Chapter 47

gādhivṛttānte rājyabhraṃśo nāma sargaḥ |
saptacatvāriṃśaḥ sargaḥ |
vasiṣṭhaḥ |
muhūrtadvitayenātha gādherādhibharabhramāt |
praśaśāmākulībhāvo velāvattvamivāmbudheḥ || 1 ||
[Analyze grammar]

payonirmāṇasammohāttasmātsa virarāma ha |
kalpāntasamaye brahmā jagadviracanādiva || 2 ||
[Analyze grammar]

bodhamāpa śanaiśśāntaḥ svamevonnidradhīradhīḥ |
kṣīvatāyāṃ praśāntāyāṃ yathā pariṇatāsavaḥ || 3 ||
[Analyze grammar]

ayaṃ so'hamidaṃ kāryamidaṃ neti dadarśa ha |
niśāvyapagame loko yathā kṣīṇatamaḥpaṭe || 4 ||
[Analyze grammar]

smṛtasvarūpo vadanamuddadhre sa jalāntarāt |
śiśirānte prabuddhātmā sarojamiva mādhavaḥ || 5 ||
[Analyze grammar]

vanavārikakubvyomavatīṃ vasumatīmimām |
anyāmeva puraḥ paśyanparaṃ vismayamāyayau || 6 ||
[Analyze grammar]

ko'haṃ kimiva paśyāmi kimakārṣamahaṃ kila |
evaṃ vicārayaṃścitraṃ sabhrūbhaṅgamabhūtkṣaṇam || 7 ||
[Analyze grammar]

etanmuhūrtamātreṇa sambhramaṃ dṛṣṭavānaham |
iti vijñāya salilādudasthādudayārkavat || 8 ||
[Analyze grammar]

cintayāmāsa ca taṭe kva me mātā kva me priyā |
yadahaṃ mṛtimāyāto madhye mātṛmahelayoḥ || 9 ||
[Analyze grammar]

bālasya mātāpitarau naṣṭau kila mamāmateḥ |
vātanītasya pattrasya vallīvṛkṣāvivāgninā || 10 ||
[Analyze grammar]

avivāho'smi jānāmi na svarūpamapi striyaḥ |
duṣṭāyāḥ kṣobhakāriṇyā madirāyā iva dvijaḥ || 11 ||
[Analyze grammar]

tasmādetadasadbhūtamahaṃ kiṃ nāma dṛṣṭavān |
vividhārambhasaṃrambhaṃ gandharvo nagaraṃ yathā || 12 ||
[Analyze grammar]

tadāstāmetadeṣā hi bandhumadhyamṛtasthitiḥ |
māyā mohe manāgasminna satyamupalabhyate || 13 ||
[Analyze grammar]

nityamevamanantāsu bhramadṛṣṭiṣu dehinām |
ceto bhramati śārdūlo vanarājiṣvivonmadaḥ || 14 ||
[Analyze grammar]

avadhīryeti taṃ cittamohaṃ gādhirnināya saḥ |
dināni katicittasmin svaka evāśrame tadā || 15 ||
[Analyze grammar]

ekadā gādhimāgacchatkaścidannapriyo'tithiḥ |
brahmāṇamiva durvāsāḥ sa viśaśrāma saśramaḥ || 16 ||
[Analyze grammar]

paramāṃ tṛptimānītaḥ phalapuṣparasāśanaiḥ |
so'tithirgādhinā tena vasanteneva pādapaḥ || 17 ||
[Analyze grammar]

atha vanditasandhyau tau kṛtajapyāv ubhāvapi |
kramācchayanamāsādya tasthaturmṛdupallavam || 18 ||
[Analyze grammar]

tataḥ pravavṛte śāntā tayostāpasayoḥ kathā |
svavyāpārocitā puṣpaśrīrivartuḥ svamāsayoḥ || 19 ||
[Analyze grammar]

papracchāthātithiṃ gādhiḥ prasaṅgāpatitaṃ vacaḥ |
kim brahman sukṛśāṅgastvaṃ kimiti śramavānasi || 20 ||
[Analyze grammar]

atithiḥ |
mamātikārśyaśramayorbhagavañchṛṇu kāraṇam |
kathayāmi yathābhūtaṃ vayaṃ nāsatyavādinaḥ || 21 ||
[Analyze grammar]

astyasminvasudhāpīṭhe uttarāśānikuñjake |
kīro nāmātivikhyātaśśrīmāñjanapado mahān || 22 ||
[Analyze grammar]

tatrāhamavasaṃ māsaṃ pūjyamānaḥ pure janaiḥ |
anantāsvādalolātmacittavetālamohitaḥ || 23 ||
[Analyze grammar]

ekadaikena tatroktaṃ kathāprastāvataḥ kvacit |
ihābhūcchvapaco rājā varṣāṇyaṣṭau dvijeti me || 24 ||
[Analyze grammar]

tato grāmeṣu matpṛṣṭaiḥ proktaṃ sakalajantubhiḥ |
rājā babhūva śvapaco varṣāṇyaṣṭāviheti taiḥ || 25 ||
[Analyze grammar]

sa evānte parijñātaḥ praviṣṭo jvalanaṃ javāt |
tato dvijaśatānīha praviṣṭāni hutāśanam || 26 ||
[Analyze grammar]

iti teṣāṃ mukhācchrutvā tasmānnirgatya maṇḍalāt |
prayāge'karavaṃ śuddhyai prāyaścittamahaṃ dvija || 27 ||
[Analyze grammar]

kṛtvā cāndrāyaṇasyānte tṛtīyasyādya pāraṇam |
ihāhamāgatastena śrānto'smyatikṛśo'smi ca || 28 ||
[Analyze grammar]

vasiṣṭhaḥ |
iti śrutavatā tena gādhinā sa tadā dvijaḥ |
bhūyaḥ pṛṣṭo'pyetadeva kathayāmāsa nānyathā || 29 ||
[Analyze grammar]

atha vismayavān gādhistāṃ nītvā tatra śarvarīm |
jagadgehamahādīpe ravāv udayamāgate || 30 ||
[Analyze grammar]

kṛte prātastanavidhāvāpṛcchyāśvatithau gate |
idaṃ sañcintayāmāsa vismayoddhurayā dhiyā || 31 ||
[Analyze grammar]

yanmayā sambhrame dṛṣṭaṃ satyaṃ bhūtaṃ dvijena tat |
uktaṃ mameti kiṃ nāma syānmāyāśambare kramaḥ || 32 ||
[Analyze grammar]

yadbandhumadhye maraṇaṃ mayā taddṛṣṭamātmanaḥ |
sā māyaiva na sandehaśśeṣe paśyāmi satyatām || 33 ||
[Analyze grammar]

tadātmaśvapacodantaṃ draṣṭuṃ tāvadakhinnadhīḥ |
hūnamaṇḍalaparyantagrāmaṃ gacchāmi satvaram || 34 ||
[Analyze grammar]

iti sañcintayan gantuṃ maṇḍalāntaramādarāt |
uttasthau bhāskaraḥ pārśvaṃ merordraṣṭumivodyataḥ || 35 ||
[Analyze grammar]

vinirgatyāvahanmārge prāvṛḍoghajavena saḥ |
deśānullaṅghayāmāsa bahūnvātataraṅgavat || 36 ||
[Analyze grammar]

tucchadeśajanācāraṃ hūnamaṇḍalamāsadat |
karabhaḥ kaṇṭakaughārthī kārañjamiva kānanam || 37 ||
[Analyze grammar]

tatra saṃvitsthitenaiva sanniveśena vai puraḥ |
apaśyadgrāmakaṃ kañcidgandharva iva pattanam || 38 ||
[Analyze grammar]

dadarśa tasya paryante tameva śvapacālayam |
adhastribhuvanasyeva pātāle narakavrajam || 39 ||
[Analyze grammar]

citracintitavistārisanniveśamayaṃ puram |
gandharvavadasāvātmaśvapaceśasya dṛṣṭavān || 40 ||
[Analyze grammar]

tenaiva sanniveśena prāgdṛṣṭaṃ śvapacāspadam |
tasya kāmapi vairāgyapadavīmanayanmanaḥ || 41 ||
[Analyze grammar]

prāvṛḍāsāraluṭhitaṃ bhittijātayavāṅkuram |
paryastacchādanārdhāṅkaṃ kiñcidādṛṣṭakandaram || 42 ||
[Analyze grammar]

dāridryaṃ taṃ dṛḍhamiva daurbhāgyamiva kuṭṭitam |
bhraṣṭāṅgamiva daurātmyaṃ daussthityamiva khaṇḍitam || 43 ||
[Analyze grammar]

gādhidantāvadalitairgavāśvamahiṣāsthibhiḥ |
dhavalairvyāptaparyantaṃ sākṣyaṃ kartumiva sthitaiḥ || 44 ||
[Analyze grammar]

bhuktaṃ pītaṃ purā tena yeṣu karparakeṣu ca |
tairasanmātramalinaiḥ paripūrṇairivāvṛtam || 45 ||
[Analyze grammar]

tābhirevāntratantrībhiḥ saṃśuṣkābhirṛtāv ṛtau |
tṛṣṇābhiriva dīrghābhiḥ paritaḥ pariveṣṭitam || 46 ||
[Analyze grammar]

ciramālokayāmāsa sa tadātmagṛhaṃ smayāt |
prāktanaṃ śuṣkaśavatāṃ yātaṃ dehamivātmavān || 47 ||
[Analyze grammar]

atha vismayavāneṣa grāmakaṃ samupāyayau |
ullaṅghya mlecchanagaramāryadeśamivādhvagaḥ || 48 ||
[Analyze grammar]

tatrāpṛcchajjanaṃ sādho kaccitsmarati bho bhavān |
prāgvṛttamasya grāmasya paryante śvapacakramam || 49 ||
[Analyze grammar]

sarva eva hi dhīmantaściravṛttamapi sphuṭam |
karasthamiva paśyanti mayeti sujanācchrutam || 50 ||
[Analyze grammar]

atra śvapacamekāntavāsinaṃ vṛddhamunnatam |
smarasyekaṃ kila tamoduḥkhānāmiva dehakam || 51 ||
[Analyze grammar]

yadi jānāsi bhoḥ sādho tanme kathaya taṃ janam |
pānthasaṃśayavicchede mahatpuṇyaphalaṃ smṛtam || 52 ||
[Analyze grammar]

bhūyo bhūya iti grāmyāḥ pṛṣṭā gādhidvijanmanā |
analpasmayasaṃrambhā ārteneva cikitsakāḥ || 53 ||
[Analyze grammar]

grāmyāḥ |
yathā kathayasi brahmaṃstattathā na tadanyathā |
kaṭañjanāmā śvapaca ihābhūddāruṇākṛtiḥ || 54 ||
[Analyze grammar]

putrapautrasuhṛdbhṛtyabandhusvajanapeṭakam |
yasyātivistīrṇamabhūtpattravṛndaṃ taroriva || 55 ||
[Analyze grammar]

tasya vṛddhasya tatsarvaṃ kalatraṃ mṛtyurācchinat |
adreḥ puṣpaphalopetaṃ mahāvanamivānilaḥ || 56 ||
[Analyze grammar]

yastato deśamutsṛjya yayau kīrapurāntaram |
varṣāṇyaṣṭāvanudvegaṃ tatra rājā babhūva yaḥ || 57 ||
[Analyze grammar]

yastatrātha parijñāya janairdūre tiraskṛtaḥ |
yathā rāśiramedhyasya yathā grāme viṣadrumaḥ || 58 ||
[Analyze grammar]

tato jane'gniṃ praviśatyātmanā yo hutāśanam |
āryatāmāryasaṃsargādāryataḥ praviveśa ha || 59 ||
[Analyze grammar]

kiṃ tvamekaṃ prayatnena śvapacaṃ pṛcchasi prabho |
kiṃ te bandhurasau kaścidabhavatsaṃstuto'tha vā || 60 ||
[Analyze grammar]

evaṃ kathayato grāmyān gādhiḥ pṛcchanpunaḥ punaḥ |
sarveṣu tatra grāmeṣu māsamekamuvāsa saḥ || 61 ||
[Analyze grammar]

yathā tenānubhūtaṃ tacchvapacatvaṃ tathaiva taiḥ |
grāmīṇaistasya kathitaṃ sarvairevāvikhaṇḍitam || 62 ||
[Analyze grammar]

avyāhataṃ sakalahūnamukhādathaitadākarṇya samyagavalokya yathānubhūtam |
gādhiśśaśāṅkamalavaddhṛdaye virūḍhaṃ gūḍhākṛtiḥ paramavismayamājagāma || 63 ||
[Analyze grammar]