Chapter 12

jīvanmuktaniścayayogopadeśo nāma sargaḥ |
dvādaśaḥ sargaḥ |
vasiṣṭhaḥ |
iti niścayavantaste mahānto vigatainasaḥ |
satyāsatyapade śānte same sukhamavasthitāḥ || 1 ||
[Analyze grammar]

iti pūrṇadhiyo dhīrāḥ samanīrāgacetasaḥ |
na nindanti na nandanti jīvitaṃ maraṇaṃ tathā || 2 ||
[Analyze grammar]

ityalaṅghyacamatkārā nārāyaṇabhujā iva |
rejuraskhalitākārā aparā iva meravaḥ || 3 ||
[Analyze grammar]

remire vanaṣaṇḍeṣu dvīpeṣu nagareṣu ca |
devopavanamālāsu svargeṣu ca surā iva || 4 ||
[Analyze grammar]

bhremuḥ kusumapūrṇāsu dolālīlābilāsu ca |
vicitravanalekhāsu meruśṛṅgaśilāsu ca || 5 ||
[Analyze grammar]

cakrurvijitaśatrūṇi cāmaracchatravanti ca |
vicitrārthāni rājyāni citrācāramayāni ca || 6 ||
[Analyze grammar]

anujagmurimāṃ sarvāṃ nānārasaviceṣṭitām |
śrutismṛtyuditārambhāmitikartavyatāmiha || 7 ||
[Analyze grammar]

vilesū ramaṇīyeṣu lalanālāsyahāriṣu |
vihārāhāraramyeṣu bhogābhogeṣu bhūṣitāḥ || 8 ||
[Analyze grammar]

viceruścārucūtāsu mandāravalitāsu ca |
apsarogītapūrṇāsu nandanodyānabhūmiṣu || 9 ||
[Analyze grammar]

ūṣurācārapūteṣu viśrāntākhilajantuṣu |
yajñakriyākarāleṣu gārhasthyeṣu yathākramam || 10 ||
[Analyze grammar]

terurhatagajendrāsu bhrāntabhūriśarāsu ca |
bherībhāṅkārabhīmāsu saṅgrāmārṇavavīciṣu || 11 ||
[Analyze grammar]

tasthuḥ puruṣacintāsu hṛtacittoddhatāsu ca |
saṃrambhakṣobharaudrāsu sarvāsu dvandvanītiṣu || 12 ||
[Analyze grammar]

manasteṣāṃ tu nīrāgamanupādhi gatabhramam |
asaktamuttamaṃ śāntaṃ paraṃ sattvapadaṃ gatam || 13 ||
[Analyze grammar]

na mamajja kvacidapi saṅkaṭeṣu mahatsu ca |
muhurapyupayāteṣu kulaśailaḥ sarassviva || 14 ||
[Analyze grammar]

nollalāsa vilāsinyā śriyā paramakāntayā |
paripūrṇendulakṣmyeva jalarāśī raghūdvaha || 15 ||
[Analyze grammar]

na mamlau duḥkhaśoṣeṇa grīṣmeṇeva vanasthalam |
jaharṣa ca na bhogaughairavaśyāyairivauṣadhiḥ || 16 ||
[Analyze grammar]

te hi kevalamavyagrāḥ kurvantaḥ kāryapañjaram |
iṣṭāniṣṭaphalaṃ rāma nābhileṣurna tatyajuḥ || 17 ||
[Analyze grammar]

nodaguḥ kāryasampattāvākrāntā nāstamāyayuḥ |
jahṛṣurna sukhaprāptau mamlurnaiva ca saṅkaṭe || 18 ||
[Analyze grammar]

mumuhurna vimoheṣu mamajjurna vipatkrame |
śuśucurna śucā śoke rurudurna bhavāniva || 19 ||
[Analyze grammar]

prakṛtācārasamprāptaṃ kurvantaḥ karma kevalam |
sthitā vigatasaṃrambhamaparā iva meravaḥ || 20 ||
[Analyze grammar]

tāṃ tvaṃ dṛṣṭimavaṣṭabhya rāghavāghavighātinīm |
anahaṅkṛtyalaṅkāro vihareha yathāsukham || 21 ||
[Analyze grammar]

yathābhūtāmimāmevaṃ paśyan sargaparamparām |
merusthiro'bdhigambhīraḥ samāssva vigatabhramaḥ || 22 ||
[Analyze grammar]

cinmātraṃ sarvamevedamitthamābhāsatāṃ gatam |
neha satyamasatyaṃ vā kvacidapyasti kiñcana || 23 ||
[Analyze grammar]

mahattāmalamālambya tyaktvedamavahelayā |
asaktabuddhiḥ sarvatra bhava bhavya bhavakṣayī || 24 ||
[Analyze grammar]

kiṃ rodiṣi ghanodvegaṃ mūḍhavaccānuśocasi |
bhramasyudbhrāntacittaṃ ca somyāvarte tṛṇaṃ yathā || 25 ||
[Analyze grammar]

rāmaḥ |
aho nu bhagavannūnaṃ samyagrūpaṃ vilakṣaye |
tvatprasādātprabuddho'smi sūryāsaṅgādivāmbujam || 26 ||
[Analyze grammar]

bhrāntirastaṅgatā nūnaṃ mihikā śaradīva me |
saṃśāntākhilasandehaḥ kariṣye vacanaṃ tava || 27 ||
[Analyze grammar]

vyapagatamadamoho mānamātsaryamuktaścirataramuditātmā śāntaśokaścireṇa |
punarasukhamagacchan svacchayaikāntabuddhyā vadasi yadasi sādho tatkariṣye viśaṅkam || 28 ||
[Analyze grammar]