Chapter 93

rāmaḥ | etāni tāni proktāni tvayā bījāni mānada | katamasya prayogeṇa śīghraṃ tatprāpyate padam || 1 ||
[Analyze grammar]

vasiṣṭhaḥ |
eteṣāṃ duḥkhabījānāṃ proktaṃ yad yanmayottaram |
tasya tasya prayogeṇa śīghramāsādyate padam || 2 ||
[Analyze grammar]

sattāsāmānyakoṭisthe jhagityeva pade yadi |
pauruṣeṇa prayatnena balātsantyajya vāsanāḥ || 3 ||
[Analyze grammar]

sthitiṃ badhnāsi tattvajña kṣaṇamapyakṣayātmikām |
kṣaṇe'sminneva tatsādhu padamāsādayasyalam || 4 ||
[Analyze grammar]

sattāsāmānyarūpe vā karoṣi sthitimaṅga cet |
tatkiñcidadhikeneha yatnenāpnoṣi tatpadam || 5 ||
[Analyze grammar]

saṃvittattve kṛtajñāno yadi tiṣṭhasi vānagha |
tad yatnenādhikenoccairāsādayasi tatpadam || 6 ||
[Analyze grammar]

saṃvedye kevale dhyānaṃ na sambhavati rāghava |
sarvatra sambhavādasyāḥ saṃvittereva sarvadā || 7 ||
[Analyze grammar]

yaccintayasi yad yāsi yattiṣṭhasi karoṣi vā |
tatra tatra sthitā saṃvitsaṃvideva tadeva vā || 8 ||
[Analyze grammar]

vāsanāsamparityāge yadi yatnaṃ karoṣi vā |
tatte śithilatāṃ yānti sarvādhivyādhayaḥ kṣaṇāt || 9 ||
[Analyze grammar]

pūrvebhyastu prayatnebhyo viṣamo'yaṃ hi saṃsmṛtaḥ |
dussādho vāsanātyāgaḥ sumerūnmūlanādapi || 10 ||
[Analyze grammar]

yāvadvilīnaṃ na mano na tāvadvāsanākṣayaḥ || 11 ||
[Analyze grammar]

tattvajñānaṃ manonāśo vāsanākṣaya eva ca |
mithaḥ kāraṇatāṃ gatvā dussādhāni sthitānyataḥ || 12 ||
[Analyze grammar]

tasmād rāghava yatnena pauruṣeṇa vivekinā |
bhogecchāṃ dūratastyaktvā trayametatsamāśrayet || 13 ||
[Analyze grammar]

sarva ete samaṃ yāvanna svabhyastā muhurmuhuḥ |
tāvanna padasamprāptirbhavatyapi samāśataiḥ || 14 ||
[Analyze grammar]

vāsanākṣayavijñānamanonāśā mahāmateḥ |
samakālaṃ cirābhyastā bhavanti phaladā muneḥ || 15 ||
[Analyze grammar]

ekaikaśo niṣevyante yadyete ciramapyalam |
tanna siddhiṃ prayacchanti mantrāśśakalitā iva || 16 ||
[Analyze grammar]

cirakālopacaritā apyete sudhiyo'pi ca |
ekaśaḥ paramabhyetuṃ na śaktāḥ sainikā iva || 17 ||
[Analyze grammar]

samamudyogamānītāḥ santa ete hi dhīmatā |
samsārāriṃ nikṛntanti mūlādapi bhaṭā iva || 18 ||
[Analyze grammar]

vāsanākṣayavijñānamanonāśāḥ prayatnataḥ |
samaṃ sevyāstava ciraṃ tena tāta na tapyase || 19 ||
[Analyze grammar]

tribhirebhiścirābhyastairhṛdayagranthayo dṛḍhāḥ |
niśśeṣameva truṭyanti bisacchedādguṇā iva || 20 ||
[Analyze grammar]

janmāntaraśatābhyastā rāma saṃsārasaṃsthitiḥ |
sā cirābhyāsayogena vinā na kṣīyate kvacit || 21 ||
[Analyze grammar]

gacchañchṛṇvan spṛśañjighraṃstiṣṭhañjāgratsvapan sadā |
śreyase paramāyāsya trayasyābhyāsavānbhava || 22 ||
[Analyze grammar]

vāsanāsamparityāgasamaṃ prāṇanirodhanaṃ |
vidustattvavidastasmāttadapyevaṃ samāharet || 23 ||
[Analyze grammar]

vāsanāsamparityāgāccittaṃ gacchatyacittatām |
prāṇaspandanirodhācca yathecchasi tathā kuru || 24 ||
[Analyze grammar]

prāṇāyāmadṛḍhābhyāsairyuktyā ca gurudattayā |
āsanāsanayogena prāṇaspando nirudhyate || 25 ||
[Analyze grammar]

samyagjñānavilāsena jagadvastuṣvanāsthayā |
yathābhūtārthadarśitvādvāsanā na pravartate || 26 ||
[Analyze grammar]

adāvante ca vastūnāmavisaṃvādi yatsthiram |
rūpaṃ taddarśanaṃ jñānaṃ kṣīyate tena vāsanā || 27 ||
[Analyze grammar]

nissaṅgaṃ vyavahāritvādbhavabhāvanavarjanāt |
śarīre nāśadarśitvādvāsanā na pravartate || 28 ||
[Analyze grammar]

saṃśānte pavanaspande yathā pāṃsurnabhastale |
vāsanāvibhave naṣṭe na cittaṃ sampravartate || 29 ||
[Analyze grammar]

yaḥ prāṇapavanaspandaścittaspandaḥ sa eva hi |
tasmājjaganti jāyante pāṃsavo'vakarādiva || 30 ||
[Analyze grammar]

prāṇaspandajayo yatnaḥ kartavyo dhīmatoccakaiḥ |
upaviśyopaviśyaikacittakena muhurmuhuḥ || 31 ||
[Analyze grammar]

atha vainaṃ kramaṃ tyaktvā cittākramaṇameva cet |
rocate te tadāpnoṣi kālena bahunā padam || 32 ||
[Analyze grammar]

na śakyate mano jetuṃ vinā yuktimanindita |
aṅkuśena vinā mattaṃ yathā duṣṭamataṅgajam || 33 ||
[Analyze grammar]

adhyātmavidyādhigamaḥ sādhusaṅgama eva ca |
vāsanāsamparityāgaḥ prāṇaspandanirodhanam || 34 ||
[Analyze grammar]

etāstā yuktayaḥ puṣṭāḥ santi cittajaye kila |
yābhistajjīyate kṣipraṃ dhārābhiriva bhūrajaḥ || 35 ||
[Analyze grammar]

satīṣu yuktiṣvetāsu haṭhānniyamayanti ye |
cetaste dīpamutsṛjya vinighnanti tamo'ñjanaiḥ || 36 ||
[Analyze grammar]

vimūḍhāḥ kartumudyuktā ye haṭhāccetaso jayam |
te nibadhnanti nāgendramunmattaṃ bisatantubhiḥ || 37 ||
[Analyze grammar]

ciraṃ cittasya mādūraṃ saṃsthitaṃ svaśarīrakam |
śodhayanti samutsṛjya yuktiṃ ye tān hatānviduḥ || 38 ||
[Analyze grammar]

bhayādbhayamupāyānti kleśātkleśaṃ vrajanti te |
nirvṛtiṃ nādhigacchanti durbhagā iva jantavaḥ || 39 ||
[Analyze grammar]

kālaṃ tīrthatapodānayajñadevārcanabhramaiḥ |
ciramādhiśatopetāḥ kṣapayanti mṛgā iva || 40 ||
[Analyze grammar]

bhramanti girikūṭeṣu phalapallavabhojinaḥ |
mugdhamugdhadhiyo bhītā varākā hariṇā iva || 41 ||
[Analyze grammar]

matirālūnaśīrṇāṅgī tadīyā pelavāṅgikā |
na kvacid yāti viśvāsaṃ mṛgī grāmagatā yathā || 42 ||
[Analyze grammar]

kallolavalitaṃ cetasteṣāṃ jaḍajavāhṛtam |
prohyate prapataddūraṃ tṛṇaṃ girinadīṣviva || 43 ||
[Analyze grammar]

ātmatattvaṃ vidhivaśātkadācitkiñcideva te |
duḥkhadoṣadaśādigdhā vidanti na vidanti vā || 44 ||
[Analyze grammar]

āgamāpāyino nityā narakasvargamānuṣaiḥ |
pātotpātakarākārā nīyante kandukā iva || 45 ||
[Analyze grammar]

tato gacchanti narakaṃ tataḥ svargamihaiva vā |
āvṛttibhirvivartante saritīva taraṅgakāḥ || 46 ||
[Analyze grammar]

tasmādetāḥ parityajya durdṛṣṭī raghunandana |
śuddhāṃ saṃvidamāśritya vītarāgaḥ sthiro bhava || 47 ||
[Analyze grammar]

jñānavāneva sukhabhāgjñānavāneva jīvati |
jñānavāneva balavāṃstasmājjñānamayo bhava || 48 ||
[Analyze grammar]

saṃvedyavarjitamanuttamamādyamekaṃ saṃvitpadaṃ vikalanaṃ kalayanmahātman |
hṛdyeva tiṣṭha kalanārahitaḥ kriyāṃ tu kurvannakartṛpadameṣyasamoditaśrīḥ || 49 ||
[Analyze grammar]