Chapter 58

bhedanirāso nāma sargaḥ |
aṣṭapañcāśaḥ sargaḥ |
vasiṣṭhaḥ |
atraivodāharantīmamitihāsaṃ purātanam |
kirāteśasya suraghorvṛttāntaṃ vismayapradam || 1 ||
[Analyze grammar]

uttarasyā diśo medaḥ karpūrapaṭalaṃ bhuvaḥ |
sambhṛtaṃ hasanaṃ śārvaṃ śuklo vā cāndra ātapaḥ || 2 ||
[Analyze grammar]

himādreśśṛṅgamastīha kailāso nāma parvataḥ |
śailajālasya sanmuktākalāpasyeva nāyakaḥ || 3 ||
[Analyze grammar]

viṣṇoḥ kṣīrodaka iva svargaḥ surapateriva |
abjajasyeva nābhyabjaṃ gṛhaṃ yaśśaśimaulinaḥ || 4 ||
[Analyze grammar]

rudrākṣavṛndadolābhiḥ sāpsarobhirvibhāti yaḥ |
lolaratnaśalākābhirlaharībhirivārṇavaḥ || 5 ||
[Analyze grammar]

gaṇāṅganānāmaniśaṃ mattānāṃ caraṇairhatāḥ |
aśokā iva rājante yatrāśokā vikāsinaḥ || 6 ||
[Analyze grammar]

sañcaracchaṅkare dikṣu bhṛguṣvindumaṇidravaiḥ |
nivartante pravartante yatrājasraṃ ca nirjharāḥ || 7 ||
[Analyze grammar]

yo latāgulmavṛkṣaughavāpīhradanadīnadaiḥ |
mṛgapakṣigaṇairbhītairbrahmāṇḍavadihāvṛtaḥ || 8 ||
[Analyze grammar]

tasya hemajaṭā nāma kirātāḥ saṃsthitāstale |
pipīlakā varatarormūlakośagatā iva || 9 ||
[Analyze grammar]

kailāsapādāraṇyānyāṃ jaṭālāyāṃ sugulmakaiḥ |
vasanti yaukavatkṣudrāste tannikaṭajīvinaḥ || 10 ||
[Analyze grammar]

āsītteṣāmudārātmā rājā parapurañjayaḥ |
jayalakṣmyā bhuja iva yaḥ prajāyāśca dakṣiṇaḥ || 11 ||
[Analyze grammar]

suraghurnāma balavān suraghorāridarpahā |
mūrtaḥ parākrama iva mūrtimāniva mārutaḥ || 12 ||
[Analyze grammar]

jino vairāgyavibhavairdhanairguhyakanāyakaḥ |
śatakratugururbodhaiḥ kāvyairasuradaiśikaḥ || 13 ||
[Analyze grammar]

sa cakre rājakāryāṇi nigrahānugrahakramaiḥ |
yathāprāptānyakhinnātmā dinānīva divākaraḥ || 14 ||
[Analyze grammar]

tajjābhyāṃ sukhaduḥkhābhyāmatha tasyābhyabhūyata |
sumatirvāgurābandhaiśśliṣṭairgrīveva pakṣiṇaḥ || 15 ||
[Analyze grammar]

kimārtaṃ pīḍayāmyenaṃ tilayantramivaujasā |
sarveṣāmeva bhūtānāṃ mamevārtiḥ prajāyate || 16 ||
[Analyze grammar]

dhanamasmai prayacchāmi dhanenānandavāñjanaḥ |
bhavatyahamivāśeṣastadalaṃ me vinigrahaiḥ || 17 ||
[Analyze grammar]

atha vā nigrahaṃ prāptaṃ karomyetena vai vinā |
vartate na prajaiveyaṃ vinā vāri sarid yathā || 18 ||
[Analyze grammar]

hā kaṣṭameṣa nigrāhyo diṣṭyānugrāhya eṣa me |
diṣṭyādya sukhavānasmi kaṣṭamadyāsmi duḥkhavān || 19 ||
[Analyze grammar]

iti dolāyitaṃ ceto na viśaśrāma bhūpateḥ |
ekatrāmbumahāvarte ciraṃ tṛṇamiva bhramat || 20 ||
[Analyze grammar]

athaikadā gṛhaṃ tasya māṇḍavyo munirāyayau |
bhrāntāśeṣakakupkuñjo vāsavasyeva nāradaḥ || 21 ||
[Analyze grammar]

tamasau pūjayāmāsa papraccha ca mahāmunim |
sandehadurdrūmastambhaparaśuṃ sarvakovidam || 22 ||
[Analyze grammar]

suraghuḥ |
bhavadāgamanenāsmi mune nirvṛtimāgataḥ |
paramāṃ vasudhāpīṭhaṃ samprāpta iva mādhave || 23 ||
[Analyze grammar]

adya tiṣṭhāmyahaṃ nātha dhanyānāṃ dhuri dharmataḥ |
vikāsi raviṇevābjaṃ yattvayāsmi vilokitaḥ || 24 ||
[Analyze grammar]

bhagavan sarvadharmajña ciraṃ viśrāntavānasi |
tadimaṃ saṃśayaṃ chinddhi mamārkastimiraṃ yathā || 25 ||
[Analyze grammar]

mahatāṃ saṅgamenārtiḥ kasya nāma na naśyati |
sandehaṃ tu parāmārtimāhurārtivido janāḥ || 26 ||
[Analyze grammar]

mannigrahānugrahajā madbhṛtyavapuṣi sthitāḥ |
kaṣanti māmalaṃ cintā gajaṃ harinakhā iva || 27 ||
[Analyze grammar]

tad yathā samatodeti sūryāṃśuriva sarvagā |
matau mama mune mānya tathā karuṇayā kuru || 28 ||
[Analyze grammar]

māṇḍavyaḥ |
svāyattena svasaṃsthena svenopāyena bhūpate |
eṣā manaḥpelavatā himavatpravilīyate || 29 ||
[Analyze grammar]

svavicāraṇayaivāśu śāmyatyantarmanojvaraḥ |
śaradāgamamātreṇa mihikā mahatī yathā || 30 ||
[Analyze grammar]

svenaiva manasā svāni svaśarīragatāni ca |
vicārayendriyāṇyantaḥ kīdṛśānyatha kāni vā || 31 ||
[Analyze grammar]

ko'haṃ kathamidaṃ kiṃ vā kathaṃ maraṇajanmanī |
vicārayāntaretattvaṃ mahattāmalameṣyasi || 32 ||
[Analyze grammar]

vicāreṇa parijñātasvabhāvasya satastava |
harṣāmarṣadṛśaścetastolayiṣyanti nācalam || 33 ||
[Analyze grammar]

manaḥ svaṃ rūpamutsṛjya śamameṣyati vijvaram |
bhūtapūrvavapurbhūtvā taraṅgaḥ payasīva te || 34 ||
[Analyze grammar]

tiṣṭhadeva mano rūpaṃ parityakṣyati te'nagha |
kalaṅkavikalaṃ kāla ṛtvantaragatāviva || 35 ||
[Analyze grammar]

anukampyā bhaviṣyanti śrīmantaḥ sarva eva te |
dṛṣṭatattvasya tuṣṭasya janāḥ piturivāvanau || 36 ||
[Analyze grammar]

vivekadīpadṛṣṭātmā mervabdhinabhasāmapi |
adhaḥ kariṣyasi nṛpa mahattāmuttamārthadām || 37 ||
[Analyze grammar]

mahattāmāgataṃ cetastava saṃsāravṛttiṣu |
na nimaṅkṣyati he sādho goṣpadeṣviva vāraṇaḥ || 38 ||
[Analyze grammar]

kṛpaṇaṃ tu mano rājanpelave'pi nimajjati |
kārye goṣpadatoye'pi jīrṇāṅgo maṣako yathā || 39 ||
[Analyze grammar]

ceto vāsanayā paṅke kīṭavatparimajjati |
dṛśyamātrāvalambinyā svayā dīnatayā tayā || 40 ||
[Analyze grammar]

tāvattāvanmahābāho svayaṃ santyajyate'khilam |
yāvad yāvatparālokaḥ paramātmaiva śiṣyate || 41 ||
[Analyze grammar]

tāvatprakṣālyate dhāturyāvaddhemaiva śiṣyate |
tāvadālokyate sarvaṃ yāvadātmaiva lakṣyate || 42 ||
[Analyze grammar]

sarvaṃ sarvikayā buddhyā svayaṃ sarvatra sarvadā |
sarvathā samparityajya svātmanātmopalabhyate || 43 ||
[Analyze grammar]

yāvatsarvaṃ na santyaktaṃ tāvadātmā na labhyate |
sarvavastuparityāge śeṣa ātmeti kathyate || 44 ||
[Analyze grammar]

yāvadanyanna santyaktaṃ tāvatsāmānyameva hi |
vastu nāsādyate sādho svātmalābhe tu kā kathā || 45 ||
[Analyze grammar]

yatra sarvātmanā svātmalābhāya patati svayam |
tyaktānyakāryaḥ prāpnoti tannāma nṛpa netarat || 46 ||
[Analyze grammar]

ātmāvalokanārthaṃ tu tasmātsarvaṃ parityajet |
sarvaṃ kiñcitparityajya yacchiṣṭaṃ tatparaṃ padam || 47 ||
[Analyze grammar]

sakalakāraṇakāryaparamparāmayajagadgatavastuvijṛmbhitam |
alamapāsya manaḥ svavapustataḥ parivilūya ca yacchubhamasti tat || 48 ||
[Analyze grammar]