Chapter 55

uddālakaviśrāntirnāma sargaḥ |
pañcapañcāśaḥ sargaḥ |
rāmaḥ |
ātmajñānadinaikārka matsaṃśayatṛṇānala |
ajñānadāhaśītāṃśo sattāsāmānyamīśa kim || 1 ||
[Analyze grammar]

vasiṣṭhaḥ |
yadā saṅkṣīyate cittamabhāvātyantabhāvanāt |
citsāmānyasvarūpasya sattāsāmānyatā tadā || 2 ||
[Analyze grammar]

nūnaṃ cetyāṃśarahitā cid yadātmani līyate |
asadrūpavadatyacchaṃ sattāsāmānyatā tadā || 3 ||
[Analyze grammar]

yadā sarvāṇi dṛśyāni saṃśāntānyo'nyavedanam |
svarūpeṇa svarūpābhaṃ bhāvyante samatā tadā || 4 ||
[Analyze grammar]

kūrmāṅgānīva dṛśyāni līyante svātmanātmani |
abhāvitānyeva yadā sattāsāmānyatā tadā || 5 ||
[Analyze grammar]

dṛṣṭireṣā hi paramā sadehādehayoḥ sadā |
muktayoḥ sambhavatyeva turyātītapadopamā || 6 ||
[Analyze grammar]

vyutthitasya bhavatyeṣā samādhisthasya cānagha |
jñasya kevalamajñasya na bhavatyeva bodhajā || 7 ||
[Analyze grammar]

asyāṃ dṛśi sthitāḥ sarve jīvanmuktā mahāśayāḥ |
siddhā rasā iva bhuvi vyomavīthyāmivānilāḥ || 8 ||
[Analyze grammar]

asmatprabhṛtayaḥ sarve nāradādyāśca rāghava |
brahmaviṣṇvīśvarādyāśca dṛṣṭāvasyāṃ vyavasthitāḥ || 9 ||
[Analyze grammar]

etāmālambya padavīṃ samastabhayanāśinīm |
uddālako'sāvavasad yāvadicchaṃ jagadgṛhe || 10 ||
[Analyze grammar]

atha kālena mahatā buddhistasya babhūva ha |
videhamuktastiṣṭhāmi dehaṃ tyaktveti niścalā || 11 ||
[Analyze grammar]

evaṃ niścayavānadrerguhāyāṃ pallavāsane |
baddhapadmāsanastasthāvāmīlitavilocanaḥ || 12 ||
[Analyze grammar]

saṃyamya gudasaṃrodhāddvārāṇi nava cetasaḥ |
mātrāsparśānacinvāno bhāvitasvāṅgacidghanaḥ || 13 ||
[Analyze grammar]

saṃruddhaprāṇapavanaḥ samasaṃsthānakandharaḥ |
tālumūlatalālagnajihvāmūlollasanmukhaḥ || 14 ||
[Analyze grammar]

na bahirnāntare nādho nordhve nārthe na śūnyake |
saṃyojitamanodṛṣṭirdantairdantānasaṃspṛśan || 15 ||
[Analyze grammar]

prāṇapravāhasaṃrodhasamaḥ svacchānanacchaviḥ |
aṅgacitsaṃviduttānaromakaṇṭakitāṅgabhūḥ || 16 ||
[Analyze grammar]

aṅgacitsaṃvidabhyāsāccitsāmānyamupādade |
tadabhyāsādavāpāntarānandasyandamuttamam || 17 ||
[Analyze grammar]

tadāsvādanato līnacitsāmānyadaśākramaḥ |
viśvambharamanantātma sattāsāmānyamāyayau || 18 ||
[Analyze grammar]

tatsthaḥ samasamābhogaḥ parāṃ viśrāntimāgataḥ |
anānandasamānandamugdhamugdhamukhadyutiḥ || 19 ||
[Analyze grammar]

saṃśāntānandapulakaḥ padaṃ prāpyāpyalaṃ gataḥ |
cirakālaparikṣīṇamananādibhavabhramaḥ || 20 ||
[Analyze grammar]

babhūva sa mahāsattvo lipikarmārpitopamaḥ |
samaḥ kalāvapūrṇena śaradacchāmbarendunā || 21 ||
[Analyze grammar]

upaśaśāma śanairdivasairasau katipayaiḥ svapade vimalātmani |
tarurasaśśaradanta ivāmale ravikaraujasi janmadaśātigaḥ || 22 ||
[Analyze grammar]

gatasakalavikalpo nirvikāro'bhirāmaḥ sakalamalavilāsopādhinirmuktamūrtiḥ |
vigalitasukhamādyaṃ tatsukhaṃ prāpa yasmiṃstṛṇamiva jalarāśāv uhyate śakralakṣmīḥ || 23 ||
[Analyze grammar]

aparimitanabho'ntarvyāpidigvyāpi pūrṇaṃ bhuvanabharaṇaśīlaṃ bhūribhāgyopasevyam |
kathanaguṇamatītaṃ satyamānandamādyaṃ sukhamasukhamanantaṃ brāhmaṇo'sau babhūva || 24 ||
[Analyze grammar]

gatavati padamādyaṃ cetasi svasvabhāvaṃ dvijatanuratha māsaiḥ sopaviṣṭā ca ṣaḍbhiḥ |
ravikaraparitaptā vātajhāṅkāraramyā tanutarabahutantrī śailavīṇā babhūva || 25 ||
[Analyze grammar]

atha bahutarakālenainamadrerbhuvaṃ tāmupayayuragakanyāsaṃyutā mātaraḥ khāt |
abhimataphalasiddhyai saṃyutā eva sarvā analamiva śikhānāṃ paṅktayaḥ piṅgakeśyaḥ || 26 ||
[Analyze grammar]

dinakarakaraśuṣkaṃ viprakaṅkālakaṃ tajjhagiti ca karakoṭau baddhakhaṭvāṅgasaṅgā |
sakalavibudhavandyā khiṅkhinī devadevī niśi navaratanṛttā kācakāntiṃ cakāra || 27 ||
[Analyze grammar]

ityuddālakadehako'dya vilasanmāyūrabarhavrajavyālolābdalave nave vivalite mandāramālāgaṇaiḥ |
śete khiṅkhinikāmahābhagavatīlīlālalāme latājāle bhṛṅga ivāntapuṣpapaṭale paścādupāgacchati || 28 ||
[Analyze grammar]

eṣoddālakacittavṛttikalanāvallī vivekasphuratsvānandapravikāsabhāsikusumā hṛtkānane vistṛte |
rūḍhā yasya kadācideva vilasadramyeva sacchāyayā nāsāveti viyogameti ca phalenoccaistarāṃ saṅgamam || 29 ||
[Analyze grammar]