Chapter 46

gādhivṛttānte rājyalābho nāma sargaḥ |
ṣaṭcatvāriṃśaḥ sargaḥ |
vasiṣṭhaḥ |
vilāsinībhirvalito mantrimaṇḍalapūjitaḥ |
vanditaḥ sarvasāmantaiśchattracāmaramālitaḥ || 1 ||
[Analyze grammar]

siddhānuśāsanaḥ kānto jñātarājyaguṇakramaḥ |
vītaśokabhayāyāsastatra prāptamahāpadaḥ || 2 ||
[Analyze grammar]

vismṛtātmaprabhāvo'bhūdaniśaṃ stavamaṅgalaiḥ |
ānandāpūrṇayā vṛttyā bhṛśaṃ kṣīva ivāsavaiḥ || 3 ||
[Analyze grammar]

kīreṣu śvapaco rājyaṃ varṣāṇyaṣṭau cakāra ha |
āryavṛttamaśeṣeṇa tāvatkālaṃ babhāra ha || 4 ||
[Analyze grammar]

yadṛcchayaikadāthāsāvatiṣṭhattyaktabhūṣaṇaḥ |
atamastārakendvarkatejo'mbudamivāmbaram || 5 ||
[Analyze grammar]

bahvamanyata no hārakeyūravasanādyasau |
prabhutābṛṃhitaṃ ceto nāhāryamabhinandati || 6 ||
[Analyze grammar]

eka evājiraṃ bāhyaṃ tādṛgveṣaḥ sa niryayau |
mukhyāṅganānnabhobhāgādantaṃ gacchannivāṃśumān || 7 ||
[Analyze grammar]

tatrāpaśyadghanaśyāmaṃ pīnaṃ śvapacapeṭakam |
gāyanmṛdu vasantotthaṃ kokilānāmiva vrajam || 8 ||
[Analyze grammar]

dhunānaṃ jhallarītantrīṃ karapallavalīlayā |
madhurehaṃ raṇadrephāmaliśreṇīmiva drumaḥ || 9 ||
[Analyze grammar]

atha tasmātsamuttasthau jarāvān raktalocanaḥ |
kācaśṛṅgaṃ himāpūrṇamiva śvapacanāyakaḥ || 10 ||
[Analyze grammar]

jyo kaṭañjeti sahasā vadan kīramahīpateḥ |
vallyāṃ kākamivānandājjānvagre'yojayatkaram || 11 ||
[Analyze grammar]

uvācedaṃ ca kīreśaṃ he bandho bhoḥ kaṭañjaka |
kva nu sthito'si diṣṭyādya dṛṣṭo'si cirabāndhava || 12 ||
[Analyze grammar]

kvāsi viśrāntavān kālametāvantaṃ vanāntare |
bandhuvṛndaparityaktaḥ parapuṣṭa ivaikakaḥ || 13 ||
[Analyze grammar]

iha rājā bhavantaṃ vā kaccidgeyakalāvidam |
raktakaṇṭhaṃ mānayati rāgavāniva kokilam || 14 ||
[Analyze grammar]

āpūrayati vā kaccidgṛhavastrāśanārpaṇaiḥ |
madhustamālaviṭapaṃ phalapattrarasairiva || 15 ||
[Analyze grammar]

darśanena tavādyāhaṃ parāṃ nirvṛtimāgataḥ |
padmaḥ sūryodayeneva candrodaya ivodadhiḥ || 16 ||
[Analyze grammar]

ānandānāmaśeṣāṇāṃ lābhānāṃ mahatāmapi |
viśrāmāṇāmanantānāṃ sīmānto bandhudarśanam || 17 ||
[Analyze grammar]

śvapace pravadatyevaṃ rājā tāvattayā tayā |
cakāra tatkālajayā ceṣṭayaivāvadhīraṇam || 18 ||
[Analyze grammar]

tāvadvātāyanagatāḥ kāntāḥ prakṛtayastathā |
śvapaco'yamiti jñātvā mlānatāmalamāyayuḥ || 19 ||
[Analyze grammar]

padmāstuṣāravṛṣṭyeva grāmāḥ sāvagrahā iva |
dāvavanta ivādrīndrā nāgarā na virejire || 20 ||
[Analyze grammar]

nṛpo'vadhīrayāmāsa sa tāṃ svajanasaṅkathām |
vṛkṣāgragatamārjāraphekkāraṃ mṛgarāḍiva || 21 ||
[Analyze grammar]

satvaraṃ praviveśāntaḥpuramāmlānamānavam |
rājahaṃsa ivāvarṣasīdatsarasijaṃ saraḥ || 22 ||
[Analyze grammar]

sarvāvayavaviśrāntāṃ mlānatāmalamāyayau |
jānustambhāntaramahārandhrasthāgniriva drumaḥ || 23 ||
[Analyze grammar]

tatrāpaśyadasau sarvaṃ viṣaṇṇavadanaṃ janam |
jālaṃ kuṅkumapuṣpāṇāṃ bhuktamūlamivākhunā || 24 ||
[Analyze grammar]

mantriṇo nāgarā nāryastataste taṃ mahīpatim |
nāsprākṣurapi tiṣṭhantaṃ gṛha eva śavaṃ yathā || 25 ||
[Analyze grammar]

bhṛtyāścākṛtasatkāraṃ dūra eva tamatyajan |
duḥkhayuktā ghanasnehā api bālaśavaṃ yathā || 26 ||
[Analyze grammar]

anānandamukhaṃ śyāmaśarīraṃ śrīvivarjitam |
dagdhaṃ sthalamivainaṃ te bahvamanyanta nākulāḥ || 27 ||
[Analyze grammar]

dhūmāyamānadehasya paritāpadaśāvatī |
nāḍhaukatāsya janatā pārśvamagnigireriva || 28 ||
[Analyze grammar]

mandotsāhasamudbhūtāstanvyaḥ saṅghātavarjitāḥ |
etadājñāḥ paraṃ prāpurbhasmanīvāmbuvipruṣaḥ || 29 ||
[Analyze grammar]

krūrakarmakarākārātsaṅgato'śubhadāyinaḥ |
tasmādviśeṣeṇa janā rākṣasādiva dudruvuḥ || 30 ||
[Analyze grammar]

eka eva babhūvāsau janamadhyagato'pi san |
arthādiguṇanirmuktaḥ paradeśa ivādhvagaḥ || 31 ||
[Analyze grammar]

bhṛśamāraṭate'pyasmai nālāpaṃ nāgarā daduḥ |
muktājālayutāyāpi kīcakāyādhvagā iva || 32 ||
[Analyze grammar]

atha sarve vayaṃ dīrghaṃ kālaṃ śvapacadūṣitāḥ |
prāyaścittairna śuddhāḥ smaḥ praviśāmo hutāśanam || 33 ||
[Analyze grammar]

iti nirṇīya nagare nāgarā mantriṇastathā |
abhito jvalayāmāsuścitāśśatasahasraśaḥ || 34 ||
[Analyze grammar]

jvalitāsvabhitastāsu tārakāsviva khe tadā |
babhūva nagaraṃ sarvamākrandaparamānavam || 35 ||
[Analyze grammar]

karuṇārāvamukharaiḥ kalatrairbāṣpavarṣibhiḥ |
avaṣṭabdhajvalatkuṇḍapātasajjajanavrajam || 36 ||
[Analyze grammar]

agnikuṇḍapraviṣṭānāṃ mantriṇāṃ bhṛtyarodanaiḥ |
krandadrathyaṃ dhvanadgartamaraṇyamiva mārutaiḥ || 37 ||
[Analyze grammar]

citidīpitaviprendramāṃsamāṃsalagandhayā |
jātanīhāramutpātavātyayāvakarairdhutaiḥ || 38 ||
[Analyze grammar]

vātadīrghavasāgandhadhūtānītakhagombhitaiḥ |
antrairvyomagataiśchannaṃ bhāskaraṃ jaladairiva || 39 ||
[Analyze grammar]

vātoddhūtacitāvahniprajvalatpuramaṇḍalam |
uḍḍīnāgnikaṇavrātatārākrāntadigantaram || 40 ||
[Analyze grammar]

pramattataskaraṃ krandadbālakāntakumārakam |
santrastanāgarāpāstajīvitāsthamasaṃsthiti || 41 ||
[Analyze grammar]

arakṣitagṛhaṃ cauraluṇṭhitākhilasañcayam |
tyaktaputrakalatraṃ ca maraṇavyagranāgaram || 42 ||
[Analyze grammar]

tasmiṃstathā vartamāne kaṣṭe vidhiviparyaye |
aśeṣajanatānāśe kalpāntasadṛśasthitau || 43 ||
[Analyze grammar]

rājyasajjanasamparkapavitrīkṛtadhīradhīḥ |
gavalaścintayāmāsa śokavyākulacetanaḥ || 44 ||
[Analyze grammar]

madarthamatyanartho'yaṃ deśe'smin sthitimāgataḥ |
akālakalpāntasamaḥ sarvanāyakanāśanaḥ || 45 ||
[Analyze grammar]

kiṃ me duḥkhitajīvena maraṇaṃ me mahotsavaḥ |
lokanindyasya durjantorjīvitānmaraṇaṃ varam || 46 ||
[Analyze grammar]

iti niścitya gavalo jvalite jvalane puraḥ |
pataṅgavadanudvegamakarodāhutiṃ vapuḥ || 47 ||
[Analyze grammar]

tasminbalādgavalanāmni hutāśarāśau dehe patatyavayavākulatāṃ prayāte |
svāṅgāvadāhadahanasphuraṇānurodhādantarjale jhagiti bodhamavāpa gādhiḥ || 48 ||
[Analyze grammar]

vālmīkiḥ |
ityuktavatyatha munau divaso jagāma sāyantanāya vidhaye'stamino jagāma |
snātuṃ sabhā kṛtanamaskaraṇā jagāma śyāmākṣaye ravikaraiśca sahājagāma || 49 ||
[Analyze grammar]