāt || 55 ||
[Analyze grammar]

idaṃ tvayuktamityantarjñāte sodeti bhāvanā |
tasmādayuktādvairasyād yayā kila virajyate || 56 ||
[Analyze grammar]

dvaitaṃ tvasatyamityantarjñāte sodeti bhāvanā |
tasmāddvaitātsuvairasyād yayā kila virajyate || 57 ||
[Analyze grammar]

ayaṃ nāhamiti jñāte sphuṭaṃ sodeti bhāvanā |
mithyāhaṅkāratādātmyād yayā nūnaṃ virajyate || 58 ||
[Analyze grammar]

brahmaivāhamiti jñāte satyaṃ sodeti bhāvanā |
tasmin satye nije rūpe yayāntaḥ parilīyate || 59 ||
[Analyze grammar]

sarvameveha brahmeti jñāte brahmaiva śiṣyate |
pīte'mṛte'mṛtamayaḥ ko nāma na bhavetkila || 60 ||
[Analyze grammar]

ceto yadevāharati tadevāśu bhavatyalam |
brahmaikābhyavahāreṇa brahmaiva bhavati kṣaṇāt || 61 ||
[Analyze grammar]

yanmithyā tanmudhaiveti jñāte sodeti bhāvanā |
mithyāpratītirakhilā yayā nūnaṃ pramārjyate || 62 ||
[Analyze grammar]

sarvaṃ sadeveti tate jñāte sodeti bhāvanā |
tasmin satye tate sphāre yayāntaḥ prāpyate sthitiḥ || 63 ||
[Analyze grammar]

yathābhūte yathātattve yathārūpe yathāsthite |
bhāvanā sthitimāyāti nānyatrāṅga kadācana || 64 ||
[Analyze grammar]

samāśatopayāte'pi vismṛte'pi nije jane |
abandhuvatsthite'pyantaḥ snihyatyeva balānmanaḥ || 65 ||
[Analyze grammar]

janmāntaraśatābhyaste sthite'pi hi bhavabhrame |
ātmātmanyeva vimale nirvṛtiṃ vindate parāṃ || 66 ||
[Analyze grammar]

nityamantikasaṃsthe'pi pare bandhāvivāśrite |
bandhubhāvaṃ gate'pyantarmano yāti na nirvṛtim || 67 ||
[Analyze grammar]

atyantagupte'pi viṣe bhojanasthe nanu smṛtiḥ |
nivṛttāpi pravṛttāpi sphuratyeva cakoravat || 68 ||
[Analyze grammar]

janmāntaraśatābhyaste'pyāgate sauhṛdaṃ param |
anātmabhūte dṛśye'sminnāyamātmā prasīdati || 69 ||
[Analyze grammar]

atyantagupte'pyamṛte bhojanasthe nanu smṛtiḥ |
rājate rajanī meghacchanne'pīva niśākare || 70 ||
[Analyze grammar]

nitye satye tathābhūta ātmātmanyeva hṛṣyati |
nānātāciragupte'pi lupte'pi kalanāmalaiḥ || 71 ||
[Analyze grammar]

tāvadātmātmanā yatnātprakṣālyedaṃ malaṃ malaiḥ |
durbhāvanamalaśśāstraiśśodhyo yāvadbhavetsitaḥ || 72 ||
[Analyze grammar]

śāntadurvāsane jñānaṃ puṇyaṃ lagati cetasi |
niṣkalaṅke site vastre yathā kuṅkumarañjanam || 73 ||
[Analyze grammar]

sarvaṃ sakalanirmāṇaṃ kāleṣu triṣvapi sthitam |
nityamekaṃ samaṃ śuddhaṃ brahmaiveti suniścayaḥ || 74 ||
[Analyze grammar]

sarvathā sarvadā sārvaṃ sarvaṃ ghaṭapaṭādimat |
jagajjanitavistāraṃ brahmedamiti vedmyaham || 75 ||
[Analyze grammar]

na me duḥkhaṃ na karmāṇi na mamehā na vāñchitam |
samaḥ svastho viśoko'smi brahmāhamiti satyatā || 76 ||
[Analyze grammar]

ahaṃ raktamahaṃ māṃsamahamasthīnyahaṃ vapuḥ |
cidahaṃ cetanaṃ cāhaṃ brahmāhamiti satyatā || 77 ||
[Analyze grammar]

ahaṃ tṛṇamahaṃ vallī gulmo'haṃ kānanānyaham |
śailasāgarasārtho'haṃ brahmaivetthaṃ kila sthitam || 78 ||
[Analyze grammar]

ādānadānasaṅkocapūrvikā bhūtaśaktayaḥ |
sarvameva cidātmāsmi brahma vyātatarūpadhṛt || 79 ||
[Analyze grammar]

latāgulmāṅkurādīnāmahamudbhāvanaiṣaṇāḥ |
cidātmāntargataṃ śāntaṃ paraṃ brahma rasātmakam || 80 ||
[Analyze grammar]

yasmin sarvaṃ yataḥ sarvaṃ yaḥ sarvaṃ sarvataśca yaḥ |
so'yaṃ cidahamekātmā paraṃ brahmeti niścayaḥ || 81 ||
[Analyze grammar]

cidātmā brahma satsatyamṛtaṃ jña iti nāmabhiḥ |
procyate sarvagaṃ tattvaṃ cinmātraṃ cetyavarjitam || 82 ||
[Analyze grammar]

ābhāsamātramamalaṃ sarvabhūtāvabodhakam |
sarvatrāvasthitaṃ śāntaṃ cidbrahmetyanubhūyate || 83 ||
[Analyze grammar]

manobuddhīndriyavrātasamastakalanācitam |
bhedaṃ tyaktvā svamābhāsaṃ cidbrahmāhamanāmayam || 84 ||
[Analyze grammar]

śabdādīnāmaśeṣāṇāṃ kāraṇānāṃ jagatsthiteḥ |
tattvāvabhāsakaṃ svacchaṃ cidbrahmāsmi na me kṣayaḥ || 85 ||
[Analyze grammar]

anāratagalatsvacchaciddhārāvahanātmakam |
ālokaḥ samanomaunaṃ cidbrahmāsmyamṛtaṃ param || 86 ||
[Analyze grammar]

anāratagaladrūpaṃ nityaṃ cānubhavāmṛtam |
aharniśaṃ kacatkānti cidbrahmāhamalepakaḥ || 87 ||
[Analyze grammar]

suṣuptasadṛśaṃ śāntamālokavimalātmakam |
sambhogāntasamābhāsaṃ cidbrahmāsmi vivāsanaḥ || 88 ||
[Analyze grammar]

khaṇḍādisvādusaṃvittirīṣad yatrānutiṣṭhati |
cittādiṣvapyabuddheṣu taccidbrahmāhamacyutaḥ || 89 ||
[Analyze grammar]

kāntāsaṃsaktacittasya candre samudite sati |
candrapratyayasattātma cidbrahmāhamanāmayam || 90 ||
[Analyze grammar]

bhūmiṣṭhanaradṛṣṭīnāṃ lagnānāṃ khe niśākare |
yā khasthā tantuvacchaktistaccidbrahmāsmi nirmalam || 91 ||
[Analyze grammar]

sukhaduḥkhādikalanāvikalaṃ nirmanastathā |
satyānubhavarūpātma cidbrahmātmāsmi śāśvatam || 92 ||
[Analyze grammar]

asaṃstutādhvagāloke manasyanyatra saṃsthite |
yā pratītiranāgaskā taccidbrahmāsmi sarvagaḥ || 93 ||
[Analyze grammar]

bhūvāryanilabījānāṃ sambandhe'ṅkurakarmasu |
śaktirudgamanī yāntastaccidbrahmāhamātatam || 94 ||
[Analyze grammar]

kharjūranimbabimbānāṃ svayamātmani tiṣṭhatām |
yāsvādasattā līnāntastadbrahma cidahaṃ samam || 95 ||
[Analyze grammar]

khedānandavimuktāntaḥ saṃvinnirmananodayā |
lābhālābhavidhau tulyā cidbrahmāsmi nirāmayam || 96 ||
[Analyze grammar]

yāvadbhūmerdhruvastāvaddṛṣṭisūtraṃ yadātatam |
tanmadhyasadṛśaṃ śāntaṃ nirmalaṃ cidahaṃ tatam || 97 ||
[Analyze grammar]

jāgratyapi suṣupte'pi svapne'pi satatoditam |
turyarūpamanādyantaṃ cidbrahmāhamanāmayaḥ || 98 ||
[Analyze grammar]

puṃsāṃ kṣetraśatotthānāmikṣūṇāṃ svāduvatsthitaḥ |
sarveṣāmekarūpo'ntaścidbrahmāsmi samaḥ sthitaḥ || 99 ||
[Analyze grammar]

sarvagā prakṛtau sūkṣmarūpā bhānoriva prabhā |
ālokakāriṇī kāntā cidbrahmedamahaṃ tatam || 100 ||
[Analyze grammar]

sambhogānandalavavadamṛtāsvādaśaktivat |
svānubhūtyekamāno'ntaścidbrahmāsmi sadavyayaḥ || 101 ||
[Analyze grammar]

protāṅgamapi guptasthaṃ dehe tanturbise yathā |
chedabhede sphuradrūpaṃ cidbrahmāhamanāmayaḥ || 102 ||
[Analyze grammar]

ākrāntabhuvanāpyabhramāleva spandaśālinī |
durlakṣyāṇumayākārā cicchaktirahamātatā || 103 ||
[Analyze grammar]

anubhūtimayāntassthasnehamātropalakṣitā |
kṣīrāntarghṛtasatteva cidahaṃ kṣayavarjitā || 104 ||
[Analyze grammar]

kaṭakāṅgadakeyūraracanā tadatanmayī |
hemnīva saṃsthitā dehe cidbrahmātmāsmi sarvagam || 105 ||
[Analyze grammar]

padārthaughasya śailāderbahirantaśca saṃsthitā |
sattāsāmānyarūpeṇa yā citsāhamalepakaḥ || 106 ||
[Analyze grammar]

sarvāsāmanubhūtīnāmādarśo yo hyakṛtrimaḥ |
agamyo malalekhānāṃ taccittattvamahaṃ mahat || 107 ||
[Analyze grammar]

sarvasaṅkalpaphaladaṃ sarvatejaḥprakāśakam |
sarvopādeyasīmāntaṃ cidātmānamupāsmahe || 108 ||
[Analyze grammar]

sarvāvayavaviśrāntaṃ samastāvayavātigam |
anārataṃ kacadrūpaṃ cidātmānamupāsmahe || 109 ||
[Analyze grammar]

ghaṭe paṭe taṭe kuḍye svadamānaṃ sadā tanau |
jāgratyapi suṣuptasthaṃ cidātmānamupāsmahe || 110 ||
[Analyze grammar]

uṣṇamagnau hime śītaṃ mṛṣṭamanne śitaṃ kṣure |
kṛṣṇaṃ dhvānte sitaṃ candre cidātmānamupāsmahe || 111 ||
[Analyze grammar]

madhurādiṣu mādhuryaṃ tīkṣṇādiṣu ca tīkṣṇatām |
gataṃ padārthaśaktyarthaṃ cidātmānamupāsmahe || 112 ||
[Analyze grammar]

jāgratsvapnasuṣupteṣu turye turyātige pade |
samaṃ sadaiva sarvatra cidātmānamupāsmahe || 113 ||
[Analyze grammar]

praśāntasarvasaṅkalpaṃ vigatākhilakautukam |
viratāśeṣasaṃrambhaṃ cidātmānamupāsmahe || 114 ||
[Analyze grammar]

niṣkautukaṃ nirālambaṃ nirīhaṃ sarvameva ca |
niraṃśaṃ nirahaṅkāraṃ cidātmānamupāsmahe || 115 ||
[Analyze grammar]

sarvasyānte sthitaṃ sarvamapyapāraikarūpiṇam |
aparyantaṃ cidārambhaṃ cidātmānamupāsmahe || 116 ||
[Analyze grammar]

trailokyadehamuktānāṃ tantumuttamamātatam |
prasārasaṅkocakaraṃ cidātmānamupāsmahe || 117 ||
[Analyze grammar]

līnamantarbahiścograṃ kroḍīkṛtya jagatkhagam |
citraṃ bṛhajjālamiva cidātmānamupāsmahe || 118 ||
[Analyze grammar]

sarvaṃ yatredamastyeva nāstyeva ca manāgapi |
sadasadbhūtamekaṃ taccidātmānamupāsmahe || 119 ||
[Analyze grammar]

paramaṃ pratyayaṃ pūrṇamāspadaṃ sarvasaṃvidām |
sarvākāravihārasthaṃ cidātmānamupāsmahe || 120 ||
[Analyze grammar]

carmamarmasirābaddhadehaduryantravāhakam |
akalaṃ sakalādhāraṃ cidātmānamupāsmahe || 121 ||
[Analyze grammar]

niṣkalaṃ ṣoḍaśakalaṃ kalanākāravarjitam |
sarvākāraṃ nakiñcicca cidātmānamupāsmahe || 122 ||
[Analyze grammar]

hṛtkaṇṭhatālumadhyasthaṃ bhrūnāsāpuṭakoṭigam |
gamāgamotkaprāṇasthaṃ cidātmānamupāsmahe || 123 ||
[Analyze grammar]

hṛtpadmakoṭarāntassthaṃ sarvāvayavakośagam |
bhuvanāḍambarādarśaṃ cidātmānamupāsmahe || 124 ||
[Analyze grammar]

aśiraskahakārāntamābhāsvaramakhaṇḍitam |
bhūṣaṇaṃ sarvabhūtīnāṃ cidātmānamupāsmahe || 125 ||
[Analyze grammar]

snehādhāradaśāśāntimukhavātāhatibhramaiḥ |
yuktaṃ muktaṃ ca ciddīpaṃ bahirantarupāsmahe || 126 ||
[Analyze grammar]

hṛtsaraḥpadminīkandatantuṃ sarvāṅgarañjakam |
janatājīvitopāyaṃ cidātmānamupāsmahe || 127 ||
[Analyze grammar]

akṣīrārṇavasambhūtamaśaśāṅkāśayasthitam |
ahāryamamṛtaṃ satyaṃ cidātmānamupāsmahe || 128 ||
[Analyze grammar]

śabdarūparasasparśagandhairābhāsamāgatam |
tenaiva rahitaṃ śāntaṃ cidātmānamupāsmahe || 129 ||
[Analyze grammar]

mahāmahimnā sahitamahataṃ sarvakartṛbhiḥ |
kartṛtvenāpyakartāraṃ cidātmānamupāsmahe || 130 ||
[Analyze grammar]

akhilamidamahaṃ mamaiva sarvaṃ tvahamapi nāhamathetaracca nāham |
iti viditavato jagatkṣataṃ me sthiramatha vāstu gatajvaro bhavāmi || 131 ||
[Analyze grammar]