Chapter 48

gādhivṛttānte pratyakṣāvalokanaṃ nāma sargaḥ |
aṣṭacatvāriṃśaḥ sargaḥ |
vasiṣṭhaḥ |
luṭhitaṃ śvapacāgāraṃ punarvismayavānyayau |
gādhirmano hi nāyāti tṛptimāścaryadarśane || 1 ||
[Analyze grammar]

tatrāvalokayāmāsa sthānāni sadanāni ca |
kalpakṣobhavivṛttāni jagantīvāmbujodbhavaḥ || 2 ||
[Analyze grammar]

uvāca svātmanaivedamaraṇye luṭhitālaye |
śuṣkāsthimālāvalite piśācaka iva bhraman || 3 ||
[Analyze grammar]

imāstā mṛtamātaṅgadantamālā vṛtau kṛtāḥ |
adyāpi saṃsthitāḥ kalpaṃ prati meruśikhā iva || 4 ||
[Analyze grammar]

iha tadvānarīmāṃsaṃ pakvaṃ vaṃśāṅkuraiḥ saha |
bhuktaṃ surāsavonmattaiḥ saha śvapacabandhubhiḥ || 5 ||
[Analyze grammar]

āliṅgya śvapacīṃ śyāmāmiha kesaricarmaṇi |
suptamāpīya maireyaṃ tiktaṃ gajamadairnavaiḥ || 6 ||
[Analyze grammar]

kauleyakakuṭumbinyaḥ piṇyākaparivardhitāḥ |
iha baddhā varatrābhirmṛtebharadakāṣṭhake || 7 ||
[Analyze grammar]

iha vāraṇamuktānāṃ tadāsītpiṭhiratrayam |
pinaddhaṃ māhiṣeṇogracarmaṇāmbudaśobhinā || 8 ||
[Analyze grammar]

sthalīṣvetāsu tāsvatra saha śvapacabālakaiḥ |
ciraṃ vilulitaṃ cūtapattrapuñje pikairiva || 9 ||
[Analyze grammar]

rūḍhatadbālaniśśvāsaraṇadvaṃśānuvṛttimat |
gītaṃ pītaṃ śunīraktasādhitāsavatoṣitaiḥ || 10 ||
[Analyze grammar]

atra sārdhaṃ kuṭumbena janyatreṣu kuṭumbinā |
nṛttaṃ tatkṛtamunnādaṃ kallolairjaladhāviva || 11 ||
[Analyze grammar]

atroḍḍayanalolānāṃ kākabhāsapatatriṇām |
dhṛtānāmanyaghātārthaṃ grathitaṃ vaṃśapañjaram || 12 ||
[Analyze grammar]

evamprāyāḥ smaran gādhiḥ prāktanīśśvapacakriyāḥ |
vismayotkampitaśirā dhātuśceṣṭāḥ parāmṛśan || 13 ||
[Analyze grammar]

cacāla tasmāddīrgheṇa deśātkālena kāryavit |
hūnamaṇḍalamutsṛjya prāpa deśāntaraṃ kramāt || 14 ||
[Analyze grammar]

samullaṅghya nadīśailamaṇḍalāraṇyasantatim |
āsasāda tuṣārādrilagnaṃ kīrajanāspadam || 15 ||
[Analyze grammar]

tatra prāpa mahīpālanagaraṃ nagasannibham |
jagadbhramaṇakhinnātmā svarlokamiva nāradaḥ || 16 ||
[Analyze grammar]

athātmanānubhūtāni dṛṣṭānyāsevitāni ca |
sthānāni nagare paśyanpapraccha janamādṛtaḥ || 17 ||
[Analyze grammar]

sādho smarasi kaccittvamiha śvapacamīśvaram |
yadi jānāsi tattanme kathayāśu yathāvidhi || 18 ||
[Analyze grammar]

nāgaraḥ |
abhūdihāṣṭau varṣāṇi śvapaco bhūmipo dvija |
rājatvamarpitaṃ yasya navamaṅgalahastinā || 19 ||
[Analyze grammar]

ante sa samparijñātaḥ sampraviṣṭo hutāśanam |
atra dvādaśavarṣāṇi samatītāni tāpasa || 20 ||
[Analyze grammar]

yaṃ yaṃ pṛcchatyasau gādhirjanaṃ jātakutūhalaḥ |
tasya tasya mukhādevaṃ śṛṇotyanubhavatyapi || 21 ||
[Analyze grammar]

athāpaśyatpure tasminnṛpaṃ sabalavāhanam |
devaṃ cakradharaṃ draṣṭuṃ mandirānnirgataṃ bahiḥ || 22 ||
[Analyze grammar]

taṃ dṛṣṭvā sthagitākāśaṃ balareṇupayodharaiḥ |
prāktanīṃ rājatāṃ smṛtvā svāmuvācātivismitaḥ || 23 ||
[Analyze grammar]

imāstāḥ kīrakāminyaḥ padmagarbhopamatvacaḥ |
kanakadravavarṇinyo lolanīlotpalekṣaṇāḥ || 24 ||
[Analyze grammar]

cāmaraughā ime candrakarasampiṇḍapāṇḍurāḥ |
sthiranirjharasaṅkāśāḥ kāśapuṣpacayā iva || 25 ||
[Analyze grammar]

kāntābhiravadhūyante vālavyajanarāśayaḥ |
imāstā navavallībhiḥ kusumānāmivarddhayaḥ || 26 ||
[Analyze grammar]

imāstā mattamātaṅgaghaṭā ghaṭitamandirāḥ |
sakalpapādapā meroriva śrṅgaparamparāḥ || 27 ||
[Analyze grammar]

ete te yamaśarvendrakuberapratimaujasaḥ |
sāmantā vāsavasyeva lokapālā mahībhṛtaḥ || 28 ||
[Analyze grammar]

imāstāḥ sarvaratnāḍhyāḥ sarvābhimatadāstatāḥ |
kalpavṛkṣalatākuñjasundaryo gṛhapaṅktayaḥ || 29 ||
[Analyze grammar]

idaṃ tatkīrajanatārājyaṃ prāgbhuktamadya me |
ātmajanmāntarācāra iva pratyakṣatāṃ gatam || 30 ||
[Analyze grammar]

satyasvapna ivedaṃ me jāgrato'pi puraḥ sthitam |
na jāne kiṃ kṛtotthānā māyeyaṃ pravijṛmbhate || 31 ||
[Analyze grammar]

aho nu khalu dīrgheṇa manomohena jṛmbhatā |
vaivaśyamupanīto'haṃ jāleneva śakuntakaḥ || 32 ||
[Analyze grammar]

hā dhikkaṣṭamabuddhaṃ me mano vāsanayā hatam |
paśyato bhramajālāni vitanoti śiśoriva || 33 ||
[Analyze grammar]

eṣā hi māyā mahatī tena me cakrapāṇinā |
darśitetyadhunā sādhu mayā smṛtamakhaṇḍitam || 34 ||
[Analyze grammar]

tadidānīṃ tathā yatnaṃ kariṣye girikandare |
yathātisambhramasyāsya jāne marma yathāsthitam || 35 ||
[Analyze grammar]

iti sañcintya nagarādgādhistaptuṃ jagāma ha |
kandaraṃ prāpya śailasya tasthau suśrāntasiṃhavat || 36 ||
[Analyze grammar]

tatra saṃvatsaraṃ sārdhaṃ payaśculakabhojanaḥ |
tapaścakre mahātejāstuṣṭaye śārṅgadhanvanaḥ || 37 ||
[Analyze grammar]

athāsya puṇḍarīkākṣaḥ payomūrtirupāyayau |
prasādamutpalaśyāmaśśaradīva mahāhradaḥ || 38 ||
[Analyze grammar]

tamājagāma śailendrakandaraṃ dvijamandiram |
payodharavadātmācchacchavirvyomanyathāvasat || 39 ||
[Analyze grammar]

bhagavān |
gādhe kaccittvayā dṛṣṭā māyā mama garīyasī |
dṛṣṭaṃ tvayā jagajjālaceṣṭitaṃ veṣṭitātmakam || 40 ||
[Analyze grammar]

cittābhimata etasminprāpte samyaganindita |
tapo giritaṭe kurvan kimanyadabhivāñchasi || 41 ||
[Analyze grammar]

vasiṣṭhaḥ |
evaṃ vadantamālokya hariṃ gādhirdvijottamaḥ |
arcākusumapūreṇa pādayoḥ paryapūjayat || 42 ||
[Analyze grammar]

dattārghaṃ kīrṇakusumaṃ praṇamyāśu pradakṣiṇaiḥ |
viṣṇumāha dvijo vākyamambhodamiva cātakaḥ || 43 ||
[Analyze grammar]

gādhiḥ |
deva yaiṣā tvayā māyā darśitātitamomayī |
mahīṃ prātarivādityastāṃ me prakaṭatāṃ naya || 44 ||
[Analyze grammar]

bhramaṃ yatpaśyati mano vāsanāmalamālitam |
svapnavatsa kathaṃ deva jāgratyapi hi dṛśyate || 45 ||
[Analyze grammar]

muhūrtamupalabdhātmā jalāntaḥ svapnavibhramaḥ |
kathaṃ pratyakṣatāṃ prāpto mamāmalapadāspada || 46 ||
[Analyze grammar]

dairghyādairghye ca kālasya śarīrasya bhavābhavau |
kathamatra sthitāni syurmadīyaśvapacabhrame || 47 ||
[Analyze grammar]

bhagavān |
gādhe svādhividhūtasya rūpamasyaitadātmajam |
cetaso'dṛṣṭatattvasya yatpaśyatyuruvibhramam || 48 ||
[Analyze grammar]

bahirna kiñcidapyasti khādridyūrvīdigādikam |
etatsvacitta evāsti pattrapuñja ivāṅkure || 49 ||
[Analyze grammar]

phalādi sphāratāmeti yathaiva bahiraṅkurāt |
bahiḥ prakaṭatāṃ yāti tathā pṛthvyādi cetasaḥ || 50 ||
[Analyze grammar]

satyaṃ pṛthvyādi cittasthaṃ na bahissthaṃ kadācana |
aṅkurasthaṃ phalaṃ vastu tasmād yasmātphalaśriyaḥ || 51 ||
[Analyze grammar]

rūpālokamanaskārān sattākālakriyākramān |
kumbhakāro ghaṭamiva ceto hanti karoti ca || 52 ||
[Analyze grammar]

ābālametatpuruṣaiḥ sarvairevānubhūyate |
svapnabhramavadāvegarāgarogādidṛṣṭiṣu || 53 ||
[Analyze grammar]

citte vṛttāntalakṣāṇi saṃsthitānyāttavāsane |
pādape phalapuṣpāṇi mūlākrāntāvanāviva || 54 ||
[Analyze grammar]

tyaktāvanerviṭapino bhūyaḥ pattrāṇi no yathā |
nirvāsanasya jīvasya punarjanmādi no tathā || 55 ||
[Analyze grammar]

yatrānantaṃ jagajjālaṃ saṃsthitaṃ tena cetasā |
śvapacatvaṃ prakaṭitaṃ yadi tadvismayo'tra kim || 56 ||
[Analyze grammar]

avabuddhā śvapacatā pratibhāsavaśāttvayā |
yathaivānalpasaṃrambhā vicitrāpi vikāradā || 57 ||
[Analyze grammar]

tathaivātithirāyāto bhuktavān suptavāndvijaḥ |
kathāṃ kathitavāṃśceti dṛṣṭavānasi vibhramam || 58 ||
[Analyze grammar]

tathaivotthāya gacchāmi prāpto'haṃ hūnamaṇḍalam |
ime hūnā ime grāmā dṛṣṭavānityasi bhramam || 59 ||
[Analyze grammar]

tathaivedaṃ kaṭañjasya prāktanaṃ luṭhitaṃ gṛham |
janairuktaḥ kaṭañjaśca dṛṣṭavānityasi bhramam || 60 ||
[Analyze grammar]

tathaiva kīranagaraṃ prāpto'smi kathitaṃ ca me |
kīraiśśvapacarājatvaṃ dṛṣṭavānityasi bhramam || 61 ||
[Analyze grammar]

evaṃ sarvaṃ tvayā dṛṣṭaṃ mohajālaṃ dvijottama |
yatsatyamiti jānāsi yaccāsatyamavaiṣi ca || 62 ||
[Analyze grammar]

vāsanāvalitaṃ cetaḥ kiṃ nāma na na paśyati |
sādhitaṃ dṛśyate svapne varṣasādhyaṃ prayojanam || 63 ||
[Analyze grammar]

nātithirna ca hūnāste na kīrāste na tatpuram |
sarvameva mahābuddhe vyāmohāddṛṣṭavānasi || 64 ||
[Analyze grammar]

gacchatā bhavatā hūnadeśaṃ pānthena kandare |
kasmiṃścidvipra viśrāntaṃ kuraṅgeṇeva kānane || 65 ||
[Analyze grammar]

tathaiva śramamūḍhatvādidaṃ taddhūnamaṇḍalam |
idaṃ tacchvapacāgāramiti dṛṣṭaṃ na satyataḥ || 66 ||
[Analyze grammar]

tathaiva kīranagaraṃ dṛṣṭavānasi tattathā |
tathaiva nānyathā vāpi māyārthī hi bhavāndvija || 67 ||
[Analyze grammar]

sarvadaiva samagrāsu viharannasi dṛṣṭavān |
dikṣu pronmattaka iva vibhramaṃ manasā mune || 68 ||
[Analyze grammar]

taduttiṣṭha nijaṃ karma kurvaṃstiṣṭhopaśāntadhīḥ |
na svakarma vinā śreyaḥ prāpnuvantīha mānavāḥ || 69 ||
[Analyze grammar]

vasiṣṭhaḥ |
iti nigaditavān sa padmanābho vanagatatāpasavṛndapūjyamānaḥ |
vibudhamunigaṇaiḥ pavitrahastairvṛta udadhiṃ nijamāspadaṃ jagāma || 70 ||
[Analyze grammar]