Chapter 53

uddālakavicāro nāma sargaḥ |
tripañcāśaḥ sargaḥ |
uddālakaḥ |
apāraparyantavapuḥ paramāṇvaṇureva vā |
cidacetyā tadākrāntau na śaktā vāsanādayaḥ || 1 ||
[Analyze grammar]

manaśśemuṣyahaṅkārapratibimbaiśśaṭhendriyaiḥ |
vāsanotthāpitā śūnyavetālī trāsanodyatā || 2 ||
[Analyze grammar]

tatkṛtebhyo vikārebhyo bhītiṃ tānyeva bhūriśaḥ |
bhūyo'pyanubhavantvantarahaṃ hi cidalepikā || 3 ||
[Analyze grammar]

cito na janmamaraṇe sarvagāyāścitaḥ kila |
kiṃ nāma mriyate brūta māryate kena vāpi kim || 4 ||
[Analyze grammar]

cito na jīvitenārthaḥ sarvātmā saiva jīvitam |
kiṃ prāpsyati kadātmaiṣa prāṅmṛto yadi jīvati || 5 ||
[Analyze grammar]

jīvyate mriyate ceti kuvikalpakalāpinām |
kalanā manasāmeva nātmano vitatātmanaḥ || 6 ||
[Analyze grammar]

yo hyahambhāvatāṃ prāpto bhāvābhāvaiḥ sa gṛhyate |
ātmano nāstyahambhāvo bhāvābhāvāḥ kuto'sya te || 7 ||
[Analyze grammar]

ahambhāvo mudhā moho manaśca mṛgatṛṣṇikā |
jaḍaḥ padārthasambhāraḥ kasyāhambhāvabhāvanā || 8 ||
[Analyze grammar]

raktamāṃsamayo deho mano naṣṭaṃ vicāraṇāt |
jaḍāścittādayaḥ sarve kuto'hambhāvabhāvanā || 9 ||
[Analyze grammar]

ātmambharitayā nityamindriyāṇi sthitānyalam |
padārthāśca padārthatve kuto'hambhāvabhāvanā || 10 ||
[Analyze grammar]

guṇā guṇeṣu vartante prakṛtiḥ prakṛtau sthitā |
sadeva sati viśrāntaṃ kuto'hambhāvabhāvanā || 11 ||
[Analyze grammar]

sarvagaṃ sarvadehasthaṃ sarvakālamayaṃ mahat |
kevalaṃ paramābhānaṃ cidātmaiva hi saṃsthitam || 12 ||
[Analyze grammar]

evaṃ kimākṛtiḥ ko vā kimādeyaśca kiṅkṛtaḥ |
kiṃrūpaḥ kimmayaḥ ko'haṃ kiṃ gṛhṇāmi tyajāmi kim || 13 ||
[Analyze grammar]

tenāhaṃ nāma nehāsti bhāvābhāvopapattimān |
anahaṅkārarūpasya sambandhaḥ kena me katham || 14 ||
[Analyze grammar]

asatyalamahaṅkāre sambandhaḥ kena kasya kaḥ |
sambandhābhāvasaṃsiddhau vilīnā dvitvakalpanā || 15 ||
[Analyze grammar]

evaṃ brahmātmakamidaṃ yatkiñcijjagati sthitam |
brahmaivāsti tadevāsmi pariśocāmi kiṃ mudhā || 16 ||
[Analyze grammar]

ekasminneva vimale pade sarvagate sthite |
ahaṅkārakalaṅkasya kathaṃ nāmodayaḥ kutaḥ || 17 ||
[Analyze grammar]

nāstyeva hi padārthaśrīrātmaivāstīha sarvagaḥ |
padārthalakṣmyāṃ satyāṃ ca sambandho'sti na kasyacit || 18 ||
[Analyze grammar]

indriyairindriyeṣvaṅgairmano manasi valgati |
cidaluptavapuḥ kena sambaddhaṃ kasya kiṃ katham || 19 ||
[Analyze grammar]

upalāyaśśalākānāṃ sambandho na yathā mithaḥ |
tathaikatrāpi dṛṣṭānāṃ dehendriyamanaścitām || 20 ||
[Analyze grammar]

asadabhyutthite vyarthamahaṅkāramahābhrame |
mamedamidamasyeti viparyastamidaṃ jagat || 21 ||
[Analyze grammar]

atattvālokajāteyamahaṅkāracamatkṛtiḥ |
tāpena himalekheva tattvālokena līyate || 22 ||
[Analyze grammar]

ātmano vyatirekeṇa na kiñcidapi vidyate |
śabdabrahmeti tattattvametattadbhāvayāmyalam || 23 ||
[Analyze grammar]

ahaṅkārabhramasyāsya jātasyākāśavarṇavat |
apunassmaraṇaṃ manye nūnaṃ vismaraṇaṃ varam || 24 ||
[Analyze grammar]

samūlaṃ parivismṛtya cirāyāhaṅkṛtibhramam |
tiṣṭhāmyātmani satyātmā śaratkhe śaradīva kham || 25 ||
[Analyze grammar]

dadātyanarthanicayaṃ vikāsayati duṣkṛtam |
vistārayati santāpamahambhāvo'nusaṃhitaḥ || 26 ||
[Analyze grammar]

sphuratyahaṅkāraghane hṛdvyomni salilātmani |
vikasatyabhitaḥ kāyakadambe doṣamañjarī || 27 ||
[Analyze grammar]

maraṇaṃ jīvitopāntaṃ jīvitaṃ maraṇāntagam |
bhāvo'bhāvāvadhicchinnaḥ kaṣṭeyaṃ duḥkhavedanā || 28 ||
[Analyze grammar]

idaṃ labdhamidaṃ prāpsyāmītyantardāhakāriṇī |
na śāmyatyarkaratnānāṃ grīṣme'rciriva durdhiyām || 29 ||
[Analyze grammar]

nāstīdamidamastīti cintā dhāvatyahaṅkṛtim |
jaḍāśayā jaḍāmabhramālā śailāvalīmiva || 30 ||
[Analyze grammar]

ahaṅkāre parikṣīṇe śuṣkaḥ saṃsārapādapaḥ |
bhūyaḥ prayacchatyaraso na pāṣāṇavadaṅkuram || 31 ||
[Analyze grammar]

sutṛṣṇākṛṣṇabhoginyo dehadrumakṛtālayāḥ |
kvāpi yānti vicārātmanyāgate vinatāsute || 32 ||
[Analyze grammar]

asadabhyutthite viśve tajjā vayamasanmayāḥ |
asanmayaparispande tvamahaṃ ceti kaḥ kramaḥ || 33 ||
[Analyze grammar]

idaṃ jagadudetyādāvakāraṇamakāraṇāt |
yadakāraṇamucchūnaṃ tatsadityucyate katham || 34 ||
[Analyze grammar]

aparyantaṃ purā kālaṃ mṛdi kumbha ivākṛtaḥ |
deho'bhavadidānīṃ tu tathaivānte bhaviṣyati || 35 ||
[Analyze grammar]

madhye naravayomātraṃ kañcitkālaṃ tu cañcalam |
ādyantasomyate tyaktvā vāri vīcitayā yathā || 36 ||
[Analyze grammar]

asmin kṣaṇaparispande dehe viśaraṇonmukhe |
taraṅge ca nibaddhāsthā ye hatāste kudṛṣṭayaḥ || 37 ||
[Analyze grammar]

prākpurastācca sarvāṇi santi vastūni cābhitaḥ |
madhyasphuṭatva eteṣāṃ kevāsthā hatarūpiṇi || 38 ||
[Analyze grammar]

citta pūrvaṃ purastācca videhaṃ śāntamityasi |
sadasadvā khasaṃlīnaṃ madhye'smin kiṃ tavogratā || 39 ||
[Analyze grammar]

yathā svapnavikāreṣu yathā sambhramadṛṣṭiṣu |
yathā vā madalīlāsu yathā nauyānasambhrame || 40 ||
[Analyze grammar]

yathā dhātuvikāreṣu yathā vendriyaviplave |
yathātisambhramānandadoṣāveśavaśeṣu ca || 41 ||
[Analyze grammar]

dṛśyate kṣīyate caiva rūpaṃ sadasatoścalam |
tathaivedamiyaṃ tveṣā kāle nyūnātiriktatā || 42 ||
[Analyze grammar]

sā ca tvayā kṛtā nityaṃ citta duḥkhasukhodayaiḥ |
yathā viyogasaṃyogayāminyoranurāgiṇām || 43 ||
[Analyze grammar]

tvamapyevāsadābhāsaṃ mithyā sadiva lakṣyase |
mṛgatṛṣṇeva tenaitattvatkṛtaṃ satkathaṃ bhavet || 44 ||
[Analyze grammar]

yadidaṃ kiñcidābhogi tatsarvaṃ dṛśyamaṇḍalam |
avastviti vinirṇīya mano yāhyamanaḥpadam || 45 ||
[Analyze grammar]

avastvidamiti sphāre rūḍhe manasi niścaye |
hemanta iva padminyaḥ kṣīyante bhogavāsanāḥ || 46 ||
[Analyze grammar]

citā dṛṣṭātmanā nūnaṃ santyaktamananaujasā |
manasā vītarāgeṇa svayaṃ svasthena bhūyate || 47 ||
[Analyze grammar]

paramātmānale kṣiptasaṃvittyavayavaṃ svayam |
dagdhātmakamalaṃ cittaṃ śuddhatāmeti śāśvatīm || 48 ||
[Analyze grammar]

dehamanyatayā dṛṣṭvā tyaktvā viṣayavāsanām |
vināśamurarīkṛtya mano jayati vīravat || 49 ||
[Analyze grammar]

manaśśatruśśarīrasya śarīraṃ manaso ripuḥ |
ekabhāvena naśyete ādhārādheyakāryavat || 50 ||
[Analyze grammar]

rāgadveṣavatornityamanyo'nyātiviruddhayoḥ |
etayormūlakāṣeṇa vināśaḥ paramaṃ sukham || 51 ||
[Analyze grammar]

etayorekasaṃsthāne ratirityeva yā kathā |
sā vyomnyayasstriyā bhuktā dhareti kathayā samā || 52 ||
[Analyze grammar]

akṛtrimavirodhasthau yatra saṅghaṭitāv ubhau |
dhārā iva patantyeva tatrānarthaparamparāḥ || 53 ||
[Analyze grammar]

mithoviruddhasaṃsarge ratimetyadhamo hi yaḥ |
tyaktavyaḥ sa patadvārāvagnirāśāvapelave || 54 ||
[Analyze grammar]

saṅkalpena manaḥ spṛṣṭvā śarīraṃ bālayakṣavat |
pātrāyeva dhanānyasmai svaduḥkhāni prayacchati || 55 ||
[Analyze grammar]

tairduḥkhaistāpito deho mano hantumathecchati |
putro'pi hanti pitaramātatāyipadaṃ gatam || 56 ||
[Analyze grammar]

nāsti śatruḥ prakṛtyaiva na ca mitraṃ kadācana |
sukhadaṃ mitramityuktaṃ duḥkhadāśśatravaḥ smṛtāḥ || 57 ||
[Analyze grammar]

deho duḥkhānyanubhavan svamano hantumicchati |
dehaṃ manaḥ svaduḥkhānāṃ satkośaṃ kurute kṣaṇāt || 58 ||
[Analyze grammar]

evaṃ mitho duḥkhadayośśliṣṭayoḥ kaḥ sukhāgamaḥ |
etayordehamanasorjātyaivānyo'nyaviddhayoḥ || 59 ||
[Analyze grammar]

manasyeva parikṣīṇe na deho duḥkhabhājanam |
tatkṣayotkatayā nityaṃ deho'pi paridhāvati || 60 ||
[Analyze grammar]

naṣṭaṃ naṣṭamanarthāya śarīraṃ padamāpadām |
alabdhātmavivekena manasāśu vinindyate || 61 ||
[Analyze grammar]

ete manaśśarīre hi mithaḥ pīvaratāṃ gate |
jaḍarūpe hi varṣāsu payodasarasī yathā || 62 ||
[Analyze grammar]

mitho duḥkhāya sampanne ekarūpe dvidhā sthite |
vyavahārapare sārdhaṃ loke vāyvanalāviva || 63 ||
[Analyze grammar]

citte kṣayiṇi saṅkṣīṇo deha ā mūlato bhavet |
vardhamāne taruriva śataśākhaḥ pravardhate || 64 ||
[Analyze grammar]

kṣīyate manasi kṣīṇe dehaḥ prakṣīṇavāsanaḥ |
mano na kṣīyate kṣīṇe dehe tatkṣapayenmanaḥ || 65 ||
[Analyze grammar]

saṅkalpapādapaṃ tṛṣṇālataṃ chittvā manovanam |
vitatām bhuvamāsādya viharāmi yathāsukham || 66 ||
[Analyze grammar]

prakṣīyamāṇamevedaṃ mama manye manaḥ sthitam |
praśāmyadvāsanājālaṃ prāvṛḍanta ivāmbudaḥ || 67 ||
[Analyze grammar]

dhātūnāṃ sanniveśo'yaṃ dehanāmā vapurmama |
prakṣīyamāṇe manasi galannevāvatiṣṭhatu || 68 ||
[Analyze grammar]

yadarthaṃ kila bhogaśrīrvāñchyate tatkalevaram |
na me nāpi ca tasyāhaṃ ko'rthaḥ sukhalavena me || 69 ||
[Analyze grammar]

nāhaṃ deha iti tvasminyuktimākarṇaya krame |
sarvāṅgeṣvapi satsveva śavaḥ kasmānna valgati || 70 ||
[Analyze grammar]

tasmāddehādatīto'haṃ nityo'nastamitadyutiḥ |
yaḥ saṅgaṃ bhāsvatā prāpya vedmi vyomani bhāskaram || 71 ||
[Analyze grammar]

jño'haṃ me na sukhenārtho nānarthena ca duḥkhitā |
śarīramastu vā māstu sthito'smi vigatajvaraḥ || 72 ||
[Analyze grammar]

yatrātmā tatra na mano nendriyāṇi na vāsanāḥ |
pāmarāḥ paritiṣṭhanti nikaṭe na mahībhṛtaḥ || 73 ||
[Analyze grammar]

padaṃ tadanuyāto'smi kevalo'smi jayāmyaham |
nisspṛho'smi niraṃśo'smi nirīho'smi nirīpsitaḥ || 74 ||
[Analyze grammar]

nedānīṃ mama sambandho manodehendriyādibhiḥ |
pṛthakkṛtasya tailasya tilairvidalitairyathā || 75 ||
[Analyze grammar]

svasmātpadavarādasmāl līlayā calitasya me |
adha ākramataḥ kiñcitparivāro hyayaṃ śubhaḥ || 76 ||
[Analyze grammar]

svasthatorjitatā sattā hṛdyatā satyatā jñatā |
ānanditopaśamitā matā ca muditoditā || 77 ||
[Analyze grammar]

pūrṇatodāratā satyā kāntimattaikatānatā |
sarvaikatā nirbhayatā kṣīṇadvitvavikalpatā || 78 ||
[Analyze grammar]

etā nityoditāḥ svasthāḥ sundaryaḥ subhagodayāḥ |
mamaikātmarateḥ kāntā nityaṃ hṛdayavallabhāḥ || 79 ||
[Analyze grammar]

sarvathā sarvadā sarvaṃ sarvasmin sambhavatyataḥ |
sarvaṃ prati mama kṣīṇe vāñchāvāñche sukhāsukham || 80 ||
[Analyze grammar]

vigatamohatayā vimanastayā gatavikalpanacittatayā sphuṭam |
uparamāmyahamātmani śītale ghanalavaśśaradīva nabhastale || 81 ||
[Analyze grammar]