Chapter 54

uddālakavicāravilāso nāma sargaḥ |
catuṣpañcāśaḥ sargaḥ |
vasiṣṭhaḥ |
iti nirṇīya tatayā dhiyā dhavalayā muniḥ |
baddhapadmāsanastasthāvardhonmīlitalocanaḥ || 1 ||
[Analyze grammar]

oṅkāramakarottārasvaramūrdhvagatadhvanim |
samyagāhatalāṅgūlaṃ ghaṇṭākumbhamivāravam || 2 ||
[Analyze grammar]

omuccārayatastasya saṃvittattve tadunmukhe |
yāvadoṅkāramūrdhvasthe vitate vimalātmani || 3 ||
[Analyze grammar]

sārdhatryaṃśātmamātrasya prathame'ṃśe sphuṭārave |
praṇavasya manākkṣubdhaprāṇāraṇitadehake || 4 ||
[Analyze grammar]

recakākhyo'khilaṃ kāyaṃ prāṇaniṣkramaṇakramaḥ |
riktīcakāra pītāmburagastya iva sāgaram || 5 ||
[Analyze grammar]

atiṣṭhatprāṇapavanaścidrasāpūrite'mbare |
tyaktadehaḥ parityaktanīḍaḥ khaga ivāmbare || 6 ||
[Analyze grammar]

hṛdayāgnirjvalañjvālī dadāha malinaṃ vapuḥ |
utpātapavanocchūno dāvaśśuṣkamiva drumam || 7 ||
[Analyze grammar]

yāvadicchamavasthaiṣā praṇavaprathame krame |
babhūva na haṭhādeva haṭhayogo hi duḥkhadaḥ || 8 ||
[Analyze grammar]

athetarāṃśāvasare praṇavasya samasthitau |
nisspandakumbhako nāma prāṇānāmabhavatkramaḥ || 9 ||
[Analyze grammar]

na bahirnāntare nādho nordhve nāśāsu tatra te |
saṅkṣobhamagamanprāṇā ardhasaṃstambhitā iva || 10 ||
[Analyze grammar]

dagdhadehapuro vahniśśaśāmāśanivatkṣaṇāt |
adṛśyata sitaṃ bhasma śārīraṃ himapāṇḍuram || 11 ||
[Analyze grammar]

yatra karpūraśayyāyāṃ suptānīva sukhocitam |
śarīrāsthīni lakṣyante nisspandāni sitāni ca || 12 ||
[Analyze grammar]

tadbhasma pavanādhūtaṃ sāsthi vāyurayojayat |
svadehe bhṛśamucchūne trinetravratavāniva || 13 ||
[Analyze grammar]

taccaṇḍapavanoddhūtamāvṛtya gaganaṃ kṣaṇāt |
śaradīvābhramihikā kvāpi bhasmāsthimad yayau || 14 ||
[Analyze grammar]

yāvadicchamavasthaiṣā praṇavasyāpare krame |
babhūva na haṭhādeva haṭhayogo hi duḥkhadaḥ || 15 ||
[Analyze grammar]

tatastṛtīyāvasare praṇavasyopaśāntide |
pūraṇātpūrako nāma prāṇānāmabhavatkramaḥ || 16 ||
[Analyze grammar]

asminnavasare prāṇāścetanāmṛtamadhyagāḥ |
vyomni śītalatāmīyurhimasaṃsparśasundarīm || 17 ||
[Analyze grammar]

kramādgaganamadhyasthāścandramaṇḍalatāṃ yayuḥ |
dhūmā gaganakośasthāśśītalāmbudatāmiva || 18 ||
[Analyze grammar]

kalākalāpasampūrṇe te tasmiṃścandramaṇḍale |
puṇyarāśāvivāpūrṇe rasāyanamahārṇave || 19 ||
[Analyze grammar]

rasāyanamahādhārāḥ sampannāḥ prāṇavāyavaḥ |
maṇiyaṣṭisamākārā jaleṣvindorivāṃśavaḥ || 20 ||
[Analyze grammar]

sā papātāmbarāddhārā śeṣe śārīrabhasmani |
rāsāyanī haraśiraḥpatiteva surāpagā || 21 ||
[Analyze grammar]

udabhūdindubimbābhaṃ caturbāhuvapustayā |
prasphuranmandarādabdheḥ pārijāta iva drumaḥ || 22 ||
[Analyze grammar]

uddālakaśarīraṃ tannārāyaṇatayoditam |
praphultacūtavatkāntamābabhau dīptisundaram || 23 ||
[Analyze grammar]

rasāyanamayāḥ prāṇāstaccharīramapūrayan |
saridoghā iva saro vṛkṣaṃ madhurasā iva || 24 ||
[Analyze grammar]

antaḥ kuṇḍalinīṃ prāṇāḥ pūrayāmāsurādṛtāḥ |
vakrānuvakraprasṛtāḥ sarāṃsīva saritskhadām || 25 ||
[Analyze grammar]

prakṛtisthaṃ babhūvāsya taccharīraṃ dvijanmanaḥ |
prāvṛṭsaṃrambhavigame dhautaṃ talamivāvaneḥ || 26 ||
[Analyze grammar]

atha padmāsanagataḥ kṛtvā dehe sthitiṃ dṛḍhām |
ālāna iva mātaṅgaṃ nibadhyendriyapañcakam || 27 ||
[Analyze grammar]

nirvikalpasamādhyarthaṃ vyavasāyamupādade |
svabhāvaṃ svacchatāṃ netuṃ śaratkāla ivāmalaḥ || 28 ||
[Analyze grammar]

svasvāntavātahariṇamāśādiggaṇagāminam |
cintayā hṛdayaṃ ninye dūrād rajjveva kīlakam || 29 ||
[Analyze grammar]

dhāvamānamadho mattaṃ cittamābilamākulam |
balātsaṃrodhayāmāsa seturjalamiva drutam || 30 ||
[Analyze grammar]

nyamīmiladdṛśāvardhaṃ paripakṣmalapakṣmake |
nisspandatārāmadhupe sandhyākāla ivāmbuje || 31 ||
[Analyze grammar]

somyatāmanayanmaunī prāṇāpānajavaṃ mukhe |
śvasanaṃ śreyase deśe praśastaḥ samayo yathā || 32 ||
[Analyze grammar]

tilebhya iva tailāni pṛthakcakre prayatnataḥ |
indriyāṇīndriyārthebhyaḥ kūrmo'ṅgānīva gopayan || 33 ||
[Analyze grammar]

bāhyān sparśānaśeṣeṇa jahau dūre śanairarīn |
sahasā kuṇḍakacchanno maṇirdūraṃ tviṣo yathā || 34 ||
[Analyze grammar]

vilīnānāntarāṃścakre sparśānujjhitadarśanān |
rasānviṭapakośasthānmārgaśīrṣa iva drumaḥ || 35 ||
[Analyze grammar]

rurodha gudasaṅkocānnavadvārānilānatha |
mukhasaṃsthaganātkumbharandhrakośānivetarān || 36 ||
[Analyze grammar]

ātmaratnaprakāśāḍhyāṃ spaṣṭāṃ kusumalāñchitām |
dadhāra kandharāṃ dhīrāṃ meruśśṛṅgaśikhāmiva || 37 ||
[Analyze grammar]

dadhāra hṛdayākāśe manaḥ saṃyamamāgatam |
vindhyakhāta ivonmattaṃ gajaṃ yuktivaśīkṛtam || 38 ||
[Analyze grammar]

śarannabhovadāsādya nirmalāmatisomyatām |
jahāra paripūrṇābdhermeroścātaralāṃ śriyam || 39 ||
[Analyze grammar]

dudhāvātha vikalpaughānpratibhāsamupeyuṣaḥ |
puraḥparisphuradrūpānmaṣakāniva mārutaḥ || 40 ||
[Analyze grammar]

āgacchato yathākāmaṃ pratibhāsānpunaḥ punaḥ |
acchinanmanasā śūraḥ khaḍgeneva raṇe śarān || 41 ||
[Analyze grammar]

vikalpaughe parālūne so'paśyaddhṛdayāmbare |
tamaśchannavivekārkaṃ lolakajjalamecakam || 42 ||
[Analyze grammar]

tadapyutsārayāmāsa samyaksvāntavivasvatā |
samyagjñānoditenāśu pavaneneva kajjalam || 43 ||
[Analyze grammar]

tamasyuparate kāntaṃ tejaḥpuñjaṃ dadarśa saḥ |
śārvare timire śānte prātaḥ sāndhyamivāmbudam || 44 ||
[Analyze grammar]

taṃ lulāva sthalābjānāṃ vanaṃ bāla iva dvipaḥ |
apibaccāpyasṛkpūraṃ vetāla iva vegataḥ || 45 ||
[Analyze grammar]

tejasyuparate tasya ghūrṇamānaṃ mano muneḥ |
niśābjavadagānnidrāṃ lolaṃ kṣīvavadeva vā || 46 ||
[Analyze grammar]

meghamālāṃ iva marudbālo nīlābjinīmiva |
yāminīmiva tīkṣṇāṃśustāmapyāśu lulāva saḥ || 47 ||
[Analyze grammar]

nidrāvyupaśame tasya bhāvayāmāsa tanmanaḥ |
vyoma śyāmaladṛgjanturnabhasīva śikhaṇḍakam || 48 ||
[Analyze grammar]

payoda iva tāpiñchaṃ nīhāramiva mārutaḥ |
tamo dīpa ivācchātmā tadapyāśu mamārja saḥ || 49 ||
[Analyze grammar]

vyomasaṃvidi bhagnāyāṃ mūḍhaṃ tasyābhavanmanaḥ |
nidrāyāṃ pravilīnāyāṃ maireyamadavāniva || 50 ||
[Analyze grammar]

mohamapyeṣa manasastaṃ mamārja mahāśayaḥ |
yāminījanitaṃ jāḍyaṃ bhuvanādiva bhāskaraḥ || 51 ||
[Analyze grammar]

tatastejastamonidrāmohādiparivarjitam |
kāmapyavasthāmāsādya viśaśrāma manaḥ kṣaṇam || 52 ||
[Analyze grammar]

viśramyāśu papātāṅgasaṃvidaṃ citsvarūpiṇīm |
seturuddhaṃ sarovāri pratīpaṃ svamivāspadam || 53 ||
[Analyze grammar]

cirānusandhānavaśātsvadanācca svasaṃvidaḥ |
tataścinmayatāmāgāddhema nūpuratāmiva || 54 ||
[Analyze grammar]

cittatvamatha santyajya cittaṃ cittvaṃ tataṃ gataṃ |
anyadeva babhūvāśu paṅkaḥ kumbhasthitāviva || 55 ||
[Analyze grammar]

cetyaṃ santyajya cicchuddhā citsāmānyamathāyayau |
tyaktavīcyādibhede'bdhau vārsāmānyamivaikadhīḥ || 56 ||
[Analyze grammar]

tyaktabhūtaughamananaṃ tato viśvambharaṃ bṛhat |
cidākāśaṃ tataṃ śuddhaṃ so'bhavadbodhimāgataḥ || 57 ||
[Analyze grammar]

tatra prāpa mahānandaṃ dṛśyadarśanavarjitam |
anantamuttamāsvādaṃ rasāyanamivārṇavam || 58 ||
[Analyze grammar]

śarīrātsamatīto'sau kāmapyavanimāgataḥ |
sattāsāmānyarūpātmā babhūvānandasāgaraḥ || 59 ||
[Analyze grammar]

dvijacetanahaṃso'sāvānandasarasi sthire |
atiṣṭhaccharadacche khe kalāpūrṇa ivoḍupaḥ || 60 ||
[Analyze grammar]

babhūvāvātadīpābho lipikarmārpitopamaḥ |
vītavelāmbudhiprakhyo vṛṣṭamūkāmbudasthitiḥ || 61 ||
[Analyze grammar]

athaitasminmahāloke tiṣṭhannuddālakaściram |
apaśyadvyomagān siddhānamarāniva bhūriśaḥ || 62 ||
[Analyze grammar]

āgatāni vicitrāṇi siddhajālāni cābhitaḥ |
śakrārkapadadātṝṇi nīrandhrāṇyapsarogaṇaiḥ || 63 ||
[Analyze grammar]

tāni nādarayāṃ cakre siddhavṛndāni sa dvijaḥ |
gambhīramatirakṣubdho vilāsāniva śaiśavān || 64 ||
[Analyze grammar]

siddhasārthamanādṛtya tasmin svānandamandire |
atiṣṭhadatha ṣaṇmāsāndiktaṭe'rka ivottare || 65 ||
[Analyze grammar]

jīvanmuktapadaṃ tattad yatsa samprāptavāndvijaḥ |
tatra siddhāḥ surāḥ sādhyāḥ sthitā brahmaharādayaḥ || 66 ||
[Analyze grammar]

ānandapariṇāmitvādanānandapadaṃ gatāḥ |
nānande na nirānande tatastatsaṃvidābabhau || 67 ||
[Analyze grammar]

kṣaṇaṃ varṣasahasraṃ vā tatra labdhvā sthitiṃ manaḥ |
ratimeti na bhogaughe dṛṣṭasvarga ivāvanau || 68 ||
[Analyze grammar]

tatpadaṃ sā gatiśśāntā tacchreyaśśāśvataṃ śivam |
tatra viśrāntimāptasya na bhūyo jāyate śramaḥ || 69 ||
[Analyze grammar]

tatpadaṃ sādhavaḥ prāpya dṛśyadṛṣṭimimāṃ punaḥ |
na yānti khadirodyānaṃ labdhacaitrarathā iva || 70 ||
[Analyze grammar]

tāṃ mahānandapadavīṃ cittānyāsādya dehinām |
dṛśyaṃ na bahu manyante rājāno dīnatāmiva || 71 ||
[Analyze grammar]

cetastatpadaviśrāntaṃ buddhaṃ dṛśyadaśāṃ prati |
kadarthādbodhamāyāti na yātyevātha vānagha || 72 ||
[Analyze grammar]

uddālako'tha ṣaṇmāsāndūrotsāritasiddhabhūḥ |
uṣitvonmiṣato'mbhodakośādarko madhāviva || 73 ||
[Analyze grammar]

dadarśa samprabuddhātmā punaḥ paramatejasaḥ |
praṇāmalālasān siddhāṃścandrabimbavapurdharān || 74 ||
[Analyze grammar]

ramaṇīrgauramandārareṇvabhrāmalacāmarāḥ |
sphuratpatākāpaṭalā dyuvimānaparamparāḥ || 75 ||
[Analyze grammar]

asmadādīnmunīndarbhapavitrāṅkakarāmbujān |
vidyādharībhirvalitānvidyādharapatīnapi || 76 ||
[Analyze grammar]

te tamūcurmahātmānamuddālakamuniṃ tadā |
prasādena praṇāmānno bhagavannavalokaya || 77 ||
[Analyze grammar]

āruhyemaṃ vimānaṃ tvamehi traiviṣṭapaṃ puraṃ |
svarga eva hi sīmānto jagatsambhogasampadām || 78 ||
[Analyze grammar]

ākalpamucitānbhuṅkṣva bhogānabhimatānvibho |
svargādiphalabhogārthamevāśeṣatapaḥkriyāḥ || 79 ||
[Analyze grammar]

hāracāmaradhāriṇyo vidyādharavarāṅganāḥ |
paśyemāstvāmupāsīnāḥ kariṇyaḥ kariṇaṃ yathā || 80 ||
[Analyze grammar]

kāmo dharmārthayoḥ sāraḥ kāmasārāśśucismitāḥ |
vasanta iva mañjaryaḥ svarga eva bhavanti tāḥ || 81 ||
[Analyze grammar]

evaṃ kathayataḥ siddhānatithīnityasau muniḥ |
paripūjya yathānyāyamatiṣṭhadgatasambhramam || 82 ||
[Analyze grammar]

nābhyanandanna tatyāja tāṃ vibhūtiṃ sa dhīradhīḥ |
bhoḥ siddhā vrajatetyuktvā svavyāpāraparo'bhavat || 83 ||
[Analyze grammar]

atha svakarmanirataṃ bhogeṣvaratimāgatam |
tamupāsya yayuḥ siddhā dinaiḥ katipayaiḥ svayam || 84 ||
[Analyze grammar]

jīvanmuktaḥ sa ca munirvijahāra yathāsukham |
yāvadicchaṃ vanānteṣu munīnāmāśrameṣu ca || 85 ||
[Analyze grammar]

merumandarakailāsahimavadvindhyasānuṣu |
dvīpopavanadikkuñjajaṅgalāraṇyabhūmiṣu || 86 ||
[Analyze grammar]

tataḥ prabhṛti samprāptapada uddālako dvijaḥ |
guhāsu girikukṣīṇāṃ nyavasaddhyānalīlayā || 87 ||
[Analyze grammar]

kadācidahnā māsena kadācidvatsareṇa ca |
kadācidvatsaraughena dhyānāsakto vyabudhyata || 88 ||
[Analyze grammar]

uddālakastadārabhya vyavahāraparo'pi san |
susamāhita evāsīccittattvaikatvamāgataḥ || 89 ||
[Analyze grammar]

cittattvaikaghanābhyāsānmahācittvamupetya saḥ |
dṛśye'smiṃścitraravivannāstamāyānna codayam || 90 ||
[Analyze grammar]

samaparapadalābhaprāptisaṃśāntacetā dalitajananapāśaḥ kṣīṇasandehadolaḥ |
śaradi khamiva kāntaṃ vyātataṃ corjitaṃ ca sphuṭamamalamalekhaṃ tat vapuḥ svaṃ babhāra || 91 ||
[Analyze grammar]