Chapter 92

cittavicārayogopadeśo nāma sargaḥ |
dvinavatitamaḥ sargaḥ |
rāmaḥ |
paramākāśakośādrirūḍhaṃ lokāntaradrumam |
tārakāpuṣpaśabalaṃ devāsuravihaṅgamam || 1 ||
[Analyze grammar]

vidyunmañjaritopāntanīlanīradapallavam |
sarvarturamyaṃ candrārkagaṇaramyaṃ kacattaṭam || 2 ||
[Analyze grammar]

saptābdhivāpīvalitaṃ saricchatanirantaram |
caturdaśavidhānantabhūtajātopajīvitam || 3 ||
[Analyze grammar]

jagatkānanamākramya sthitāyāḥ kṛtajālakam |
brahman saṃsṛtimṛdvīkālatāyā vitatākṛteḥ || 4 ||
[Analyze grammar]

jarāmaraṇaparyāyaduḥkhaduḥkhaphalāvaleḥ |
prarūḍhamūlamālāyā mohasekajalāñjaleḥ || 5 ||
[Analyze grammar]

kiṃ bījamatha bījasya tasya kiṃ bījamucyate |
atha tasyāpi kiṃ bījaṃ bījaṃ tasyāpi kiṃ bhavet || 6 ||
[Analyze grammar]

sarvametatsamāsena punarbodhābhivṛddhaye |
siddhaye jñānasārasya vada me vadatāṃ vara || 7 ||
[Analyze grammar]

vasiṣṭhaḥ |
antarlīnaghanārambhaśubhāśubhamahāṅkuram |
saṃsṛtivrataterbījaṃ śarīraṃ viddhi rāghava || 8 ||
[Analyze grammar]

śākhāpratānagahanā phalapallavalāsinī |
teneyaṃ bhavati sphītā śaradīva vasundharā || 9 ||
[Analyze grammar]

bhāvābhāvadaśākośaṃ duḥkharatnasamudgakam |
bījamasya śarīrasya cittamāśāvaśānugam || 10 ||
[Analyze grammar]

cittādidamudetyuccaiḥ saccāsaccāṅgajālakam |
tathā caitatsvayaṃ svapnasambhrameṣvanubhūyate || 11 ||
[Analyze grammar]

yathā gandharvasaṅkalpātpuramevaṃ hi cetasaḥ |
savātāyanamākārabhāsuraṃ jāyate vapuḥ || 12 ||
[Analyze grammar]

yadidaṃ kiñcidābhogi jāgataṃ dṛśyatāṃ gatam |
rūpaṃ taccetasaḥ sphāraṃ ghaṭāditvaṃ mṛdo yathā || 13 ||
[Analyze grammar]

dve bīje cittavṛkṣasya vṛttivratatidhāriṇaḥ |
ekaṃ prāṇaparispando dvitīyaṃ dṛḍhabhāvanā || 14 ||
[Analyze grammar]

yadā praspandate prāṇo nāḍīsaṃsparśanodyataḥ |
tadā saṃvedanamayaṃ cittamāśu prajāyate || 15 ||
[Analyze grammar]

yadā na spandate prāṇaḥ sirāsaraṇikoṭare |
asaṃvittivaśāttena cittamantarna jāyate || 16 ||
[Analyze grammar]

prāṇaspandanamevedaṃ cittadvāreṇa dṛśyate |
jagattāmāgataṃ vyomni nīlatvādīva dṛgdṛśā || 17 ||
[Analyze grammar]

prāṇapraspandanaṃ puṃstā tacchāntiśśāntirucyate |
prāṇapraspandanātsaṃvidvāti vīṭeva coditā || 18 ||
[Analyze grammar]

saṃvitsphurati deheṣu prāṇaspandaprabodhitā |
cakrāvartairaṅganeṣu vīṭeva karatāḍitā || 19 ||
[Analyze grammar]

satī sarvagatā saṃvitprāṇaspandena bodhyate |
sūkṣmātsūkṣmatarākārā gandhalekheva vāyunā || 20 ||
[Analyze grammar]

saṃvitsaṃrodhanaṃ śreyaḥ paramaṃ viddhi rāghava |
kāraṇaṃ samatāyāstatkṣobhastatra na vidyate || 21 ||
[Analyze grammar]

saṃvitsamuditaivāśu yāti saṃvedyamādarāt |
saṃvedanādanantāni tato duḥkhāni cetasaḥ || 22 ||
[Analyze grammar]

suptā punarabodhāya saṃvitsantiṣṭhate yadā |
labdhaṃ bhavati labdhavyaṃ tadā tadamalaṃ padam || 23 ||
[Analyze grammar]

tasmātprāṇaparispandairvāsanācodanaistathā |
no cetsaṃvidamucchūnāṃ karoṣi tadajo bhavān || 24 ||
[Analyze grammar]

saṃviducchūnatā cittaṃ viddhi tenedamātatam |
anarthajālamālūnaviśīrṇajanajīvakam || 25 ||
[Analyze grammar]

yoginaścittaśāntyarthaṃ kurvanti prāṇarodhanam |
prāṇāyāmaistathā dhyānaiḥ prayogairyuktikalpitaiḥ || 26 ||
[Analyze grammar]

cittopaśāntiphaladaṃ paramaṃ sāmyakāraṇam |
subhagaṃ saṃvidaḥ svāsthyaṃ prāṇasaṃrodhanaṃ viduḥ || 27 ||
[Analyze grammar]

jñānavadbhiḥ prakaṭitāmanubhūtāṃ ca rāghava |
cittasyotpattimaparāṃ vāsanāta imāṃ śṛṇu || 28 ||
[Analyze grammar]

dṛḍhabhāvanayā tyaktapūrvāparavicāraṇam |
yadādānaṃ padārthasya vāsanā sā prakīrtitā || 29 ||
[Analyze grammar]

bhāvitaṃ tīvrasaṃvegādātmanā yattadeva saḥ |
bhavatyāśu mahābāho vigatetarasaṃsmṛtiḥ || 30 ||
[Analyze grammar]

tādṛgrūpo hi puruṣo vāsanāvivaśīkṛtaḥ |
yatpaśyati tadetattatsadvastviti vimuhyati || 31 ||
[Analyze grammar]

vāsanāveśavaivaśyātsvarūpaṃ prajahāti tam |
bhramaṃ paśyati durdṛṣṭiḥ sarvaṃ madavaśādiva || 32 ||
[Analyze grammar]

asamyagjñānavāneva bhavatyādhipariplutaḥ |
antassthayā vāsanayā viṣūcyeva vaśīkṛtaḥ || 33 ||
[Analyze grammar]

asamyagdarśanaṃ yatsyād yadanātmātmabhāvanam |
yadavastuni vastutvaṃ taccittaṃ viddhi rāghava || 34 ||
[Analyze grammar]

dṛḍhābhyāsapadārthaikabhāvanādaticañcalam |
cittaṃ sañjāyate janmajarāmaraṇakāraṇam || 35 ||
[Analyze grammar]

yadā na vāsyate kiñciddheyopādeyarūpi yat |
sthīyate sakalaṃ tyaktvā tadā cittaṃ na jāyate || 36 ||
[Analyze grammar]

avāsanatvātsatataṃ yadā na manute manaḥ |
amanastā tadodeti paramopaśamapradā || 37 ||
[Analyze grammar]

yadā kiñcinna saṃvittau sphuratyabhramivāmbare |
tadā padma ivākāśe cittamantarna jāyate || 38 ||
[Analyze grammar]

yadā na bhāvyate bhāvaḥ kvacijjagati vastuni |
tadā hṛdambare śūnye cittarakṣo na jāyate || 39 ||
[Analyze grammar]

etāvanmātrakaṃ manye rūpaṃ cittasya rāghava |
yadbhāvanaṃ vastuno'ntā rāgeṇa ca rasena ca || 40 ||
[Analyze grammar]

na kāñcitkalanāyogyāṃ dṛśaṃ bhāvayataḥ svataḥ |
ākāśakośasvacchasya kutaścittodayo bhavet || 41 ||
[Analyze grammar]

yadabhāvanamāsthāyā yadabhāvasya bhāvanam |
yad yathāvastudarśitvaṃ tadacittatvamucyate || 42 ||
[Analyze grammar]

sarvamantaḥ parityajya śītalāśayavarti yat |
vṛttisthamapi taccittamasadrūpamudāhṛtam || 43 ||
[Analyze grammar]

vāsanāyāṃ rasādānād rāgo yasya na vidyate |
tasya cittamacittatvaṃ gataṃ sattvaṃ taducyate || 44 ||
[Analyze grammar]

na vāsanā ghanā yasya punarjananakāriṇī |
jīvanmuktaḥ sa sattvasthaścakrabhramavadāsthitaḥ || 45 ||
[Analyze grammar]

bhṛṣṭabījopamā yeṣāṃ punarjananavarjitā |
vāsanā rasanirhīnā jīvanmuktā hi te smṛtāḥ || 46 ||
[Analyze grammar]

sattvarūpapariprāptacittāste jñānapāragāḥ |
acittā iti kathyante dehānte vyomarūpiṇaḥ || 47 ||
[Analyze grammar]

dve bīje rāma cittasya prāṇaspandanavāsane |
ekasmiṃśca tayoḥ kṣīṇe kṣipraṃ dve api naśyataḥ || 48 ||
[Analyze grammar]

mithaḥ kāraṇamete hi bīje janmani cetasaḥ |
jalāṅgīkaraṇe rāma jalāśayaghanāviva || 49 ||
[Analyze grammar]

bījāṅkuravadete hi sthite ca tilatailavat |
avinābhāvinī nityaṃ kālāpekṣakrame tathā || 50 ||
[Analyze grammar]

sārdhamutpādayete tu cittakaṃ saṃvidātmakam |
yathā ghrāṇendriyānandamāmodapavanāv ubhau || 51 ||
[Analyze grammar]

cittasyotpādake sārdhaṃ tathaite vā same tadā |
āmodapuṣpavattailatilavacca vyavasthite || 52 ||
[Analyze grammar]

vāsanāvaśataḥ prāṇaspandastena ca vāsanā |
jāyate cittabījasya tena bījāṅkurakramaḥ || 53 ||
[Analyze grammar]

vāsanotplūyamānatvātsaṃvitprakṣobhakarmaṇā |
prāṇaspandaṃ bodhayati tena cittaṃ prajāyate || 54 ||
[Analyze grammar]

prāṇaḥ spandanadharmitvātspandate spṛṣṭahṛdguhaḥ |
saṃvidaṃ bodhayaṃstena cittabālaḥ prajāyate || 55 ||
[Analyze grammar]

evaṃ hi vāsanāprāṇaspandau cittasya kāraṇam |
tayorekakṣaye nāśo dvayościttasya cānagha || 56 ||
[Analyze grammar]

sukhaduḥkhamahāskandhaṃ śarīrakamahāphalam |
kāryapallavitākāraṃ vṛttivratativeṣṭitam || 57 ||
[Analyze grammar]

tṛṣṇākṛṣṇāhivalitaṃ rāgarogabakālayam |
ajñānamūlaṃ sudṛḍhaṃ līnendriyavihaṅgamam || 58 ||
[Analyze grammar]

vāsanākṣayanāmaitaṃ cittavṛkṣaṃ kṣaṇena hi |
prapātayati vātaughaḥ kālapakvaṃ phalaṃ yathā || 59 ||
[Analyze grammar]

pāṇḍurīkṛtasarvāśaṃ sthagitākhiladarśanam |
vilolajaladākāramajñānāvakarotthitam || 60 ||
[Analyze grammar]

tṛṣṇātṛṇalavaprāptaṃ stambhākṛtiśarīrakam |
sphurattanutanukṣubdhaṃ lubdhamutplavanaṃ prati || 61 ||
[Analyze grammar]

antassthitamahālokamapaśyatpravilīyate |
pavanaspandarodhācca rāma cittarajaḥ kṣaṇāt || 62 ||
[Analyze grammar]

vāsanāprāṇapavanaspandayoranayostayoḥ |
saṃvedyaṃ bījamityuktaṃ sphuratastau yatastataḥ || 63 ||
[Analyze grammar]

hṛdi saṃvedyagardhena prāṇaspando'tha vāsanā |
udeti tasmātsaṃvedyaṃ kathitaṃ bījametayoḥ || 64 ||
[Analyze grammar]

saṃvedyasamparityāgātprāṇaspandanavāsane |
samūlaṃ naśyataḥ kṣipraṃ mūlacchedādiva drumau || 65 ||
[Analyze grammar]

saṃvidaṃ viddhi saṃvedyabījaṃ vīra tayā vinā |
na sambhavati saṃvedyaṃ tailahīnastilo yathā || 66 ||
[Analyze grammar]

na bahirnāntare kiñcitsaṃvedyaṃ vidyate pṛthak |
saṃvitsphurantī saṅkalpya saṃvedyaṃ sphurati svataḥ || 67 ||
[Analyze grammar]

svapne yathātmamaraṇaṃ tathā deśāntarasthitiḥ |
svacamatkārayogena saṃvedyaṃ saṃvidastathā || 68 ||
[Analyze grammar]

saṃvedanaṃ svasaṅkalpātsaṃvido yatpravartate |
jagajjālakatāṃ yāti tadidaṃ raghunandana || 69 ||
[Analyze grammar]

yathā bālasya vetālaḥ svasaṅkalpodbhavo bhavet |
puruṣatvaṃ yathā sthāṇoḥ saṃvedyaṃ saṃvidastathā || 70 ||
[Analyze grammar]

etanmithyā vidurjñānaṃ samyagjñānādvilīyate |
rajjvāmiva bhujaṅgatvaṃ dvīndutvaṃ svīkṣitādiva || 71 ||
[Analyze grammar]

śuddhaiva saṃvittrijagatsaṃvedyaṃ nānyadastyalam |
ityantarniścayo rūḍhaḥ samyagjñānaṃ vidurbudhāḥ || 72 ||
[Analyze grammar]

pūrvaṃ dṛṣṭamadṛṣṭaṃ vā yadasyāḥ pratibhāsate |
saṃvidastatprayatnena mārjanīyaṃ vijānatā || 73 ||
[Analyze grammar]

tadamārjanamātraṃ hi mahāsaṃsāratāṃ gatam |
tatpramārjanamātraṃ tu mokṣa ityabhidhīyate || 74 ||
[Analyze grammar]

saṃvedanamanantāya duḥkhāya jananātmane |
asaṃvittirajāḍyasthā sukhāyājananātmane || 75 ||
[Analyze grammar]

ajaḍo galitānandastyaktasaṃvedano bhava |
asaṃvedyaḥ prabuddhātmā yastvaṃ sa tvaṃ raghūdvaha || 76 ||
[Analyze grammar]

rāmaḥ |
ajaḍaścāpyasaṃvittiḥ kīdṛśo bhavati prabho |
asaṃvittau ca jāḍyaṃ tatkathaṃ vā vinivāryate || 77 ||
[Analyze grammar]

vasiṣṭhaḥ |
yaḥ sarvatrānavasthāstho viśrāntāstho na kutracit |
jīvo na vindate kiñcidasaṃvidajaḍo hi saḥ || 78 ||
[Analyze grammar]

saṃvidvastudaśālambaḥ sa yasyeha na vidyate |
so'saṃvidajaḍaḥ proktaḥ kurvan kāryaśatānyapi || 79 ||
[Analyze grammar]

saṃvedyena hṛdākāśo manāgapi na lipyate |
yasyāsāvajaḍo'saṃvijjīvanmuktaśca kathyate || 80 ||
[Analyze grammar]

yadā na bhāvyate kiñcinnirvāsanatayātmani |
bālamūkādivijñānamiva ca sthīyate sthiram || 81 ||
[Analyze grammar]

tadā jāḍyavinirmuktamasaṃvedanamātatam |
āśritaṃ bhavati prājña yasmādbhūyo na lipyate || 82 ||
[Analyze grammar]

samastavāsanātyāgānnirvikalpasamādhitaḥ |
nīlatvamiva khātsphāra ānandaḥ sampravartate || 83 ||
[Analyze grammar]

yoginastatra līnasya nissaṃvedanasaṃvidaḥ |
tanmayatvādanādyantaṃ tadapyantarvilīyate || 84 ||
[Analyze grammar]

gacchaṃstiṣṭhan spṛśañjighrannapi tena sa ucyate |
ajaḍo galitānandastyaktasaṃvedanaḥ sukhī || 85 ||
[Analyze grammar]

etāṃ dṛṣṭimavaṣṭabhya kaṣṭayā naṣṭaceṣṭayā |
tara duḥkhāmbudheḥ pāramapāraguṇasāgaraḥ || 86 ||
[Analyze grammar]

yathā bījādbṛhadvṛkṣo vyoma vyāpnoti kālataḥ |
tathaivedaṃ svasaṅkalpātsaṃvedyaṃ saṃvidutthitam || 87 ||
[Analyze grammar]

yadā saṅkalpya saṅkalpaṃ saṃvitsaṃvindate vapuḥ |
tadāsya janmajālasya saiva gacchati bījatām || 88 ||
[Analyze grammar]

janayitvātmanātmānaṃ mohayitvā punaḥ punaḥ |
svayaṃ mokṣaṃ nayatyante saṃvitsarvatra rāghava || 89 ||
[Analyze grammar]

yadeva bhāvayatyeṣā tadeva bhavati kṣaṇāt |
naṭavadbhūmikāṃ tyaktvā svamāyāti cirādvapuḥ || 90 ||
[Analyze grammar]

devo nāgo'suro yakṣo rakṣaḥ puṅkinnaro gajaḥ |
ātmaivāsyā vilāsinyā jagannaṭyāḥ pranṛtyati || 91 ||
[Analyze grammar]

baddhvātmānaṃ ruditvā ca kośakāraḥ krimiryathā |
cirātkevalatāmeti svayaṃ saṃvitsvabhāvataḥ || 92 ||
[Analyze grammar]

jagajjaladhijālānāṃ saṃvijjalamalaṃ tathā |
yathaivāpūrya dikcakraṃ sphuratyadryāditāṃ gatā || 93 ||
[Analyze grammar]

dyauḥ kṣamā vāyurākāśaṃ parvatāḥ sarito diśaḥ |
ityasyā vīcayaḥ proktāḥ saṃvitsalilasantateḥ || 94 ||
[Analyze grammar]

saṃvinmātraṃ jagatsarvaṃ dvitīyā nāsti kalpanā |
ityeva samyagjñānena saṃvidgacchati nānyatām || 95 ||
[Analyze grammar]

yadā na vindate kiñcitspandate na na copati |
svātmanyeva sthitiṃ yāti saṃvinnālipyate tadā || 96 ||
[Analyze grammar]

athāsyāḥ saṃvido rāma sanmātraṃ bījamucyate |
sattvamātrādudetyeṣā prākāśyamiva tejasaḥ || 97 ||
[Analyze grammar]

dve rūpe tatra sattāyā ekaṃ nānākṛti sthitam |
dvitīyamekarūpaṃ tu vibhāgo'yaṃ tayośśṛṇu || 98 ||
[Analyze grammar]

ghaṭatā paṭatā tattā tvattā matteti kathyate |
sattārūpaṃ vibhāgena yattu nānākṛti sthitam || 99 ||
[Analyze grammar]

vibhāgaṃ tu parityajya sattaikātmatayā tatam |
sāmānyenaiva sattāyā rūpamekamudāhṛtam || 100 ||
[Analyze grammar]

viśeṣaṃ samparityajya sanmātraṃ yadalepakam |
ekarūpaṃ mahārūpaṃ sattāyāstatparaṃ viduḥ || 101 ||
[Analyze grammar]

rūpaṃ nānākṛtitvena sattāyā na kadācana |
asaṃvedyaṃ sambhavati tasmādetadavastukam || 102 ||
[Analyze grammar]

ekarūpaṃ tu yad rūpaṃ sattāyā vimalātmakam |
na kadācana tad yāti nāśaṃ nāpi ca vismṛtim || 103 ||
[Analyze grammar]

kālasattā kalāsattā vastusatteyamityapi |
vibhāgakalanāṃ tyaktvā sanmātraikaparo bhava || 104 ||
[Analyze grammar]

kālasattā khasattā ca pronmuktakalanā satī |
yadyapyuttamasadrūpā tathāpyeṣā na vāstavī || 105 ||
[Analyze grammar]

vibhāgakalanā yatra vibhinnamatadāyinī |
nānātākāraṇaṃ dṛṣṭā tatkathaṃ pāvanaṃ bhavet || 106 ||
[Analyze grammar]

sattāsāmānyamevaikaṃ bhāvayan kevalaṃ vapuḥ |
paripūrṇaḥ parānandī tiṣṭhābharitadigbharaḥ || 107 ||
[Analyze grammar]

sattāsāmānyamātrasya yā koṭiḥ kovideśvara |
saivāsya bījatāṃ yātā tata eṣa pravartate || 108 ||
[Analyze grammar]

sattāsāmānyaparyantaṃ yattatkalanayojjhitam |
padamādyamanādyantaṃ tasya bījaṃ na vidyate || 109 ||
[Analyze grammar]

saṃvil layaṃ yāti tatra nirvikāraṃ ca tiṣṭhati |
bhūyo nāvartate duḥkhe tatra labdhavatī padam || 110 ||
[Analyze grammar]

taddhetuḥ sarvahetūnāṃ tasya heturna vidyate |
sa sāraḥ sarvasārāṇāṃ tasmātsāro na vidyate || 111 ||
[Analyze grammar]

tasmiṃściddarpaṇe sphāre samagrā vastudṛṣṭayaḥ |
imāstāḥ pratibimbanti sarasīva taṭadrumāḥ || 112 ||
[Analyze grammar]

sarve bhāvā ime tatra svadante svādadhāriṇi |
ṣaḍrasā iva jihvāyāṃ prakaṭatvaṃ prayānti ca || 113 ||
[Analyze grammar]

tatkhādacchatarasyāpi cidākāśasya vai padam |
sarveṣāṃ svādajātānāmalamāsvādanaṃ ca tat || 114 ||
[Analyze grammar]

jāyate vartate caiva vardhate dṛśyate tathā |
santiṣṭhate vigalati tatrāṅga jagatāṃ gaṇaḥ || 115 ||
[Analyze grammar]

tattadguru gariṣṭhānāṃ tattal laghu laghīyasām |
tattatsthūlaṃ sthaviṣṭhānāmaṇīyastadaṇīyasām || 116 ||
[Analyze grammar]

daviṣṭhānāṃ daviṣṭhaṃ tadantikānāṃ tadantikam |
kaniṣṭhānāṃ kaniṣṭhaṃ tajjyeṣṭhaṃ tajjyāyasāmapi || 117 ||
[Analyze grammar]

tejasāmapi tattejastamasāmapi tattamaḥ |
vastūnāmapi tadvastu dṛśāmapyaṅga dṛkparā || 118 ||
[Analyze grammar]

tattatkiñcinnakiñcicca tattadasti ca nāsti ca |
tattaddṛśyaṃ adṛśyaṃ ca tattadasmi na cāsmi ca || 119 ||
[Analyze grammar]

rāma sarvaprayatnena tasminparamapāvane |
pade sthitimupāyāsi yathā kuru tathānagha || 120 ||
[Analyze grammar]

tadamalamajaraṃ tadātmatattvaṃ tadavagatāv upaśāntimeti cetaḥ |
avagatavitataikatatsvarūpo bhava bhavamukta sadoditaścirāya || 121 ||
[Analyze grammar]